So̱ꞌo̱ ni̱ xa̱a̱ a̱ kii̱ꞌ ni̱ sko̱ꞌniꞌ te̱ yivi̱ꞌ Daniel poso̱ miiꞌ ñuꞌuꞌ lion
6
Ni̱ tu̱u̱ Darío ña̱ va̱ꞌa̱ nduuꞌ a̱ ña̱ sa̱kuisoꞌ tyuunꞌ ra̱ ciento oko̱ te̱ ka̱ꞌndi̱a̱ tyuunꞌ i̱ꞌi̱n xaanꞌ nuu̱ꞌ ñu̱ꞌuꞌ miiꞌ xaꞌndia tyuunꞌ ra̱.
2 Te̱ ni̱ sa̱kuisoꞌ tyuunꞌ ra̱ uni̱ taꞌan te̱ ko̱to̱ sa̱a̱ xatyuunꞌ te̱ ciento oko̱ ja̱a̱nꞌ, sa̱kanꞌ te̱ ndö̱ñuꞌuꞌ saka nde̱e̱ siee ña̱ kaꞌán rey ja̱a̱nꞌ xaꞌa̱ꞌ. Te̱ i̱i̱n te̱ uni̱ taꞌan ja̱a̱nꞌ nduuꞌ Daniel.
3 Te̱ Daniel ndii, yatyi̱ va̱ ni̱ niaꞌa̱ ra̱ nuu̱ꞌ rey ña̱ va̱ꞌa̱ ka̱ xatyuunꞌ ra̱ te̱ sa̱kanꞌ sa̱kuuꞌ te̱ xaꞌndia tyuunꞌ ja̱a̱nꞌ, sa̱kanꞌ na kuiiꞌ ni̱ kuni̱ rey sa̱kuisoꞌ tyuunꞌ ña̱ꞌaꞌ ra̱ ka̱niiꞌ nuu̱ꞌ ñu̱ꞌuꞌ miiꞌ xaꞌndia tyuunꞌ mi̱iꞌ ra̱.
4 Sa̱kanꞌ te̱ ni̱ xa̱ꞌaꞌ te̱ xaꞌndia tyuunꞌ ja̱a̱nꞌ xiinꞌ mi̱iꞌ te̱ xitoꞌ ña̱ꞌaꞌ nandukuꞌ ra̱ ku̱a̱tyi̱ Daniel, ndiani̱ te̱ kaꞌa̱n ra̱ xiinꞌ rey ña̱ xätyuunꞌ va̱ꞌa̱ te̱ ja̱a̱nꞌ xiinꞌ ña̱ kaꞌán rey ja̱a̱nꞌ xaꞌa̱ꞌ. Ndisu̱ xaꞌa̱ꞌ a̱ ña̱ te̱ xatyuunꞌ nda̱ku nduuꞌ Daniel ndii, nï̱ ku̱vi̱ na̱ꞌi̱ ra̱ nde̱e̱ i̱i̱n ku̱a̱tyi̱ ra̱, ni̱ nde̱e̱ kö̱o̱ tu̱ nde̱e̱ i̱i̱n xaꞌa̱ꞌ ña̱ ku̱vi̱ ti̱i̱n ku̱a̱tyi̱ ña̱ꞌaꞌ ra̱, sa̱kanꞌ ña̱ i̱i̱n te̱ ku̱vi̱ i̱ni̱ e̱ꞌ ku̱ni̱ e̱ꞌ nduuꞌ Daniel ja̱a̱nꞌ.
5 Sa̱kanꞌ na ni̱ kaꞌa̱n xiinꞌ taꞌanꞌ te̱ yivi̱ꞌ ja̱a̱nꞌ ndii: “Köo̱ꞌ xa̱tyiꞌ a̱ ku̱vi̱ ti̱i̱n kua̱tyi̱ e̱ꞌ Daniel kaa̱ꞌ xaꞌa̱ꞌ tyu̱u̱n ña̱ xaaꞌ ra̱, nde̱e̱ tyaaꞌ ka̱ ti̱i̱n ku̱a̱tyi̱ ña̱ꞌaꞌ e̱ꞌ xaꞌa̱ꞌ ña̱ kaꞌán tu̱ꞌu̱n nde̱iꞌ Ndiosí, ña̱ kandixaꞌ ra̱,” ni̱ katyi̱ ra̱.
