Tu̱tu̱ yoꞌoꞌ nduuꞌ ña̱ kaꞌán xaꞌa̱ꞌ ña̱ ni̱ xa̱a̱ i̱i̱n te̱ ni̱ na̱niꞌ Jonás
Xinuꞌ Jonás nuu̱ꞌ Ndiosí
1
Untaꞌ ndii, ni̱ kaꞌa̱n Yahvé xiinꞌ i̱i̱n te̱ yivi̱ꞌ, te̱ ni̱ na̱niꞌ Jonás, siꞌe̱ Amitai ndii:
2 ―Ki̱ꞌi̱n i̱tyiꞌ te̱ kuꞌu̱n u̱nꞌ ñu̱u̱ tyie̱, ña̱ naniꞌ Nínive, te̱ sa̱kuniꞌ tu̱ꞌu̱n u̱nꞌ ne̱ ndieeꞌ ñu̱u̱ ja̱a̱nꞌ ña̱ nä̱ꞌaꞌ ka̱ te̱ sa̱ndo̱ñuꞌuꞌ i̱ ni̱a̱, sa̱kanꞌ ña̱ kündieni ka̱ xíniꞌ i̱ xaꞌa̱ꞌ ña̱ ni̱a̱ꞌa ña̱ xaaꞌ ni̱a̱ ―ni̱ katyi̱ a̱ xiinꞌ ra̱.
3 Ndisu̱ Jonás ndii, ni̱ kuni̱ ra̱ ki̱ꞌi̱n ra̱ i̱tyiꞌ ña̱ kuaꞌa̱n tu̱ku̱ ñu̱u̱, ña̱ naniꞌ Tarsis, te̱ ku̱nu̱ ra̱ nuu̱ꞌ Yahvé i̱i̱n xaanꞌ miiꞌ xikaꞌ va̱. Sa̱kanꞌ na ni̱ na̱kaa̱ꞌ ra̱ ñu̱u̱ Jope miiꞌ xaá tundo̱oꞌ, te̱ ni̱ tya̱ꞌvi̱ ra̱ i̱i̱n tundo̱oꞌ, tunꞌ kuaꞌa̱n ñu̱u̱ Tarsis ja̱a̱nꞌ, te̱ ni̱ sko̱ꞌnuꞌ ra̱ ti̱xi̱n nu̱ꞌ, te̱ kuaꞌa̱n ra̱ i̱i̱n xaanꞌ miiꞌ xikaꞌ va̱ xiinꞌ te̱ kuaꞌa̱n i̱kanꞌ.
4 Te̱ ndisu̱, Yahvé ndii, ni̱ kaꞌa̱n tyuunꞌ a̱ xiinꞌ i̱i̱n tatyi̱ꞌ ndi̱e̱eꞌ va̱ te̱ ka̱ka̱ a̱ nuu̱ꞌ mi̱ni̱ ja̱a̱nꞌ, sa̱kanꞌ na kuiiꞌ ndi̱e̱eꞌ va̱ ni̱ ku̱u̱n kuiꞌe̱ savi̱ꞌ, te̱ nde̱e̱ ni̱ xa̱ni̱ni̱ te̱ yivi̱ꞌ, te̱ kuaꞌa̱n ja̱a̱nꞌ, ña̱ kua̱tyi̱ xiꞌe̱ ndo̱o̱ tundo̱oꞌ ja̱a̱nꞌ.
5 Sa̱kanꞌ na ni̱ yi̱ꞌvi xa̱va̱ꞌa̱ te̱ xatyuunꞌ xiinꞌ tundo̱oꞌ ja̱a̱nꞌ, te̱ ni̱ xa̱ꞌaꞌ i̱ꞌi̱n ra̱ kaꞌán ra̱ xiinꞌ ndiosí ra̱, te̱ ni̱ xa̱ti̱a̱ tu̱ ra̱ ña̱ꞌa̱ ña̱ ñuꞌuꞌ ti̱xi̱n tundo̱oꞌ ja̱a̱nꞌ, te̱ kü̱u̱ vie̱ kuaꞌa̱ꞌ ka̱ nu̱ꞌ. Ndisu̱ Jonás ndii, ni̱ ndiꞌvi̱ ra̱ i̱i̱n xaanꞌ ti̱xi̱n tundo̱oꞌ ja̱a̱nꞌ, te̱ ni̱ na̱ka̱nduꞌu̱ꞌ ra̱ ni̱ kixi̱n ra̱.
