Génesis 33

Nu tsicoo̱ mañi tahan ra Jacob tsihin ra Esaú

Nda sava ca quita̱ ra Jacob, tan nyehe̱ ra vatsí ra Esaú tsihin cumi cientu rayɨɨ. Tacan tan natsatsa̱ ra tsi ra nyihi sehe ra, tsi ña Lea, tsi ña Raquel, ña Bilha tan ña Zilpa sɨhɨ ra naha ra. 2 Tan nda nuu jayaha̱ ra tsi ñi cuví musu tsihin sehe ñi, tsinu uvi tyaa̱ ra tsi ña Lea tsihin sehe ña, tan nu ndɨhɨ tyaa̱ ra tsi ña Raquel tsihin ra José luhlu sehe ña. 3 Tan maa ra yaha̱ ityi nuu, tsa tsa cua cuyatyin ra nu vatsí ra yañi ra tsicuɨñɨ̱ tsɨtɨ ra tan tsaqui̱n ra nuu ra nda cuanda nu ñuhu, utsa tsaha. 4 Maa tyin tsinú xaan ra Esaú tsi jataha̱n ra tsi ra Jacob nu vatsí ra, tyaa̱ yuhu ra tsi ra tan tsinumi̱ nyaa tahan ra naha tan nduvi ra naha tsacu̱. 5 Yaha can tan nanyehe̱ ra tsi ñi ñaha can tsihin tsa nyihi nyacú tsihin ñi tan catyí ra:

--Tan ra nyihi vatsí tsihin un ihya naha ra ¿Yóo ra cuví ra naha?

--Sehe yu cuví tsi ra naha, maa Nyoo tsaha̱ tsi ra naha tsi yu ―catyí ra tsihin ra Esaú.

6 Iyaha ñi natuhva̱ ña Bilha tan ña Zilpa tsihin sehe ñi nu nyaá ra, tan tsaqui̱n ñi nuu ñi nda nu ñuhu. 7 Yaha can, natuhva̱ ndɨhɨ ña Lea tsihin sehe ña tan tsaqui̱n ndɨhɨ ñi nuu ñi nda nu ñuhu. Nda nu jandɨhɨ ña tsi, natuhva̱ ña Raquel tsihin ra José luhlu sehe ña, tan tsaqui̱n ndɨhɨ ñi nuu ñi nda nu ñuhu.

8 ―Tan ¿náa tsicá iñi un javaha un tsihin tandɨhɨ quɨtɨ cuaha taha̱n yu can? ―catyí ra Esaú.

Tan catyí ra Jacob:

--Tsa vatsí, tsii maa un cuví can, yañi, tyin cuñí yu ñihi yu tumañi iñi nuu un --catyí ra.

9 --Ña cuví naquihin yu yacan yañi, tsa iyó maa jana yuhu, na ndoo maa can tsi un ―catyí ra Esaú.

10 --Ña vaha yañi, tatun ñihi̱ yu tumañi iñi nuu un, ja̱ha tumañi iñi, na̱quihin tsa tsahá maa yu tsi un, tyin vaha xaan naquihi̱n cuenda un tsi yu, tumaa tun Nyoo nyehé yu cuñí yu nyehé yu tsi un. 11 Ja̱ha tumañi iñi na̱quihin can, tsa tsa tsaha̱ yu tsi un cuví can, tandɨhɨ maa tsa nyehé un ihya tsii maa yu cuví can maa Nyoo tsaha̱ can tsi yu, tan nduve náa cumañi tsi yu ―catyí ra.

Nda cuanda tsa naquihi̱n maa ra Esaú can jaha̱ ra. 12 Tan catyí ra Esaú tsihin ra:

--Co̱hon ndo, jin, cuhun maa yu ityi nuu tan quitsi nyicun ndo tsi yu ―catyí ra.

13 --Yañi, tsitó maa un tyin ndi nyihi ra nyihi sehe yu ña cuví caca ñihi yu tsihin ra naha, tan vatsí mbee iyó sehe tan indɨquɨ iyó sehe tsihin yu, tatun ñihi xaan cuhun yu tsihin tɨ naha tɨ ña cua cunyee tɨ tsaa tɨ, tan coto iin quɨvɨ ñi cúu tandɨhɨ tɨ naha tɨ. 14 Co̱hon nyooho tsa ñihi, vatsi cuee maa yu tsihin ra nyihi ihya naha ra, vatsi maa ndi cuhva tsicá quɨtɨ iyó sehe ihya naha tɨ, tan cua ñihi tahan yo nda Seir ―catyí ra tsihin ra Esaú.

15 --Vaha maa, jin. Maa tyin cu̱hva ndatu nacoo yu taahan ra vatsi tsihin yu ihya naha ra tsihin un ―catyí ra Esaú.

―Vaha maa tacan ñi, ña caca iñi un --catyí ra tsihin ra.

16 Juvin ñi maa quɨvɨ can cuanuhu̱ ra Esaú nda Seir. 17 Maa tyin ra Jacob, yañi ra, cuahan ndɨhɨ ra tan tsaa̱ ra iin nu tsaa̱ ra, tan ican nacutsi̱ ra vehe ra tan javaha̱ ra tyahva nu cuyucu quɨtɨ jana ra. Tan yacan cuenda jacunañi̱ ra Sucot ican. (Sucot cuñí tsi catyí "tyahva").

18 Yaha can tan tsaa̱ ra nda Siquem, ñuu canyií nda Canaán, tsaa̱ vaha ra, nduve náa tahan ra, tyin maa Nyoo jacuendá tsi ra nda quɨvɨ quita̱ ra nda Padan-aram. 19 Tan ñuhu nu nacutsi̱ ra vehe ra (vehe ñɨɨ quɨtɨ), jata̱ ra can, tan yañi ra Siquem, sehe ra Hamor, xico̱ ra naha ñuhu can tsi ra, tan cientu xuhun yɨhɨ́ yahvi ñuhu can. 20 Yaha can tan javaha̱ ra iin ata tan jacunañi̱ ra ican: El-Elohé-Israel*f7.