6 Sa̱kanꞌ na ni̱ na̱ka̱ta̱ te̱ xitoꞌ te̱ xaꞌndia tyuunꞌ ja̱a̱nꞌ xiinꞌ sa̱kuuꞌ te̱ xaꞌndia tyuunꞌ ja̱a̱nꞌ kuento ra̱, te̱ ni̱ xaꞌa̱n ra̱ nuu̱ꞌ rey Darío, te̱ kii̱ꞌ ni̱ xa̱a̱ ra̱ i̱kanꞌ, te̱ ni̱ kaꞌa̱n ra̱ xiinꞌ te̱ ja̱a̱nꞌ ndii:
―Rey Darío, kaꞌnuꞌ va̱ te̱ nduuꞌ yoꞌó nde̱e̱ ndiꞌiꞌ ni̱ kivi̱ꞌ.
7 Sa̱kuuꞌ nduꞌu̱, te̱ ndisoꞌ tyuunꞌ vie̱, ni̱ na̱ka̱ta̱ ndu̱ kuento ndu̱, xiinꞌ te̱ xaꞌndia tyuunꞌ, xiinꞌ te̱ xitoꞌ te̱ xaꞌndia tyuunꞌ ja̱a̱nꞌ, xiinꞌ te̱ kaꞌán nde̱iꞌ, xiinꞌ te̱ kuuꞌ nuuꞌ nuu̱ꞌ te̱ xíinꞌ, te̱ ni̱ xa̱ꞌa̱ ndu̱ i̱i̱n junta miiꞌ ni̱ ndoo̱ ndu̱ kuento ña̱ kuní a̱ kaꞌa̱n tyuunꞌ u̱nꞌ, te̱ keꞌi̱ i̱i̱n nde̱iꞌ ña̱ kaꞌán ña̱ niiꞌ oko̱ uxi̱ kivi̱ꞌ ndii, nde̱e̱ i̱i̱n ne̱ yivi̱ꞌ kü̱vi̱ kaꞌa̱n ndaꞌvi nuu̱ꞌ nde̱e̱ i̱i̱n ndiosí, ni̱ nde̱e̱ nuu̱ꞌ nde̱e̱ i̱i̱n te̱ yivi̱ꞌ, süu̱ꞌ ja̱a̱nꞌ ndii, nuu̱ꞌ yoꞌó ku̱i̱ti̱ꞌ ku̱vi̱ sa̱a̱ ni̱a̱ ña̱ ja̱a̱nꞌ. Te̱ yo̱o̱ ka̱ säxinú a̱ ndii, ko̱ꞌni̱ ña̱ꞌaꞌ te̱ yivi̱ꞌ poso̱ miiꞌ ñuꞌuꞌ lion.
8 Sa̱kanꞌ na kuiiꞌ sa̱a̱ u̱nꞌ ña̱ va̱ꞌa̱, te̱ ta̱xi̱ u̱nꞌ ndi̱e̱e̱ꞌ nde̱iꞌ yoꞌoꞌ, te̱ tyi̱nduꞌu̱ꞌ tu̱ u̱nꞌ nuu̱ꞌ nda̱ꞌaꞌ u̱nꞌ nuu̱ꞌ a̱, sa̱kanꞌ te̱ kö̱o̱ ku̱vi̱ na̱ma̱ a̱, nde̱e̱ naa yoo tu̱ꞌu̱n nde̱iꞌ ne̱ ndieeꞌ nuu̱ꞌ ñu̱ꞌuꞌ Media, xiinꞌ nuu̱ꞌ ñu̱ꞌuꞌ Persia ni̱ xa̱a̱ u̱nꞌ, ña̱ ja̱a̱nꞌ ndii, kö̱o̱ kivi̱ꞌ nama̱ a̱ ―ni̱ katyi̱ ra̱.
