Tata ra Abraham tsihin ña Cetura
25
Tan inga ñaha tsa tsicoo̱ tsihin ra Abraham tumaa ñasɨɨhɨ ra, nañí ña Cetura. 2 Tan sehe ra tsicoo̱ tsihin ñaha ican cuví ra Zimram, ra Jocsán, ra Medán, ra Madián, ra Isbac tan tsihin ra Súa. 3 Tan ra Jocsán can cuví jutu ra Seba tsihin ra Dedán; tan ra Dedán can cuví jutu nyɨvɨ Asur, nyɨvɨ Letum tan nyɨvɨ Leum. 4 Tan ra Madián, cuví jutu ra Efa, ra Efer, ra Hanoc, ra Abida, tan ra Elda. Tandɨhɨ maa ra ican naha ra cuví tata ña Cetura. 5 Maa tyin ra Isaac naquihi̱n cuenda tandɨhɨ maa tsa cuca ra Abraham, jutu ra. 6 Maa tyin tsi sehe ña Agar tan tsihin sehe ña Cetura, tsaha̱ ra tsa tsaha̱ maa ra tsi ra can naha ra. Tan jacuhu̱n ra tsi ra naha nu ñuhu canyií cuenda ityi nu caná ñicanyii tahan ndi iyó maa ra, tyin ña cuñí ra tsa iin ñi coo ra naha tsihin ra Isaac sehe ñasɨɨhɨ vaha maa ra.Nu quɨhvɨ̱ ñuhu ra Abraham nu ndaa cumisantu
7 Tan cientu uñi xico tsahun cuiya tsicoo̱ ra Abraham nu ñuhu ñayɨvɨ. 8 Tsahnu xaan ra tsaha tsihi̱ ra tsihin cuehe tsaahnu, ndɨhɨ̱ nɨɨ vaha quɨvɨ ra. Tan ndu ii̱n ndɨhɨ ra tsihin nyɨvɨ ra nu quɨhvɨ̱ ñuhu ra nu ndaa cumisantu. 9 Nduvi sehe tsitsa ra tsicutsi̱ tsi ra, ra Isaac tsihin ra Ismael nu cuví yavi yuu cuenda Macpela, nu cuu̱ cuenda ra Efrón, sehe ra Zohar, sehe ra Het, yatyin cuenda Mamre ityi caná ñicanyii, 10 nu jata̱ ra tahan ndi iyó ra tsi sehe ra Het, ican quɨhvɨ̱ ñuhu ra tsihin ñasɨɨhɨ ra. 11 Tan nasoco̱ xaan Nyoo tsi ra Isaac sehe ra tsa yaha tsihi̱ ra. Tan yatyin nu nyaá soco nañí "Ra nyitó ra nyehé tsi yu" tsicoo̱ ra can.
Tata ra Ismael, yañi quiin ra Isaac
12-13 Tan tata ra Ismael, ra tsa cuví sehe ra Abraham tsihin ña Agar, ña Egipto, ña cuvi̱ musu ña Sara, cuví ra ihya naha ra. Quitsaha̱ tsi tsihin sehe nuu ra: Ra Nebaiot; tsaha vatsí ra Cedar, ra Adbeel, ra Mibsam, 14 ra Misma, ra Duma, ra Massa, 15 ra Hadar, ra Tema, ra Jetur, ra Nafis tan ra Cedema. 16 Tacan nañí tsa utsi uvi sehe ra Ismael can. Tan tsihin sɨvɨ ra naha nacotó ra naha nu cuví ñuhu ra naha tan nu tyaa̱ ra vehe ra nu cuahan ra tsicá ra. Tan intuhun intuhun ra cuví nuu tsihin nyɨvɨ ra.
17 Tan cientu oco tsahun uvi cuiya ra Ismael, jutu ra naha, tsaha tsihi̱ ra, tan tsa yaha quita̱ tsa nyito tsi ra ndu ii̱n ndɨhɨ ra tsihin nyɨvɨ ñuu ra ñuu ndɨyɨ. 18 Nda Havila nda cuanda Shur tsicoo̱ tata ra ityi nuu Egipto, ityi tsa cuahan ityi Asiria. Ican tsicoo̱ ra naha vasu ndi maa iyó tisɨhɨ inga tata ra Abraham tsa iyó inga tsiyo can tsihin ra naha.
