So̱ꞌo̱ ni̱ xa̱a̱ a̱ kii̱ꞌ ni̱ xa̱ni Daniel ña̱ ni̱ xi̱ni̱ ra̱ ku̱miꞌ taꞌan ki̱tiꞌ i̱kuꞌ, tiꞌ i̱yo̱ va̱ iinꞌ
7
Xta̱ꞌanꞌ va̱, kuiya̱ nu̱uꞌ kii̱ꞌ ni̱ nduu̱ Belsasar rey nuu̱ꞌ ñu̱ꞌuꞌ Babilonia ndii, ni̱ xa̱ni Daniel, te̱ ni̱ sa̱tuví tu̱ a̱ nuu̱ꞌ ra̱ kii̱ꞌ kanduꞌu̱ꞌ ra̱ nuu̱ꞌ tunꞌ xto̱ ra̱ kixín ra̱. Te̱ kii̱ꞌ ni̱ ndo̱to̱ ra̱ ndii, ni̱ ke̱ꞌi̱ ra̱ nuu̱ꞌ tu̱tu̱ ña̱ kaꞌnuꞌ ña̱ kaꞌnuꞌ ku̱i̱ti̱ꞌ, ña̱ ni̱ kaꞌa̱n xa̱ni̱ ja̱a̱nꞌ xiinꞌ ra̱. Te̱ ña̱ yo̱ꞌo̱ꞌ nduuꞌ ña̱ ni̱ ke̱ꞌi̱ ra̱,
2 kaꞌán ra̱ ndii:
“Ni̱ xi̱ni̱ yuꞌu̱ ñu̱u kii̱ꞌ ni̱ xa̱ni i̱ ña̱ ndi̱e̱eꞌ xikaꞌ tatyi̱ꞌ ña̱ kuaxi̱ ku̱mi sa̱aꞌ xiki̱ꞌ i̱i̱n yivi̱ꞌ, te̱ sa̱kanda ndi̱e̱eꞌ a̱ ti̱kui mi̱ni̱ kaꞌnuꞌ.
3 Te̱ ni̱ xi̱ni̱ i̱ ña̱ numi̱ꞌ va̱ ni̱ ki̱e̱e̱ ku̱miꞌ taꞌan ki̱tiꞌ i̱kuꞌ naꞌnuꞌ xa̱va̱ꞌa̱, tiꞌ i̱yo̱ va̱ iinꞌ, nuu̱ꞌ mi̱ni̱ kaꞌnuꞌ, te̱ xa̱ siinꞌ xa̱ siinꞌ iinꞌ i̱ꞌi̱n riꞌ.
4 Tiꞌ i̱kuꞌ, tiꞌ nu̱uꞌ ndii, naa kaaꞌ lion kaaꞌ riꞌ, te̱ ndi̱xi̱n riꞌ ndii, naa iinꞌ ndi̱xi̱n tasu̱ꞌ iinꞌ a̱. Te̱ kii̱ꞌ iinꞌ i̱ xitoꞌ ndiꞌe̱ꞌ i̱ sa̱a̱ kaaꞌ riꞌ ndii, ni̱ tu̱ꞌu̱n Ndiosí ndi̱xi̱n riꞌ, te̱ ni̱ ndo̱ni̱ꞌi̱ ña̱ꞌaꞌ a̱, te̱ ni̱ xa̱ni̱ a̱ riꞌ iinꞌ riꞌ nuu̱ꞌ ñu̱ꞌuꞌ nde̱e̱ na̱a̱ te̱ yivi̱ꞌ, te̱ ni̱ ta̱xi̱ tu̱ a̱ nimá riꞌ nde̱e̱ naa nimá te̱ yivi̱ꞌ.
5 “Te̱ tiꞌ i̱kuꞌ, tiꞌ uvi̱, tiꞌ ni̱ xi̱ni̱ i̱ ndii, naa kaaꞌ oso kaaꞌ riꞌ, te̱ sukun ka̱ i̱i̱n taꞌviꞌ xi̱i̱nꞌ riꞌ te̱ sa̱kanꞌ tu̱ku̱ taꞌviꞌ a̱, te̱ niꞌniꞌ uni̱ taꞌan i̱kiꞌ ndikaꞌ ki̱tiꞌ yu̱ꞌuꞌ riꞌ. Sa̱kanꞌ te̱ ni̱ kaꞌa̱n i̱i̱n tatyi̱ꞌ yu̱ꞌuꞌ xiinꞌ riꞌ ndii: ‘Nu̱ta̱ te̱ ka̱xi̱ꞌ u̱nꞌ kuaꞌa̱ꞌ va̱ nde̱i̱ꞌ,’ ni̱ katyi̱ a̱.
