Nu tsaa̱ ra Jacob ñuu Harán
29
Tsa yaha caha̱n ra tuhun tsicá iñi ra, nacaca̱ ra cuahan ra ityi ñuu canyií ityi caná ñicanyii.2 Tan tsaa̱ ra iin nu tsaa̱ ra, nyehe̱ ra uñi cuhva yucú mbee cuaha quitatú tɨ naha tɨ yuhu soco nu tsihí tɨ naha tɨ ndutya, tan ndasɨ́ iin yuu cahnu yuhu soco can. 3 Tacan cuvi̱ tyin, nda tsa ndu iin tandɨhɨ maa mbee cuaha can naha tɨ coho tɨ ndutya, tsaha cua jatsiyo ra naha yuu can tsaha coho tɨ naha tɨ ndutya, ndɨhɨ coho tɨ naha tɨ ndutya, tyasɨ́ nyico ra naha yuu can nuu soco can. 4 Tan nyehe̱ ra Jacob yucú ra jacuendá mbee can naha tɨ, tan tsica̱ tuhun ra tsi ra naha:
--¿Náa nañí ñuu ndo, ñi?
--Harán, nañí ñuu ndi--catyí ra naha.
5 ―¿Vasɨquɨ nacotó ndo tsi ra Labán, sehe yañi ra Nacor?
--Nacotó ndi tsi ra --catyí ra naha.
6 ―¿An iyó vaha ra?
―Iyó vaha maa ra nduve náa tundoho tsi ra. Ji̱hna, ican vatsí ña Raquel, sehe ra, tsihin mbee jana ra ―catyí ra naha tsihin ra.
7 Tacan tan nacaha̱n ra tsihin ra naha:
--Ja̱coho ndo ndutya mbee jana ndo tan cua̱ahan nyico ndo cua jacatsi ndo tsi tɨ naha tɨ, ndi yatyi xaan, ña tan tahan tsi cuhva cua tyihi vaha ndo mbee jana ndo.
8 Tan nacaha̱n ra naha tsihin ra:
--Ña cuví, xin, tyin cuñí tsi ndu iin tandɨhɨ maa mbee naha tɨ tan cuví jatsiyo ndi yuu ndasɨ́ yuhu soco ihya tan cuvi coho tɨ naha tɨ ndutya --catyí ra naha tsihin ra.
9 Ndi natuhún ra tsihin ra naha, tan tsaa̱ ña Raquel tsihin mbee jana jutu ña, tyin juvin ña jacuendá tsi tɨ naha tɨ. 10 Cuhva tsa nyehe̱ ra tsi ña tsihin mbee jana ra Labán, jutu ña, jatsiyo̱ ra yuu ndasɨ́ yuhu soco can tan tsaha̱ ra ndutya tsihi̱ mbee can naha tɨ. 11 Yaha can tsaha tsinumi̱ nyaa ra tsi ña tan quitsaha̱ tsacú ra. 12 Tan caahán ra tsihin ña tyin sehe ña Rebeca, tyixi ña, cuví ra, tacan tan tsinú xaan ña can cua jacoto ña tsi ra Labán, jutu ña.
13 Cuhva tsa tsito̱ ra Labán tuhun ra Jacob, sehe ñaha cuhva ra, tsaha̱n ra tsi jataha̱n ra tsi ra Jacob, tsaha̱ ra nacumi tsi ra, tan tsinumi̱ nyaa ra tsi ra, quihi̱n ra tsi ra cuahan tsihin ra yuvehe ra. Nu tsaa̱ ra naha, catyi̱ tuhun ra Jacob tandɨhɨ maa cuhva cuvi̱ tsihin ra. 14 Tan catyí ixto ra tsihin ra:
--Nyɨvɨ vaha maa yo cuví, xin, nɨñɨ ndi nyisó un ―catyí ixto ra tsihin ra.
Nu tindaha̱ ra Jacob tsihin sehe ra Labán
Ndoo̱ ra Jacob iyó ra yuvehe ixto ra.
15 Tsa yaha̱ iin yoo, catyí ra ixto ra tsihin ra:
--Jacob, caha̱n tsihin yu nácaa cuñí un tyahví yu tsi un, tyin ña cua jatyiñu cuatu ñi maa un tsihin yu, ndi maa tsa nyɨvɨ yo cuví.
16 Tan iyó uvi sehe sɨɨhɨ ra Labán: Intuhun ña nañí Lea, ña cuví sehe nuu ra, tan inga ña nañí Raquel. 17 Tan ña Lea can sɨɨ xaan caá tinuu ña, maa tyin, sɨɨ ca caá ña Raquel. 18 Tan ña Raquel can cuñí xaan ra Jacob, tan catyí ra tsihin ra Labán:
--Cua jatyiñu yu utsa cuiya tsa cuenda ña Raquel, sehe un.