9 Sa̱kanꞌ na ni̱ tyi̱nduꞌu̱ꞌ rey Darío nuu̱ꞌ nda̱ꞌaꞌ ra̱ nuu̱ꞌ tu̱tu̱ miiꞌ yoso̱ꞌ nde̱iꞌ ja̱a̱nꞌ.
10 Ndisu̱ kii̱ꞌ ni̱ xi̱ni̱ Daniel kuento ña̱ ni̱ tyi̱nduꞌu̱ꞌ rey nuu̱ꞌ nda̱ꞌaꞌ ra̱ nuu̱ꞌ tu̱tu̱ ja̱a̱nꞌ ndii, ni̱ nda̱ꞌni̱ ra̱ vi̱ꞌe̱ ra̱, te̱ ni̱ nu̱niaꞌ ra̱ ventana ña̱ yoo miiꞌ iinꞌ tunꞌ xto̱ kixín ra̱, ni̱ ku̱nda̱ku miiꞌ naá ñu̱u̱ Jerusalén. Te̱ i̱kanꞌ ni̱ xi̱kuii̱n xitiꞌ ra̱, te̱ ni̱ kaꞌa̱n ra̱ xiinꞌ Ndiosí taxiꞌ ra̱ ña̱ tyi̱nda̱ni a̱, sa̱kanꞌ ña̱ xa̱ sa̱kanꞌ xixaá ra̱ kaꞌán ra̱ xiinꞌ Ndiosí uni̱ i̱tyiꞌ i̱ꞌi̱n kivi̱ꞌ kuaꞌa̱n.
11 Sa̱kanꞌ te̱ ni̱ ko̱ꞌni̱ sa̱kuuꞌ te̱ yivi̱ꞌ ja̱a̱nꞌ vi̱ꞌe̱ Daniel, te̱ ni̱ na̱ꞌi̱ nda̱ꞌaꞌ ña̱ꞌaꞌ ra̱ kaꞌán ra̱ xiinꞌ Ndiosí, te̱ xikán tu̱ ra̱ nuu̱ꞌ a̱ ña̱ tyi̱ndi̱e̱eꞌ ña̱ꞌaꞌ a̱.
12 Xa̱kaꞌán e̱ꞌ te̱ ni̱ ki̱e̱e̱ ra̱ kuaꞌa̱n ra̱ miiꞌ nduꞌu̱ꞌ rey, te̱ kaꞌa̱n ra̱ xiinꞌ te̱ ja̱a̱nꞌ xaꞌa̱ꞌ ña̱ kaꞌán tu̱ꞌu̱n nde̱iꞌ ndii:
―Tákuiꞌe, yoꞌó ndii, ni̱ kaꞌa̱n tyuunꞌ u̱nꞌ, te̱ ni̱ keꞌi̱ i̱i̱n tu̱ꞌu̱n nde̱iꞌ ña̱ kaꞌán ña̱ niiꞌ oko̱ uxi̱ kivi̱ꞌ naaꞌ kaꞌa̱n ndaꞌvi yo̱o̱ ka̱ nuu̱ꞌ ndee ka̱ ndiosí, uun nuu̱ꞌ ndee ka̱ te̱ yivi̱ꞌ, te̱ süu̱ꞌ nuu̱ꞌ yoꞌó kaꞌa̱n ndaꞌvi ra̱ ndii, ko̱ꞌni̱ ña̱ꞌaꞌ te̱ yivi̱ꞌ poso̱ miiꞌ ñuꞌuꞌ lion. ¿Süu̱ꞌ sa̱kanꞌ nduuꞌ a̱ nuꞌ? ―ni̱ katyi̱ ra̱.
Te̱ ni̱ kaꞌa̱n rey xiinꞌ ra̱ ndii:
―Uun, sa̱kanꞌ nduuꞌ a̱, nde̱iꞌ ja̱a̱nꞌ ndii, kü̱vi̱ nama̱ a̱ sa̱a̱ niiꞌ kü̱vi̱ nama̱ nde̱iꞌ ña̱ yoo nuu̱ꞌ ne̱ ndieeꞌ nuu̱ꞌ ñu̱ꞌuꞌ Media, xiinꞌ ne̱ ndieeꞌ nuu̱ꞌ ñu̱ꞌuꞌ Persia ―ni̱ katyi̱ ra̱.
13 Sa̱kanꞌ te̱ ni̱ na̱ku̱i̱i̱n te̱ ja̱a̱nꞌ kaꞌán ra̱ xiinꞌ rey ndii:
―Daniel, te̱ nduuꞌ i̱i̱n te̱ judío, te̱ ni̱ xaꞌa̱n na̱ka̱ uꞌvi̱ te̱ ñu̱u̱ e̱ꞌ te̱i̱n ne̱ judío ndii, xïtoꞌ kaꞌnuꞌ ra̱ yoꞌó, tákuiꞌe rey, ni̱ nde̱e̱ säxinú tu̱ ra̱ nde̱iꞌ ña̱ ni̱ kaꞌa̱n tyuunꞌ u̱nꞌ, te̱ ni̱ keꞌi̱, sa̱kanꞌ ña̱ ni̱ xi̱ni̱ ndu̱ kaꞌán ra̱ xiinꞌ Ndiosí ra̱ uni̱ i̱tyiꞌ i̱ꞌi̱n kivi̱ꞌ kuaꞌa̱n ―ni̱ katyi̱ ra̱.
