So̱ꞌo̱ ni̱ xa̱a̱ a̱ kii̱ꞌ ni̱ sa̱tuví a̱ nuu̱ꞌ Daniel kii̱ꞌ iinꞌ ra̱ yu̱ꞌuꞌ i̱ti̱a̱ Tigris
10
Kii̱ꞌ xa̱ kuaꞌa̱n uni̱ kuiya̱ ña̱ xaꞌndia tyuunꞌ rey Ciro nuu̱ꞌ ñu̱ꞌuꞌ Persia ndii, ni̱ sa̱tuví a̱ nuu̱ꞌ Daniel, te̱ naniꞌ tu̱ Beltsasar, i̱i̱n ña̱ ndi̱xa̱. Te̱ ni̱ ku̱nda̱ni̱ ra̱ ña̱ ña̱ ni̱ sa̱tuví a̱ nuu̱ꞌ ra̱ ja̱a̱nꞌ ndii, kaꞌán a̱ xaꞌa̱ꞌ ña̱ ko̱o̱ nuu̱ꞌ kuꞌu̱n e̱ꞌ, nakuuꞌ ña̱ ko̱o̱ ñuꞌu̱, xiinꞌ ña̱ sa̱ndoꞌoꞌ te̱ xíinꞌ ne̱ yivi̱ꞌ i̱i̱n yivi̱ꞌ.
2 “Yuꞌu̱, Daniel, kii̱ꞌ ni̱ sa̱tuví a̱ ña̱ ja̱a̱nꞌ nuu̱ꞌ i̱ ndii, niiꞌ uni̱ taꞌan xi̱mana ni̱ xika̱ sutyiꞌ i̱ni̱ va̱ i̱.
3 Nï̱ xi̱xi̱ i̱ ña̱ xaxi̱ꞌ ña̱ asi̱nꞌ va̱, ni̱ nde̱e̱ nï̱ xi̱xi̱ tu̱ i̱ nde̱i̱ꞌ, ni̱ nde̱e̱ nï̱ xi̱ꞌi̱ tu̱ i̱ vino, ni̱ nde̱e̱ nï̱ xa̱ki̱n tu̱ i̱ ti̱kui xavixínꞌ i̱i̱nꞌ i̱, nde̱e̱ ni̱ xinu̱ ña̱ uni̱ taꞌan xi̱mana ja̱a̱nꞌ.
4 Te̱ kivi̱ꞌ ña̱ oko̱ ku̱miꞌ xikaꞌ yoo nu̱uꞌ xaꞌa̱ꞌ kuiya̱ ndii, iinꞌ yuꞌu̱ yu̱ꞌuꞌ i̱ti̱a̱ tyie̱ ña̱ naniꞌ Tigris.
5 Te̱ ni̱ ndo̱ni̱ꞌi̱ i̱ nuu̱ꞌ i̱, te̱ ni̱ xini i̱ i̱i̱n ña̱ kaaꞌ nde̱e̱ naa te̱ yivi̱ꞌ, te̱ niꞌnuꞌ ra̱ toto̱ ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ yuꞌva̱ lino, te̱ ña̱ tiín to̱koꞌ ra̱ ndii, xiinꞌ mi̱iꞌ ndiꞌiꞌ oro ni̱ ku̱a̱ꞌa̱ a̱.
6 Te̱ yiꞌé ka̱niiꞌ a̱ nde̱e̱ naa yuu̱ꞌ ña̱ naniꞌ topacio, te̱ nuu̱ꞌ ra̱ ndii, yiꞌé a̱ nde̱e̱ naa ñuꞌu̱ savi̱ꞌ, te̱ ndu̱tyiꞌ nuu̱ꞌ ra̱ ndii, yiꞌé a̱ nde̱e̱ naa tyoon kii̱ꞌ tuún nuꞌ, te̱ nda̱ꞌaꞌ ra̱ xiinꞌ xaꞌa̱ꞌ ra̱ ndii, yiꞌé a̱ nde̱e̱ naa ka̱a̱ bronce, te̱ tatyi̱ꞌ ra̱ kii̱ꞌ kaꞌán ra̱ ndii, niꞌi̱ a̱ nde̱e̱ naa kii̱ꞌ ndatuꞌunꞌ kuaꞌa̱ꞌ xa̱va̱ꞌa̱ ne̱ yivi̱ꞌ.
