Jonás 2

Kaꞌán Jonás xiinꞌ Ndiosí

Sa̱kanꞌ te̱ ni̱ kaꞌa̱n Jonás xiinꞌ Yahvé Ndiosí ra̱, nde̱e̱ miiꞌ naá ra̱ ti̱xi̱n ti̱a̱kaꞌ ja̱a̱nꞌ ndii:

2 ―Ni̱ xika̱n i̱ ña̱ tyi̱ndi̱e̱eꞌ u̱nꞌ yuꞌu̱ kii̱ꞌ ni̱ yoo̱ i̱ tu̱ndoꞌo̱ꞌ, Yahvé xto̱ꞌo̱ i̱, te̱ ni̱ tyi̱ndi̱e̱eꞌ xna̱ꞌa̱ u̱nꞌ yuꞌu̱. Nde̱e̱ ti̱xi̱n ñu̱u̱ ndi̱i ni̱ kaꞌa̱n ndaꞌvi i̱ xiinꞌ u̱nꞌ, te̱ sa̱aꞌ ni̱ ndii, ni̱ xi̱ni̱ so̱ꞌo̱ u̱nꞌ tatyi̱ꞌ yu̱ꞌuꞌ i̱.

3 Ni̱ sko̱ꞌniꞌ u̱nꞌ yuꞌu̱ nde̱e̱ ma̱ꞌinꞌ mi̱ni̱ miiꞌ kunu va̱, te̱ ndee xa̱ nuu̱ꞌ ti̱kui kui̱ti̱ꞌ ni̱ xi̱ko̱ niꞌiꞌ yuꞌu̱ sa̱a̱ kuaꞌa̱n. Te̱ kii̱ꞌ sakanda u̱nꞌ ti̱kui xiinꞌ kii̱ꞌ satuvi̱ꞌ u̱nꞌ ra̱ ndii, ni̱ xkaꞌndi̱a̱ ndo̱so̱ꞌ raꞌ yuꞌu̱.

4 Sa̱kanꞌ na ni̱ ka̱ꞌanꞌ i̱ ndii, ni̱ na̱ko̱o̱ u̱nꞌ yuꞌu̱ xata̱ꞌ u̱nꞌ, ndisu̱ kusaaꞌ ta̱xi̱ ka̱ na u̱nꞌ xkaꞌndi̱a̱ i̱ ti̱xi̱n yu̱kunꞌ su̱ꞌu̱n miiꞌ yoo u̱nꞌ.

5 Ni̱ na̱saꞌvi̱ nde̱e̱ suku̱nꞌ i̱ ni̱ xa̱a̱ ti̱kui, te̱ ti̱kui mi̱ni̱, miiꞌ kunu i̱i̱n yaví ndiaaꞌ vi̱ꞌ ndii, ni̱ xi̱nu̱ndu̱u̱ raꞌ ka̱niiꞌ i̱. Te̱ ku̱xi̱ ti̱kui ndii, ni̱ ti̱so̱ va̱ a̱ xíniꞌ i̱.

6 Te̱ ni̱ nde̱kaꞌnu̱ i̱ nde̱e̱ ti̱xi̱n ñu̱ꞌuꞌ nde̱e̱ ma̱aꞌ, tee̱ꞌ ni̱ nda̱si̱ i̱ꞌnu̱ a̱ yuꞌu̱ nde̱e̱ ndiꞌiꞌ ni̱ kivi̱ꞌ ni̱ ka̱ꞌanꞌ i̱, ndisu̱ yoꞌó ndii, ni̱ sa̱kakú u̱nꞌ yuꞌu̱ ña̱ ku̱vi̱ i̱, Yahvé Ndiosí kuaꞌa mi̱iꞌ i̱.

7 Kii̱ꞌ ni̱ tu̱u̱ i̱ ña̱ vä̱ꞌa̱ ka̱ i̱ ndii, ni̱ na̱ka̱ꞌan i̱ ña̱ kaꞌa̱n i̱ xiinꞌ yoꞌó Yahvé Ndiosí, te̱ si̱u̱ꞌunꞌ ña̱ ni̱ kaꞌa̱n i̱ xiinꞌ u̱nꞌ ndii, ni̱ na̱xaa̱ a̱ nde̱e̱ vi̱ꞌe̱ su̱ꞌu̱n miiꞌ yoo u̱nꞌ.

8 Te̱ ne̱ ndikún ña̱ kuä̱sa̱ꞌ kuní xini xaꞌanꞌ ndii, xïtoꞌ kaꞌnuꞌ ka̱ ni̱a̱ yoꞌó.

9 Ndisu̱ yuꞌu̱ ndii, na̱kua̱tu̱ kuatiaꞌ i̱ nuu̱ꞌ yoꞌó xiinꞌ ña̱ nasoko̱ꞌ, te̱ sa̱xinú tu̱ i̱ kuento i̱ ña̱ ni̱ ta̱xi̱ i̱ nuu̱ꞌ u̱nꞌ. Sa̱kanꞌ ña̱ i̱i̱n nda̱a̱ꞌ yoꞌó, Yahvé Ndiosí kui̱ti̱ꞌ ku̱vi̱ sa̱kakú ne̱ yivi̱ꞌ ―ni̱ katyi̱ Jonás.

10 Te̱ ni̱ kaꞌa̱n tyuunꞌ Yahvé Ndiosí xiinꞌ ti̱a̱kaꞌ ja̱a̱nꞌ, te̱ ni̱ xaꞌa̱n ska̱naꞌ riꞌ Jonás nuu̱ꞌ ñu̱ꞌuꞌ yu̱ꞌuꞌ mi̱ni̱.