14 Te̱ kii̱ꞌ ni̱ xi̱ni̱ so̱ꞌo̱ rey ña̱ ja̱a̱nꞌ ndii, ni̱ ku̱su̱tyiꞌ xa̱va̱ꞌa̱ i̱ni̱ ra̱, te̱ ni̱ xika̱ ra̱ sa̱kakú ra̱ Daniel. Sa̱kanꞌ na kuiiꞌ ndu̱viꞌ kivi̱ꞌ ja̱a̱nꞌ ni̱ xika̱ rey nandukuꞌ ra̱ sa̱a̱ ku̱vi̱ te̱ sa̱kakú ña̱ꞌaꞌ ra̱.
15 Ndisu̱ te̱ yivi̱ꞌ ja̱a̱nꞌ ndii, ni̱ xaꞌa̱n ko̱to̱ tu̱ku̱u̱ ra̱ rey, te̱ ni̱ kaꞌa̱n ra̱ xiinꞌ ra̱ ndii:
―Tákuiꞌe, xiní kaxiꞌ yoꞌó ña̱ nde̱e̱ i̱i̱n nde̱iꞌ ne̱ ndieeꞌ nuu̱ꞌ ñu̱ꞌuꞌ Media, xiinꞌ ne̱ ndieeꞌ nuu̱ꞌ ñu̱ꞌuꞌ Persia, ña̱ ni̱ tyi̱nduꞌu̱ꞌ yoꞌó nuu̱ꞌ nda̱ꞌaꞌ u̱nꞌ nuu̱ꞌ ndii, kü̱vi̱ nama̱ a̱ ―ni̱ katyi̱ ra̱.
16 Sa̱kanꞌ te̱ ni̱ kaꞌa̱n tyuunꞌ rey, te̱ ni̱ xaꞌa̱n na̱ka̱ te̱ yivi̱ꞌ Daniel, te̱ ni̱ sko̱ꞌniꞌ ña̱ꞌaꞌ ra̱ poso̱ miiꞌ ñuꞌuꞌ lion. Ndisu̱ ña̱ kuní ka̱ sko̱ꞌniꞌ ña̱ꞌaꞌ ra̱ i̱kanꞌ, te̱ ni̱ kaꞌa̱n rey xiinꞌ Daniel ndii:
―Ndiatuꞌ i̱ni̱ i̱ ña̱ Ndiosí u̱nꞌ, ña̱ xakaꞌnuꞌ u̱nꞌ xiinꞌ ka̱niiꞌ nimá u̱nꞌ i̱ꞌi̱n kivi̱ꞌ kuaꞌa̱n, na sa̱kakú na yoꞌó ―ni̱ katyi̱ ra̱.
17 Te̱ kii̱ꞌ ni̱ sko̱ꞌniꞌ ña̱ꞌaꞌ ra̱ ti̱xi̱n poso̱ miiꞌ ñuꞌuꞌ lion ja̱a̱nꞌ ndii, ni̱ sa̱tuvi̱ꞌ ra̱ i̱i̱n yuu̱ꞌ, te̱ ni̱ tyi̱nduꞌu̱ꞌ ra̱ a̱ yu̱ꞌuꞌ poso̱ ja̱a̱nꞌ, te̱ ni̱ tyi̱nduꞌu̱ꞌ rey nuu̱ꞌ nda̱ꞌaꞌ ra̱ xiinꞌ ka̱xun nda̱ꞌaꞌ xata̱ꞌ yuu̱ꞌ ja̱a̱nꞌ, te̱ ni̱ tyi̱ndi̱e̱e̱ tu̱ i̱nga̱ te̱ ndisoꞌ tyuunꞌ vie̱ ja̱a̱nꞌ nuu̱ꞌ nda̱ꞌaꞌ ra̱ xiinꞌ ka̱xun nda̱ꞌaꞌ xata̱ꞌ yuu̱ꞌ ja̱a̱nꞌ, sa̱kanꞌ te̱ nde̱e̱ i̱i̱n te̱ yivi̱ꞌ kü̱vi̱ kuꞌu̱n te̱ sa̱kakú ra̱ Daniel i̱kanꞌ.
