So̱ꞌo̱ ni̱ xa̱a̱ a̱ kii̱ꞌ ni̱ xa̱ni Daniel ña̱ ni̱ xi̱ni̱ ra̱ i̱i̱n mbe̱e̱ tyie̱, xiinꞌ i̱i̱n ti̱xuꞌu̱ꞌ tyie̱
8
“Kii̱ꞌ xa̱ kuaꞌa̱n uni̱ kuiya̱ ña̱ xaꞌndia tyuunꞌ rey Baltasar ndii, ni̱ xi̱ni̱ tu̱ku̱u̱ yuꞌu̱, Daniel, i̱nga̱ ña̱ ni̱ sa̱tuví a̱ nuu̱ꞌ i̱, kii̱ꞌ xa̱ ni̱ yaꞌa̱ ña̱ ni̱ xi̱ni̱ i̱ ña̱ ni̱ sa̱tuví a̱ nuu̱ꞌ i̱ ña̱ nu̱uꞌ.
2 Ni̱ xa̱ni i̱ ña̱ iinꞌ i̱ yu̱ꞌuꞌ i̱ti̱a̱ Ulai, ña̱ xkaꞌndi̱a̱ ya̱ti̱n ñu̱u̱ Susa, ña̱ nduuꞌ i̱i̱n ñu̱u̱ kaꞌnuꞌ miiꞌ xaꞌndia tyuunꞌ rey ja̱a̱nꞌ, ña̱ naá nuu̱ꞌ ñu̱ꞌuꞌ Elám.
3 Kii̱ꞌ ni̱ ndo̱ni̱ꞌi̱ i̱ nuu̱ꞌ i̱, te̱ ni̱ xi̱ni̱ i̱ iinꞌ i̱i̱n mbe̱e̱ tyie̱ yu̱ꞌuꞌ i̱ti̱a̱. Te̱ mbe̱e̱ ja̱a̱nꞌ ndii, yoo uvi̱ taꞌan ndi̱kiꞌ riꞌ, te̱ nani̱ꞌ xa̱va̱ꞌa̱ a̱, ndisu̱ nani̱ꞌ ka̱ i̱i̱n a̱ te̱ sa̱kanꞌ i̱nga̱ a̱, tee̱ꞌ ndee ni̱ yaꞌa̱ te̱ ni̱ naku̱n ña̱ ja̱a̱nꞌ.
4 Te̱ ni̱ xi̱ni̱ i̱ ña̱ ni̱ tyu̱ꞌu̱n ndi̱kiꞌ ndo̱o̱ riꞌ yo̱o̱ ka̱ nduuꞌ a̱ itaꞌ miiꞌ ketá ñu̱ꞌu̱, xiinꞌ yo̱o̱ ka̱ nduuꞌ a̱ itaꞌ nda̱ꞌaꞌ ku̱a̱ꞌa̱ e̱ꞌ, xiinꞌ yo̱o̱ ka̱ nduuꞌ a̱ itaꞌ nda̱ꞌaꞌ i̱ti̱n e̱ꞌ kii̱ꞌ xkaꞌndíá riꞌ kuaꞌa̱n riꞌ, te̱ nde̱e̱ i̱i̱n kö̱o̱ ku̱vi̱ ku̱ntaꞌanꞌ xiinꞌ riꞌ, ni̱ nde̱e̱ kö̱o̱ tu̱ ku̱vi̱ kaku̱ ña̱ kä̱ni̱ ña̱ꞌaꞌ riꞌ, te̱ xaaꞌ riꞌ nde̱e̱ ka̱ ña̱ kuní miiꞌ riꞌ, te̱ so̱ꞌo̱ nakoó kuaꞌa̱ꞌ ka̱ ndi̱e̱e̱ꞌ riꞌ.
