So̱ꞌo̱ ni̱ xa̱a̱ a̱ kii̱ꞌ ni̱ kaꞌa̱n Daniel xiinꞌ Ndiosí xaꞌa̱ꞌ ne̱ ñu̱u̱ ra̱
9
“Darío ni̱ nduu̱ siꞌe̱ Asuero, te̱ i̱i̱n te̱ vi̱ꞌe̱ ne̱ ñu̱ꞌuꞌ Media nduuꞌ ra̱. Darío ja̱a̱nꞌ ni̱ nduuꞌ rey nuu̱ꞌ ne̱ ndieeꞌ nuu̱ꞌ ñu̱ꞌuꞌ Babilonia.
2 Kuiya̱ nu̱uꞌ kii̱ꞌ xaꞌndia tyuunꞌ rey Darío ja̱a̱nꞌ ndii, nduꞌu̱ꞌ yuꞌu̱, Daniel, kaꞌviꞌ i̱ tu̱ꞌu̱n Ndiosí, ña̱ ni̱ ke̱ꞌi̱ Jeremías, te̱ ni̱ kaꞌa̱n tiakú tu̱ꞌu̱n Ndiosí, ña̱ kaꞌán ña̱ kuní a̱ ko̱o̱ nduxín ñu̱u̱ Jerusalén niiꞌ uni̱ xi̱ko̱ uxi̱ kuiya̱ sa̱a̱ niiꞌ ni̱ kaꞌa̱n Ndiosí xiinꞌ Jeremías ja̱a̱nꞌ.
3 Sa̱kanꞌ te̱ ni̱ xa̱ꞌaꞌ i̱ kaꞌán ndaꞌvi i̱ xiinꞌ Ndiosí, xto̱ꞌo̱ i̱, te̱ ni̱ yoo̱ ndi̱ti̱a̱ i̱ nuu̱ꞌ a̱ nduꞌu̱ꞌ i̱ nuu̱ꞌ yaa̱ꞌ nuꞌu̱, te̱ ni̱ na̱kuiꞌnu̱ tu̱ i̱ toto̱ nde̱iꞌ.
4 Te̱ ni̱ xa̱ꞌaꞌ i̱ ndatuꞌunꞌ i̱ xiinꞌ Yahvé Ndiosí, xto̱ꞌo̱ i̱, te̱ naꞌmá i̱ ku̱a̱tyi̱ mi̱iꞌ i̱, xiinꞌ ku̱a̱tyi̱ ne̱ ñu̱u̱ i̱ kaꞌán i̱ xiinꞌ a̱ ndii:
“Tákuiꞌe Ndiosí, ña̱ kaꞌnuꞌ va̱ nduuꞌ yoꞌó, te̱ ña̱ kotyukuuꞌ va̱ tu̱ nduuꞌ u̱nꞌ. Te̱ sa̱xinú u̱nꞌ sa̱kuuꞌ kuento u̱nꞌ ña̱ taxiꞌ u̱nꞌ, te̱ kundaꞌvi i̱ni̱ u̱nꞌ xini u̱nꞌ ne̱ ndani̱ yoꞌó, te̱ saxinú ni̱a̱ ña̱ kaꞌán tyuunꞌ u̱nꞌ xiinꞌ ni̱a̱
5 Ndisu̱ nduꞌu̱ ndii, ni̱ xa̱a̱ ndu̱ ku̱a̱tyi̱, te̱ ni̱ xa̱a̱ tu̱ ndu̱ ña̱ ni̱a̱ꞌa, te̱ ni̱ xa̱a̱ tu̱ ndu̱ ña̱ kuäsa̱ꞌ kuní, te̱ ni̱ xa̱ teiꞌ tu̱ ndu̱ nuuꞌ u̱nꞌ, te̱ ni̱ na̱ko̱o̱ ndu̱ nde̱iꞌ, ña̱ kaꞌán tyuunꞌ u̱nꞌ, xiinꞌ ña̱ kaꞌán tuní u̱nꞌ xiinꞌ ndu̱.