7 “Tee̱ꞌ ndee itaꞌ te̱ yivi̱ꞌ i̱kanꞌ xiinꞌ i̱ ndii, i̱i̱n nda̱a̱ꞌ yuꞌu̱, Daniel ku̱i̱ti̱ꞌ, ni̱ xi̱ni̱ ña̱ ni̱ sa̱tuví a̱ nuu̱ꞌ i̱ ja̱a̱nꞌ, sa̱kanꞌ ña̱ ni̱ yi̱ꞌvi xa̱va̱ꞌa̱ ra̱, te̱ ni̱ ta̱xtaꞌan ndo̱o̱ ra̱ kuaꞌa̱n ti̱si̱ꞌe ra̱.
8 Sa̱kanꞌ na kuiiꞌ ni̱ ndoo̱ i̱i̱n nda̱a̱ꞌ i̱ iinꞌ i̱ i̱kanꞌ xitoꞌ ndiꞌe̱ꞌ i̱ ña̱ ni̱ sa̱tuví a̱ nuu̱ꞌ i̱ ja̱a̱nꞌ. Te̱ ni̱ ndo̱ko̱ ndo̱o̱ ña̱ ndi̱e̱eꞌ i̱, te̱ ni̱ ku̱u̱ ya̱a̱ ndi̱i ndo̱o̱ nuu̱ꞌ i̱ ni̱ xa̱a̱ a̱.
9 Sa̱kanꞌ te̱ ni̱ xi̱ni̱ so̱ꞌo̱ i̱ kaꞌán ra̱ xiinꞌ i̱. Te̱ kii̱ꞌ ni̱ xi̱ni̱ so̱ꞌo̱ i̱ tatyi̱ꞌ yu̱ꞌuꞌ ra̱ ndii, ni̱ ku̱u̱ ni̱a̱a̱ꞌ i̱, te̱ ni̱ ndu̱va̱ i̱ kanduꞌu̱ꞌ ndieeꞌ i̱ nuu̱ꞌ ñu̱ꞌuꞌ, nde̱e̱ ni̱ kixi̱n i̱.
10 Xa̱ sa̱kanꞌ ni̱ te̱ ni̱ tondi̱a̱ nda̱ꞌaꞌ ra̱ yuꞌu̱, te̱ ni̱ ndo̱ni̱ꞌi̱ ra̱ yuꞌu̱, te̱ ni̱ xi̱kuii̱n xitiꞌ i̱ tuviꞌ nda̱ꞌaꞌ i̱ ñu̱ꞌuꞌ ni̱ xa̱a̱ ra̱.
11 Te̱ ni̱ kaꞌa̱n ka̱ ra̱ xiinꞌ i̱ ndii: ‘Daniel, ndo̱ndi̱tyi̱ kiꞌi̱ꞌ te̱ ku̱ni̱ so̱ꞌo̱ kaxiꞌ va̱ u̱nꞌ ña̱ kaꞌa̱n i̱ xiinꞌ u̱nꞌ vi̱ti̱n. Ni̱ ti̱ꞌviꞌ Ndiosí yuꞌu̱ kuaxi̱ ko̱to̱ i̱ yoꞌó, sa̱kanꞌ ña̱ ndani̱ va̱ a̱ yoꞌó,’ ni̱ katyi̱ ra̱.
“Te̱ kii̱ꞌ kaꞌán ka̱ ra̱ ña̱ ja̱a̱nꞌ xiinꞌ i̱, te̱ ni̱ ndo̱ndi̱tyi̱ i̱ nde̱e̱ kisiꞌ vi̱ꞌ a̱ yuꞌu̱.
