29
Yo̱o̱ ka̱ xaxi̱i̱ va̱ nimá kii̱ꞌ kutúnꞌ ni̱a̱ te̱ na̱ko̱o̱ ni̱a̱ ña̱ ni̱a̱ꞌa ña̱ xaaꞌ ni̱a̱ ndii,
i̱i̱n xaa̱ kiꞌi̱ꞌ ku̱i̱ti̱ꞌ ña̱ ku̱ndo̱ꞌo̱ ni̱a̱,
te̱ köo̱ꞌ xa̱tyiꞌ ña̱ ku̱vi̱ sa̱a̱ ni̱a̱ xaꞌa̱ꞌ ni̱a̱ te̱ kaku̱ ni̱a̱.
2 Kii̱ꞌ xaꞌndia tyuunꞌ ne̱ xatyuunꞌ nda̱ku nuu̱ꞌ ne̱ yivi̱ꞌ ndii,
sa̱kuuꞌ ne̱ yivi̱ꞌ va̱ꞌa̱ kuni,
ndisu̱ kii̱ꞌ xaꞌndia tyuunꞌ te̱ xaaꞌ ña̱ ni̱a̱ꞌa ndii,
sa̱kuuꞌ ne̱ yivi̱ꞌ tanaꞌ ndi̱i.
3 Yu̱vaꞌ siꞌiꞌ i̱i̱n ne̱ xtani̱ va̱ ña̱ xini tuní ndii,
va̱ꞌa̱ va̱ kuni ni̱a̱ xaaꞌ siꞌe̱ ni̱a̱ ja̱a̱nꞌ,
ndisu̱ naaꞌ xikaꞌ sii̱ꞌ tiaa̱ siꞌe̱ ni̱a̱ ja̱a̱nꞌ xiinꞌ ña̱ꞌaꞌ ñaꞌ xiko̱ꞌ xiinꞌ miiꞌ ndii,
xasiki̱ꞌ saka ra̱ sa̱kuuꞌ ña̱ vikaꞌ ra̱.
4 Rey,
te̱ xatyuunꞌ nda̱ku ndii,
ndieeꞌ va̱ꞌa̱ ne̱ ñu̱u̱ ra̱ xaaꞌ ra̱,
ndisu̱ rey,
te̱ ke̱ndiaa̱ꞌ yaꞌviꞌ kuaꞌa̱ꞌ va̱ xu̱ꞌunꞌ yoo̱ꞌ ndii,
sanduxín ndi̱ꞌi̱ ra̱ ne̱ ñu̱u̱ ra̱ ja̱a̱nꞌ.
5 Yo̱o̱ ka̱ kaꞌán va̱ꞌa̱ tyito̱ va̱ xaꞌa̱ꞌ ne̱ ndiakaꞌ taꞌanꞌ kutu̱ꞌ xiinꞌ ni̱a̱ ndii,
nde̱e̱ naa tunꞌ ii̱ꞌ miiꞌ koyo̱ ne̱ ja̱a̱nꞌ tandieeꞌ ni̱a̱.
6 Ne̱ xaaꞌ ña̱ ni̱a̱ꞌa ndii,
koyó ni̱a̱ nuu̱ꞌ ku̱a̱tyi̱ ña̱ xaaꞌ mi̱iꞌ ni̱a̱,
ndisu̱ ne̱ xatyuunꞌ nda̱ku ndii,
kakú ni̱a̱,
te̱ xitaꞌ vi̱ꞌ ni̱a̱ ña̱ va̱ꞌa̱ kuni ni̱a̱.
7 Ne̱ xatyuunꞌ nda̱ku ndii,
ndiꞌni̱ ni̱a̱ xaꞌa̱ꞌ ña̱ kande̱iꞌ kuní nuu̱ꞌ ne̱ ndaꞌvi kuuꞌ,
ndisu̱ ne̱ xaaꞌ ña̱ ni̱a̱ꞌa ndii,
kuäsa̱ꞌ ndiꞌni̱ ni̱a̱ nde̱e̱ siee xaꞌa̱ꞌ ña̱ ja̱a̱nꞌ.
8 Ne̱ yivi̱ꞌ,
ne̱ xandiꞌiꞌ ndii,
ku̱vi̱ na̱kiku̱ꞌ ni̱a̱ sa̱kuuꞌ ne̱ yivi̱ꞌ,
ne̱ ndieeꞌ i̱i̱n ka̱niiꞌ i̱i̱n ñu̱u̱ tyie̱,
ndisu̱ ne̱ xini tuní ndii,
ku̱vi̱ na̱ta̱ndi̱e̱e̱ mani̱ꞌ ne̱ ja̱a̱nꞌ sa̱kuuꞌ ne̱ yivi̱ꞌ ja̱a̱nꞌ.
9 Naaꞌ kuꞌu̱n i̱i̱n te xini tuní ku̱a̱tyi̱ xiinꞌ i̱i̱n ne̱ küuꞌ kaxiꞌ ndii,
tee̱ꞌ ndee na̱saa̱ꞌ ni̱a̱ uun tee̱ꞌ ndee kuaku̱ ni̱a̱ ndii,
kü̱ni̱a̱ni̱ ña̱ ndoꞌoꞌ ni̱a̱ xiinꞌ ne̱ ja̱a̱nꞌ.