6 Sa̱kanꞌ te̱ ni̱ ku̱ya̱ti̱n te̱ xiinꞌ ña̱ꞌa̱ tundo̱oꞌ ja̱a̱nꞌ miiꞌ kanduꞌu̱ꞌ Jonás kixín ra̱, te̱ ni̱ kaꞌa̱n ra̱ xiinꞌ ra̱ ndii:
―¡Küsu̱n u̱nꞌ nuu̱ꞌ ma̱ꞌna rai̱n! ¡Ndo̱koo̱ te̱ kaꞌa̱n ndaꞌvi u̱nꞌ xiinꞌ Ndiosí u̱nꞌ! ¡Tee̱ꞌ ña̱ ja̱a̱nꞌ kueinꞌ tyi̱ndi̱e̱eꞌ na yooꞌ te̱ kaku̱ e̱ꞌ ni̱, saa̱ꞌ i̱i̱n kii̱ꞌ ndo̱ñuꞌuꞌ e̱ꞌ! ―ni̱ katyi̱ ra̱.
7 Te̱ ni̱ xa̱ꞌaꞌ kaꞌán xiinꞌ taꞌanꞌ te̱ ñuꞌuꞌ ti̱xi̱n tundo̱oꞌ ja̱a̱nꞌ ndii:
―Va̱ꞌa̱ ka̱ ka̱ti̱n e̱ꞌ te̱ ku̱ni̱ e̱ꞌ yo̱o̱ kumiꞌ kua̱tyi̱ xaꞌa̱ꞌ tu̱ndoꞌo̱ꞌ ña̱ ndoꞌoꞌ e̱ꞌ yoꞌoꞌ ―ni̱ katyi̱ ra̱.
Sa̱kanꞌ te̱ ni̱ ka̱ti̱n ra̱ te̱ ni̱ ku̱nda̱ni̱ ra̱ ña̱ Jonás nduuꞌ te̱ kumiꞌ kua̱tyi̱ xaꞌa̱ꞌ tu̱ndoꞌo̱ꞌ ja̱a̱nꞌ.
8 Xaꞌa̱ꞌ a̱ ja̱a̱nꞌ na ni̱ nda̱tuꞌu̱nꞌ ra̱ Jonás ndii:
―Kaꞌa̱n kii̱ꞌ xiinꞌ ndu̱ vi̱ti̱n ndee xaꞌa̱ꞌ na ndoꞌoꞌ e̱ꞌ tu̱ndoꞌo̱ꞌ yoꞌoꞌ. ¿Ndee nuu̱ꞌ tyu̱u̱n xaaꞌ u̱nꞌ? ¿Miiꞌ ni̱ ki̱e̱e̱ u̱nꞌ? ¿Ndee ñu̱u̱ ni̱ ki̱e̱e̱ u̱nꞌ? ¿Ndee ñu̱ꞌuꞌ ni̱ tuvi̱ u̱nꞌ? ―ni̱ katyi̱ ra̱.
9 Te̱ ni̱ na̱kui̱i̱n Jonás kaꞌán ra̱ ndii:
―I̱i̱n te̱ hebreo nduuꞌ i̱, te̱ xakaꞌnuꞌ i̱ Yahvé, Ndiosí, ña̱ nduꞌu̱ꞌ ndi̱viꞌ, ña̱ ni̱ xa̱ꞌa̱ mi̱ni̱ kaꞌnuꞌ xiinꞌ ñu̱ꞌuꞌ i̱i̱n yivi̱ꞌ ―ni̱ katyi̱ ra̱.
10 Te̱ sa̱kanꞌ na ni̱ yi̱ꞌvi va̱ te̱ yivi̱ꞌ ja̱a̱nꞌ, te̱ ni̱ nda̱tuꞌu̱nꞌ ña̱ꞌaꞌ ra̱ ndii:
―¿Ndiotyun na ni̱ xa̱a̱ u̱nꞌ ña̱ ja̱a̱nꞌ? ―ni̱ katyi̱ ra̱.
Ni̱ nda̱tuꞌu̱nꞌ ña̱ꞌaꞌ ra̱ sa̱kanꞌ kua̱tyi̱ ndii, xa̱ xiní te̱ ja̱a̱nꞌ ña̱ nuu̱ꞌ Yahvé xikaꞌ xinuꞌ Jonás, sa̱kanꞌ ña̱ mi̱iꞌ Jonás ja̱a̱nꞌ xa̱ ni̱ nda̱tuꞌunꞌ nuu̱ꞌ te̱ kuaꞌa̱n xiinꞌ ra̱ ja̱a̱nꞌ, ña̱ ni̱ xa̱a̱ ra̱.
11 Ndisu̱ xaꞌa̱ꞌ a̱ ña̱ so̱ꞌo̱ ndi̱e̱eꞌ ka̱ xikaꞌ tatyi̱ꞌ nuu̱ꞌ mi̱ni̱ ja̱a̱nꞌ, na ni̱ nda̱tuꞌu̱nꞌ ra̱ Jonás ndii:
―¿Yo̱o̱ nduuꞌ a̱ ku̱vi̱ sa̱a̱ ndu̱ xiinꞌ u̱nꞌ te̱ vi̱kuii̱n ña̱ i̱yo̱ kaa̱ꞌ nuu̱ꞌ mi̱ni̱ yoꞌoꞌ? ―ni̱ katyi̱ ra̱.
