So̱ꞌo̱ ni̱ xa̱a̱ a̱ kii̱ꞌ ni̱ sa̱xinú Jonás tyu̱u̱n ña̱ ni̱ ta̱xi̱ Ndiosí nuu̱ꞌ ra̱ sa̱a̱ ra̱
3
Sa̱kanꞌ te̱ ni̱ kaꞌa̱n tyuunꞌ ni̱ tukuuꞌ Yahvé xiinꞌ Jonás i̱tyiꞌ ña̱ uvi̱ ndii:
2 ―Ki̱ꞌi̱n i̱tyiꞌ te̱ kuꞌu̱n u̱nꞌ ñu̱u̱ tyie̱, ña̱ naniꞌ Nínive, te̱ sa̱kuniꞌ tu̱ꞌu̱n u̱nꞌ ne̱ ndieeꞌ i̱kanꞌ kuento ña̱ kaꞌa̱n i̱ xiinꞌ u̱nꞌ ―ni̱ katyi̱ a̱ xiinꞌ ra̱.
3 Xaꞌa̱ꞌ a̱ ja̱a̱nꞌ na ni̱ ki̱ꞌi̱n Jonás i̱tyiꞌ te̱ kuaꞌa̱n ra̱ ñu̱u̱ Nínive sa̱a̱ niiꞌ ni̱ kaꞌa̱n tyuunꞌ Yahvé xiinꞌ ra̱. Te̱ ñu̱u̱ Nínive ja̱a̱nꞌ ndii, i̱i̱n ñu̱u̱ tyie̱ xa̱va̱ꞌa̱ nduuꞌ a̱, sa̱kanꞌ na kuiiꞌ uni̱ kivi̱ꞌ kuní te̱ ndi̱ꞌi̱ ku̱nu̱ꞌni̱ i̱i̱n te̱ yivi̱ꞌ ñu̱u̱ ja̱a̱nꞌ.
4 Sa̱kanꞌ te̱ ni̱ xa̱ꞌaꞌ Jonás xinuꞌniꞌ ra̱ ñu̱u̱ ja̱a̱nꞌ, ndu̱viꞌ ni̱ xika̱ ra̱ kaꞌán ndo̱so̱ꞌ ra̱ nuu̱ꞌ ne̱ ndieeꞌ ñu̱u̱ ja̱a̱nꞌ, kaꞌán ra̱ ndii:
―Ndee uvi̱ xi̱ko̱ kivi̱ꞌ kuní te̱ sa̱ndo̱ñuꞌuꞌ Ndiosí ka̱niiꞌ ñu̱u̱ Nínive yoꞌoꞌ ―ni̱ katyi̱ ra̱.
5 Te̱ ne̱ ndieeꞌ ñu̱u̱ Nínive ja̱a̱nꞌ ndii, ni̱ ka̱ndi̱xaꞌ ni̱a̱ Ndiosí, te̱ ni̱ na̱ka̱ta̱ ni̱a̱ kuento ni̱a̱ ña̱ ko̱o̱ ndi̱ti̱a̱ sa̱kuuꞌ ni̱a̱, te̱ sa̱kanꞌ tu̱ ni̱ na̱kuinu̱ sa̱kuuꞌ ni̱a̱ toto̱ ndiaaꞌ nde̱iꞌ, nde̱e̱ ne̱ kualiꞌ te̱ nde̱e̱ ne̱ xi̱xa̱, nde̱e̱ ne̱ vika̱ꞌ xiinꞌ nde̱e̱ ne̱ ndaꞌvi kuuꞌ.
6 Te̱ sa̱kanꞌ tu̱ te̱ xaꞌndia tyuunꞌ kuuꞌ nu̱uꞌ ñu̱u̱ Nínive, kii̱ꞌ ni̱ xi̱ni̱ ra̱ kuento kaa̱ꞌ ndii, ni̱ nu̱ta̱ ra̱ nuu̱ꞌ tei̱ kaꞌnuꞌ ra̱, te̱ ni̱ ta̱va̱ꞌ ra̱ toto̱ va̱ꞌa̱ ña̱ niꞌnuꞌ ra̱, te̱ ni̱ na̱kuiꞌnu̱ ra̱ toto̱ nde̱iꞌ, sa̱kanꞌ te̱ ni̱ xi̱ku̱nduꞌu̱ꞌ ra̱ nuu̱ꞌ yaa̱ꞌ nuꞌu̱.
