Nu nasoco̱ ra Isaac tsi ra Jacob
27
Tan tsa yaha xaan tsahnu ra Isaac, ña nditsín ca maa nyehé ra, cuaá maa ra, tan cuvi̱ tsi tsa cana̱ ra tsi ra Esaú, sehe nuu ra tan catyí ra tsihin ra:--¡Esaú!
―Maa yu ihya, tyaa --catyí ra Esaú.
2 --Nyehé un tyin tsa tsahnu xaan yu, ña tsitó yu ama cua cúu yu. 3 Vityin ihya, qui̱hin nduva un, cua̱ahan tsitsi cuhu tan cahñi iin quɨtɨ, 4 tan jatyihyo un nyayu tɨ cuhva taahán iñi maa yu, tan quitsi ndaca un nyayu can catsi yu, tacan tan cua nasoco yu tsi un tsitsi tsa ñaha ca cúu yu ―catyí jutu ra tsihin ra.
5 Maa tyin tsiñí ñi sɨhɨ ra tsa caahán jutu ra tsihin ra; yacan cuenda tsa yaha cuahan ra tsitsi cuhu cua nducu ra quɨtɨ cua quitsi nuhu tsihin ra, 6 tacan tan catyí sɨhɨ ra tsihin ra Jacob, yañi ra tan catyí ña:
--Ji̱hna, tsiñi̱ yu tsa caahán jutu un tsihin ra Esaú yañi un tan catyí ra tsihin ra: 7 ꞌCua cahñi iin quɨtɨ tan ja̱nduvaha tsi tɨ tan asɨn vaha cua jatyihyo un tsi tɨ tan cua catsi yu tan cua nasoco yu tsi un ityi nuu Nyoo tsitsi tsa ñaha ca cúu yuꞌ, catyí ra tsihin ra. 8 Tya̱a soho vaha tsa cua cahan yu tsihin un vityin ihya. 9 Cua̱ahan cua quihin uvi taahan sehe mbee ndɨquɨ tsa xaahan vaha tsitsi cora ndacan tan cua javaha yu tsa cua catsi jutu un cuhva taahán iñi maa ra. 10 Tan maa un cua cundaca can catsi jutu un, tacan tan cua nasoco ra tsi un tsitsi tsa ñaha ca cúu ra ―catyí ña tsihin ra Jacob.
11 Tan catyí ra Jacob tsihin sɨhɨ ra:
--Maa tyin cuaha xaan ixi iñí tsi ra Esaú tan yuhu nduve. 12 Cuvi ñi tyin vaca ndaha jutu yu tsi yu; tan cua catyi ra tyin tsacú nducu yu tsi ra, nducú maa yu nu tahnu ndatu yu, náa vihi tsa vaha cua ñihi yu tacan.
13 Tan catyí sɨhɨ ra tsihin ra:
--Na tahnu ndatu maa yu cuenda un, intuhun ñi tsa cuñí yu tya̱a yahvi tsa caahán yu tsihin un, cua quihin mbee can naha tɨ ―catyí ña tsihin ra.
14 Tacan tan tsaha̱n ra tsi quihi̱n ra mbee ndɨquɨ can naha tɨ tsindaca̱ ra tsi sɨhɨ ra. Janduvaha̱ ña tsi tɨ naha tɨ tan jatyihyo̱ ña cuñu can cuhva taahán iñi maa yɨɨ ña. 15 Yaha can, tan tava̱ ña jahma vaha ra Esaú, sehe nuu ña tsa yucú vaha tan jacunditsi̱ ña can tsi ra Jacob. 16 Tan juvin ñi maa tsihin ñɨɨ mbee can naha tɨ cava̱ nuu ña ndaha ra tsihin jucun ra, 17 tan tsaha̱ ña tsa jatyihyo̱ ña tsi ra tsihin paan.
18 Tacan tan quɨhvɨ̱ ra nu nyií jutu ra tan catyí ra:
--Tyaa.
--Maa yu ihya, xin, ¿ndáa ra cuví yooho ra Jacob o ra Esaú? --catyí jutu ra tsihin ra.
19 --Ra Esaú, sehe nuu un cuví yu, tyaa, tsa ica̱ yu tsa caahán un tuhun. Ndu̱vita tan cu̱nyaa tan catsi cuñu quɨtɨ tsa jatyihyo̱ yu, tan na̱soco tsi yu --catyí ra Jacob.