12 Sa̱kanꞌ te̱ ni̱ na̱kui̱i̱n Jonás ndii:
―Na̱ꞌi̱n ndo̱ꞌ yuꞌu̱ te̱ sko̱ꞌniꞌ ndo̱ꞌ yuꞌu̱ mi̱ni̱, te̱ na̱ku̱naa̱ taxi̱nꞌ ti̱kui. Kua̱tyi̱ ndii, xiní i̱ ña̱ su̱vi̱ i̱ kumiꞌ kua̱tyi̱ te̱ kuunꞌ kuiꞌe̱ ndi̱e̱eꞌ va̱ savi̱ꞌ kaa̱ꞌ, te̱ sandoꞌoꞌ a̱ ndoꞌó ―ni̱ katyi̱ ra̱.
13 I̱kanꞌ te̱ ni̱ xa̱ꞌaꞌ te̱ satuvi̱ꞌ tundo̱oꞌ ja̱a̱nꞌ xanduxa̱ꞌ ra̱ sa̱na̱ndikoꞌ ra̱ nu̱ꞌ yu̱ꞌuꞌ mi̱ni̱, ndisu̱ nï̱ kooꞌ tyukuuꞌ ra̱, sa̱kanꞌ ña̱ ti̱kui mi̱ni̱ ja̱a̱nꞌ ndii, so̱ꞌo̱ ndi̱e̱eꞌ nde̱e̱ ndi̱e̱eꞌ ka̱ xikoꞌ niꞌiꞌ ña̱ꞌaꞌ raꞌ.
14 Xaꞌa̱ꞌ a̱ ja̱a̱nꞌ na ni̱ kaꞌa̱n ndaꞌvi ra̱ xiinꞌ Yahvé Ndiosí ndii:
―¡Yahvé Ndiosí, sa̱a̱ u̱nꞌ ña̱ va̱ꞌa̱ te̱ sä̱ndo̱ñuꞌuꞌ u̱nꞌ nduꞌu̱ xaꞌa̱ꞌ ku̱a̱tyi̱ te̱ yivi̱ꞌ yoꞌoꞌ, ni̱ nde̱e̱ tï̱i̱n kua̱tyi̱ tu̱ u̱nꞌ ndu̱ naa kuaꞌa̱n sa̱kanꞌ ku̱vi̱ ra̱ naaꞌ köo̱ꞌ ku̱a̱tyi̱ ra̱, sa̱kanꞌ ña̱ mi̱iꞌ yoꞌó ni̱ kaꞌa̱n tuní ña̱ sa̱kanꞌ kuní u̱nꞌ, Yahvé Ndiosí! ―ni̱ katyi̱ ra̱.
15 Sa̱kanꞌ na ni̱ ti̱i̱n te̱ satuvi̱ꞌ tundo̱oꞌ ja̱a̱nꞌ Jonás, te̱ ni̱ sko̱ꞌniꞌ ña̱ꞌaꞌ ra̱ mi̱ni̱, xa̱kaꞌán e̱ꞌ te̱ ni̱ na̱ku̱naa̱ taxi̱nꞌ ti̱kui mi̱ni̱ ja̱a̱nꞌ.
16 Te̱ kii̱ꞌ ni̱ xi̱ni̱ te̱ ja̱a̱nꞌ ña̱ ni̱ xa̱a̱ Ndiosí i̱kanꞌ ndii, ni̱ na̱nda̱ni̱ yiꞌvi va̱ ra̱, te̱ ni̱ xa̱ꞌmi̱ ra̱ ña̱ nasoko̱ꞌ nuu̱ꞌ a̱, te̱ ni̱ ta̱xi̱ tu̱ ra̱ kuento ra̱ ña̱ sa̱kaꞌnuꞌ naa sa̱kaꞌnuꞌ ña̱ꞌaꞌ ra̱.
17 Ndisu̱ Yahvé Ndiosí ndii, ni̱ sa̱kooꞌ tu̱ꞌva̱ a̱ i̱i̱n ti̱a̱kaꞌ tyie̱ va̱ te̱ ni̱ ko̱koꞌ riꞌ Jonás ja̱a̱nꞌ, te̱ ni̱ naa̱ ra̱ ti̱xi̱n ti̱a̱kaꞌ ja̱a̱nꞌ uni̱ taꞌan kivi̱ꞌ xiinꞌ uni̱ taꞌan ñu̱u.
