So̱ꞌo̱ ni̱ xa̱a̱ a̱ kii̱ꞌ ni̱ na̱saa̱ꞌ Jonás ni̱ xi̱ni̱ ra̱ Ndiosí
4
Ndisu̱ Jonás ndii, nï̱ xta̱ni̱ xa̱tyiꞌ ra̱ ña̱ ni̱ xa̱a̱ Yahvé, sa̱kanꞌ na ni̱ xiꞌe̱ va̱ ra̱,
2 kaꞌán ra̱ xiinꞌ a̱ ndii:
―A̱anꞌ va̱ Yahvé, xa̱ ni̱ kaꞌa̱n yuꞌu̱ ña̱, ña̱ kaa̱ꞌ sa̱a̱ u̱nꞌ, kii̱ꞌ nduꞌu̱ ka̱ i̱ miiꞌ ni̱ ki̱e̱e̱ i̱. Sa̱kanꞌ na yatyi̱ va̱ ni̱ kuni̱ i̱ ku̱nu̱ i̱ te̱ kuꞌu̱n i̱ ñu̱u̱ Tarsis. Kua̱tyi̱ ndii, xiní yuꞌu̱ ña̱ yoꞌó ndii, Ndiosí kaꞌnuꞌ i̱ni̱ va̱ nduuꞌ u̱nꞌ, te̱ xikuitaꞌnú i̱ni̱ u̱nꞌ xaꞌa̱ꞌ ne̱ yivi̱ꞌ, te̱ sa̱kanꞌ tu̱ nä̱saa̱ꞌ ni̱a̱ꞌa̱ u̱nꞌ xini u̱nꞌ ne̱ yivi̱ꞌ, te̱ ndisu̱ yoo kaꞌnuꞌ kuaꞌa̱ꞌ va̱ i̱ni̱ u̱nꞌ xaꞌa̱ꞌ ni̱a̱, te̱ sa̱kanꞌ tu̱ xikuitaꞌnú i̱ni̱ u̱nꞌ xaꞌa̱ꞌ kua̱tyi̱ ni̱a̱, te̱ kii̱ꞌ kuni sa̱ndo̱ñuꞌuꞌ ña̱ꞌaꞌ u̱nꞌ ndii, naꞌinꞌ nda̱ꞌaꞌ u̱nꞌ xiinꞌ ña̱ kuni sa̱a̱ u̱nꞌ.
3 Xaꞌa̱ꞌ a̱ ja̱a̱nꞌ na kaꞌán ndaꞌvi i̱ xiinꞌ u̱nꞌ ña̱ ka̱ꞌni̱ꞌ u̱nꞌ yuꞌu̱, kua̱tyi̱ ndii nde̱e̱ tyaaꞌ ka̱ ku̱vi̱ i̱ te̱ sa̱kanꞌ ña̱ tiaku i̱ ―ni̱ katyi̱ Jonás xiinꞌ Ndiosí.
4 Sa̱kanꞌ na ni̱ kaꞌa̱n Yahvé xiinꞌ Jonás ndii:
―Vä̱ꞌa̱ xa̱tyiꞌ xaaꞌ u̱nꞌ ña̱ nasaáꞌ ndikui u̱nꞌ ―ni̱ katyi̱ a̱ xiinꞌ ra̱.
5 Te̱ ni̱ ke̱ta̱ Jonás ñu̱u̱ ja̱a̱nꞌ, te̱ kuaꞌa̱n ra̱ i̱i̱n xaanꞌ ya̱ti̱n miiꞌ tuviꞌ i̱ꞌnu̱ naá a̱, kuaꞌa̱n miiꞌ ketaꞌ ñu̱ꞌu̱ nduuꞌ a̱ ja̱a̱nꞌ. I̱kanꞌ te̱ ni̱ xa̱ꞌa̱ ra̱ i̱i̱n ti̱a̱ꞌvaꞌ ku̱ndu̱u̱ ka̱tiꞌ ra̱, te̱ ni̱ xi̱ku̱nduꞌu̱ꞌ ra̱ i̱kanꞌ te̱ ku̱ni̱ ra̱ yo̱o̱ nduuꞌ a̱ ku̱ndo̱ꞌo̱ ñu̱u̱ ja̱a̱nꞌ.