6 “Te̱ tiꞌ i̱kuꞌ, tiꞌ uni̱, tiꞌ ni̱ xi̱ni̱ i ndii, naa kaaꞌ ndi̱ka̱ꞌa̱ kaaꞌ riꞌ, te̱ xata̱ꞌ riꞌ ndondia ku̱miꞌ taꞌan ndi̱xi̱n riꞌ, naa iinꞌ ndi̱xi̱n sa̱a̱ iinꞌ a̱. Te̱ ku̱miꞌ taꞌan kuuꞌ xíniꞌ riꞌ. Te̱ ni̱ na̱ti̱i̱n riꞌ kuaꞌa̱ꞌ va̱ ndi̱e̱e̱ꞌ te̱ ka̱ꞌndi̱a̱ tyuunꞌ riꞌ.
7 “Te̱ tiꞌ i̱kuꞌ, tiꞌ ku̱miꞌ, tiꞌ ni̱ xi̱ni̱ i̱ kii̱ꞌ ni̱ satuví a̱ nuu̱ꞌ i̱ ndii, i̱yo̱ xa̱va̱ꞌa̱ kaaꞌ riꞌ, te̱ ki̱ni̱ tu̱ kaaꞌ riꞌ, te̱ ndi̱e̱eꞌ xa̱va̱ꞌa̱ riꞌ. Te̱ naꞌnuꞌ xa̱va̱ꞌa̱ nu̱ꞌu̱ riꞌ, te̱ tiꞌeꞌ a̱ nde̱e̱ naa ka̱a̱, te̱ ña̱ xaxi̱ꞌ riꞌ ndii, sa̱kuatyiꞌ ndo̱o̱ riꞌ a̱, te̱ xaín ndo̱so̱ꞌ riꞌ ña̱ ndoó ndo̱so̱ꞌ xaxi̱ꞌ riꞌ. Te̱ siinꞌ kaaꞌ riꞌ te̱ sa̱kanꞌ sa̱kuuꞌ tiꞌ ni̱ xi̱ni̱ i̱ ña̱ nu̱uꞌ, te̱ ni̱ yoo̱ tu̱ uxi̱ taꞌan ndi̱kiꞌ riꞌ.
8 “Te̱ kii̱ꞌ iinꞌ i̱ xitoꞌ ndiꞌe̱ꞌ i̱ ndi̱kiꞌ riꞌ ja̱a̱nꞌ ndii, ni̱ xi̱ni̱ i̱ nakún i̱nga̱ ndi̱kiꞌ lulu te̱i̱n ña̱ ja̱a̱nꞌ. Te̱ ni̱ ndu̱va̱ uni̱ taꞌan ndi̱kiꞌ riꞌ ja̱a̱nꞌ, te̱ ndoo̱ miiꞌ ku̱i̱i̱n ña̱ lulu, ña̱ ni̱ naku̱n ja̱a̱nꞌ. Te̱ naa iinꞌ ndu̱tyiꞌ nuu̱ꞌ te̱ yivi̱ꞌ iinꞌ ndu̱tyiꞌ nuu̱ꞌ ndi̱kiꞌ lulu ja̱a̱nꞌ, te̱ yoo yu̱ꞌuꞌ a̱, te̱ kani̱a̱ꞌa a̱ xaꞌa̱ꞌ Ndiosí.
9 “Te̱ kii̱ꞌ iinꞌ ka̱ i̱ xitoꞌ ndiꞌe̱ꞌ i̱ ndi̱kiꞌ ja̱a̱nꞌ ndii,
ni̱ xi̱ni̱ i̱ ni̱ xi̱kuita̱ kiꞌinꞌ tei̱ kaꞌnuꞌ.
Te̱ ni̱ xi̱ku̱nduꞌu̱ꞌ i̱i̱n Tákuiꞌe xi̱xa̱ xa̱va̱ꞌa̱,
ña̱ yoo nde̱e̱ ndiꞌiꞌ ni̱ kivi̱ꞌ, nuu̱ꞌ i̱i̱n tei̱ kaꞌnuꞌ ja̱a̱nꞌ.
Ya̱a̱ katyi̱ vi̱ꞌ toto̱ nani̱ꞌ niꞌnuꞌ ra̱.
