So̱ꞌo̱ sa̱a̱ a̱ kii̱ꞌ kundi̱koꞌ i̱i̱n yivi̱ꞌ
12
‘Te̱ kivi̱ꞌ ja̱a̱nꞌ ndii, ki̱xi̱n Miguel, i̱i̱n ángele kaꞌnuꞌ va̱, ña̱ xitoꞌ ndoꞌó, ne̱ Israel.
Te̱ ko̱o̱ kuaꞌa̱ꞌ va̱ tu̱ndoꞌo̱ꞌ kivi̱ꞌ ja̱a̱nꞌ,
te̱ naa ña̱ ja̱a̱nꞌ ndii, kö̱o̱ kivi̱ꞌ ni̱ yoo̱ i̱nga̱ a̱
nde̱e̱ kii̱ꞌ ni̱ xa̱ꞌaꞌ yoo ne̱ yivi̱ꞌ nuu̱ꞌ ñu̱ꞌuꞌ i̱i̱n yivi̱ꞌ,
ndisu̱ kivi̱ꞌ ja̱a̱nꞌ sa̱ndoó ndiká Ndiosí sa̱kuuꞌ ne̱ ñu̱u̱ u̱nꞌ,
ne̱ yoso̱ꞌ kivi̱ꞌ nuu̱ꞌ tu̱tu̱ a̱.
2 Te̱ kuaꞌa̱ꞌ ne̱ ni̱ xiꞌi̱ ñuꞌuꞌ ti̱xi̱n ñu̱ꞌuꞌ na̱ti̱a̱ku̱ kii̱ꞌ sa̱kanꞌ,
sa̱va̱ ni̱a̱ na̱ti̱a̱ku̱ te̱ na̱ti̱i̱n ni̱a̱ kivi̱ꞌ ñu̱u̱ ña̱ kö̱o̱ kivi̱ꞌ ndiꞌiꞌ,
te̱ sa̱va̱ tu̱ku̱ ni̱a̱ na̱ti̱a̱ku̱ te̱ na̱ti̱i̱n ni̱a̱ ña̱ kaꞌanꞌ nuu̱ꞌ,
xiinꞌ ña̱ ko̱o̱ ni̱a̱ tu̱ndoꞌo̱ꞌ nde̱e̱ ndiꞌiꞌ ni̱ kivi̱ꞌ.
3 Te̱ te̱ xini tuní ndii, yiꞌe̱ nda̱tu̱nꞌ ra̱ nde̱e̱ naa ña̱ tuún ndieeꞌ ndi̱viꞌ.
Te̱ te̱ ni̱ sa̱niaꞌá kuaꞌa̱ꞌ ne̱ yivi̱ꞌ ña̱ ka̱ka̱ ni̱a̱ i̱tyiꞌ nda̱ku ndii,
yiꞌe̱ ra̱ nde̱e̱ ndiꞌiꞌ ni̱ kivi̱ꞌ nde̱e̱ naa tiuu̱nꞌ ndieeꞌ ndi̱viꞌ.
4 ‘Ndisu̱ yoꞌó, Daniel, ta̱xa̱ꞌa̱ si̱ꞌe u̱nꞌ ña̱ ni̱ kaꞌa̱n i̱ xiinꞌ u̱nꞌ ñaa̱ꞌ, te̱ nda̱si̱ kutu̱ꞌ u̱nꞌ tu̱tu̱ ñaa̱ꞌ nde̱e̱ xaa̱ kivi̱ꞌ soꞌo̱ꞌ ndiꞌiꞌ. Sa̱kanꞌ ña̱ kuaꞌa̱ꞌ va̱ te̱ yivi̱ꞌ ka̱ka̱ ndu̱u̱ na̱ndu̱kuꞌ ña̱ xini tuní, te̱ ku̱ndityi ka̱ ra̱ xiinꞌ ña̱ xini tuní ja̱a̱nꞌ kaꞌanꞌ ra̱,’ ni̱ katyi̱ ángele ja̱a̱nꞌ.
