Yoꞌoꞌ kaꞌán a̱ xaꞌa̱ꞌ ña̱ nianiaꞌ ña̱ oro, ña̱ ni̱ xa̱ꞌa̱ rey Nabucodonosor te̱ sa̱kaꞌnuꞌ ne̱ yivi̱ꞌ a̱
3
Ni̱ xa̱ꞌa̱ rey Nabucodonosor i̱i̱n ña̱ nianiaꞌ xiinꞌ mi̱iꞌ ndiꞌiꞌ oro, te̱ oko̱ uxi̱ metro sukun a̱, te̱ uni̱ metro ña̱ ndiká a̱, te̱ ni̱ xaꞌa̱n ka̱ni̱ ra̱ a̱ yo̱soꞌ nuu̱ꞌ ñu̱ꞌuꞌ Dura, nda̱ꞌaꞌ ñu̱u̱ Babilonia.
2 I̱kanꞌ te̱ ni̱ ti̱ꞌviꞌ rey kuento nuu̱ꞌ sa̱kuuꞌ te̱ xaꞌndia tyuunꞌ nuu̱ꞌ ñu̱ꞌuꞌ ja̱a̱nꞌ, te̱ na̱kaya̱ sa̱kuuꞌ te̱ xaꞌndia tyuunꞌ i̱ꞌi̱n xaanꞌ nda̱ꞌaꞌ ñu̱u̱ ja̱a̱nꞌ, xiinꞌ te̱ xaꞌndia tyuunꞌ nuu̱ꞌ te̱ xíinꞌ, xiinꞌ te̱ xaꞌndia tyuunꞌ i̱ꞌi̱n ñu̱u̱ kualiꞌ, xiinꞌ te̱ kaꞌán tuní, xiinꞌ te̱ xitoꞌ xu̱ꞌunꞌ ñu̱u̱, xiinꞌ kuesí, xiinꞌ te̱ kuuꞌ nu̱uꞌ nuu̱ꞌ vi̱ꞌe̱ tyuunꞌ, xiinꞌ sa̱kuuꞌ i̱nga̱ te̱ ndisoꞌ tyuunꞌ nuu̱ꞌ ñu̱ꞌuꞌ ja̱a̱nꞌ, te̱ kuꞌu̱n ra̱ miiꞌ sa̱kaꞌnuꞌ ra̱ ña̱ nianiaꞌ, ña̱ ni̱ kaꞌa̱n tyuunꞌ rey Nabucodonosor, te̱ ni̱ xa̱ꞌa̱ te̱ yivi̱ꞌ a̱.
3 Xaꞌa̱ꞌ a̱ ja̱a̱nꞌ na ni̱ ndu̱i̱i̱n sa̱kuuꞌ te̱ kaꞌnuꞌ ja̱a̱nꞌ nuu̱ꞌ ña̱ nianiaꞌ, ña̱ ni̱ xa̱ꞌa̱ rey ja̱a̱nꞌ, te̱ sa̱kaꞌnuꞌ ña̱ꞌaꞌ ra̱.
4 Te̱ tiꞌeꞌ ni̱ kaꞌa̱n te̱ kaꞌán ndo̱so̱ꞌ ndii: “Ku̱ni̱ so̱ꞌo̱ sa̱kuuꞌ ndoꞌó, ne̱ yivi̱ꞌ, ne̱ ni̱ ki̱e̱e̱ sa̱kuuꞌ ñu̱u̱, xiinꞌ nda̱ꞌaꞌ a̱, xiinꞌ ndoꞌó ne̱ yoo tu̱ꞌu̱n mi̱iꞌ.