6 Te̱ nï̱ sa̱xinú ndu̱ ña̱ ni̱ kaꞌa̱n ndo̱so̱ꞌ te̱ ni̱ kaꞌa̱n tiakú tu̱ꞌu̱n u̱nꞌ, te̱ ni̱ xika̱ nu̱u̱ nuu̱ꞌ u̱nꞌ, te̱ xiinꞌ ña̱ ndi̱e̱eꞌ u̱nꞌ ni̱ kaꞌa̱n ndo̱so̱ꞌ ra̱ nuu̱ꞌ kuaꞌa̱ꞌ rey ndu̱, xiinꞌ nuu̱ꞌ kuaꞌa̱ꞌ te̱ kuuꞌ nu̱uꞌ, xiinꞌ nuu̱ꞌ kuaꞌa̱ꞌ te̱ xii̱ꞌ ya̱taꞌ ndu̱, xiinꞌ nuu̱ꞌ sa̱kuuꞌ ne̱ yivi̱ꞌ i̱i̱n yivi̱ꞌ.
7 Tákuiꞌe, yoꞌó nduuꞌ ña̱ xatyuunꞌ nda̱ku, ndisu̱ nduꞌu̱, ne̱ ni̱ ki̱e̱e̱ nuu̱ꞌ ñu̱ꞌuꞌ Judá, kivi̱ꞌ vi̱ti̱n ndii, kuuꞌ kaꞌanꞌ nuu̱ꞌ ndu̱, naa kuuꞌ ne̱ ndieeꞌ ñu̱u̱ Jerusalén, xiinꞌ sa̱kuuꞌ ne̱ vi̱ꞌe̱ Israel, ne̱ ndieeꞌ ya̱ti̱n, xiinꞌ ne̱ ndieeꞌ xikaꞌ, xiinꞌ ne̱ ndieeꞌ miiꞌ ka̱ nuu̱ꞌ ñu̱ꞌuꞌ i̱i̱n yivi̱ꞌ miiꞌ ni̱ xa̱ti̱a̱ i̱ꞌnu̱ ña̱ꞌaꞌ u̱nꞌ xaꞌa̱ꞌ a̱ ña̱ ni̱ xa̱teiꞌ ni̱a̱ nuu̱ꞌ u̱nꞌ.
8 Tákuiꞌe, sa̱kuuꞌ nduꞌu̱, xiinꞌ sa̱kuuꞌ te̱ xaꞌndia tyuunꞌ nuu̱ꞌ ndu̱, xiinꞌ sa̱kuuꞌ te̱ kuuꞌ nu̱uꞌ nuu̱ꞌ ndu̱, xiinꞌ sa̱kuuꞌ te̱ xii̱ꞌ ya̱taꞌ ndu̱ ndii, kuuꞌ kaꞌanꞌ xa̱va̱ꞌa̱ nuu̱ꞌ ndu̱, sa̱kanꞌ ña̱ ni̱ xa̱a̱ ndu̱ ku̱a̱tyi̱ nuu̱ꞌ yoꞌó.
9 Ndisu̱ yoꞌó, Yahvé Ndiosí ndu̱ ndii, ña̱ vi̱ta va̱ nimá nduuꞌ u̱nꞌ, te̱ ña̱ yoo kaꞌnuꞌ i̱ni̱ va̱ tu̱ nduuꞌ u̱nꞌ, tee̱ꞌ ndee xaaꞌ ndu̱ ku̱a̱tyi̱ nuu̱ꞌ u̱nꞌ.
10 Te̱ nï̱ ta̱xi̱ so̱ꞌo̱ ndu̱ ña̱ kaꞌán u̱nꞌ, Yahvé Ndiosí ndu̱, ni̱ nde̱e̱ nï̱ sa̱xinú tu̱ ndu̱ ña̱ ni̱ sa̱niaꞌá te̱ ni̱ xika̱ nu̱u̱ nuu̱ꞌ u̱nꞌ, te̱ ni̱ kaꞌa̱n tiakú tu̱ꞌu̱n va̱ꞌa̱ ña̱ ni̱ kaꞌa̱n u̱nꞌ xiinꞌ ndu̱ xiinꞌ nda̱ꞌaꞌ te̱ ja̱a̱nꞌ.