20 Tacan tan catyí jutu ra tsihin ra:
--¿Nácaa tyin iyaha cuii ñi ñihi̱ un quɨtɨ can, ñi?
Tan catyí ra tsihin ra:
--Maa ra Jehová, Nyoo un, jaha̱ tsa iyaha ñi ñihi̱ yu tsi tɨ.
21 Tan catyí jutu ra tsihin ra:
--Na̱tuhva nu nyaá yu ihya, tyin cuñí yu vaca ndaha yu tsi un tatun nditsa un tyin ra Esaú cuví un o jandaví ñaha un ―catyí ra.
22 Natuhva̱ ra nu nyaá jutu ra tan tsaca̱ ndaha ra can tsi ra, tan catyí ra: "Ndusu ra Jacob cuví ndusu un, maa tyin soco un, soco ra Esaú cuví." 23 Maa tyin ña nacoto̱ maa ra tatun ra Jacob cuví can, tyin ixi xaan ndaha ra tumaa tsa ixi ndaha ra Esaú, yañi ra. Tan tsa ndi cumañi ca nasoco ra tsi ra Jacob, 24 tsica̱ tuhun nyico ra tsi ra inga tsaha:
--¿Nditsa un tyin ra Esaú cuví un, ñi?
--Nditsa yu, tyaa, ra Esaú cuví yu ―catyí ra.
25 Tacan tan catyí jutu ra tsihin ra:
--Ja̱yaha tsa ñihi̱ un catsi yu tan cua nasoco yu tsi un --catyí ra.
Tacan tan tsaha̱ ra nyayu ndahá ra tsatsi̱ jutu ra tan tsihi̱ ndɨhɨ ra vinu tsa ndahá ra. 26 Yaha can tan catyí nyico jutu ra tsihin ra:
--Na̱ha, tya̱a yuhu tsi yu vityin.
27 Tacan tan tyaa̱ yuhu ra tsi jutu ra. Tan ñihi̱ jutu ra xico jahma nditsí ra, tacan tan nasoco̱ jutu ra tsi ra tsihin tuhun ihya:
"Tsa nditsa maa, xico ra Esaú, sehe yu, cuví tsehe,
tyin tumaa caná xico cuhu nasoco̱ Nyoo, caná nuu ra.
28 Maa Nyoo cua jacuun savi nu tyiñu jahá un
tan maa ñi ndaha tyiñu vaha cua naquihin un,
cuaha trigo tan cuaha ndutya yucu vixi cuví uva cua coo tsi un.
29 Tan cuaha nyɨvɨ cua cuvi musu un,
cua cuɨñɨ tsɨtɨ nyɨvɨ ñuu ityi nuu un.
Quɨ̱hɨ ndaha tsi nyɨvɨ yo,
¡tan na cuɨñɨ tsɨtɨ ñi ityi nuu un!
Nyɨvɨ tyisó sɨvɨ tsi un tsihin tsa ña vaha, cua tahnu ndatu ñi,
tan nyɨvɨ nasocó tsi un sɨɨ cua nasoco Nyoo tsi ñi."
30 Ndi quita̱ cuii ñi ra Jacob tsa ndɨhɨ̱ nasoco̱ jutu ra tsi ra, tsaha tsaa̱ ra Esaú, yañi ra, tsinducu̱ ra quɨtɨ tsitsi cuhu. 31 Tan jatyihyo̱ ndɨhɨ ra nyayu quɨtɨ ñihi̱ ra can tan tsindaca̱ ra tsi jutu ra tan catyí ra tsihin ra:
--Ndu̱vita tyaa, ca̱tsi cuñu quɨtɨ tsa tsinducu̱ yu catsi un, tan na̱soco tsi yu ―catyí ra.
32 Tacan tan catyí jutu ra tsihin ra:
--¿Yóo, yooho cuvi un, ñi?
--Ra Esaú, sehe nuu un cuví yu, tyaa ―catyí ra can.
33 Tan iyó xaan cuñí jutu ra tan quitsaha̱ nɨhɨ ra, tan catyí ra:
--¿Tan yóo ra cuví ra quitsi̱ nañi ndahá ra tsa ñihi̱ ra tsatsi̱ yu, tan nasoco̱ yu tsi ra tsa ñaha ca tsaa un? ―catyí ra.