12 Sa̱kanꞌ te̱ tu̱ku̱ ni̱ ni̱ kaꞌa̱n ra̱ xiinꞌ i̱ ndii: ‘Kuäa̱n yiꞌvi u̱nꞌ, Daniel, sa̱kanꞌ ña̱ nde̱e̱ kivi̱ꞌ nu̱uꞌ kii̱ꞌ ni̱ xa̱ꞌaꞌ kaꞌán u̱nꞌ xiinꞌ Ndiosí, te̱ ta̱xi̱ a̱ ku̱nda̱ni̱ u̱nꞌ ña̱ vixi, te̱ ni̱ sa̱nuuꞌ tu̱ u̱nꞌ nimá u̱nꞌ nuu̱ꞌ a̱ ndii, ni̱ xi̱ni̱ so̱ꞌo̱ a̱ ña̱ kaꞌán u̱nꞌ xiinꞌ a̱. Te̱ xaꞌa̱ꞌ a̱ ña̱ ni̱ kaꞌa̱n u̱nꞌ xiinꞌ a̱ ja̱a̱nꞌ na kuaxi̱ ko̱to̱ i̱ yoꞌó.
13 Ángele, ña̱ xaꞌndia tyuunꞌ nuu̱ꞌ te̱ xaꞌndia tyuunꞌ nuu̱ꞌ ne̱ ndi̱e̱e̱ꞌ nuu̱ꞌ ñu̱ꞌuꞌ Persia, ni̱ xi̱ku̱i̱taꞌnu̱ ndi̱e̱eꞌ va̱ nuu̱ꞌ i̱ niiꞌ oko̱ i̱i̱n kivi̱ꞌ, ndisu̱ ángele Miguel ni̱ ki̱xi̱n tyi̱ndi̱e̱eꞌ yuꞌu̱. Te̱ ña̱ ja̱a̱nꞌ nduuꞌ i̱i̱n ña̱ kumiꞌ kuaꞌa̱ꞌ kotyukuuꞌ ka̱ ña̱ ndi̱e̱eꞌ ndi̱viꞌ. Te̱ ña̱ ja̱a̱nꞌ ni̱ ndoo̱ kuntaꞌanꞌ xiinꞌ ángele ni̱a̱ꞌa ja̱a̱nꞌ.
14 Te̱ kuaxi̱ i̱ kaꞌa̱n i̱ xiinꞌ u̱nꞌ ña̱ ku̱ndo̱ꞌo̱ ne̱ taꞌanꞌ u̱nꞌ kivi̱ꞌ soꞌo̱ꞌ ndiꞌiꞌ, sa̱kanꞌ ña̱ ña̱ ni̱ satuví a̱ nuu̱ꞌ u̱nꞌ ja̱a̱nꞌ ndii, xaꞌa̱ꞌ ña̱ ko̱o̱ kivi̱ꞌ soꞌo̱ꞌ ndiꞌiꞌ ja̱a̱nꞌ kaꞌán a̱,’ ni̱ katyi̱ ángele ja̱a̱nꞌ xiinꞌ i̱.
15 “Te̱ kii̱ꞌ kaꞌán ángele ja̱a̱nꞌ xiinꞌ i̱ ndii, ni̱ sa̱nuuꞌ i̱ nuu̱ꞌ i̱ nuu̱ꞌ ñu̱ꞌuꞌ, te̱ nï̱ nakuiinꞌ xa̱tyiꞌ i̱ nuu̱ꞌ a̱.
16 Sa̱kanꞌ te̱ ni̱ tondi̱a̱ nda̱ꞌaꞌ ña̱ kaaꞌ nde̱e̱ naa te̱ yivi̱ꞌ ja̱a̱nꞌ yu̱ꞌuꞌ i̱, te̱ ni̱ xa̱ꞌaꞌ i̱ kaꞌán i̱ xiinꞌ ña̱ iinꞌ ya̱ti̱n nuu̱ꞌ i̱ ja̱a̱nꞌ ndii: ‘Xto̱ꞌo̱ i̱, ña̱ ni̱ xi̱ni̱ i̱ kaa̱ꞌ ndii, ni̱ sa̱ndiꞌni̱ va̱ a̱ yuꞌu̱, te̱ ni̱ ndi̱ꞌi̱ ndo̱o̱ ndi̱e̱e̱ꞌ i̱ ni̱ xa̱a̱ a̱.