5 “Te̱ kii̱ꞌ xanini i̱ xaꞌa̱ꞌ ña̱ ni̱ xa̱ni i̱ ja̱a̱nꞌ, te̱ ni̱ xi̱ni̱ i̱ taꞌnuꞌ vi̱ꞌ i̱i̱n ti̱xuꞌu̱ꞌ tyie̱ nuu̱ꞌ ñu̱ꞌuꞌ i̱i̱n yivi̱ꞌ kuaxi̱ riꞌ miiꞌ ketá ñu̱ꞌu̱, te̱ yoo i̱i̱n ndi̱kiꞌ riꞌ tyie̱ xa̱va̱ꞌa̱ tiꞌe̱ꞌ riꞌ, te̱i̱n ndu̱tyiꞌ nuu̱ꞌ riꞌ.
6 Te̱ ni̱ xa̱a̱ riꞌ nde̱e̱ miiꞌ iinꞌ mbe̱e̱ tyie̱, tiꞌ uvi̱ taꞌan ndi̱kiꞌ, tiꞌ ni̱ xi̱ni̱ iinꞌ yu̱ꞌuꞌ i̱ti̱a̱ ja̱a̱nꞌ, te̱ kii̱ꞌ ni̱ xa̱a̱ riꞌ i̱kanꞌ ndii, ni̱ tu̱vi̱ ndi̱kiꞌ ña̱ꞌaꞌ riꞌ xiinꞌ sa̱kuuꞌ ña̱ ndi̱e̱eꞌ riꞌ,
7 te̱ ni̱ xi̱ni̱ i̱ ni̱ xa̱a̱ riꞌ nde̱e̱ miiꞌ iinꞌ mbe̱e̱ ja̱a̱nꞌ, te̱ ni̱ ku̱u̱n ña̱ꞌaꞌ riꞌ, te̱ ni̱ xaꞌnu̱ riꞌ uvi̱ sa̱aꞌ ndi̱kiꞌ tiꞌ ja̱a̱nꞌ, te̱ kö̱o̱ xa̱tyiꞌ a̱ ni̱ ku̱vi̱ sa̱a̱ mbe̱e̱ ja̱a̱nꞌ te̱ na̱kaꞌa̱n riꞌ xaꞌa̱ꞌ riꞌ, sa̱kanꞌ ña̱ ni̱ sa̱nduva ña̱ꞌaꞌ ti̱xuꞌu̱ꞌ ja̱a̱nꞌ, te̱ ni̱ xeꞌni̱ ndo̱so̱ꞌ ña̱ꞌaꞌ riꞌ. Te̱ nde̱e̱ i̱i̱n ne̱ yivi̱ꞌ nï̱ ku̱vi̱ sa̱kakú mbe̱e̱ ja̱a̱nꞌ nda̱ꞌaꞌ ti̱xuꞌu̱ꞌ tyie̱ ja̱a̱nꞌ.
8 Te̱ ti̱xuꞌu̱ꞌ tyie̱ ja̱a̱nꞌ ndii, so̱ꞌo̱ xikoó ka̱ ña̱ ndi̱e̱eꞌ riꞌ, ndisu̱ kii̱ꞌ na̱nduuꞌ ndi̱e̱eꞌ xa̱va̱ꞌa̱ riꞌ ndii, ni̱ taꞌnu̱ ndi̱ꞌi̱ ndi̱kiꞌ riꞌ, ña̱ tyie̱ ja̱a̱nꞌ, te̱ miiꞌ ni̱ ii̱n ña̱ ja̱a̱nꞌ ni̱ naku̱n ku̱miꞌ taꞌan ka̱ ndi̱kiꞌ riꞌ, te̱ i̱ꞌi̱n a̱ xtoꞌniꞌ ku̱miꞌ sa̱aꞌ xiki̱ꞌ i̱i̱n yivi̱ꞌ.