Te̱ i̱xiꞌ xíniꞌ ra̱ ndii, ya̱a̱ katyi̱ vi̱ꞌ tu̱ a̱ ja̱a̱nꞌ.
Te̱ tei̱ kaꞌnuꞌ ja̱a̱nꞌ xiinꞌ ndixa̱nꞌ nuꞌ ndii, ñuꞌu̱ ndatinꞌ vi̱ꞌ nduuꞌ a̱.
10 Te̱ ya̱ti̱n nuu̱ꞌ a̱ miiꞌ nduꞌu̱ꞌ ra̱ ja̱a̱nꞌ ketaꞌ i̱i̱n i̱ti̱a̱ miiꞌ kuaꞌa̱n mi̱iꞌ ndiꞌiꞌ ñuꞌu̱.
Te̱ kuaꞌa̱ꞌ mií ne̱ yivi̱ꞌ xikaꞌ nuuꞌ nuu̱ꞌ ra̱,
te̱ kuaꞌa̱ꞌ millón ne̱ yivi̱ꞌ itaꞌ ndi̱tyi̱ nuu̱ꞌ ra̱.
Sa̱kanꞌ te̱ ni̱ xa̱ꞌaꞌ te̱ nduꞌu̱ꞌ nuu̱ꞌ tei̱ ja̱a̱nꞌ sanaꞌmá ra̱ ne̱ kuaꞌa̱ꞌ ja̱a̱nꞌ,
te̱ ni̱ nuni̱a̱ꞌ tu̱ kiꞌinꞌ tu̱tu̱ miiꞌ yoso̱ꞌ ña̱ ni̱ xa̱a̱ ni̱a̱.
11 “Te̱ ni̱ ndoo̱ ka̱ i̱ xitoꞌ ndiꞌe̱ꞌ i̱ ña̱ ja̱a̱nꞌ, sa̱kanꞌ ña̱ ku̱vi̱ xini so̱ꞌo̱ i̱ ña̱ kani̱a̱ꞌa ndi̱kiꞌ lulu ja̱a̱nꞌ. Te̱ kii̱ꞌ iinꞌ ka̱ i̱ xitoꞌ ndiꞌe̱ꞌ i̱ ña̱ ja̱a̱nꞌ ndii, ni̱ xa̱ꞌni̱ꞌ Ndiosí i̱i̱n tiꞌ i̱kuꞌ ja̱a̱nꞌ. Te̱ ni̱ sa̱kuatyiꞌ a̱ riꞌ, te̱ ni̱ ko̱ꞌni̱ ña̱ꞌaꞌ a̱ nuu̱ꞌ ñuꞌu̱ te̱ ko̱ko̱ riꞌ.
12 Te̱ ni̱ tu̱ꞌu̱n tu̱ Ndiosí ndi̱e̱e̱ꞌ i̱nga̱ ka̱ uni̱ taꞌan tiꞌ i̱kuꞌ, tiꞌ ni̱ xi̱ni̱ i̱ ña̱ nu̱uꞌ, ndisu̱ ni̱ ta̱xi̱ a̱ ña̱ ku̱ti̱a̱ku̱ ka̱ riꞌ ndiaꞌviꞌ ka̱ kivi̱ꞌ.
13 “Te̱ kii̱ꞌ iinꞌ ka̱ i̱ xitoꞌ ndiꞌe̱ꞌ i̱ ña̱ ja̱a̱nꞌ ñu̱u ja̱a̱nꞌ ndii.
Ni̱ xi̱ni̱ i̱ kuaxi̱ nu̱u̱ i̱i̱n te̱ kaaꞌ nde̱e̱ naa te̱ yivi̱ꞌ te̱i̱n viko̱ꞌ,
te̱ ni̱ xa̱a̱ ra̱ ya̱ti̱n miiꞌ nduꞌu̱ꞌ Tákuiꞌe, te̱ xi̱xa̱ va̱ ja̱a̱nꞌ, te̱ yoo nde̱e̱ ndiꞌiꞌ ni̱ kivi̱ꞌ ja̱a̱nꞌ,
te̱ ni̱ ki̱xi̱n ndi̱a̱ka̱ ña̱ꞌaꞌ ángele nuu̱ꞌ Tákuiꞌe ja̱a̱nꞌ.