18 I̱kanꞌ te̱ kuaꞌa̱n nuꞌu̱ꞌ rey vi̱ꞌe̱ ra̱, te̱ ni̱ na̱ka̱nduꞌu̱ꞌ so̱ko ra̱, te̱ nï̱ xi̱i̱n tu̱ ra̱ ña̱ sa̱sánaꞌ ña̱ꞌaꞌ ne̱ yivi̱ꞌ, te̱ niiꞌ ñu̱u ja̱a̱nꞌ nï̱ ku̱vi̱ kusu̱n ra̱.
19 Ni̱ kitu̱ꞌ so̱ꞌo̱ tu̱ku̱ kivi̱ꞌ, te̱ ni̱ ndo̱koo̱ rey, te̱ ni̱ xaꞌa̱n kiꞌi̱ꞌ xa̱va̱ꞌa̱ ra̱ poso̱ miiꞌ ñuꞌuꞌ lion ja̱a̱nꞌ.
20 Te̱ kii̱ꞌ ni̱ ku̱ya̱ti̱n ra̱ i̱kanꞌ, te̱ ni̱ kaꞌa̱n sutyiꞌ i̱ni̱ ra̱ ndii:
―Daniel, yoꞌó te̱ xikaꞌ nuuꞌ nuu̱ꞌ Ndiosí tiaku, te̱ xakaꞌnuꞌ ña̱ꞌaꞌ u̱nꞌ xiinꞌ ka̱niiꞌ nimá u̱nꞌ i̱ꞌi̱n kivi̱ꞌ kuaꞌa̱n, ¿ñáá ni̱ sa̱kakú na a̱ yoꞌó yu̱ꞌuꞌ lion? ―ni̱ katyi̱ ra̱.
21 Sa̱kanꞌ te̱ ni̱ na̱ku̱i̱i̱n Daniel kaꞌán ra̱ xiinꞌ rey ndii:
―Tákuiꞌe rey, kaꞌnuꞌ va̱ te̱ nduuꞌ yoꞌó nde̱e̱ ndiꞌiꞌ ni̱ kivi̱ꞌ.
22 Ndiosí, ña̱ xakaꞌnuꞌ i̱ ni̱ ti̱ꞌviꞌ ángele, ña̱ xikaꞌ nuuꞌ nuu̱ꞌ a̱, te̱ ni̱ nda̱si̱ a̱ yu̱ꞌuꞌ lion, te̱ nï̱ xa̱xi̱ꞌ riꞌ yuꞌu̱, sa̱kanꞌ ña̱ xiní a̱ ndii, te̱ kö̱o̱ ku̱a̱tyi̱ nduuꞌ i̱, te̱ kö̱o̱ tu̱ nde̱e̱ i̱i̱n ña̱ ni̱a̱ꞌa ni̱ xa̱a̱ i̱ nuu̱ꞌ yoꞌó, tákuiꞌe ―ni̱ katyi̱ ra̱.
23 Sa̱kanꞌ te̱ ni̱ na̱ku̱a̱tiaꞌ xa̱va̱ꞌa̱ rey, te̱ ni̱ kaꞌa̱n tyuunꞌ ra̱ ña̱ xta̱ꞌniꞌ te̱ yivi̱ꞌ Daniel poso̱ ja̱a̱nꞌ. Te̱ kii̱ꞌ ni̱ ke̱ta̱ ra̱ poso̱ ja̱a̱nꞌ ndii, kuäsa̱ꞌ ni̱ tu̱xuꞌví ra̱ nde̱e̱ siee vi̱ꞌ, sa̱kanꞌ ña̱ i̱ni̱ ra̱ ni̱ xi̱ni̱ ra̱ Ndiosí ra̱.