9 “Te̱ xata̱ꞌ i̱i̱n ndi̱kiꞌ riꞌ, ña̱ ku̱miꞌ taꞌan ja̱a̱nꞌ, ni̱ ke̱ta̱ i̱i̱n ndi̱kiꞌ lulu ña̱ kumiꞌ kuaꞌa̱ꞌ xa̱va̱ꞌa̱ ña̱ ndi̱e̱eꞌ, te̱ ni̱ kiku̱ ndo̱o̱ ña̱ ndi̱e̱eꞌ a̱ nda̱ꞌaꞌ i̱ti̱n e̱ꞌ, xiinꞌ miiꞌ ketá ñu̱ꞌu̱, xiinꞌ nuu̱ꞌ ñu̱ꞌuꞌ nda̱tu̱nꞌ xa̱va̱ꞌa̱, miiꞌ ndieeꞌ ndu̱ ne̱ vi̱ꞌe̱ Israel.
10 Te̱ ni̱ xna̱koo̱ ña̱ ndi̱e̱eꞌ a̱ nde̱e̱ ndi̱viꞌ miiꞌ ndieeꞌ ángele Ndiosí, xiinꞌ miiꞌ ndieeꞌ tiuu̱nꞌ, te̱ ni̱ sa̱koyó a̱ sa̱va̱ ña̱ ja̱a̱nꞌ, xiinꞌ tiuu̱nꞌ ja̱a̱nꞌ, te̱ ni̱ xeꞌni̱ ndo̱so̱ꞌ ña̱ꞌaꞌ a̱.
11 Te̱ ndi̱kiꞌ lulu ja̱a̱nꞌ ndii, nde̱e̱ mi̱iꞌ Ndiosí, ña̱ nduuꞌ xto̱ꞌo̱ nuu̱ꞌ ángele ja̱a̱nꞌ, ni̱ na̱kuii̱n teiꞌ a̱ nuuꞌ, te̱ ni̱ sa̱i̱i̱n kuiín tu̱ a̱ ña̱ xaꞌmiꞌ ne̱ yivi̱ꞌ ña̱ꞌa̱ nuu̱ꞌ Ndiosí i̱ꞌi̱n kivi̱ꞌ kuaꞌa̱n, te̱ ni̱ xe̱ꞌnaꞌ tu̱ a̱ xiinꞌ yu̱kunꞌ su̱ꞌu̱n miiꞌ xakaꞌnuꞌ ne̱ yivi̱ꞌ Ndiosí ja̱a̱nꞌ.
12 Te̱ nï̱ ta̱xi̱ Ndiosí ña̱ ku̱ntaꞌanꞌ ángele ja̱a̱nꞌ xiinꞌ ndi̱kiꞌ lulu ja̱a̱nꞌ xaꞌa̱ꞌ ña̱ ni̱ xa̱a̱ a̱ ja̱a̱nꞌ. Te̱ ni̱ xi̱kuii̱n ne̱ yivi̱ꞌ ña̱ nasoko̱ꞌ ni̱a̱ ña̱ꞌa̱ nuu̱ꞌ Ndiosí i̱ꞌi̱n kivi̱ꞌ kuaꞌa̱n, te̱ ni̱ xeꞌni̱ ndo̱so̱ꞌ ndi̱kiꞌ lulu ja̱a̱nꞌ ña̱ ndi̱xa̱ xaꞌa̱ꞌ Ndiosí, te̱ ni̱ ke̱ta̱ va̱ꞌa̱ a̱ xiinꞌ sa̱kuuꞌ ña̱ ni̱ xa̱a̱ a̱.
