Nu tsaa̱ ra Isaac ñuu Gerar
26
Tyembu can, tsicoo̱ iin tama xaan nu iyó ra Isaac tumaa tsa tsicoo̱ tahan ndi iyó maa jutu ra, yacan cuenda cuahan ra tsihin nyɨvɨ ra nda Gerar nu iyó ra Abimelec ra cuví rey ñuu Filistia. 2 Tan ityi can quita̱ ra Jehová nuu ra tan catyí ra tsihin ra: "Isaac, coto ñahñi cuhun un nda Egipto, cua ndoo un coo un nu cua cahan yu tsihin un. 3 Tsa vityin ihya ñi, co̱o yooho ihya, tumaa ra inga ñuu, tan maa yu cunyaa tsihin un tan cua nasoco yu tsi un, tan tsihin cuhva ihya cua jandaa yu cuhva ndoo̱ yu tuhun tsihin jutu un, tyin ñuhu ihya cua nacuhva yu tsi un tan tsi tata un. 4 Tan tumaa tsa cuaha tiñuu ityi sɨquɨ tacan tsa cuaha tata un cua jaha yu, tan cua cuhva yu tandɨhɨ ñuhu ihya tsi ra naha, tan tandɨhɨ maa ñuu iyó nu ñuhu ñayɨvɨ ihya cua nasoco ra naha, tsihin cuhva can cua nasoco yu tsi nyɨvɨ can. 5 Tacan cua cuvi cuenda tsatyin tyaa̱ yahvi jutu un tsi yu, jandaa̱ ra cuhva tava̱ tyiñu yu tsi ra, tyaa̱ yahvi ra ley tsa jacuaha̱ yu tsi ra", catyí Nyoo tsihin ra.6 Tacan tan ndoo̱ ra iyó ra ñuu Gerar ican. 7 Tan ra iyó ñuu ican naha ra tsica̱ tuhun ra naha tsi ra yóo cuú ra tsi ña Rebeca, tan catyí ra:
--Ñaha cuhva yu cuví tsi ña -catyí ra tsihin ra naha, tyin yuuhví ra coto cahñi ra naha tsi ra tsa catyi ña, tun cahan ra tyin ñasɨɨhɨ ra tsi ña tyin tyaquɨ xaan caá ña.
8 Tan tsa tsica̱ quɨvɨ iyó ra ñuu can tan cuvi̱ tsi tsa nyaá ra Abimelec ventana tan nyehe̱ ra tsi ra Isaac numí nyaa ra tsi ña Rebeca. 9 Tacan tan tsicana̱ ra naha tsi ra Isaac jaha̱ ra tan catyí ra tsihin ra:
--¿An yacan ñasɨɨhɨ un cuví tsi ña ihya?
--Juvin, ñasɨɨhɨ yu tsi ña --catyí ra.
--Tan ¿náa cuenda catyí un tyin ñaha cuhva un cuví tsi ña? --catyí rey can tsihin ra.
--Tsica̱ iñi maa yu tyin cuvi cahñi ra ihya naha ra tsi yu tsa catyi ña ihya --catyí ra tsihin rey can.
10 --Maa tyin ¿náa cuenda javaha̱ un tacan tsihin ndi? Tsa juhva ca, tsa tsicoo̱ intuhun ra ñuu ndi tsihin ñasɨɨhɨ un. Tan tsa catyi un tan cua coo cuatyi ndi --catyí ra tsihin ra Isaac.
11 Tan jacoto̱ rey can tsi nandɨhɨ nyɨvɨ ñuu ra, tan catyí ra tsihin ñi:
--Nyooho tsa ña cua tyaa yahvi tsi ra ihya a tsi ñasɨɨhɨ ra, tsa nditsa tyin taahán tsi cúu ndo --catyí ra.
12 Tan cuiya can tatsi̱ ra Isaac trigo. Tan cuaha xaan trigo naquihi̱n ra tyin maa Nyoo nasoco̱ tsi ra. 13 Cuca xaan ra, tan cuaha xaan tsa tsii ra cuvi̱. 14 Nda cua xaan ña cuñí ra Filistia naha ra tsihin ra tsa yaha cuaha mbee tan indɨquɨ jana ra, tan cuaha musu jatyiñú tsihin ra. 15 Tan tandɨhɨ maa soco tsa tsatya̱ musu jaha̱ jutu ra tsa ndi iyó maa ra, jandutu̱ ra Filistia naha ra can tsihin nyahyu. 16 Nu ndɨhɨ tuhun catyí ra Abimelec tsihin ra:
--Yaha xaan ca cuca un cuvi̱ tan ñavin ca nyuhu. Yacan cuenda vaha ca quita un ñuu ndi --catyí ra tsihin ra Isaac.