19 Tan nacaha̱n ra Labán tsihin ra:
―Vaha ca yooho naquihin tsi ña tan ñavin ca tsa naquihin inga rayɨɨ tsi ña. Ndo̱o tsihin yu --catyí ra tsihin ra.
20 Ña tuvi̱ maa iñi ra Jacob jatyiñu̱ ra tsa utsa cuiya can tsa cuenda ña Raquel; taahan ñi quɨvɨ cuví can cuñí ra, tyin yaha xaan cuñí ra tsi ña. 21 Tsa yaha ndɨhɨ utsa cuiya jatyiñu̱ ra, catyí ra tsihin ixto ra:
--Tsa ndɨhɨ̱ tyembu tsa ndoo̱ yu tuhun tsihin un jatyiñu̱ yu tsa cuenda ñasɨɨhɨ yu. Vityin ihya, cu̱hva tsi ña Raquel tindaha tsihin yu ―catyí ra.
22 Tacan tan tsaqui̱n ra Labán vico tan cana̱ ra nandɨhɨ maa nyɨvɨ yatyin vehe ra, nu tindaha̱ ra Jacob. 23 Tan cuvi̱ tsi tsacuaa can, quihi̱n ra Labán tsi ña Lea tsindaca̱ ra tsi ra Jacob, tan quixi̱ ra Jacob tsihin ña. 24 Nacuhva̱ jutu ña Lea ican iin musu ñaha, ña nañí Zilpa, tyin cuvi musu ña. 25 Tsa tuvi inga quɨvɨ, nyehe̱ ra Jacob tyin ñavin ña Raquel tsaha̱ ixto ra tsi ra. Tsicaha̱n ra tsihin ra:
--¿Náa cuenda tyin tyehen ica̱ un tsihin yu? Ñavin tsa cuenda ña Lea ihya jatyiñu̱ yuhu, tsa cuenda ña Raquel jatyiñu̱ yu utsa cuiya. ¿Náa cuvi̱ jandavi̱ ñaha un tsi yu?
26 Tan catyí ra Labán tsihin ra:
--Ji̱hna, ña jihna ca ñi cuatyi xaan tindaha nuu ndi ihya, tyin jihna ca ñi cuví sehe nuu tindaha, tacan iyó ndi. 27 Ja̱ndaa jihna vico nu tindaha̱ un tsihin ña Lea nɨɨ vitya ihya, yaha can tan cua cuhva ndɨhɨ yu tsi ña Raquel tsi un tatun jatyiñu un inga utsa ca cuiya tsihin yu --catyí ra tsihin ra.
28 Ndoo̱ ra Jacob vaha, nɨɨ vitya can tsicoo̱ vico, yaha can tsaha nacuhva̱ ra Labán tsi ña Raquel cua cuvi ñasɨɨhɨ ra. 29 Tan nacuhva̱ ndɨhɨ ra tsi ña Bilha musu ra, tsi ña Raquel, tyin cuvi musu ña. 30 Tsicoo̱ ra Jacob tsihin ña Raquel can, tan jatyiñu̱ ra utsa cuiya ca tsihin ra Labán tsa cuenda ña. Yaha xaan ca cuñí ra tsi ña Raquel tan ñavin ca ña Lea.
Nandɨhɨ sehe ra Jacob
31 Nyehé ra Jehová tyin cuñí xaan ca ra Jacob tsi ña Raquel tan ñavin ca ña Lea, yacan cuenda tsaha̱ Nyoo tsa cuvi coo sehe ña Lea tan ña Raquel ñaha numa cuví ña. 32 Tan tsa cacu̱ sehe nuu ña Lea jacunañi̱ ña tsi lee can Rubén, tan catyí ña: "Nyehé ra Jehová tsa cuiihya cuñí yu, vityin cua cuñi xaan yɨɨ yu tsi yu", catyí ña.
33 Tsicoo̱ inga sehe ña tan jacunañi̱ ña Simeón tsi lee can, tan catyí ña: "Tsitó maa ra Jehová tyin yoñi cuñí tsi yu yacan cuenda tsaha̱ ra inga sehe yu", catyí ña.
34 Tan tsinu uñi sehe ña tsa tsicoo̱ nyico jacunañi̱ ña Leví tyin catyí ña: "Vityin nditsa cua cunyaa naa yɨɨ yu tsi yu, tyin tsa iyó uñi sehe ra tsihin yu", catyí ña.
35 Tsicoo̱ nyico sehe ña, tan catyí ña: "Cua jacahnu yu tsi ra Jehová vityin", catyí ña. Yacan cuenda jacunañi̱ ña Judá tsi sehe ña. Tan tsindɨhɨ̱ nu cuví tsicoó sehe ña.