11 Sa̱kuuꞌ nduꞌu̱, ne̱ Israel, ni̱ xa̱ so̱ꞌo̱ nuu̱ꞌ ña̱ sa̱niaꞌá tu̱ꞌu̱n nde̱iꞌ u̱nꞌ, te̱ nï̱ xi̱i̱n ndu̱ sa̱xinú ndu̱ ña̱ ni̱ kaꞌa̱n tyuunꞌ u̱nꞌ xiinꞌ ndu̱, sa̱kanꞌ na kuiiꞌ ni̱ na̱tya̱ꞌa̱n ndu̱ ni̱ xa̱a̱ u̱nꞌ, te̱ ni̱ na̱tya̱ꞌa̱n tu̱ ndu̱ ni̱ xa̱a̱ kuento u̱nꞌ, ña̱ ni̱ ta̱xi̱ u̱nꞌ nda̱ꞌaꞌ Moisés, te̱ ni̱ xika̱ nuuꞌ nuu̱ꞌ u̱nꞌ, sa̱kanꞌ ña̱ ni̱ xa̱a̱ ndu̱ ku̱a̱tyi̱ nuu̱ꞌ u̱nꞌ.
12 Ni̱ sa̱xinú u̱nꞌ ña̱ ni̱ kaꞌa̱n u̱nꞌ ña̱ ka̱ni̱ u̱nꞌ ndu̱, te̱ ka̱ni̱ tu̱ u̱nꞌ te̱ xaꞌndia tyuunꞌ nuu̱ꞌ ndu̱, kii̱ꞌ ni̱ sa̱nduxín u̱nꞌ ñu̱u̱ Jerusalén. Sa̱kanꞌ ña̱ nde̱e̱ i̱i̱n kivi̱ꞌ tiäꞌa̱an ko̱o̱ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ naa ña̱ i̱yo̱ xa̱va̱ꞌa̱ ña̱ ni̱ yoo̱ ñu̱u̱ Jerusalén ja̱a̱nꞌ.
13 Sa̱kuuꞌ ña̱ ja̱a̱nꞌ ni̱ ndo̱ꞌo̱ ndu̱, sa̱a̱ niiꞌ yoso̱ꞌ a̱ nuu̱ꞌ tu̱tu̱ ña̱ ni̱ ke̱ꞌi̱ Moisés, ndisu̱ nduꞌu̱ ndii, tiäꞌa̱an na̱ndu̱kuꞌ ndu̱ yoꞌó, Tákuiꞌe Yahvé Ndiosí ndu̱, ni̱ nde̱e̱ tiäꞌa̱an na̱ko̱o̱ tu̱ ndu̱ ña̱ xaaꞌ ndu̱ ña̱ ni̱a̱ꞌa, ni̱ nde̱e̱ kuäsa̱ꞌ ndikún tu̱ ndu̱ ña̱ ndi̱xa̱ ña̱ saniaꞌá u̱nꞌ.
14 Xaꞌa̱ꞌ a̱ ja̱a̱nꞌ na ni̱ ti̱ꞌviꞌ u̱nꞌ ña̱ ki̱ni̱, ña̱ ni̱ kaꞌa̱n u̱nꞌ ja̱a̱nꞌ, ni̱ ndo̱ꞌo̱ ndu̱, sa̱kanꞌ ña̱ yoꞌó, Tákuiꞌe Yahvé Ndiosí xto̱ꞌo̱ ndu̱ ndii, xatyuunꞌ nda̱ku u̱nꞌ xiinꞌ sa̱kuuꞌ ña̱ xaaꞌ u̱nꞌ, ndisu̱ nduꞌu̱ ndii, nï̱ xi̱i̱n ndu̱ ku̱ni̱ so̱ꞌo̱ ndu̱ ña̱ kaꞌán u̱nꞌ xiinꞌ ndu̱.