5 “Sa̱kanꞌ te̱ ni̱ xi̱ni̱ yuꞌu̱, Daniel, itaꞌ ndityi i̱nga̱ ka̱ uvi̱ taꞌan te̱ yivi̱ꞌ yu̱ꞌuꞌ i̱ti̱a̱ ja̱a̱nꞌ, i̱i̱n ra̱ iinꞌ i̱i̱n taꞌviꞌ yu̱ꞌuꞌ i̱ti̱a̱, te̱ i̱nga̱ ra̱ iinꞌ tu̱ku̱ taꞌviꞌ.
6 Te̱ ni̱ kaꞌa̱n i̱i̱n te̱ iinꞌ yu̱ꞌuꞌ i̱ti̱a̱ ja̱a̱nꞌ xiinꞌ te̱ niꞌnuꞌ toto̱ nda̱tu̱nꞌ, ña̱ ni̱ ku̱a̱ꞌa̱ xiinꞌ yuꞌva̱ lino, te̱ iinꞌ nuu̱ꞌ ti̱kui i̱ti̱a̱ ja̱a̱nꞌ ndii: ‘¿A̱ma̱ vi̱ꞌ kuꞌu̱n ndi̱koꞌ sa̱kuuꞌ ña̱ i̱yo̱ nia kaa̱ꞌ?,’ ni̱ katyi̱ ra̱.
7 “Te̱ ni̱ ndo̱ni̱ꞌi̱ te̱ niꞌnuꞌ toto̱, ña̱ ni̱ ku̱a̱ꞌa̱ xiinꞌ yuꞌva̱ lino, te̱ iinꞌ nuu̱ꞌ ti̱kui i̱ti̱a̱ ja̱a̱nꞌ, uvi̱ sa̱aꞌ nda̱ꞌaꞌ ra̱, te̱ ni̱ xi̱ni̱ so̱ꞌo̱ i̱ ni̱ ti̱i̱n ndi̱a̱a̱ ra̱ kivi̱ꞌ Ndiosí, ña̱ tiaku nde̱e̱ ndiꞌiꞌ ni̱ kivi̱ꞌ, te̱ ni̱ kaꞌa̱n ra̱ ndii: ‘Uni̱ kuiya̱ yoso̱ꞌ sa̱va̱ ka̱ kuní te̱ kuꞌu̱n ndi̱koꞌ sa̱kuuꞌ ña̱ i̱yo̱ kaa̱ꞌ. Kii̱ꞌ ndi̱ꞌi̱ sa̱nduxín te̱ yivi̱ꞌ sa̱kuuꞌ ña̱ ndi̱e̱eꞌ ne̱ vi̱ꞌe̱ Israel, ne̱ nduuꞌ kuenta Ndiosí,’ ni̱ katyi̱ ra̱.
8 “Te̱ ni̱ xi̱ni̱ so̱ꞌo̱ i̱, ndisu̱ nï̱ ku̱nda̱ni̱ i̱ ndee ña̱ kaꞌán ra̱ xiinꞌ i̱, te̱ ni̱ kaꞌa̱n i̱ xiinꞌ ra̱ ndii: ¿Ndee ña̱ xkaꞌndi̱a̱ kii̱ꞌ kuꞌu̱n ndi̱ꞌi̱ sa̱kuuꞌ ña̱ ja̱a̱nꞌ?, ni̱ katyi̱ i̱.
9 “Te̱ ni̱ kaꞌa̱n te̱ ja̱a̱nꞌ xiinꞌ i̱ ndii: ‘Daniel, kuaꞌa̱n na kuaꞌa̱n u̱nꞌ nuu̱ꞌ i̱tyiꞌ ña̱ xikaꞌ u̱nꞌ, sa̱kanꞌ ña̱, ña̱ ni̱ kaꞌa̱n i̱ xiinꞌ u̱nꞌ ja̱a̱nꞌ ndii, kuní a̱ ko̱o̱ si̱ꞌe a̱ nde̱e̱ ska̱tyiꞌ xaa̱ kivi̱ꞌ soꞌo̱ꞌ ndiꞌiꞌ.