5 Kii̱ꞌ ku̱ni̱ so̱ꞌo̱ ndo̱ꞌ ndeꞌí tiꞌeꞌ nda̱tyuunꞌ tunꞌ nityiꞌ, xiinꞌ tunꞌ yoo̱ꞌ, xiinꞌ ñuu̱ꞌ naꞌnuꞌ ña̱ xandaaꞌ te̱ yivi̱ꞌ, xiinꞌ ñuu̱ꞌ i̱tunꞌ ña̱ xandaaꞌ te̱ yivi̱ꞌ, xiinꞌ vitu̱ꞌ tunꞌ yoo kuaꞌa̱ꞌ tu̱tyi̱ nuu̱ꞌ, xiinꞌ tu̱n yoo̱ꞌ, tunꞌ kuaꞌa̱ꞌ yu̱ꞌuꞌ, xiinꞌ sa̱kuuꞌ nuu̱ꞌ nda̱tyuunꞌ ña̱ tiinꞌ te̱ yivi̱ꞌ te̱ xandaaꞌ ra̱ ndii, vi̱kuita̱ xitiꞌ ndo̱ꞌ te̱ sa̱kaꞌnuꞌ ndo̱ꞌ ña̱ nianiaꞌ, ña̱ ni̱ kaꞌa̱n tyuunꞌ rey Nabucodonosor, te̱ ni̱ ku̱a̱ꞌa̱ a̱.
6 Te̱ yo̱o̱ ka̱ ku̱ï̱ta̱ xitiꞌ nuu̱ꞌ ña̱ ja̱a̱nꞌ te̱ sa̱kaꞌnuꞌ ni̱a̱ a̱ ndii, xa̱ numi̱ꞌ sa̱kanꞌ ko̱ꞌni̱ ña̱ꞌaꞌ te̱ yivi̱ꞌ nuu̱ꞌ ñuꞌu̱ ndatin ti̱xi̱n xitu̱n”, ni̱ katyi̱ ra̱.
7 Xaꞌa̱ꞌ a̱ ja̱a̱nꞌ na kii̱ꞌ ni̱ xi̱ni̱ so̱ꞌo̱ sa̱kuuꞌ ne̱ yivi̱ꞌ, ne̱ ni̱ na̱kaya̱ i̱kanꞌ, ña̱ xandaaꞌ te̱ yivi̱ꞌ sa̱kuuꞌ nuu̱ꞌ nda̱tyuunꞌ ja̱a̱nꞌ ndii, ni̱ xi̱kuita̱ xitiꞌ ni̱a̱, te̱ ni̱ xa̱kaꞌnuꞌ ni̱a̱ ña̱ nianiaꞌ, ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro ja̱a̱nꞌ.
8 Te̱ ni̱ ki̱xi̱n sa̱va̱ te̱ xini tuní xaꞌa̱ꞌ tiuu̱nꞌ kii̱ꞌ sa̱kanꞌ, te̱ ni̱ tyi̱nduꞌu̱ꞌ ra̱ ku̱a̱tyi̱ xaꞌa̱ꞌ te̱ judío nuu̱ꞌ rey.
9 Te̱ ni̱ kaꞌa̱n ra̱ xiinꞌ rey Nabucodonosor ndii:
―¡Rey, kaꞌnuꞌ va̱ te̱ nduuꞌ yoꞌó nde̱e̱ ndiꞌiꞌ ni̱ kivi̱ꞌ!
10 Yoꞌó, tákuiꞌe rey ndii, ni̱ tyi̱ka̱nduꞌu̱ꞌ u̱nꞌ i̱i̱n nde̱iꞌ ña̱ kaꞌán ña̱ sa̱kuuꞌ ne̱ yivi̱ꞌ ku̱i̱ta̱ xitiꞌ te̱ sa̱kaꞌnuꞌ ni̱a̱ ña̱ nianiaꞌ, ña̱ ni̱ ku̱a̱ꞌa̱ xiinꞌ oro, kii̱ꞌ ku̱ni̱ so̱ꞌo̱ ni̱a̱ ndeꞌí tiꞌeꞌ nda̱tyuunꞌ tunꞌ nityiꞌ, xiinꞌ tunꞌ yoo̱ꞌ, xiinꞌ ñuu̱ꞌ naꞌnuꞌ ña̱ xandaaꞌ te̱ yivi̱ꞌ, xiinꞌ ñuu̱ꞌ i̱tunꞌ ña̱ xandaaꞌ te̱ yivi̱ꞌ, xiinꞌ vitu̱ꞌ tunꞌ yoo kuaꞌa̱ꞌ tu̱tyi̱ nuu̱ꞌ, xiinꞌ tu̱n yoo̱ꞌ tunꞌ kuaꞌa̱ꞌ yu̱ꞌuꞌ, xiinꞌ sa̱kuuꞌ nuu̱ꞌ nda̱tyuunꞌ ña̱ tiinꞌ te̱ yivi̱ꞌ te̱ xandaaꞌ ra̱.