15 “Ndiosí, xto̱ꞌo̱ ndu̱, ni̱ niaꞌa̱ u̱nꞌ ña̱ ndi̱e̱eꞌ u̱nꞌ kii̱ꞌ ni̱ ta̱va̱ꞌ u̱nꞌ ndu̱ nuu̱ꞌ ñu̱ꞌuꞌ Egipto, te̱ xaꞌa̱ꞌ ña̱ ja̱a̱nꞌ kaꞌán va̱ꞌa̱ ne̱ yivi̱ꞌ xaꞌa̱ꞌ u̱nꞌ nde̱e̱ kii̱ꞌ sa̱kanꞌ te̱ nde̱e̱ vi̱ti̱n. Ndisu̱ nduꞌu̱ ndii, xa̱ nuu̱ꞌ ña̱ ni̱a̱ꞌa, xiinꞌ ña̱ kuäsa̱ kuní xaaꞌ ndu̱.
16 Tákuiꞌe, xiní ndu̱ ña̱ ña̱ xatyuunꞌ nda̱ku nduuꞌ u̱nꞌ, sa̱a̱ u̱nꞌ ña̱ va̱ꞌa̱ te̱ sa̱nu̱ndiaꞌá u̱nꞌ ña̱ xiꞌé u̱nꞌ, xiinꞌ ña̱ ni̱ na̱saa̱ꞌ u̱nꞌ xini u̱nꞌ ndu̱, sa̱kanꞌ ña̱ ñu̱u̱ mi̱iꞌ u̱nꞌ nduuꞌ ñu̱u̱ Jerusalén, xiinꞌ i̱kuꞌ su̱ꞌu̱n ña̱ iinꞌ nuu̱ꞌ a̱. Sa̱kuuꞌ ne̱ yivi̱ꞌ, ne̱ ndieeꞌ ñu̱u̱ ña̱ ñuꞌuꞌ ya̱ti̱n ndii, xandiꞌiꞌ ni̱a̱ xiinꞌ ñu̱u̱ Jerusalén, te̱ xandiꞌiꞌ tu̱ ni̱a̱ xiinꞌ nduꞌu̱, ne̱ nduuꞌ kuenta u̱nꞌ, xaꞌa̱ꞌ ku̱a̱tyi̱ ndu̱, xiinꞌ xaꞌa̱ꞌ ku̱a̱tyi̱ ña̱ ni̱ xa̱a̱ ne̱ xii̱ꞌ ya̱taꞌ ndu̱.
17 Tákuiꞌe Ndiosí, ña̱ xakaꞌnuꞌ ndu̱, sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán yuꞌu̱, te̱ xikaꞌ nuuꞌ nuu̱ꞌ u̱nꞌ, xiinꞌ u̱nꞌ, te̱ ku̱ni̱ so̱ꞌo̱ tu̱ u̱nꞌ ña̱ kaꞌán ndaꞌvi i̱ nuu̱ꞌ u̱nꞌ. Te̱ xaꞌa̱ꞌ a̱ ña̱ kiꞌinꞌ kaꞌnuꞌ u̱nꞌ kivi̱ꞌ mi̱iꞌ u̱nꞌ ndii, sa̱a̱ u̱nꞌ ña̱ va̱ꞌa̱ te̱ va̱ꞌa̱ kuni u̱nꞌ ko̱to̱ u̱nꞌ miiꞌ iinꞌ yu̱kunꞌ, ña̱ ni̱ nduxi̱n ndo̱o̱.
18 Sa̱a̱ u̱nꞌ ña̱ va̱ꞌa̱, Ndiosí, xto̱ꞌo̱ ndu̱, te̱ tyu̱nxaꞌaꞌ u̱nꞌ kuuꞌ ndu̱, te̱ ku̱ni̱ so̱ꞌo̱ u̱nꞌ ña̱ kaꞌán ndu̱ xiinꞌ u̱nꞌ. Ko̱to̱ kaxiꞌ u̱nꞌ sa̱a̱ vi̱ꞌ ni̱ nduxi̱n ndu̱, te̱ ni̱ nduxi̱n tu̱ ñu̱u̱ miiꞌ ni̱ xa̱kaꞌnuꞌ ndu̱ yoꞌó. Süu̱ꞌ kaꞌán ndaꞌvi ndu̱ nuu̱ꞌ u̱nꞌ xaꞌa̱ꞌ a̱ ña̱ i̱ni̱ ndu̱ ña̱ ne̱ xatyuunꞌ nda̱ku nduuꞌ ndu̱, süu̱ꞌ ja̱a̱nꞌ ndii, kaꞌán ndaꞌvi ndu̱ xiinꞌ u̱nꞌ xaꞌa̱ꞌ a̱ ña̱ ña̱ va̱ꞌa̱ nimá nduuꞌ u̱nꞌ.