Ra Jacob tan ra Esaú, sehe ra Isaac tsihin ña Rebeca
19 Ihya cuví cuhva tsicoo̱ ra Isaac sehe ra Abraham: 20 Uvi xico cuiya ra Isaac quɨvɨ tindaha̱ ra tsihin ña Rebeca, ñaha cuhva ra Labán, sehe ra Betuel, ra ñuu Aram, ñuu nañí Padan-aram. 21 Tan ñaha numa cuví ñasɨɨhɨ ra, yacan cuenda caha̱n ndaahvi ra tsihin ra Jehová tyin na cuvi coo sehe ña. Tan tɨɨ̱n cuenda Nyoo tsa caha̱n ra, tan cuvi̱ tsicoo̱ sehe ña. 22 Maa tyin tsa ñihi̱ sehe ña tinɨhɨ cuví lee can ñuhú tsitsi ña, tan tsa ñihi tuñú tinɨhɨ nyihi can tsitsi ña, tsica̱ iñi ña: "Náa cuenda tyehen cuví tsi yo". Tacan tan tsaha̱n ña tsica̱ tuhun ña tsi ra Jehová: "Jutu mañi yu náa taahán yu". 23 Tan catyí ra tsihin ña:
"Ji̱hna, tinɨhɨ ñuhú tsitsi un
tan cua cuvi ra naha uvi taahan ñuu,
tan ña iin cuví ñuu can tsitsi un,
Iin ñuu can cahnu cua cuvi tan ñavin ca inga ñuu can,
ra cua cacu jihna cua cuvi musu nuu ra cua cacu tsinu uvi."
24 Tacan tan tahan tsi quɨvɨ cacu̱ sehe ña, tan tinɨhɨ cuví sehe ña tsicoo̱. 25 Lee cacu̱ jihna, yaaha xaan ixi jiñi lee can tan ixi ndaha ra, tan Esaú jacunañi̱ ñi tsi ra. 26 Tan Jacob jacunañi̱ ñi tsi lee luhlu tsa cacu̱ tsinu uvi, tyin tsihin intuhun ndaha lee luhlu can yɨhɨ́ ndaha ra xuu sɨyɨ yañi ra cacu̱ ra. Tan uñi xico cuiya ra Isaac quɨvɨ cacu̱ tinɨhɨ sehe ñasɨɨhɨ ra.
Nu xico̱ ra Esaú tsa taahán tsi tsi ra tsa cuú ra ra tsitsa
27 Tsa yaha tsahnu̱ ra tinɨhɨ nyihi can, ra Esaú cuví ra, ra vaha xaan tsahñí quɨtɨ. Tan ra Jacob, yañi ra, cuví ra can iin ra taxin iyó, tan mbee taahán iñi ra jacuendá ra. 28 Cuñí xaan ca ra Isaac tsi ra Esaú tyin taahán xaan iñi ra catsi ra tsa tuhvá ra can ñihí, maa tyin sɨhɨ ra naha cuñí xaan ca ña can tsi ra Jacob.
29 Tan cuvi̱ tsi iin tsaha nyií ra Jacob jatyihyó ra calu yucu, tan tsaa̱ ra Esaú tatú vaha ra quee̱ ra tsicaca̱ nuu ra tsitsi cuhu, 30 tan catyí ra tsihin ra Jacob tsa tsaa̱ ra:
--Ja̱ha tumañi iñi, xiin, cu̱hva luxu calu cuaaha jatyihyo̱ un juvin catsi yu tyin yaha xaan isocó yu --catyí ra.
(Tuhun cuaaha ihya inducu ñi tsiñí yo can tsihin Edom, yacan cuenda inga tucu sɨvɨ ra Esaú cuví Edom.)
31 Tacan tan nacaha̱n ra Jacob tsihin ra:
--¿Tatun cuhva un ndatu tsa taahán tsi tsi un tsa cuví un sehe tsitsa tsi yu, jin?
32 Tan catyí ra Esaú:
--Nyehé maa un tyin yaha xaan isocó yu, tan ndatu tsa cuú yu sehe tsitsa nduve nu tsiñi ñuhu can tsi yu --catyí ra tsihin yañi ra.
33 Tan catyí ra can tsihin ra:
--Tatun nditsa un cua cuhñi yo tyiñu ihya vityin.