Nu nañihi̱ tahan ra Jacob tsihin ra Esaú
32
Tsa yaha̱ cuanuhu̱ ra Labán, quihi̱n ndɨhɨ ra Jacob ityi cuahan ra tsihin nyɨvɨ ra. Tan ityi nu cuahan ra quita̱ ángel Nyoo nuu ra. 2 Tan tsa nyehe̱ ra tsi ángel can naha ra, catyí ra: "Jandaru Nyoo cuví ra ihya naha ra", catyí ra. Yacan cuenda jacunañi̱ ra can Mahanaim.3 Jacuhu̱n ra Jacob taahan ra cuví tyiñu nuu ra nda ñuu Seir cuenda Edom nu iyó ra Esaú, yañi ra. 4 Tava̱ tyiñu ra Jacob tsi ra naha tan catyí ra: "Tyehen catyi ndo tsihin ra Esaú, yañi yu: 'Tava̱ tyiñu ra Jacob yañi un tsi ndi, tan vatsí jacoto ndi tsi un jaha̱ ra tyin tandɨhɨ maa tyembu tsa ña nyehe̱ tahan ndo, yuvehe ra Labán ixto ndo tsicoo̱ ra. 5 Cuca xaan ra, iyó indɨquɨ, urru, mbee ticatyi tan mbee axin jana ra, tan iyó musu rayɨɨ tan musu ñaha tsi ra, tan jaquitsi̱ ra tsi ndi tyin cuñí ra coto ra tun ñihi ra tumañi iñi nuu unꞌ", catyí ra tsihin ra naha tan cuahan ra naha.
6 Tsaa̱ nuhu ra naha tan catyí ra naha tsihin ra:
--Tsa cundaa̱ tyiñu tsa tava̱ un tsi ndi, ra yañi un vatsí ra vatsí jatahan ra tsi yo, tan vatsí cumi cientu rayɨɨ tsihin ra ―catyí ra naha tsihin ra.
7 Quitsaha̱ yuuhví ra tan ndoo̱ ra tsa tsicá iñi ra. Tan natahvi̱ sava ra nyɨvɨ cuaha cuahan tsihin ra tan tacan tucu ñi mbee, indɨquɨ tan camello. 8 Tyin tsicá iñi ra: "Sava nyɨvɨ cuhun ityi nuu tan sava ñi cuhun ityi tsata, tun cúu nyɨvɨ cuahan ityi nuu cua cacu ñi vatsí ityi tsata", cuñí ra tsicá iñi ra. 9 Tan quitsahá tsicán tahvi ra tsi Nyoo tan catyí ra: "Nyoo jutu yu, maa un tava̱ tyiñu tsi yu tsa cunuhu yu ñuu yu tan catyí un tyin cua tsaa vaha yu, tsinu̱ iñi yu tsa caha̱n un tyin yooho cuví Nyoo ra Abraham tsii yu, tan ra Isaac jutu yu, 10 nundɨɨ maa yu yaha̱ yu yutya Jordán ihya quɨvɨ can, yutun tatun ñi yu ndahá yu tan vityin nasoco̱ xaan un tsi yu vasu ndi maa nduve yahvi nyaa yu, maa tyin cuaha xaan nyɨvɨ tsaha̱ un tsi yu nda cuanda cuví natahvi̱ sava yu tsi ñi. 11 Vityin tsicán yu tsi un tsa jacacu un tsi ndi ndaha ra Esau yañi yu, na ña jañicueehe ra tsi ndi, tyin yuuhví yu coto cahñi ra tsi yu tsihin ñi cuví ñasɨɨhɨ yu tsihin sehe ndi. 12 Catyi̱ un tsihin yu tyin cua tsaa vaha yu ñuu yu tan catyí tucu un tyin cuaha nyɨvɨ tata yu cua coo, tumaa tsa cuaha nyɨtɨ yuhu ndutya ñuhu tan ña cuví nacahvi yo itsi tacan ña cuví nacahvi tsi nyɨvɨ tata yu cua coo, catyí un", catyí ra tsihin Nyoo.
13 Tan ndoo̱ ra quixi̱ ra tsacuaa can. Jasɨɨ̱n ra mbee, camello, indɨquɨ tan urru cua cuhva maa ra tsi ra Esaú, yañi ra. 14 Jasɨɨ̱n ra uvi cientu mbee sɨɨhɨ quɨtɨ iyó ndɨquɨ, tan oco taahan quɨtɨ yɨɨ, tan juvin ñi tacan jasɨɨ̱n ra mbee ticatyi, uvi cientu mbee sɨɨhɨ tan oco mbee yɨɨ. 15 Oco utsi camello ndaca sehe ñi, uvi xico indɨquɨ sɨɨhɨ tan utsi quɨtɨ yɨɨ, oco urru sɨɨhɨ tan utsi quɨtɨ yɨɨ jasɨɨ̱n ra. 16 Yaha can tan nacuhva̱ ra intuhun nuu tɨ naha tɨ cuhva cuú tɨ naha tɨ tsi tsa intuhun intuhun musu ra, tan catyí ra tsihin ra naha:
--Ya̱ha ndo nda nuu tsihin tɨ naha tɨ, iin cuhun maa mbee tan iin cuhun maa indɨquɨ, camello tan urru, tan tsica tsica ñi cuhun ndo tsihin tɨ naha tɨ ―catyí ra.