24 I̱kanꞌ te̱ ni̱ kaꞌa̱n tyuunꞌ rey ña̱ kuꞌu̱n na̱ka̱ te̱ xíinꞌ te̱ yivi̱ꞌ, te̱ ni̱ tyi̱nduꞌu̱ꞌ ku̱a̱tyi̱ xaꞌa̱ꞌ Daniel ja̱a̱nꞌ, te̱ ni̱ na̱ti̱i̱n ra̱ ñaꞌ siꞌi te̱ ja̱a̱nꞌ, xiinꞌ sa̱kuuꞌ siꞌe̱ ra̱, xiinꞌ mi̱iꞌ ra̱, te̱ ni̱ ko̱ꞌni̱ ña̱ꞌaꞌ ra̱ poso̱ miiꞌ ñuꞌuꞌ lion ja̱a̱nꞌ. Te̱ nde̱e̱ kuní ka̱ na̱xinu̱ ra̱ nde̱e̱ ma̱aꞌ ti̱xi̱n poso̱ miiꞌ ñuꞌuꞌ riꞌ ja̱a̱nꞌ, te̱ ni̱ na̱ti̱i̱n ña̱ꞌaꞌ riꞌ xa̱ꞌaꞌ xaxi̱ꞌ riꞌ nde̱e̱ i̱kiꞌ ra̱.
25 Sa̱kanꞌ te̱ ni̱ ke̱ꞌi̱ rey Darío i̱i̱n nde̱iꞌ nuu̱ꞌ i̱i̱n tu̱tu̱, kuaꞌa̱n nda̱ꞌaꞌ sa̱kuuꞌ ne̱ yivi̱ꞌ, ne̱ ndieeꞌ ka̱niiꞌ nuu̱ꞌ ñu̱ꞌuꞌ miiꞌ xaꞌndia tyuunꞌ ra̱, xiinꞌ nuu̱ꞌ ne̱ ndieeꞌ nda̱ꞌaꞌ a̱, xiinꞌ nuuꞌ ne̱ yoo tu̱ꞌu̱n mi̱iꞌ, kaꞌán ra̱ ndii: “Na ko̱o̱ na̱ ña̱ mani̱ꞌ te̱i̱n sa̱kuuꞌ ndo̱ꞌ, te̱ na ku̱ndi̱e̱e̱ va̱ꞌa̱ ndo̱ꞌ.
26 Kaꞌán tyuunꞌ i̱ ña̱ ka̱niiꞌ nuu̱ꞌ ñu̱ꞌuꞌ miiꞌ xaꞌndia tyuunꞌ i̱ ndii, na ki̱ꞌi̱n kaꞌnuꞌ sa̱kuuꞌ ne̱ yivi̱ꞌ Ndiosí, ña̱ xakaꞌnuꞌ Daniel, te̱ na sa̱kaꞌnuꞌ tu̱ ña̱ꞌaꞌ ni̱a̱.
Sa̱kanꞌ ña̱ Ndiosí tiaku nduuꞌ a̱,
te̱ yoo a̱ nde̱e̱ ndiꞌiꞌ ni̱ kivi̱ꞌ,
te̱ köo̱ꞌ kivi̱ꞌ nduxi̱n ña̱ xaꞌndia tyuunꞌ a̱,
te̱ yoo tu̱ ndi̱e̱e̱ꞌ a̱ nde̱e̱ ndiꞌiꞌ ni̱ kivi̱ꞌ.
27 Te̱ ña̱ ja̱a̱nꞌ nduuꞌ ña̱ sa̱kakú ne̱ yivi̱ꞌ,
te̱ sa̱ndoó ndiká tu̱ ña̱ꞌaꞌ a̱,
te̱ xaaꞌ a̱ tyu̱u̱n kaꞌnuꞌ, xiinꞌ ña̱ nandani̱ ndi̱viꞌ, xiinꞌ nuu̱ꞌ ñu̱ꞌuꞌ i̱i̱n yivi̱ꞌ.
Te̱ ña̱ ja̱a̱nꞌ tu̱ ni̱ sa̱kakú Daniel nuu̱ꞌ kiꞌinꞌ lion, te̱ nï̱ xa̱xi̱ꞌ ña̱ꞌaꞌ riꞌ,” ni̱ katyi̱ ra̱.
28 Te̱ Daniel ndii, ni̱ ndoo̱ ra̱ nduuꞌ ka̱ ra̱ te̱ ndisoꞌ tyuunꞌ vie̱ va̱ kii̱ꞌ xaꞌndia tyuunꞌ ka̱ Darío, xiinꞌ nde̱e̱ kii̱ꞌ ni̱ xa̱ꞌndi̱a̱ tyuunꞌ rey Ciro nuu̱ꞌ ñu̱ꞌuꞌ Persia.