11 Te̱ yo̱o̱ ka̱ ku̱ï̱ta̱ xitiꞌ te̱ sa̱kaꞌnuꞌ ni̱a̱ ña̱ ja̱a̱nꞌ ndii, sko̱ꞌniꞌ ña̱ꞌaꞌ te̱ yivi̱ꞌ nuu̱ꞌ ñuꞌu̱ ndatin ti̱xi̱n xitu̱n.
12 Va̱ꞌa̱, ndisu̱ yoo ndiaꞌviꞌ te̱ judío te̱i̱n e̱ꞌ yoꞌoꞌ, te̱ ni̱ sa̱kuisoꞌ tyuunꞌ u̱nꞌ nuu̱ꞌ ñu̱ꞌuꞌ Babilonia, te̱ nduuꞌ Sadrac, xiinꞌ Mesac, xiinꞌ Abed-nego. Te̱ ja̱a̱nꞌ ndii, xïtoꞌ kaꞌnuꞌ ra̱ yoꞌó, te̱ xïtoꞌ kaꞌnuꞌ tu̱ ra̱ ndiosí u̱nꞌ, ni̱ nde̱e̱ xïtoꞌ kaꞌnuꞌ tu̱ ra̱ ña̱ nianiaꞌ, ña̱ oro, ña̱ ni̱ kaꞌa̱n tyuunꞌ u̱nꞌ te̱ ni̱ ku̱a̱ꞌa̱ ―ni̱ katyi̱ ra̱.
13 Sa̱kanꞌ te̱ ni̱ na̱saa̱ꞌ xa̱va̱ꞌa̱ rey Nabucodonosor, te̱ ni̱ kaꞌa̱n tyuunꞌ ra̱ ña̱ ki̱xi̱n ndi̱a̱ka̱ te̱ yivi̱ꞌ Sadrac, xiinꞌ Mesac, xiinꞌ Abed-nego nuu̱ꞌ ra̱. Te̱ kii̱ꞌ ni̱ xa̱a̱ te̱ sa̱va̱ ja̱a̱nꞌ nuu̱ꞌ ra̱,
14 te̱ ni̱ nda̱tuꞌu̱nꞌ ña̱ꞌaꞌ ra̱ ndii:
―¿Ñáá ndi̱xa̱ nduuꞌ a̱ ña̱ yoꞌó, Sadrac, xiinꞌ yoꞌó, Mesac, xiinꞌ yoꞌó, Abed-nego ndii, kï̱ꞌi̱n kaꞌnuꞌ ndo̱ꞌ ndiosí, ña̱ xakaꞌnuꞌ i̱, xiinꞌ ña̱ nianiaꞌ, ña̱ ni̱ ku̱a̱ꞌa̱ xiinꞌ oro, ña̱ ni̱ kaꞌa̱n tyuunꞌ i̱, te̱ ni̱ ku̱a̱ꞌa̱?
15 Te̱ vi̱ti̱n ndii, ¿ñáá xa̱ xindoó nimá ndo̱ꞌ ku̱i̱ta̱ xitiꞌ ndo̱ꞌ nuu̱ꞌ ña̱ nianiaꞌ, ña̱ ni̱ kaꞌa̱n tyuunꞌ i̱ te̱ ni̱ ku̱a̱ꞌa̱ a̱, te̱ ki̱ꞌi̱n kaꞌnuꞌ ña̱ꞌaꞌ ndo̱ꞌ kii̱ꞌ ku̱ni̱ so̱ꞌo̱ ndo̱ꞌ tatyi̱ꞌ nda̱tyuunꞌ? Sa̱kanꞌ ña̱ naaꞌ sä̱kaꞌnuꞌ ña̱ꞌaꞌ ndo̱ꞌ ndii, xa̱ vi̱ti̱n ti̱o̱ꞌ ti̱i̱n te̱ yivi̱ꞌ ndoꞌó te̱ ko̱ꞌni̱ ra̱ ndoꞌó ti̱xi̱n xitu̱n nuu̱ꞌ ñuꞌu̱ ndatin, te̱ kö̱o̱ nde̱e̱ i̱i̱n ndiosí ña̱ ku̱vi̱ sa̱kakú ndoꞌó ―ni̱ katyi̱ ra̱.