10 Te̱ xaꞌni̱ꞌ ne̱ yivi̱ꞌ ndii,
ndasiꞌ ra̱ te̱ xatyuunꞌ nda̱ku,
ndisu̱ te̱ xatyuunꞌ nda̱ku ndii,
kuní ra̱ ku̱ndi̱a̱ka̱ taꞌanꞌ va̱ꞌa̱ ra̱ xiinꞌ te̱ ja̱a̱nꞌ.
11 Ne̱ küuꞌ kaxiꞌ ndii,
kü̱vi̱ ka̱si̱ yu̱ꞌuꞌ ne̱ ja̱a̱nꞌ ña̱ xiꞌé ni̱a̱,
ndisu̱ ne̱ xini tuní ndii,
ku̱vi̱ ka̱si̱ yu̱ꞌuꞌ ni̱a̱ a̱,
te̱ käꞌán ni̱a̱ nde̱e̱ i̱i̱n ña̱ꞌa̱.
12 Naaꞌ tyu̱nxaꞌaꞌ i̱i̱n te̱ xaꞌndia tyuunꞌ ña̱ kaꞌán kiꞌinꞌ ne̱ xini xaꞌanꞌ ndii,
na̱ndu̱u̱ ni̱a̱ꞌa sa̱kuuꞌ te̱ taxiꞌ nde̱iꞌ nuu̱ꞌ ra̱,
te̱ ndieeꞌ miiꞌ xaꞌndia tyuunꞌ ra̱.
13 Ne̱ ndaꞌvi kuuꞌ xiinꞌ ne̱ vika̱ꞌ,
ne̱ mi̱iꞌ kuuꞌ xiinꞌ ni̱a̱ ndii,
yoo i̱i̱n ña̱ nakuitá ni̱a̱,
ña̱ Yahvé ni̱ ta̱xi̱ kivi̱ꞌ ñu̱u̱ uvi̱ sa̱aꞌ ni̱a̱ te̱ ku̱vi̱ tiaku ni̱a̱.
14 Naaꞌ na̱tava̱ꞌ nda̱ku i̱i̱n rey ku̱a̱tyi̱ ne̱ ndaꞌvi kuuꞌ ndii,
kuaꞌa̱ꞌ va̱ kuiya̱ ka̱ꞌndi̱a̱ tyuunꞌ ra̱.
15 Naaꞌ su̱ku̱ꞌ ndu̱ku̱ e̱ꞌ ne̱ kualiꞌ siꞌe̱ e̱ꞌ,
te̱ sa̱kiꞌinꞌ tu̱ ña̱ꞌaꞌ e̱ꞌ nde̱iꞌ ndii,
ne̱ xini tuní ku̱ndu̱u̱ ni̱a̱,
ndisu̱ tiaa̱ siꞌe̱ ne̱ yivi̱ꞌ uunꞌ ña̱ꞌaꞌ siꞌe̱ ni̱a̱ ne̱ köo̱ꞌ kivi̱ꞌ suku̱ꞌ ndu̱ku̱ ña̱ꞌaꞌ yu̱vaꞌ siꞌiꞌ ni̱a̱ ndii,
sa̱kaꞌanꞌ ni̱a̱ si̱ꞌiꞌ ni̱a̱.
16 Kii̱ꞌ kuuꞌ kuaꞌa̱ꞌ va̱ ne̱ xaaꞌ ña̱ ni̱a̱ꞌa ndii,
so̱ꞌo̱ kuuꞌ kuaꞌa̱ꞌ ka̱ ku̱a̱tyi̱ nuu̱ꞌ ñu̱ꞌuꞌ i̱i̱n yivi̱ꞌ,
ndisu̱ ne̱ xatyuunꞌ nda̱ku ndii,
ku̱ti̱a̱ku̱ ni̱a̱ te̱ ku̱ni̱ ni̱a̱ nduxi̱n sa̱kuuꞌ ne̱ xaaꞌ ña̱ ni̱a̱ꞌa ja̱a̱nꞌ.
17 Ko̱ndi̱a̱ yu̱ꞌuꞌ ndo̱ꞌ ne̱ kuatyi̱ꞌ siꞌe̱ ndo̱ꞌ te̱ ku̱ndi̱e̱e̱ mani̱ꞌ ndo̱ꞌ sa̱a̱ ni̱a̱,
te̱ sa̱kuatiaꞌ tu̱ ni̱a̱ nimá ndo̱ꞌ.
18 Kii̱ꞌ säxinú ne̱ yivi̱ꞌ,
ne̱ ndieeꞌ i̱i̱n ñu̱u̱ ña̱ kaꞌán tiakú Ndiosí xiinꞌ ni̱a̱ ndii,
xïkuiín ni̱a̱ ña̱ xaaꞌ ni̱a̱ ña̱ ni̱a̱ꞌa,
ndisu̱ ne̱ saxinú ña̱ kaꞌán tiakú Ndiosí xiinꞌ ni̱a̱ ndii,
ndieeꞌ va̱ꞌa̱ ni̱a̱.