13 “Sa̱kanꞌ te̱ ni̱ xi̱ni̱ so̱ꞌo̱ i̱ ndatuꞌunꞌ xiinꞌ taꞌan uvi̱ taꞌan ángele su̱ꞌu̱n, kaꞌán a̱ ndii: ‘¿A̱ma̱ vi̱ꞌ tu̱ kuꞌu̱n ndi̱ꞌi̱ ña̱ satuví a̱ kaa̱ꞌ, te̱ ndi̱xa̱ꞌaꞌ tukuuꞌ ña̱ xaꞌmiꞌ ne̱ yivi̱ꞌ ña̱ꞌa̱ nuu̱ꞌ Ndiosí? ¿Te̱ a̱ma̱ vi̱ꞌ kuꞌu̱n ndi̱koꞌ ña̱ xeꞌnaꞌ ndi̱kiꞌ lulu kaa̱ꞌ xiinꞌ yu̱kunꞌ Ndiosí, xiinꞌ ña̱ xeꞌní ndo̱so̱ꞌ a̱ yu̱kunꞌ kaꞌnuꞌ, xiinꞌ ña̱ xeꞌní tu̱ a̱ ángele su̱ꞌu̱n, ña̱ ndieeꞌ ndi̱viꞌ?,’ ni̱ katyi̱ a̱.
14 “Te̱ ni̱ kaꞌa̱n i̱nga̱ ángele ndii: ‘Nde̱e̱ ska̱tyiꞌ xinu̱ uvi̱ mií uni̱ ciento kivi̱ꞌ xiinꞌ ñu̱u. Sa̱kanꞌ vi̱ꞌ te̱ nda̱sa̱ndo̱o̱ Ndiosí yu̱kunꞌ a̱,’ ni̱ katyi̱ a̱.
15 “Te̱ kii̱ꞌ iinꞌ yuꞌu̱, Daniel, xanini i̱ ndee ña̱ kuni katyi̱ ña̱ ni̱ sa̱tuví a̱ nuu̱ꞌ i̱ ja̱a̱nꞌ, te̱ i̱i̱n ni̱ xi̱kuii̱n i̱i̱n ña̱ kaaꞌ nde̱e̱ naa te̱ yivi̱ꞌ nuu̱ꞌ i̱,
16 te̱ ni̱ xi̱ni̱ so̱ꞌo̱ i̱ i̱i̱n tatyi̱ꞌ yu̱ꞌuꞌ nde̱e̱ naa kaꞌán i̱i̱n ne̱ yivi̱ꞌ kuaxi̱ a̱ nde̱e̱ i̱ti̱a̱ Ulai, te̱ kaꞌán a̱ ndii: ‘Gabriel, sa̱na̱kuatyiꞌ nuu̱ꞌ te̱ yivi̱ꞌ ñaa̱ꞌ nde̱e̱ ña̱ kuni katyi̱ ña̱ ni̱ xi̱ni̱ ra̱ ja̱a̱nꞌ,’ ni̱ katyi̱ a̱.
17 “Sa̱kanꞌ te̱ ni̱ ku̱ya̱ti̱n ángele Gabriel ja̱a̱nꞌ nuu̱ꞌ i̱, te̱ kii̱ꞌ ni̱ ku̱ya̱ti̱n a̱ miiꞌ iinꞌ i̱ ndii, ni̱ yi̱ꞌvi xa̱va̱ꞌa̱ i̱, nde̱e̱ ni̱ na̱ka̱nduꞌu̱ꞌ ndi̱e̱e̱ i̱ nde̱e̱ nuu̱ꞌ ñu̱ꞌuꞌ, te̱ ni̱ kaꞌa̱n a̱ xiinꞌ i̱ ndii: ‘Yoꞌó, te̱ nduuꞌ siꞌe̱ ne̱ yivi̱ꞌ ndii, kuní a̱ ku̱nda̱ni̱ u̱nꞌ ña̱, ña̱ ni̱ sa̱tuví a̱ nuu̱ꞌ u̱nꞌ kaa̱ꞌ ndii, ña̱ xkaꞌndi̱a̱ kivi̱ꞌ soꞌo̱ꞌ ndiꞌiꞌ nduuꞌ a̱,’ ni̱ katyi̱ a̱.