7 Xa̱kaꞌán e̱ꞌ te̱ ni̱ ti̱a̱tyuunꞌ te̱ xaꞌndia tyuunꞌ kuuꞌ nu̱uꞌ ja̱a̱nꞌ, te̱ kuuꞌ kaꞌnuꞌ xatyuunꞌ nuu̱ꞌ ra̱ ña̱ kuꞌu̱n kaꞌa̱n ndo̱so̱ꞌ ra̱ ka̱niiꞌ ñu̱u̱ Nínive ja̱a̱nꞌ xiinꞌ tu̱ꞌu̱n nde̱iꞌ yoꞌoꞌ, kaꞌán ra̱ ndii:
―Nde̱e̱ i̱i̱n ne̱ yivi̱ꞌ, ni̱ nde̱e̱ ki̱tiꞌ sana̱ ni̱a̱, naa kuuꞌ si̱ndiki̱ꞌ xiinꞌ mbe̱e̱ ndii, kä̱xi̱ꞌ ni̱a̱ nde̱e̱ i̱i̱n nuu̱ꞌ ña̱ xaxi̱ꞌ, sa̱kanꞌ tu̱ ki̱tiꞌ sana̱ ni̱a̱ ja̱a̱nꞌ ndii, naaꞌ sä̱mani̱ꞌ ni̱a̱ riꞌ, ni̱ nde̱e̱ ti̱kui sä̱koꞌoꞌ ni̱a̱ riꞌ.
8 Süu̱ꞌ ja̱a̱nꞌ ndii sa̱kuuꞌ ne̱ yivi̱ꞌ xiinꞌ sa̱kuuꞌ ki̱tiꞌ ndii, kuní a̱ ña̱ na̱kuiꞌnu̱ ni̱a̱ toto̱ ndiaaꞌ nde̱iꞌ, te̱ kaꞌa̱n ndaꞌvi na kaꞌa̱n ndaꞌvi ndi̱e̱eꞌ ni̱a̱ xiinꞌ Ndiosí, te̱ na na̱ko̱o̱ ni̱a̱ ña̱ ni̱a̱ꞌa ña̱ xaaꞌ ni̱a̱, te̱ sa̱kanꞌ tu̱ kü̱nta̱ꞌanꞌ ka̱ ni̱a̱, ni̱ nde̱e̱ mï̱iꞌ ka̱ tu̱ ku̱u̱ ni̱a̱ xiinꞌ nde̱e̱ i̱i̱n ne̱ yivi̱ꞌ.
9 Tee̱ꞌ kueinꞌ ko̱o̱ kaꞌnuꞌ na i̱ni̱ Ndiosí xaꞌa̱ꞌ e̱ꞌ te̱ na̱ꞌi̱n nda̱ꞌa a̱ xiinꞌ tu̱ndoꞌo̱ꞌ ña̱ kuni sa̱ndo̱ñuꞌuꞌ a̱ yooꞌ, te̱ kaku̱ na e̱ꞌ sa̱a̱ a̱ ―ni̱ katyi̱ ra̱.
10 Te̱ ni̱ xi̱ni̱ Ndiosí ña̱ ni̱ na̱ma̱ ne̱ ja̱a̱nꞌ nimá ni̱a̱, te̱ ni̱ na̱ko̱o̱ tu̱ ni̱a̱ ña̱ ni̱a̱ꞌa ña̱ xaaꞌ ni̱a̱. Xaꞌa̱ꞌ a̱ ja̱a̱nꞌ na, sa̱kanꞌ tu̱ Ndiosí ndii, nï̱ ka̱ni̱ ña̱ꞌaꞌ a̱ tu̱ndoꞌo̱ꞌ ña̱ ni̱ kuni̱ a̱ sa̱ndoꞌoꞌ ña̱ꞌaꞌ a̱ ja̱a̱nꞌ.