14 Te̱ ni̱ na̱ti̱i̱n ra̱ ña̱ ndi̱e̱eꞌ, xiinꞌ ña̱ nda̱tu̱nꞌ, xiinꞌ ña̱ ka̱ꞌndi̱a̱ tyuunꞌ ra̱,
sa̱kanꞌ te̱ sa̱kaꞌnuꞌ ña̱ꞌaꞌ sa̱kuuꞌ ne̱ yivi̱ꞌ, ne̱ ndieeꞌ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ, xiinꞌ sa̱kuuꞌ ne̱ yoo tu̱ꞌu̱n miiꞌ.
Te̱ köo̱ꞌ kivi̱ꞌ kuꞌu̱n ndi̱koꞌ ña̱ ka̱ꞌndi̱a̱ tyuunꞌ ra̱,
te̱ köo̱ꞌ kivi̱ꞌ tu̱ nduxi̱n miiꞌ ka̱ꞌndi̱a̱ tyuunꞌ ra̱.
15 “Yuꞌu̱ Daniel ndii, ni̱ yi̱ꞌvi xa̱va̱ꞌa̱ i̱ ni̱ xa̱a̱ ña̱ ni̱ xi̱ni̱ i̱ ja̱a̱nꞌ, te̱ ni̱ ndi̱ꞌni̱ tu̱ i̱ xaꞌa̱ꞌ sa̱kuuꞌ ña̱ ni̱ sa̱tuví a̱ nuu̱ꞌ i̱.
16 Sa̱kanꞌ te̱ ni̱ ku̱ya̱ti̱n i̱ nuu̱ꞌ i̱i̱n te̱ itaꞌ ya̱ti̱n nuu̱ꞌ tei̱ kaꞌnuꞌ ja̱a̱nꞌ, te̱ ni̱ kaꞌa̱n i̱ xiinꞌ ra̱ ña̱ sa̱a̱ ra̱ ña̱ va̱ꞌa̱ te̱ kaꞌa̱n ra̱ xiinꞌ i̱ ndee ña̱ kuni katyi̱ sa̱kuuꞌ ña̱ ni̱ xa̱ni i̱ ja̱a̱nꞌ. Te̱ ni̱ na̱ku̱i̱i̱n yu̱ꞌuꞌ ra̱, te̱ ni̱ kaꞌa̱n ra̱ xiinꞌ i̱ ndii:
17 ‘Tiꞌ i̱kuꞌ, tiꞌ ku̱miꞌ taꞌan i̱yo̱ va̱ iinꞌ ja̱a̱nꞌ kuni katyi̱ a̱ ku̱miꞌ taꞌan rey, te̱ ka̱ꞌndi̱a̱ tyuunꞌ nuu̱ꞌ ñu̱ꞌuꞌ i̱i̱n yivi̱ꞌ.
18 Ndisu̱ soꞌo̱ꞌ ndiꞌiꞌ ndii, nda̱ꞌaꞌ ne̱ nduuꞌ kuenta Ndiosí, ña̱ sa̱kuuꞌ a̱ ku̱vi̱, ña̱ nduꞌu̱ ndi̱viꞌ, na̱ta̱xi̱ a̱ ña̱ xaꞌndia tyuunꞌ ra̱ ja̱a̱nꞌ, te̱ ka̱ꞌndi̱a̱ tyuunꞌ ni̱a̱ nde̱e̱ ndiꞌiꞌ ni̱ kivi̱ꞌ,’ ni̱ katyi̱ ra̱.
19 “Te̱ ni̱ kuni̱ ka̱ i̱ ku̱nda̱ni̱ i̱ ndee ña̱ kuni katyi̱ tiꞌ i̱kuꞌ, tiꞌ ku̱miꞌ, sa̱kanꞌ ña̱ siinꞌ va̱ kaaꞌ riꞌ te̱ sa̱kanꞌ i̱nga̱ tiꞌ ni̱ xi̱ni̱ nu̱uꞌ i̱ ja̱a̱nꞌ, te̱ tyaꞌanꞌ xa̱va̱ꞌa̱ tu̱ kaaꞌ riꞌ. Te̱ nu̱ꞌu̱ riꞌ ndii, ka̱a̱ tiꞌeꞌ xa̱va̱ꞌa̱ nduuꞌ a̱, te̱ tyii̱nꞌ riꞌ ndii, ka̱a̱ bronce nduuꞌ a̱, te̱ sakuatyiꞌ ndo̱o̱ riꞌ ña̱ xaxi̱ꞌ riꞌ, te̱ xaín ndo̱so̱ꞌ riꞌ ña̱ ndoó ndo̱so̱ꞌ xaxi̱ꞌ riꞌ.