6 Sa̱kanꞌ te̱ ni̱ sa̱kuaꞌnuꞌ Yahvé Ndiosí i̱i̱n tunꞌ yoo̱, tunꞌ naniꞌ ricino, miiꞌ nduꞌu̱ꞌ Jonás ja̱a̱nꞌ, te̱ ko̱o̱ ka̱tiꞌ xíniꞌ ra̱. Sa̱kanꞌ te̱ na̱ku̱naa̱ va̱ꞌa̱ na nimá ra̱ xiinꞌ ña̱ ndoꞌoꞌ ra̱. Te̱ va̱ꞌa̱ yaꞌa̱ ni̱ ku̱ni̱ Jonás ni̱ xi̱ni̱ ra̱ tunꞌ ka̱tiꞌ ja̱a̱nꞌ.
7 Ndisu̱ ni̱a̱ꞌa̱ va̱ kua̱xi̱ kitúꞌ tu̱ku̱ kivi̱ꞌ ndii, mi̱iꞌ Ndiosí ni̱ ti̱ꞌviꞌ i̱i̱n nuu̱ꞌ ti̱nda̱kuꞌ te̱ ni̱ xa̱xi̱ꞌ riꞌ tunꞌ ka̱tiꞌ ja̱a̱nꞌ, te̱ ni̱ ityi̱ nu̱ꞌ.
8 Te̱ kii̱ꞌ ni̱ ke̱ta̱ ñu̱ꞌu̱ ndii, mi̱iꞌ tu̱ Ndiosí ni̱ xa̱a̱ sa̱kanꞌ te̱ ni̱ ki̱xi̱n i̱i̱n tatyi̱ꞌ ndi̱e̱eꞌ i̱ꞌniꞌ xa̱va̱ꞌa̱, te̱ ni̱ xa̱ꞌmi̱ kooꞌ tyukuuꞌ ñu̱ꞌu̱ xíniꞌ Jonás, xa̱ yooꞌ ra̱ ku̱vi̱ xa̱tyiꞌ ra̱, xaꞌa̱ꞌ a̱ ja̱a̱nꞌ naaꞌ nde̱e̱ ni̱ ndi̱o̱o̱ꞌ i̱ni̱ ra̱ ku̱vi̱ xa̱tyiꞌ ra̱, kaꞌán ra̱ ndii:
―Nde̱e̱ tyaaꞌ ka̱ ku̱vi̱ i̱ te̱ sa̱kanꞌ ña̱ tiaku ndoꞌoꞌ i̱ ―ni̱ katyi̱ ra̱.
9 Sa̱kanꞌ te̱ ni̱ nda̱tuꞌu̱nꞌ ña̱ꞌaꞌ Ndiosí ndii:
―¿Ñáá tuu u̱nꞌ ndii, va̱ꞌa̱ xaaꞌ u̱nꞌ ña̱ nasaáꞌ xa̱va̱ꞌa̱ u̱nꞌ xaꞌa̱ꞌ tunꞌ ka̱tiꞌ kaa̱ꞌ? ―ni̱ katyi̱ a̱.
Te̱ ni̱ na̱kui̱i̱n Jonás nuu̱ꞌ a̱ ndii:
―Uun, va̱ꞌa̱ xaaꞌ i̱ ña̱ nasaáꞌ i̱ nde̱e̱ yoo i̱ ku̱vi̱ i̱ ―ni̱ katyi̱ ra̱.
10 Xaꞌa̱ꞌ a̱ ja̱a̱nꞌ naaꞌ ni̱ na̱kui̱i̱n Yahvé nuu̱ꞌ ra̱ ndii:
―Naaꞌ ndani̱ yaꞌa̱ yoꞌó i̱tunꞌ ka̱tiꞌ ja̱a̱nꞌ, tee̱ꞌ ndee kö̱o̱ꞌ nu̱ꞌ ni̱ tyi̱ꞌi̱ꞌ u̱nꞌ, ni̱ nde̱e̱ kö̱o̱ꞌ tu̱ nu̱ꞌ ni̱ sa̱kuaꞌnuꞌ u̱nꞌ, kua̱tyi̱ ndii, i̱i̱n ñu̱u ni̱ naku̱n nu̱ꞌ, te̱ tu̱ku̱ ñu̱u ni̱ ndo̱ñuꞌuꞌ nu̱ꞌ.
11 Sa̱a̱ ka̱ vi̱ꞌ tu̱ kuní a̱ ña̱ ko̱o̱ kaꞌnuꞌ i̱ni̱ yuꞌu̱ xaꞌa̱ꞌ ñu̱u̱ tyie̱, ña̱ nduuꞌ Nínive, miiꞌ ndieeꞌ yaꞌa̱ ciento oko̱ mií ne̱ yivi̱ꞌ, ne̱ yoo ni̱a̱a̱ꞌ, te̱ yoo kuaꞌa̱ꞌ yaꞌa̱ tu̱ ki̱tiꞌ ―ni̱ katyi̱ a̱ xiinꞌ ra̱.