18 “Te̱ kii̱ꞌ kaꞌán ña̱ ja̱a̱nꞌ xiinꞌ i̱ iinꞌ a̱ ndii, ni̱ ku̱ni̱a̱a̱ꞌ i̱, te̱ ni̱ ndu̱va̱ i̱ kanduꞌu̱ꞌ i̱ ñu̱ꞌuꞌ, ndisu̱ ni̱ tondi̱a̱ nda̱ꞌaꞌ a̱ yuꞌu̱, te̱ ni̱ na̱kuii̱n ndi̱tyi̱ i̱ ni̱ xa̱a̱ a̱.
19 Te̱ ni̱ kaꞌa̱n a̱ xiinꞌ i̱ ndii:
‘Ni̱ xa̱a̱ i̱ yoꞌoꞌ te̱ sa̱na̱kuatyiꞌ i̱ nuu̱ꞌ u̱nꞌ ña̱ xkaꞌndi̱a̱ kii̱ꞌ xinu̱ kivi̱ꞌ ña̱ xiꞌé Ndiosí, sa̱kanꞌ ña̱ ña̱ ni̱ xi̱ni̱ u̱nꞌ ja̱a̱nꞌ ndii, kaꞌán a̱ xaꞌa̱ꞌ ña̱ ko̱o̱ kii̱ꞌ kuꞌu̱n ndi̱ꞌi̱ i̱i̱n yivi̱ꞌ.
20 Mbe̱e̱, tiꞌ uvi̱ taꞌan ndi̱kiꞌ, tiꞌ ni̱ xi̱ni̱ u̱nꞌ ja̱a̱nꞌ nduuꞌ rey, te̱ ka̱ꞌndi̱a̱ tyuunꞌ nuu̱ꞌ ñu̱ꞌuꞌ Media, xiinꞌ rey, te̱ ka̱ꞌndi̱a̱ tyuunꞌ nuu̱ꞌ ñu̱ꞌuꞌ Persia.
21 Te̱ ti̱xuꞌu̱ꞌ, tiꞌ ni̱ xi̱ni̱ u̱nꞌ, nduuꞌ rey, te̱ ka̱ꞌndi̱a̱ tyuunꞌ nuu̱ꞌ ñu̱ꞌuꞌ Grecia, te̱ ndi̱kiꞌ riꞌ, ña̱ tyie̱ xa̱va̱ꞌa̱, ña̱ ni̱ xi̱ni̱ u̱nꞌ yoo te̱i̱n ndu̱tyiꞌ nuu̱ꞌ riꞌ ja̱a̱nꞌ, nduuꞌ rey, te̱ nu̱uꞌ, nuu̱ꞌ ñu̱ꞌuꞌ Grecia ja̱a̱nꞌ.
22 Te̱ ku̱miꞌ sa̱aꞌ ndi̱kiꞌ riꞌ, ña̱ ni̱ naku̱n kii̱ꞌ ni̱ taꞌnu̱ ndi̱kiꞌ ña̱ nu̱uꞌ ndii, kuni katyi̱ a̱ ña̱ ko̱o̱ ku̱miꞌ taꞌan rey nuu̱ꞌ ñu̱ꞌuꞌ ja̱a̱nꞌ, ndisu̱ kö̱o̱ kuaꞌa̱ꞌ ndi̱e̱e̱ꞌ ra̱ nde̱e̱ naa te̱ nu̱uꞌ ja̱a̱nꞌ.
23 ‘Kii̱ꞌ kuꞌu̱n ndi̱ꞌi̱ ña̱ xaꞌndia tyuunꞌ rey ja̱a̱nꞌ,
te̱ ku̱kuaꞌa̱ꞌ ña̱ ni̱a̱ꞌa ña̱ xaaꞌ ne̱ yivi̱ꞌ nuu̱ꞌ ñu̱ꞌuꞌ i̱i̱n yivi̱ꞌ ndii,
na̱ku̱nduꞌu̱ꞌ i̱nga̱ rey, te̱ ni̱a̱ꞌa xa̱va̱ꞌa̱, te̱ kotyukuuꞌ xa̱va̱ꞌa̱ tu̱ ra̱ xiinꞌ ña̱ xini xaꞌanꞌ.