19 ¡Tákuiꞌe, Tákuiꞌe, sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán ndu̱ xiinꞌ u̱nꞌ! ¡Te̱ ko̱o̱ kaꞌnuꞌ i̱ni̱ u̱nꞌ xiinꞌ ndu̱! ¡Tákuiꞌe, sa̱a̱ u̱nꞌ ña̱ va̱ꞌa̱ te̱ tyu̱nxaꞌaꞌ u̱nꞌ kuuꞌ ndu̱, te̱ ki̱xi̱n tyi̱ndi̱e̱eꞌ u̱nꞌ ndu̱! Te̱ xaꞌa̱ꞌ a̱ ña̱ kiꞌinꞌ kaꞌnuꞌ u̱nꞌ kivi̱ꞌ mi̱iꞌ u̱nꞌ, Ndiosí ndu̱, xiinꞌ xaꞌa̱ꞌ a̱ ña̱ ndani̱ u̱nꞌ ñu̱u̱ mi̱iꞌ u̱nꞌ, xiinꞌ xaꞌa̱ꞌ a̱ ña̱ ndani̱ u̱nꞌ nduꞌu̱, ne̱ nduuꞌ kuenta u̱nꞌ, ne̱ xikán nuu̱ꞌ u̱nꞌ, te̱ sa̱kakú u̱nꞌ ndu̱ ndii, kü̱kuatyí u̱nꞌ te̱ ki̱xi̱n tyi̱ndi̱e̱eꞌ u̱nꞌ ndu̱, ni̱ katyi̱ i̱ xiinꞌ Ndiosí.
Yoꞌoꞌ ni̱ kaꞌa̱n ángele Gabriel ña̱ uni̱ xi̱ko̱ uxi̱ xi̱mana ni̱ ta̱xi̱ Ndiosí nuu̱ꞌ ne̱ Israel te̱ na̱ma̱ ni̱a̱ nimá ni̱a̱
20 “Kaꞌán ka̱ i̱ xiinꞌ Ndiosí iinꞌ i̱, te̱ naꞌmá ka̱ tu̱ i̱ ku̱a̱tyi̱ mi̱iꞌ i̱, xiinꞌ ku̱a̱tyi̱ ne̱ ñu̱u̱ i̱, ne̱ Israel, te̱ kaꞌán ndaꞌvi tu̱ i̱ xiinꞌ xto̱ꞌo̱ i̱ Ndiosí xaꞌa̱ꞌ i̱kuꞌ su̱ꞌu̱n ña̱ nduuꞌ kuenta a̱.
21 Te̱ nani̱ ña̱ ja̱a̱nꞌ xaaꞌ i̱ iinꞌ i̱, te̱ taꞌnuꞌ ángele Gabriel ni̱ xa̱a̱ a̱ miiꞌ iinꞌ i̱ ja̱a̱nꞌ, te̱ ángele Gabriel ja̱a̱nꞌ nduuꞌ ña̱ ni̱ xi̱ni̱ i̱ kii̱ꞌ ni̱ sa̱tuví a̱ nuu̱ꞌ i̱ sa̱aꞌ ka̱. Te̱ kii̱ꞌ ni̱ xa̱a̱ ángele ja̱a̱nꞌ miiꞌ iinꞌ ndii, sa̱va̱ ni̱ hora ña̱ xaꞌmiꞌ ne̱ yivi̱ꞌ ki̱tiꞌ nuu̱ꞌ Ndiosí xa̱kuaa̱ꞌ nduuꞌ a̱.