34 Tan cuhva tsa tsiñi̱ ra Esaú can tsa caha̱n jutu ra, quitsaha̱ tsacú ra tsa ndasɨ́ cuñí ra tsa javaha̱ yañi ra tsi ra, tan tsaa xaan canatsaa̱ ra tan catyí ra:
--¡Na̱soco ndɨhɨ tsi yu, tyaa!
35 Tan catyí jutu ra tsihin ra:
--Tsa quitsi̱ ra yañi un tan jandavi̱ ñaha ra tsi yu tan naquihi̱n ra tsa cua nasoco yu tsi un, xin.
36 Tan nacaha̱n ra Esaú:
--Vaha xaan maa nañí ra Jacob jaha̱ ndo, tsa cuahan tsi uvi tsaha jatsii̱ ra tsa taahán tsi tsi yu: Tsa jihna ñi jatsii̱ ra ndatu tsa cuví yu sehe nuu, tan vityin ihya jatsii̱ ndɨhɨ ra tsa cua nasoco un tsi yu.
¿An ña naquihi̱n vaha un tsa cua nasoco un tsi yu, tyaa? --catyí ra tsihin jutu ra.
37 --Ji̱hna, tsaha̱ yu ndatu tsi ra yañi un cua quɨhɨ ndaha ra tsi un, nandɨhɨ nyɨvɨ yo cua cuvi musu nuu ra, tan cuñí yu tsa coo cuaha trigo tan ndutya yucu vixi cuví uva tsi ra. Tan ¿náa cuví javaha yu tsa cuenda un, jutu yu?
38 Tan nacaha̱n ra tsihin jutu ra:
--¿An nduve tan intuhun ca tsa cuví nasoco un tsi yu tyaa? ¡Na̱soco ndɨhɨ tsi yu!
Tan quitsaha̱ tsacú nyico ra.
39 Tacan tan catyí jutu ra tsihin ra:
"Cañi cua coo un nu ñavin ñuhu vaha cuví
nu nduve savi cuún,
40 Tsihin mityi xaan un cua cunyee iñi un tan ña cua cahñi nyɨvɨ tsi un,
tan musu ra yañi un cua cuvi tsi un,
maa tyin quɨvɨ cua ñihi un tunyee iñi
cua ndoo nuña un, ña cua cuvi ca un musu ra", catyí jutu ra tsihin ra.
Nu tsinu̱ ra Jacob nuu ra Esaú, yañi ra
41 Nda tacan maa tan nduxaa̱n iñi ra Esaú tsi ra Jacob, yañi ra, tsa cuenda tsa nasoco̱ jutu ra naha tsi ra, tan catyí ra tsitsi añima ra: "Nda yaha cúu jutu ndi tan nda yaha tucuiihya iñi tsi ndi, tacan tsaha cua jandɨhɨ yu nuu ra Jacob ihya", catyí ra.
42 Tsito̱ sɨhɨ ra naha tuhun tsicá iñi ra Esaú tsa cua javaha ra tsihin yañi ra, tan tsicana̱ ñi tsi ra Jacob jaha̱ ña tan catyí ña tsihin ra:
--Ji̱hna, ra yañi un tsicá iñi ra cahñi ra tsi un tyin tacan tan cua naa tsa xaan cuñí ra ―catyí ña tsihin ra Jacob―. 43 Yacan cuenda tya̱a yahvi tsa cua cahan yu tsihin un vityin ihya; cua̱ahan nda Harán yuvehe ra Labán ixto un, 44 ndo̱o ndacan tan juhva tyembu, na yaha jihna tsa xaan cuñí ra yañi un 45 tsa catyi tsa javaha̱ un tsi ra, nda naa iñi ra can tacan tsaha cua jacuhun yu tyiñu nuu un tan quitsi nuhu un; ¡ña cuñí yu cundɨhɨ nduvi taahan sehe yu tsa iin quɨvɨ ñi! ―catyí ña tsihin ra.
46 Yaha can tan catyí sɨhɨ ra tsihin jutu ra:
--Ña sɨɨ ca cuñí yu iyó yu tsa catyi ñi ñaha sehe ra Het, ñi Canaán, tsa naquihi̱n ra Esaú, yañi ra Jacob ihya. Tatun ra ihya quihin ndɨhɨ sehe nyɨvɨ Canaán ihya, náa catyi ca iyó yu vaha vihi ca cúu yu --catyí ña tsihin yɨɨ ña.