16 Sa̱kanꞌ te̱ ni̱ na̱ku̱i̱i̱n Sadrac, xiinꞌ Mesac, xiinꞌ Abed-nego nuu̱ꞌ rey kaꞌán ra̱ ndii:
―Tákuiꞌe, küní a̱ ña̱ na̱kaꞌa̱n ndu̱ xaꞌa̱ꞌ ndu̱ nuu̱ꞌ yoꞌó xaꞌa̱ꞌ ña̱ ja̱a̱nꞌ.
17 Naaꞌ ko̱ꞌni̱ u̱nꞌ nduꞌu̱ ti̱xi̱n xitu̱n nuu̱ꞌ ñuꞌu̱ ndatin ndii, Ndiosí, ña̱ kandixaꞌ ndu̱, ku̱vi̱ sa̱kakú nduꞌu̱, te̱ ku̱vi̱ tu̱ sa̱kakú a̱ nduꞌu̱ nda̱ꞌaꞌ u̱nꞌ naaꞌ kuni sa̱a̱ u̱nꞌ xiinꞌ ndu̱ nde̱e̱ ka̱ nuu̱ꞌ i̱nga̱ ña̱ ni̱a̱ꞌa.
18 Ndisu̱ tee̱ꞌ ndee sä̱kakú a̱ nduꞌu̱ ndii, kuní ndu̱ ña̱ ku̱nda̱ni̱ u̱nꞌ ña̱ kö̱o̱ kivi̱ꞌ sa̱kaꞌnuꞌ ndu̱ nde̱e̱ i̱i̱n ndiosí u̱nꞌ, ni̱ nde̱e̱ kï̱ꞌi̱n kaꞌnuꞌ tu̱ ndu̱ ña̱ nianiaꞌ, ña̱ ni̱ kaꞌa̱n tyuunꞌ u̱nꞌ te̱ ni̱ ku̱a̱ꞌa̱ ja̱a̱nꞌ ―ni̱ katyi̱ ra̱.
19 Sa̱kanꞌ te̱ ni̱ na̱saa̱ꞌ xa̱va̱ꞌa̱ rey Nabucodonosor ni̱ xi̱ni̱ ra̱ Sadrac, xiinꞌ Mesac, xiinꞌ Abed-nego nde̱e̱ ni̱ ku̱kuaꞌa vi̱ꞌ nuu̱ꞌ ra̱. I̱kanꞌ te̱ ni̱ kaꞌa̱n tyuunꞌ ra̱ ña̱ sa̱ndatin ndi̱e̱eꞌ ka̱ te̱ yivi̱ꞌ ñuꞌu̱ ti̱xi̱n xitu̱n ja̱a̱nꞌ nde̱e̱ uxa̱ i̱tyiꞌ ka̱ i̱ꞌni̱ ko̱o̱ a̱ te̱ sa̱kanꞌ sa̱a̱ xiyoó a̱.
20 Te̱ ni̱ ti̱ꞌviꞌ ra̱ te̱ yivi̱ꞌ, te̱ ndi̱e̱eꞌ xa̱va̱ꞌa̱, te̱ nduuꞌ te̱ xíinꞌ ra̱, te̱ sa̱tiín ra̱ Sadrac, xiinꞌ Mesac, xiinꞌ Abed-nego te̱ ko̱ꞌni̱ ña̱ꞌaꞌ ra̱ ti̱xi̱n xitu̱n nuu̱ꞌ ñuꞌu̱ ndatin.
21 Sa̱kanꞌ te̱ ni̱ xi̱ko̱tii̱n uni̱ sa̱aꞌ te̱ sa̱va̱ ja̱a̱nꞌ, sa̱kanꞌ yoo toto̱ ndiká ña̱ ndisuku̱ꞌ ra̱, xiinꞌ ndixa̱nꞌ ra̱, xiinꞌ xini̱ꞌ yoso̱ꞌ ra̱, xiinꞌ toto̱ niꞌnuꞌ ra̱, te̱ ni̱ ko̱ꞌni̱ ña̱ꞌaꞌ ra̱ ti̱xi̱n xitu̱n nuu̱ꞌ ñuꞌu̱ ndatin ja̱a̱nꞌ.