24 Te̱ ku̱ndityi xa̱va̱ꞌa̱ ra̱, ndisu̱ süu̱ꞌ xiinꞌ ña̱ ndi̱e̱eꞌ mi̱iꞌ ra̱,
te̱ sa̱nduxín ra̱ kuaꞌa̱ꞌ ña̱ yoo i̱i̱n yivi̱ꞌ,
te̱ ke̱ta̱ va̱ꞌa̱ ra̱ xiinꞌ sa̱kuuꞌ ña̱ sa̱a̱ ra̱.
Te̱ ka̱ꞌni̱ꞌ tu̱ ra̱ te̱ ndisoꞌ tyuunꞌ vie̱,
te̱ ka̱ꞌni̱ꞌ tu̱ ra̱ kuaꞌa̱ꞌ ne̱ nduuꞌ kuenta Ndiosí.
25 Te̱ rey ja̱a̱nꞌ ndii, ku̱ndityi xa̱va̱ꞌa̱ ra̱ xiinꞌ ña̱ xini xaꞌanꞌ, te̱ ku̱ñuñuꞌ xa̱va̱ꞌa̱ tu̱ ra̱.
Te̱ kuaꞌa̱ꞌ xa̱va̱ꞌa̱ ne̱ yivi̱ꞌ ka̱ꞌni̱ꞌ sikiꞌ ra̱.
Te̱ ku̱ntaꞌanꞌ tu̱ ra̱ xiinꞌ mi̱iꞌ Ndiosí, ña̱ sa̱kuuꞌ a̱ ku̱vi̱, ña̱ nduꞌu̱ꞌ ndi̱viꞌ,
ña̱ nduuꞌ Xto̱ꞌo̱ nuu̱ꞌ sa̱kuuꞌ xto̱ꞌo̱,
ndisu̱ ndo̱ñuꞌuꞌ xa̱tyiꞌ ra̱ sa̱a̱ Ndiosí, sa̱kanꞌ ña̱ süu̱ꞌ te̱ yivi̱ꞌ ka̱ꞌni̱ꞌ ña̱ꞌaꞌ.
26 ‘Te̱ ña̱ ni̱ satuví a̱ nuu̱ꞌ u̱nꞌ xaꞌa̱ꞌ uvi̱ mií uni̱ ciento kivi̱ꞌ xiinꞌ ñu̱u ja̱a̱nꞌ ndii, xa̱ ni̱ sa̱na̱kuatyiꞌ yuꞌu̱ a̱ nuu̱ꞌ u̱nꞌ, te̱ ña̱ ndi̱xa̱ nduuꞌ a̱. Ta̱xa̱ꞌa̱ u̱nꞌ u̱n, sa̱kanꞌ ña̱ kuní kuaꞌa̱ꞌ te̱ ko̱o̱ a̱, ndisu̱ ña̱ xinu̱ ku̱ndu̱u̱ a̱,’ ni̱ katyi̱ a̱.
27 “Yuꞌu̱ Daniel ndii, ni̱ xa̱vi xa̱va̱ꞌa̱ i̱, te̱ ni̱ ka̱nduꞌu̱ꞌ i̱ kuni ku̱vi̱ i̱ kiꞌinꞌ kivi̱ꞌ, ndi̱ꞌi̱ ja̱a̱nꞌ te̱ ni̱ nu̱ta̱ i̱, te̱ ni̱ xa̱ꞌaꞌ tukuuꞌ i̱ xaaꞌ i̱ tyu̱u̱n nuu̱ꞌ rey, ndisu̱ ndiꞌni̱ xa̱va̱ꞌa̱ nimá i̱ xaꞌa̱ꞌ ña̱ ni̱ sa̱tuví a̱ nuu̱ꞌ i̱ ja̱a̱nꞌ, sa̱kanꞌ ña̱ nï̱ ku̱vi̱ ku̱nda̱ni̱ i̱ ndee ña̱ kuni katyi̱ a̱.