17 ¿Sa̱a̱ tu̱ ku̱vi̱ nda̱tuꞌunꞌ yuꞌu̱, te̱ xikaꞌ nuuꞌ nuu̱ꞌ u̱nꞌ, xiinꞌ u̱nꞌ? Sa̱kanꞌ ña̱ kö̱o̱ ka̱ xa̱tyiꞌ ka̱ ndi̱e̱e̱ꞌ i̱, xa̱ ndoꞌoꞌ ndi̱va̱ꞌa̱ i̱, te̱ naꞌinꞌ tatyi̱ꞌ ku̱i̱ti̱ꞌ i̱,’ ni̱ katyi̱ i̱.
18 “Sa̱kanꞌ te̱ ni̱ tondi̱a̱ ni̱ tu̱ku̱u̱ te̱ kaaꞌ nde̱e̱ naa te̱ yivi̱ꞌ ja̱a̱nꞌ yuꞌu̱, te̱ ni̱ ta̱xi̱ ra̱ ndi̱e̱e̱ꞌ i̱,
19 te̱ ni̱ kaꞌa̱n ra̱ xiinꞌ i̱ ndii: ‘Kuäa̱n yiꞌvi u̱nꞌ, ni̱ nde̱e̱ kü̱ndi̱ꞌni̱ tu̱ u̱nꞌ, sa̱ndi̱e̱ni xiinꞌ mi̱iꞌ u̱nꞌ, te̱ na̱tyi̱naá u̱nꞌ ndi̱e̱e̱ꞌ u̱nꞌ, sa̱kanꞌ ña̱ ndani̱ xa̱va̱ꞌa̱ Ndiosí yoꞌó,’ ni̱ katyi̱ ra̱.
“Te̱ kii̱ꞌ ni̱ kaꞌa̱n ra̱ ña̱ ja̱a̱nꞌ xiinꞌ i̱ ndii, ni̱ na̱ku̱naa̱ ña̱ ndi̱e̱eꞌ i̱, te̱ ni̱ kaꞌa̱n i̱ xiinꞌ ra̱ ndii: ‘Xa̱ ku̱vi̱ kaꞌa̱n u̱nꞌ xiinꞌ i̱, Tákuiꞌe, sa̱kanꞌ ña̱ xa̱ ni̱ ta̱xi̱ u̱nꞌ ña̱ ndi̱e̱eꞌ i̱,’ ni̱ katyi̱ i̱ xiinꞌ ra̱.
20 “Sa̱kanꞌ te̱ ni̱ kaꞌa̱n ka̱ ra̱ xiinꞌ i̱ ndii: ‘¿Ñáá xiní u̱nꞌ ndiotyun kuaxi̱ ko̱to̱ i̱ yoꞌó? Nä̱ꞌanꞌ ka̱ te̱ na̱ndi̱koꞌ i̱ te̱ ku̱ntaꞌanꞌ i̱ xiinꞌ ángele ña̱ xaꞌndia tyuunꞌ nuu̱ꞌ te̱ xaꞌndia tyuunꞌ nuu̱ꞌ ne̱ ndieeꞌ nuu̱ꞌ ñu̱ꞌuꞌ Persia. Te̱ kii̱ꞌ ndi̱ꞌi̱ ku̱ntaꞌanꞌ i̱ xiinꞌ ángele ja̱a̱nꞌ, te̱ xaa̱ tu̱ ángele ña̱ xaꞌndia tyuunꞌ nuu̱ꞌ te̱ xaꞌndia tyuunꞌ nuu̱ꞌ ne̱ ndieeꞌ nuu̱ꞌ ñu̱ꞌuꞌ Grecia.
21 Te̱ vi̱ti̱n ndii, kaꞌa̱n i̱ xiinꞌ u̱nꞌ xaꞌa̱ꞌ ña̱ yoso̱ꞌ nuu̱ꞌ tu̱tu̱ ña̱ kaꞌán xaꞌa̱ꞌ ña̱ ndi̱xa̱. Te̱ kii̱ꞌ kuntaꞌanꞌ i̱ xiinꞌ uvi̱ sa̱aꞌ ángele ja̱a̱nꞌ ndii, i̱i̱n nda̱a̱ꞌ ángele Miguel, ña̱ xitoꞌ ndoꞌó, ne̱ Israel, ku̱i̱ti̱ꞌ tyindieeꞌ yuꞌu̱.