22 Te̱ xaꞌa̱ꞌ a̱ ña̱ ni̱ kuni̱ rey ña̱ xinu̱ kiꞌi̱ꞌ ña̱ ni̱ kaꞌa̱n tyuunꞌ ra̱ ja̱a̱nꞌ ndii, ndi̱e̱eꞌ xa̱va̱ꞌa̱ ni̱ sa̱ndatin te̱ yivi̱ꞌ ñuꞌu̱ ti̱xi̱n xitu̱n ja̱a̱nꞌ. Xaꞌa̱ꞌ a̱ ja̱a̱nꞌ na kuiiꞌ ni̱ xna̱koo̱ ñuꞌu̱ nde̱e̱ yu̱ꞌuꞌ xitu̱n ja̱a̱nꞌ, te̱ ni̱ xa̱ꞌni̱ꞌ a̱ te̱ xíinꞌ, te̱ ni̱ ko̱ꞌni̱ te̱ sa̱va̱ ja̱a̱nꞌ nuu̱ꞌ ñuꞌu̱ ti̱xi̱n xitu̱n ja̱a̱nꞌ.
23 Sa̱kanꞌ na tiín kutu̱ꞌ uni̱ sa̱aꞌ te̱ sa̱va̱ ja̱a̱nꞌ, te̱ ni̱ koyo̱ ra̱ ti̱xi̱n xitu̱n miiꞌ ndatin ñuꞌu̱ ja̱a̱nꞌ.
24 Sa̱kanꞌ te̱ kiꞌi̱ꞌ va̱ ni̱ ndo̱ndi̱tyi̱ Nabucodonosor, te̱ nandani̱ va̱ ra̱ ndatuꞌúnꞌ ra̱, te̱ kaꞌán tuní miiꞌ xaꞌndia tyuunꞌ ra̱ ndii:
―¿Ñáá süu̱ꞌ uni̱ taꞌan kuuꞌ te̱ yivi̱ꞌ ni̱ sa̱tiín e̱ꞌ ni̱ ko̱ꞌni̱ e̱ꞌ nuu̱ꞌ ñuꞌu̱ kaa̱ꞌ? ―ni̱ katyi̱ ra̱.
Te̱ ni̱ kaꞌa̱n te̱ ja̱a̱nꞌ xiinꞌ ra̱ ndii:
―Sa̱kanꞌ nduuꞌ a̱, tákuiꞌe ―ni̱ katyi̱ ra̱.
25 Te̱ ni̱ kaꞌa̱n rey ndii:
―Ndisu̱ yuꞌu̱ ndii, ku̱miꞌ taꞌan kuuꞌ te̱ yivi̱ꞌ xitoꞌ i̱ kuaꞌa̱n kuaxi̱ xikaꞌ te̱i̱n ñuꞌu̱ ndatin kaa̱ꞌ, te̱ kö̱o̱ xa̱tyiꞌ a̱ ndoꞌoꞌ ra̱ xaaꞌ ñuꞌu̱ kaa̱ꞌ, te̱ te̱ ku̱miꞌ ndii, naa kaaꞌ i̱i̱n ndiosí kaaꞌ ra̱ ―ni̱ katyi̱ ra̱.
26 Kaꞌán ka̱ Nabucodonosor ña̱ ja̱a̱nꞌ, te̱ ni̱ ku̱ya̱ti̱n ra̱ yu̱ꞌuꞌ xitu̱n miiꞌ ndatin ñuꞌu̱ ja̱a̱nꞌ, te̱ ni̱ ndeꞌi̱ tiꞌeꞌ ra̱ kaꞌán ra̱ ndii:
―Yoꞌó, Sadrac, xiinꞌ yoꞌó, Mesac, xiinꞌ yoꞌó, Abed-nego. Ndoꞌó, te̱ xikaꞌ nuuꞌ nuu̱ꞌ Ndiosí, ña̱ nduꞌu̱ꞌ ndi̱viꞌ ndii, kuaꞌa̱n ki̱e̱e̱ ndo̱ꞌ ñaa̱ꞌ te̱ ki̱xi̱n ndo̱ꞌ yoꞌoꞌ ―ni̱ katyi̱ ra̱.