17 Tacan tan quita̱ ra Isaac cuahan ra tsihin nandɨhɨ nyɨvɨ ra nda nduhva cuenda Gerar, tan ican tsicoo̱ ra. 18 Tandɨhɨ maa soco jutu ra tsa jandutu̱ ra Filistia naha ra, nuña̱ nyico ra, tan juvin ñi cuhva nañí maa tandɨhɨ soco can jaha̱ jutu ra, nañí nyico maa tandɨhɨ soco can jaha̱ ra. 19 Tan iin quɨvɨ yucú ra cuví musu ra tsatyá ra naha iin soco nu cuví nduhva can, tan nañihi̱ ra naha iin ndohyo. 20 Maa tyin ra Filistia ra jacuendá mbee nu cuví nduhva can cañi̱ tahan ra naha tsihin musu ra Isaac tan catyí ra naha tyin tsii maa ra naha cuví ndohyo can. Yacan cuenda jacunañi̱ ra "Esek" ndohyo can tyin cañi̱ tahan ra naha tsaha can. 21 Yaha can tsatya̱ nyico ra naha inga soco tan juvin ñi tacan cuvi̱ tsihin soco can, tan jacunañi̱ ra "Sitna" soco can. Tan Sitna cuñí tsi catyi: xaan iñi tahan.
22 Quita̱ ra Isaac cuahan ra ican, tan nu tsaa̱ ra naha tsatya̱ ra naha inga soco, tan jacunañi̱ ra Rehobot soco can tyin ña cañi̱ tahan ca ra Filistia naha ra tsihin ra tsaha can, tacan tan catyí ra: "Maa Nyoo tsaha̱ tsa coo vaha yo vityin, tan cua coo cuaha tsii yo ihya", catyí ra.
23 Yaha can tan quita̱ ra nu iyó ra tsaha cuahan ra nda Beerseba. 24 Tan tsacuaa nu quixi̱ ra quita̱ ra Jehová nuu ra tan catyí ra tsihin ra:
"Isaac, yuhu cuví Nyoo ra jutu un.
Ña nayuhvi un tyin nyaá maa yu tsihin un.
Cua nasoco yu tsi un tan cua janducuaha yu tata un.
tsa cuenda jutu un, ra cuvi̱ musu yu."
25 Tacan tan javaha̱ ra Isaac iin ata ican, tan jacahnu̱ ra sɨvɨ ra Jehová, tyin sɨvɨ maa ra Nyoo cuví can, tan nacutsi̱ ra vehe ra ican, tan tsatya̱ musu ra inga soco can jaha̱ ra.
26 Iin quɨvɨ ra Abimelec quee̱ ra nda Gerar tsihin ra Ahuzat, ra vaha iñi tsi ra, tan ra Ficol ra cuví capitaan ra cuví nuu tsihin jandaru, cuahan ra naha cua natuhun ra naha tsihin ra Isaac. 27 Tan catyí ra Isaac tsihin ra naha:
--¿Náa cuenda vatsí nyehe ndo tsi yu tan xaan iñi ndo tsi yu tava̱ ndo tsi yu ñuu ndo?
28 Tan catyí ra naha tsihin ra:
--Nyehé ndi tyin nyaá Nyoo tsihin un, yacan cuenda cuñí ndi cuhñi ndi tuhun tsihin un. Tsehe cuví tuhun cuñí ndi cunuhñi. 29 Tyin ña cua javaha un náa tsa ña vaha tsihin ndi, tyin nduve náa javaha̱ ndi tsi un, tyaa̱ nuu vaha ndi tsi un tan tava̱ vii ndi tsi un tsihin tsa vaha ñuu ndi, tan vityin ihya Nyoo nasocó ra tsi un --catyí naha tsihin ra.
30 Tacan tan javaha̱ ra iin vico cahnu, tsatsi̱ ra naha tan tsihi̱ ra naha ra tyin tsinyacu̱ ra naha vico. 31 Yatyi xaan nduvita̱ ra naha tsa tuvi̱ inga quɨvɨ can tan tsinuhñi̱ tuhun jaha̱ ra naha. Tsaha̱ ra naha nacumi tsi tahan ra naha tsihin tsa vaha, tsaha cuahan ra naha.
32 Juvin ñi quɨvɨ can tsaa̱ nuhu musu ra Isaac tsa tsaha̱n tsicatya̱ soco jaha̱ ra, jacoto̱ ra naha tsi ra tyin taha̱n ra naha ndutya. 33 Tan soco can jacunañi̱ ra "Seba", yacan cuenda ndi nañí maa ñuu can Beerseba nda ñicanyii vityin.