28
Tacan tan cana̱ ra Isaac tsi ra Jacob, sehe ra, nasoco̱ ra tsi ra tan tsaha̱ cuenda ra tsi ra tan catyí ra: "Ña tindaha un tsihin sehe nyɨvɨ ñuu Canaán ihya. 2 Cua̱ahan nda Padan-aram yuvehe ra Betuel, tsii un, tan tindaha tsihin sehe ra Labán, ixto un. 3 Tan maa ra Nyoo iyó tandɨhɨ tunyee iñi tsi, cua nasoco tsi un tan cuhva ra coo cuaha tata un tan coo ra naha nanɨɨ catsico nu ñuhu ñayɨvɨ. 4 Na nasoco ra tsi un tan cua nasoco ndɨhɨ ra tsi nyɨvɨ tata un, tumaa nasoco̱ ra tsi jutu yu, tan naquihin ndɨhɨ un ñuhu nu iyó yo ihya, ñuhu tsa tsaha̱ ra tsi jutu yu", catyí ra tsihin ra Jacob.5 Tacan cuví nu jacuhu̱n ra Isaac tsi ra Jacob nda Padan-aram, yuvehe ra Labán, ixto ra, cuhva sɨhɨ ra, ñi cuví sehe ra Betuel, nyɨvɨ Aram.
6 Nyehe̱ ra Esaú nu nasoco̱ jutu ra tsi ra Jacob, yañi ra, tan jacuhu̱n jutu ra tsi ra can nda Padan-aram na tindaha ra ñuu can. Tan tsiñi̱ ndɨhɨ ra tyin na ña quihin ra Jacob ñaha ñuu Canaán nu iyó ra naha. 7 Tyaa̱ yahvi ra Jacob tsa caahán jutu ra tan sɨhɨ ra tsihin ra tsaha cuahan ra Padan-aram. 8 Ican tsito̱ ra Esaú tyin ña taahán iñi jutu ra tsi sehe sɨɨhɨ nyɨvɨ ñuu Canaán; 9 yacan cuenda tsaha̱n ra nu iyó ra Ismael, ixto ra, tan quihi̱n ra inga ñaha nañí Mahala, tahan ña Nebaiot, sehe ixto ra.
Nu quita̱ Nyoo nuu ra Jacob nu cuví Bet-el
10 Quita̱ ra Jacob Beerseba nu iyó ra tan cuahan ra nda Harán. 11 Tan tsa cuñí cuaa tsaa̱ ra iin nu tsaa̱ ra, tan quihi̱n ra iin yuu iyó maa can tsicunyaa̱ naa jiñi ra tan ican quixi̱ ra. 12 Tsacuaa can nyehe̱ ra iin ñimaahna: Iin cuayɨ quee̱ nda andɨvɨ tan tsañí can nda nu ñuhu, tan cuaha xaan ángel maa ra Nyoo ndaá tan nuú ra naha nu cuayɨ can nyehé ra. 13 Tan maa ra Jehová nyaá nda jiñi cuayɨ can tan catyí ra tsihin ra Jacob: "Yuhu cuví ra Jehová, Nyoo ra Abraham, tsii un, tan ra Isaac, jutu un. Cua cuhva yu ñuhu nu canyií un juvin tsi un tan tsi tata un. 14 Tan tumaa tsa cuaha nyaca ñuhu tacan cuaha tata un cua cuvi, tan tandɨhɨ tsa cumi tutun ñuhu ñayɨvɨ cua coo ra naha; tan cua nasoco un nandɨhɨ nyɨvɨ nu ñuhu ñayɨvɨ, tan cua nasoco ndɨhɨ tucu tata un tsi ñi, tsihin cuhva can cua nasoco yu tsi ñi. 15 Cua jandaa yu tsa caahán yu tsihin un tan cua jaquitsi nyico yu tsi un nu ñuhu ihya, ña cua nacoo yu tsi un, nyaá maa yu cua jacuenda yu tsi un ndaa ityi cuahan un", catyí Nyoo tsihin ra tsitsi ñimaahna can.
16 Tsa yaha ndoto̱ ra tan catyí ra: "Ña tsitó maa yu tsa nyaá Nyoo ihya. 17 Ii xaan ihya, ihya cuví vehe Nyoo, yuhu vehe andɨvɨ cuví ihya," catyí ra tsa iyo cuñí ra.
18 Yatyi xaan nduvita̱ ra tsa tuvi can, tan quihi̱n ra yuu tsa tsinyaa̱ naa jiñi ra tan tyaa̱ ra can tumaa yuu xahñu tan tyiso̱ ra acetye sɨquɨ yuu can, tan cuví can iin tsa ndaa tyin ican caha̱n Nyoo tsihin ra. 19 Tan nu quixi̱ ra can nañí tsi Luz*f5, maa tyin sama̱ ra sɨvɨ can tsa yaha̱ caha̱n Nyoo tsihin ra tan jacunañi̱ ra can Bet-el.
20 Ican catyí ra tsihin maa ra: "Tatun cuhun Nyoo tsihin yo tan jacuenda ra tsi yo nu cuahan yo ihya, tan cuhva ra tsa catsi yo tan tsa cunditsi yo, 21 tan quitsi nuhu nyico yo tsihin tsa vaha yuvehe jutu yo, cua cuvi ra Nyoo yo. 22 Tan yuu tyaa̱ yo ihya cua cuvi can tumaa vehe Nyoo; tan tandɨhɨ tsa cua cuhva ra tsi yo, utsi cuhva cua tava yo can tan cua nacuhva yo intuhun cuhva can tsi ra", catyí ra tsihin ra.