Sa̱kanꞌ te̱ ni̱ ki̱e̱e̱ uni̱ sa̱aꞌ te̱ ja̱a̱nꞌ ti̱xi̱n xitu̱n nuu̱ꞌ ñuꞌu̱ ja̱a̱nꞌ.
27 Te̱ ni̱ ku̱ya̱ti̱n sa̱kuuꞌ te̱ xaꞌndia tyuunꞌ nuu̱ꞌ ñu̱ꞌuꞌ ja̱a̱nꞌ, te̱ ni̱ na̱kaya̱ i̱kanꞌ, te̱ ni̱ xi̱ni̱ ra̱ ña̱ nï̱ xixi̱ te̱ sa̱va̱ ja̱a̱nꞌ ni̱ xa̱a̱ ñuꞌu̱ ja̱a̱nꞌ, te̱ ni̱ ku̱nda̱ni̱ ra̱ ña̱ nde̱e̱ i̱i̱n i̱xiꞌ xíniꞌ te̱ ja̱a̱nꞌ nï̱ xixi̱. Te̱ nï̱ xixi̱ tu̱ toto̱ ra̱, te̱ ni̱ nde̱e̱ kuäsa̱ꞌ xaꞌán ñuꞌma̱ vi̱ꞌ a̱.
28 Sa̱kanꞌ te̱ ni̱ kaꞌa̱n tiꞌeꞌ Nabucodonosor ndii:
―¡Kaꞌnuꞌ va̱ ña̱ nduuꞌ Ndiosí, ña̱ kandixaꞌ Sadrac, xiinꞌ Mesac, xiinꞌ Abed-nego kaa̱ꞌ, sa̱kanꞌ ña̱ ni̱ ti̱ꞌviꞌ a̱ ángele, ña̱ xikaꞌ nuuꞌ nuu̱ꞌ a̱, te̱ sa̱kakú a̱ te̱ i̱ni̱ xini ña̱ꞌaꞌ xikaꞌ nuuꞌ nuu̱ꞌ a̱, te̱ nï̱ sa̱xinú ra̱ ña̱ ni̱ kaꞌa̱n tyuunꞌ yuꞌu̱, te̱ nduuꞌ rey! Süu̱ꞌ ja̱a̱nꞌ ndii, ni̱ sa̱na̱kuaꞌa ra̱ ñu̱ꞌuꞌ ndeꞌi̱ ra̱ te̱ ku̱vi̱ ra̱ te̱ sa̱kanꞌ ña̱ sa̱kaꞌnuꞌ ra̱ i̱nga̱ ndiosí, te̱ na̱ko̱o̱ ra̱ Ndiosí, ña̱ kandixaꞌ ra̱.
29 Te̱ vi̱ti̱n ndii, kaꞌán tyuunꞌ i̱ ña̱ ndee ka̱ te̱ yivi̱ꞌ ka̱ni̱a̱ꞌa xaꞌa̱ꞌ Ndiosí, ña̱ kandixaꞌ te̱ sa̱va̱ kaa̱ꞌ ndii, na sa̱kuatyiꞌ xiꞌe̱ xa̱tyiꞌ ña̱ꞌaꞌ te̱ yivi̱ꞌ, te̱ vi̱ꞌe̱ ra̱ ndii, na sa̱nduxín xa̱tyiꞌ ra̱ a̱, ndee ka̱ ñu̱u̱ ki̱e̱e̱ ra̱, uun ndee ka̱ ñu̱ꞌuꞌ nduꞌu̱ꞌ ra̱, uun ndee ka̱ tu̱ꞌu̱n ndatuꞌunꞌ ra̱, sa̱kanꞌ ña̱ kö̱o̱ ka̱ i̱nga̱ Ndiosí, ña̱ ku̱vi̱ sakakú naa ña̱ ja̱a̱nꞌ ―ni̱ katyi̱ ra̱.
30 Ndi̱ꞌi̱ ja̱a̱nꞌ te̱ ni̱ sa̱kuisoꞌ tyuunꞌ vie̱ ka̱ rey te̱ nduuꞌ Sadrac, xiinꞌ Mesac, xiinꞌ Abed-nego nda̱ꞌaꞌ ñu̱u̱ nuu̱ꞌ ñu̱ꞌuꞌ Babilonia ja̱a̱nꞌ.