22 Te̱ ni̱ sa̱na̱kuatyiꞌ a̱ ña̱ ja̱a̱nꞌ nuu̱ꞌ i̱, kaꞌán a̱ xiinꞌ i̱ ndii: ‘Daniel, kuaxi̱ i̱ yoꞌoꞌ vi̱ti̱n te̱ ta̱xi̱ i̱ ña̱ xini tuní, xiinꞌ ña̱ ku̱nda̱ni̱ u̱nꞌ ña̱ ni̱ sa̱tuví a̱ nuu̱ꞌ u̱nꞌ ja̱a̱nꞌ.
23 Kii̱ꞌ ni̱ xa̱ꞌaꞌ so̱ꞌo̱ u̱nꞌ kaꞌán u̱nꞌ xiinꞌ Ndiosí, te̱ ni̱ na̱ku̱i̱i̱n a̱ ña̱ kaꞌán u̱nꞌ xiinꞌ a̱. Te̱ ni̱ kaꞌa̱n tyuunꞌ Ndiosí xiinꞌ i̱, sa̱kanꞌ na ni̱ xa̱a̱ i̱ yoꞌoꞌ te̱ kaꞌa̱n i̱ xiinꞌ u̱nꞌ ndee ña̱ kuni katyi̱ ña̱ ni̱ sa̱tuví a̱ nuu̱ꞌ u̱nꞌ ja̱a̱nꞌ, sa̱kanꞌ ña̱ ndani̱ va̱ Ndiosí yoꞌó. Te̱ vi̱ti̱n ndii, tyu̱u̱n xaꞌaꞌ va̱ u̱nꞌ ña̱ kaꞌa̱n i̱ xiinꞌ u̱nꞌ te̱ ku̱nda̱ni̱ u̱nꞌ ndee ña̱ kuni katyi̱ ña̱ ni̱ sa̱tuví a̱ nuu̱ꞌ u̱nꞌ ja̱a̱nꞌ.
24 ‘Uni̱ xi̱ko̱ uxi̱ xi̱mana ni̱ tyi̱tuní Ndiosí nuu̱ꞌ ne̱ ñu̱u̱ u̱nꞌ, xiinꞌ nuu̱ꞌ ñu̱u̱ su̱ꞌu̱n miiꞌ nduꞌu̱ꞌ u̱nꞌ,
te̱ na̱ko̱o̱ ni̱a̱ ku̱a̱tyi̱ ña̱ xateiꞌ ni̱a̱ nuu̱ꞌ Ndiosí, te̱ vi̱kuii̱n tu̱ ni̱a̱ ña̱ xaaꞌ ni̱a̱ ku̱a̱tyi̱,
te̱ ko̱o̱ ka̱ꞌnuꞌ i̱ni̱ Ndiosí xaꞌa̱ꞌ ni̱a̱, te̱ nda̱sa̱ndo̱o̱ ña̱ꞌaꞌ a̱ nuu̱ꞌ ku̱a̱tyi̱ ni̱a̱,
te̱ ku̱ndu̱u̱ ni̱a̱ ne̱ xatyuunꞌ nda̱ku nde̱e̱ ndiꞌiꞌ ni̱ kivi̱ꞌ,
te̱ xinu̱ ña̱ ni̱ sa̱tuví a̱ nuu̱ꞌ u̱nꞌ ja̱a̱nꞌ, xiinꞌ tu̱ꞌu̱n ña̱ kaꞌán tiakú a̱ ja̱a̱nꞌ,
sa̱kanꞌ vi̱ꞌ te̱ sa̱ñuꞌuꞌ Ndiosí miiꞌ su̱ꞌu̱n xa̱va̱ꞌa̱ ñu̱u̱ Jerusalén ja̱a̱nꞌ.