10 Kuaꞌa̱ꞌ xa̱va̱ꞌa̱ ne̱ yivi̱ꞌ, ne̱ i̱ni̱ xini Ndiosí, ku̱ndo̱ꞌo̱ tu̱ndoꞌo̱ꞌ, ña̱ ni̱ kaꞌa̱n i̱ xiinꞌ u̱nꞌ xaꞌa̱ꞌ ja̱a̱nꞌ, ndisu̱ kii̱ꞌ ndi̱ꞌi̱ ku̱ndo̱ꞌo̱ ni̱a̱ ña̱ ja̱a̱nꞌ ndii, ndu̱ndo̱o̱ ni̱a̱, te̱ ndu̱nda̱ku tu̱ nimá ni̱a̱ nuu̱ꞌ Ndiosí. Te̱ ne̱ xaaꞌ ña̱ ni̱a̱ꞌa ndii, sa̱a̱ na xaaꞌ ni̱a̱ ña̱ ni̱a̱ꞌa ja̱a̱nꞌ, te̱ ni̱ nde̱e̱ kü̱nda̱ni̱ ni̱a̱ ndiotyun na xaaꞌ ni̱a̱ ña̱ ja̱a̱nꞌ, ndisu̱ ne̱ xini tuní ndii, ku̱nda̱ni̱ kaxiꞌ ni̱a̱ sa̱kuuꞌ ña̱ ja̱a̱nꞌ.
11 Nde̱e̱ kii̱ꞌ sa̱i̱i̱n kuiín te̱ yivi̱ꞌ ña̱ xaꞌmiꞌ ne̱ yivi̱ꞌ ki̱tiꞌ nuu̱ꞌ Ndiosí, te̱ nde̱e̱ kivi̱ꞌ ña̱ ka̱ni̱ ra̱ ña̱ xeꞌnaꞌ ki̱ni̱ xa̱va̱ꞌa̱ kaaꞌ miiꞌ ni̱ xa̱ꞌmi̱ ni̱a̱ ki̱tiꞌ ja̱a̱nꞌ ndii, i̱i̱n mií uvi̱ ciento ku̱miꞌ xi̱ko̱ uxi̱ kivi̱ꞌ xkaꞌndi̱a̱.
12 Sa̱ñuꞌun va̱ Ndiosí sa̱kuuꞌ ne̱ ndiatuꞌ, te̱ itaꞌ ni̱ꞌi̱ tu̱ ni̱a̱ nuu̱ꞌ i̱tyiꞌ a̱ nde̱e̱ xaa̱ ña̱ i̱i̱n mií uni̱ ciento oko̱ xaꞌu̱n kivi̱ꞌ.
13 Te̱ yoꞌó ndii, ku̱ndiku̱n na ku̱ndiku̱n u̱nꞌ i̱tyiꞌ Ndiosí, te̱ na̱ndiee̱ꞌ tu̱ u̱nꞌ, sa̱kanꞌ ña̱ kii̱ꞌ xaa̱ kivi̱ꞌ soꞌo̱ꞌ ndiꞌiꞌ ndii, na̱ti̱a̱ku̱ u̱nꞌ te̱ na̱ti̱i̱n u̱nꞌ tu̱mani̱ꞌ, ña̱ ni̱ ta̱xa̱ꞌa̱ Ndiosí xaꞌa̱ꞌ u̱nꞌ ku̱ndu̱u̱ ña̱ꞌa̱ u̱nꞌ,’ ni̱ katyi̱ ra̱ xiinꞌ i̱.”