17 Tan catyí ra tsihin ra tsa jacuhu̱n jihna ra:
--Tun tahan un tsi ra yañi yu, tan tsicá tuhun ra tsi un tyehen: ꞌ¿maa cuahan un? ¿yóo tsii cuví quɨtɨ ihya naha tɨ? ¿a iyó tsitoho un?ꞌ 18 Ca̱tyi un tsihin ra cuhva cua cahan yu ihya: ꞌTata, ja̱ha tumañi iñi na̱quihin cuenda tandɨhɨ quɨtɨ tsa jaquitsí yuhu ra ndaahvi ihya tsi un, tan nda tsata cuii vatsí maa yu, catyí ra Jacob, yañi unꞌ, ca̱tyi un tsihin ra ―catyí ra tsihin ra.
19 Tan juvin ñi tacan tsaha̱ cuenda ra tsi ra cuahan tsinu uvi, ra cuahan tsinu uñi tan nandɨhɨ ca maa ra tsa cuahan ityi nuu ra.
20 ―Ca̱han ndɨhɨ ndo tyin nda tsata cuii vatsí yu, catyi ndo tsihin ra --catyí ra tsihin ra naha.
Tacan javaha̱ ra tyin tsicá iñi ra: "Tsihin tsa cua cuhva maa yo tsi ra Esaú tsihin yacan cuvi janduvita yo iñi ra, tan tsa cua ñihi tahan yo tsihin ra ña xaan ca cua cuñi ra nyehe ra tsi yo tan cua naquihin cuenda vaha ra tsi yo", cuñí ra tsicá iñi ra. 21 Jihna ca tsa cua cuhva maa ra tsi yañi ra jacuhu̱n ra ityi nuu, tan ndoo̱ ra quixi̱ ra nu tsicuɨñɨ̱ ra can.
Nu tɨɨ̱n tahan ra Jacob tsihin ángel Nyoo nu cuví Peniel
22 Tan juvin ñi maa tsacuaa can nduvita̱ ra Jacob, quihi̱n ra tsi ña Raquel, ña Lea, ña Bilha, ña Zilpa, tan tsihin nandɨhɨ tsa utsi iin sehe ra, yaha̱ ra yutya nañí Jaboc, iin nu yaxin ndutya tsihin ñi. 23 Jayaha̱ ra tsi ñi tsihin tandɨhɨ maa tsa tsii ra yutya can. 24 Tacan tan ndoo̱ maa intuhun ña ra inga tsiyo yutya can, tan ican quita̱ iin rayɨɨ, tan cañi̱ tahan ra tsihin rayɨɨ can nda cuanda cunditsin. 25 Tan nyehé rayɨɨ can tyin ña cunyeé ra tsi ra Jacob, tan tsitsi tsa cañí tahan ra naha, cañi̱ ra nu yɨhɨ́ tahan sɨhɨn ra Jacob tan quehñi̱ tahan sɨhɨn ra. 26 Tan catyí ra tsihin ra Jacob:
--Ja̱ña tsi yu tyin tsa cuñí cunditsin.
Tan nacaha̱n ra Jacob:
--Tun nasoco un tsi yu, cua jaña yu tsi un ―catyí ra.
27 Tan tsica̱ tuhun ra tsi ra:
―¿Nácaa nañí un?
--Jacob, nañí yu --catyí ra tsihin ra.
28 Tacan tan catyí ra tsihin ra Jacob:
--Ñavin ca Jacob cua cunañi un vityin, tyin cañi̱ tahan un tsihin Nyoo, tan tsihin nyɨvɨ tan jacanaa̱ un, yacan cuenda Israel cua cunañi un vityin ―catyí rayɨɨ can tsihin ra.
29 Tsica̱ tuhun ra Jacob tsi ra:
--¿Náa nañí un?
Tan catyí ra can:
--¿Náa cuenda tsicá tuhun un sɨvɨ yu? --catyí ra tsihin ra.
Juvin ñi maa can nasoco̱ rayɨɨ can tsi ra.
30 Tan Peniel jacunañi̱ ra Jacob ican, tyin ican nyehe̱ ra nuu Nyoo tan ña tsihi̱ ra, catyí ra.