25 Kuní a̱ ña̱ ku̱ni̱ so̱ꞌo̱ u̱nꞌ ña̱ yo̱ꞌo̱ꞌ,
te̱ kuní tu̱ a̱ ña̱ kunda̱ni̱ u̱nꞌ ña̱ nde̱e̱ kivi̱ꞌ nu̱uꞌ ña̱ ni̱ kaꞌa̱n tyuunꞌ rey,
te̱ na̱ka̱sa̱ꞌa̱ xa̱aꞌ te̱ yivi̱ꞌ yu̱kunꞌ kaꞌnuꞌ ñu̱u̱ Jerusalén,
te̱ nde̱e̱ kivi̱ꞌ ña̱ xaa̱ ña̱ ti̱a̱nu̱ꞌ Ndiosí ka̱ꞌndi̱a̱ tyuunꞌ ndii, uxa̱ taꞌan xi̱mana xkaꞌndi̱a̱.
Te̱ kii̱ꞌ xkaꞌndi̱a̱ i̱nga̱ ka̱ uni̱ xi̱ko̱ uvi̱ xi̱mana te̱ xinu̱ ya̱ꞌya̱ ñu̱u̱ ja̱a̱nꞌ,
xiinꞌ nama̱ ña̱ ndasi i̱ꞌnu̱ a̱,
ndisu̱ kivi̱ꞌ ja̱a̱nꞌ ndii, ko̱o̱ kuaꞌa̱ꞌ va̱ tu̱ndoꞌo̱ꞌ.
26 Te̱ kii̱ꞌ xkaꞌndi̱a̱ uni̱ xi̱ko̱ uvi̱ xi̱mana ja̱a̱nꞌ ndii,
ka̱ꞌni̱ꞌ te̱ yivi̱ꞌ ña̱ ti̱a̱nu̱ꞌ Ndiosí ka̱ꞌndi̱a̱ tyuunꞌ ja̱a̱nꞌ,
ndisu̱ ndä̱ni̱ꞌi̱ nda̱ꞌaꞌ xa̱tyiꞌ a̱, te̱ nu̱ta̱ i̱i̱n rey, te̱ ti̱a̱nu̱ꞌ ra̱ nda̱ꞌaꞌ xaꞌa̱ꞌ ra̱,
te̱ sa̱nduxín ra̱ ñu̱u̱ Jerusalén, xiinꞌ yu̱kunꞌ kaꞌnuꞌ a̱,
te̱ soꞌo̱ꞌ ndiꞌiꞌ ko̱ꞌni̱ kuaꞌa̱ꞌ te̱ xíinꞌ, te̱ ko̱o̱ ñuꞌu̱ i̱kanꞌ sa̱a̱ ra̱,
te̱ sa̱nduxín ra̱ ka̱niiꞌ i̱kanꞌ sa̱a̱ niiꞌ xa̱ ni̱ kaꞌa̱n tuní Ndiosí xaꞌa̱ꞌ a̱.
27 Te̱ i̱nga̱ ka̱ xi̱mana te̱ ndoo̱ ra̱ kuento xiinꞌ kuaꞌa̱ꞌ te̱ yivi̱ꞌ,
te̱ ma̱ꞌiꞌ xi̱mana ja̱a̱nꞌ ndii,
sa̱i̱i̱n kuiín ra̱ ña̱ xaꞌmiꞌ ne̱ yivi̱ꞌ ki̱tiꞌ nuu̱ꞌ Ndiosí, xiinꞌ ña̱ nasoko̱ꞌ ni̱a̱ ña̱ꞌa̱ nuu̱ꞌ a̱.
Te̱ nuu̱ꞌ a̱ miiꞌ iinꞌ altar miiꞌ xixí ki̱tiꞌ ja̱a̱nꞌ ndii, ka̱ni̱ ra̱ i̱nga̱ ña̱ ki̱ni̱ xa̱va̱ꞌa̱ kaaꞌ.
Ndi̱ꞌi̱ ña̱ ja̱a̱nꞌ te̱ sa̱ndo̱ñuꞌuꞌ Ndiosí te̱ ja̱a̱nꞌ naa xa̱ ni̱ tyi̱tuní a̱ xaꞌa̱ꞌ ra̱.’”
Ni̱ katyi̱ ángele Gabriel ja̱a̱nꞌ xiinꞌ i̱.