19 Süu̱ꞌ xiinꞌ ña̱ kaniꞌ kuento ku̱i̱ti̱ꞌ e̱ꞌ te̱ xikaꞌ nuuꞌ so̱ꞌo̱,
te̱ kandixaꞌ ra̱ ña̱ kaꞌán e̱ꞌ xiinꞌ ra̱,
sa̱kanꞌ ña̱ ku̱vi̱ ku̱ni̱ so̱ꞌo̱ ra̱ ña̱ kaꞌa̱n e̱ꞌ,
ndisu̱ säxinú ra̱ tyu̱u̱n ña̱ kuní e̱ꞌ sa̱a̱ ra̱.
20 Nde̱e̱ ku̱vi̱ ka̱ ku̱ndi̱a̱tu̱ i̱ni̱ e̱ꞌ ña̱ na̱ma̱ ne̱ küuꞌ kaxiꞌ nimá ni̱a̱,
te̱ sa̱kanꞌ i̱i̱n ne̱ kaꞌán sa̱a̱ ka̱ iinꞌ yu̱ꞌuꞌ ni̱a̱ nde̱e̱ naa ne̱ köo̱ꞌ ña̱ xanini.
21 Yo̱o̱ ka̱ taxiꞌ sa̱kuuꞌ ña̱ xikán ne̱ xikaꞌ nuuꞌ nuu̱ꞌ ni̱a̱ nde̱e̱ kii̱ꞌ kualiꞌ ne̱ ja̱a̱nꞌ ndii,
na̱ndu̱u̱ so̱ꞌo̱ xa̱va̱ꞌa̱ ne̱ xikaꞌ nuuꞌ ja̱a̱nꞌ kii̱ꞌ ku̱i̱xa̱ ni̱a̱.
22 Ne̱ yivi̱ꞌ,
ne̱ xiꞌé,
nduuꞌ ne̱ taxiꞌ xaꞌaꞌ xiinꞌ tu̱ꞌu̱n kuiꞌe̱,
te̱ ne̱ yatyi̱ va̱ nasaáꞌ ndii,
xaaꞌ va̱ ni̱a̱ ku̱a̱tyi̱.
23 Ne̱ kaniꞌiꞌ xiinꞌ miiꞌ ndii,
sa̱kaꞌanꞌ xiinꞌ miiꞌ mi̱iꞌ ni̱a̱,
ndisu̱ ne̱ ndaꞌvi kuuꞌ nimá ndii,
ki̱ꞌi̱n kaꞌnuꞌ ña̱ꞌaꞌ ne̱ yivi̱ꞌ.
24 Naaꞌ tyi̱ndi̱e̱eꞌ ndo̱ꞌ i̱i̱n te̱ kuiꞌna̱ꞌ ndii,
ndäni̱ xiinꞌ miiꞌ mi̱iꞌ ndo̱ꞌ,
sa̱kanꞌ ña̱ kii̱ꞌ tyi̱nduꞌu̱ꞌ ne̱ yivi̱ꞌ ku̱a̱tyi̱ xaꞌa̱ꞌ ra̱ nuu̱ꞌ kuesí ndii,
ki̱ë̱e̱ yu̱ꞌuꞌ ndo̱ꞌ ña̱ xiní ndo̱ꞌ xaꞌa̱ꞌ ra̱ tee̱ꞌ ndee xa̱ ni̱ ta̱xi̱ ndo̱ꞌ kuento ndo̱ꞌ.
25 Ña̱ yiꞌvi e̱ꞌ ne̱ yivi̱ꞌ ndii,
nde̱e̱ naa i̱i̱n tunꞌ ii̱ꞌ miiꞌ ku̱vi̱ koyo̱ e̱ꞌ nduuꞌ a̱,
ndisu̱ ne̱ i̱ni̱ xini Yahvé ndii,
xitoꞌ ña̱ꞌaꞌ a̱.
26 Kuaꞌa̱ꞌ va̱ ne̱ yivi̱ꞌ ndukuꞌ ña̱ tyi̱ndi̱e̱eꞌ ña̱ꞌaꞌ te̱ xaꞌndia tyuunꞌ kaꞌnuꞌ,
ndisu̱ ña̱ xatyuunꞌ nda̱ku ndii,
nda̱ꞌaꞌ Yahvé ku̱a̱xi̱ a̱ xaꞌa̱ꞌ i̱ꞌi̱n e̱ꞌ.
27 Ne̱ xatyuunꞌ nda̱ku ndii,
ndasiꞌ ni̱a̱ ne̱ xaaꞌ ña̱ ni̱a̱ꞌa,
te̱ ne̱ xaaꞌ ña̱ ni̱a̱ꞌa ndii,
ndasiꞌ ni̱a̱ ne̱ xatyuunꞌ nda̱ku.