20 Te̱ ni̱ kuni̱ tu̱ i̱ ku̱nda̱ni̱ i̱ xaꞌa̱ꞌ uxi̱ sa̱aꞌ ndi̱kiꞌ riꞌ ja̱a̱nꞌ, xiinꞌ xaꞌa̱ꞌ ndi̱kiꞌ lulu, ña̱ ni̱ naku̱n miiꞌ ni̱ ndu̱va̱ uni̱ taꞌan ndi̱kiꞌ tiꞌ ja̱a̱nꞌ, te̱ yoo ndu̱tyiꞌ nuu̱ꞌ a̱, te̱ yoo tu̱ yu̱ꞌuꞌ a̱, te̱ kani̱a̱ꞌa a̱ xaꞌa̱ꞌ Ndiosí. Te̱ yoo kuaꞌa̱ꞌ ka̱ ndi̱e̱e̱ꞌ ndi̱kiꞌ ja̱a̱nꞌ te̱ sa̱kanꞌ sa̱kuuꞌ i̱nga̱ a̱.
21 Te̱ ni̱ xi̱ni̱ i̱ kuntaꞌanꞌ ndi̱kiꞌ ja̱a̱nꞌ xiinꞌ ne̱ nduuꞌ kuenta Ndiosí, te̱ ketaꞌ va̱ꞌa̱ a̱ xiinꞌ ni̱a̱,
22 nde̱e̱ ni̱ xa̱a̱ tákuiꞌe xi̱xa̱ xa̱va̱ꞌa̱, ña̱ yoo nde̱e̱ ndiꞌiꞌ ni̱ kivi̱ꞌ, ña̱ nduuꞌ Ndiosí nduꞌu̱ꞌ ndi̱viꞌ, te̱ ni̱ sa̱naꞌmá nda̱ku a̱ ne̱ nduuꞌ kuenta mi̱iꞌ a̱, sa̱kanꞌ ña̱ xa̱ ni̱ xa̱a̱ kivi̱ꞌ ña̱ xa̱ꞌaꞌ ne̱ ja̱a̱nꞌ ka̱ꞌndi̱a̱ tyuunꞌ ni̱a̱.
23 “Te̱ ni̱ kaꞌa̱n ka̱ ra̱ xiinꞌ i̱ ndii:
‘Tiꞌ i̱kuꞌ, tiꞌ ku̱miꞌ, tiꞌ i̱yo̱ xa̱va̱ꞌa̱ kaaꞌ ja̱a̱nꞌ,
kuni katyi̱ a̱ te̱ ka̱ꞌndi̱a̱ tyuunꞌ nuu̱ꞌ i̱i̱n yivi̱ꞌ,
te̱ siinꞌ va̱ ka̱ꞌndi̱a̱ tyuunꞌ ra̱ te̱ sa̱kanꞌ sa̱kuuꞌ i̱nga̱ te̱ xaꞌndia tyuunꞌ ja̱a̱nꞌ,
sa̱kanꞌ ña̱ sa̱nduxín ra̱ ka̱niiꞌ ñu̱ꞌuꞌ i̱i̱n yivi̱ꞌ,
kueꞌni̱ ndo̱so̱ꞌ ra̱ a̱, te̱ sa̱kuatyiꞌ xiꞌe̱ ndo̱o̱ ra̱ a̱.
24 Te̱ ndi̱kiꞌ riꞌ, ña̱ uxi̱ taꞌan ja̱a̱nꞌ,
kuni katyi̱ a̱ uxi̱ taꞌan rey, te̱ ka̱ꞌndi̱a̱ tyuunꞌ miiꞌ xaꞌndia tyuunꞌ, te̱ ku̱miꞌ ja̱a̱nꞌ.
Te̱ kii̱ꞌ ndi̱ꞌi̱ ka̱ꞌndi̱a̱ tyuunꞌ te̱ uxi̱ taꞌan ja̱a̱nꞌ,
te̱ ko̱o̱ i̱nga̱ te̱ ka̱ꞌndi̱a̱ tyuunꞌ,
te̱ ja̱a̱nꞌ ndii, siinꞌ va̱ ka̱ꞌndi̱a̱ tyuunꞌ ra̱ te̱ sa̱kanꞌ te̱ nu̱uꞌ, te̱ uxi̱ ja̱a̱nꞌ,
te̱ ja̱a̱nꞌ ndii, ka̱nandoo ra̱ uni̱ taꞌan rey, te̱ uxi̱ ja̱a̱nꞌ.
25 Te̱ ka̱ni̱a̱ꞌa ra̱ xaꞌa̱ꞌ Ndiosí, ña̱ sa̱kuuꞌ a̱ ku̱vi̱, ña̱ nduꞌu̱ꞌ ndi̱viꞌ,
te̱ mi̱iꞌ ku̱u̱ ra̱ xiinꞌ ne̱ nduuꞌ kuenta Ndiosí,
te̱ sa̱a̱ ra̱ ña̱ nduxa̱ꞌ te̱ na̱ma̱ ra̱ tu̱ꞌu̱n nde̱iꞌ Ndiosí,
te̱ na̱ma̱ tu̱ ra̱ vi̱koꞌ, ña̱ xaꞌa ne̱ yivi̱ꞌ ña̱ xakaꞌnuꞌ ni̱a̱ Ndiosí.
Te̱ mi̱iꞌ ra̱ vi̱ko̱ niꞌiꞌ ne̱ nduuꞌ kuenta Ndiosí, niiꞌ uni̱ kuiya̱ yoso̱ꞌ sa̱va̱.
26 Ndisu̱ kii̱ꞌ na̱ku̱nduꞌu̱ꞌ, te̱ nduuꞌ kuesí nuu̱ꞌ tei̱ kaꞌnuꞌ ja̱a̱nꞌ ndii,
tu̱ꞌu̱n ra̱ ña̱ xaꞌndia tyuunꞌ rey ja̱a̱nꞌ nda̱ꞌaꞌ ra̱, te̱ sa̱ndo̱ñuꞌuꞌ xa̱tyiꞌ ña̱ꞌaꞌ ra̱,
te̱ sa̱ndiꞌiꞌ xa̱tyiꞌ tu̱ ña̱ꞌaꞌ ra̱ nde̱e̱ a̱ma̱ ka̱ ni̱.
27 Te̱ ta̱xi̱ ra̱ nda̱ꞌaꞌ ne̱ nduuꞌ kuenta ra̱ ña̱ xaꞌndia tyuunꞌ, xiinꞌ ña̱ ndi̱e̱eꞌ,
xiinꞌ ña̱ nda̱tu̱nꞌ, ña̱ ni̱ ku̱miꞌ sa̱kuuꞌ te̱ xaꞌndia tyuunꞌ nuu̱ꞌ ñu̱ꞌuꞌ i̱i̱n yivi̱ꞌ.
Te̱ Ndiosí, ña̱ sa̱kuuꞌ a̱ ku̱vi̱, nduꞌu̱ ndi̱viꞌ ja̱a̱nꞌ ndii,
köo̱ꞌ kivi̱ꞌ kuꞌu̱n ndi̱ꞌi̱ ña̱ xaꞌndia tyuunꞌ a̱,
te̱ sa̱kuuꞌ te̱ xaꞌndia tyuunꞌ nuu̱ꞌ ñu̱ꞌuꞌ i̱i̱n yivi̱ꞌ, xiinꞌ ne̱ yivi̱ꞌ ndii,
ka̱ka̱ nu̱u̱ ni̱a̱ nuu̱ꞌ a̱, te̱ sa̱xinú tu̱ ni̱a̱ ña̱ kaꞌán tyuunꞌ a̱,’ ni̱ katyi̱ ra̱ xiinꞌ i̱.
28 “Yoꞌoꞌ ndiꞌiꞌ ña̱ kaꞌán i̱ xaꞌa̱ꞌ ña̱ ni̱ xa̱ni i̱ ja̱a̱nꞌ. Ndisu̱ yuꞌu̱, Daniel ndii, kusaaꞌ ndiꞌni̱ na ndiꞌni̱ ka̱ i̱ xaꞌa̱ꞌ a̱, te̱ nuu̱ꞌ i̱ ndii, ni̱ ku̱ya̱a̱ ndi̱i a̱ ni̱ xa̱a̱ ña̱ ni̱ xi̱ni̱ i̱ ja̱a̱nꞌ, nde̱e̱ sa̱a̱ ka̱ ni̱ ndii, nï̱ kaꞌa̱n i̱ xiinꞌ nde̱e̱ i̱i̱n ne̱ yivi̱ꞌ xaꞌa̱ꞌ ña̱ ja̱a̱nꞌ,” ni̱ katyi̱ Daniel.