28
Ne̱ xaaꞌ ña̱ ni̱a̱ꞌa ndii,
xinuꞌ ni̱a̱ tee̱ꞌ ndee köo̱ꞌ ne̱ yivi̱ꞌ ndikún taxiꞌ ña̱ꞌaꞌ,
ndisu̱ ne̱ xatyuunꞌ nda̱ku ndii,
ndi̱tu̱ni̱ ne̱ ja̱a̱nꞌ te̱ xikaꞌ ni̱a̱ nde̱e̱ naa lion.
2 Xaꞌa̱ꞌ a̱ ña̱ ni̱ ku̱ni̱a̱ꞌa va̱ ne̱ yivi̱ꞌ i̱i̱n yivi̱ꞌ ndii,
ni̱ ku̱u̱ kuaꞌa̱ꞌ va̱ te̱ xaꞌndia tyuunꞌ nuu̱ꞌ ni̱a̱.
Ndisu̱ naaꞌ sa̱kanꞌ te̱ ka̱nꞌdi̱a̱ tyuunꞌ i̱i̱n te̱ xini tuní va̱,
te̱ ndityi va̱ tu̱ ra̱ ndii,
ku̱ndi̱e̱e̱ va̱ꞌa̱ ne̱ yivi̱ꞌ sa̱a̱ ra̱.
3 Te̱ xaꞌndia tyuunꞌ,
te̱ sandoꞌoꞌ ne̱ natiín ndii,
nduuꞌ ra̱ nde̱e̱ naa savi̱ꞌ kii̱ꞌ kuunꞌ kuiꞌe̱ a̱,
te̱ sanduxín a̱ sa̱kuuꞌ ña̱ saviꞌ.
4 Te̱ xaꞌndia tyuunꞌ,
te̱ säxinú ña̱ kaꞌán tu̱ꞌu̱n nde̱iꞌ ndii,
tyindieeꞌ taꞌanꞌ ra̱ xiinꞌ ne̱ xaaꞌ ña̱ ni̱a̱ꞌa,
te̱ te̱ xaꞌndia tyuunꞌ,
te̱ saxinú tu̱ꞌu̱n nde̱iꞌ ja̱a̱nꞌ ndii,
kuntaꞌanꞌ ra̱ xiinꞌ ne̱ xaaꞌ ña̱ ni̱a̱ꞌa ja̱a̱nꞌ.
5 Te̱ xaꞌndia tyuunꞌ,
te̱ xaaꞌ ña̱ ni̱a̱ꞌa ndii,
kündani̱ xa̱tyiꞌ ra̱ xaꞌa̱ꞌ ña̱ xatyuunꞌ nda̱ku,
ndisu̱ te̱ xaꞌndia tyuunꞌ,
te̱ saxinú ña̱ kaꞌán Yahvé ndii,
kundani̱ te̱ ja̱a̱nꞌ sa̱kuuꞌ ña̱ ja̱a̱nꞌ.
6 Va̱ꞌa̱ ka̱ ña̱ ku̱ndu̱u̱ e̱ꞌ ne̱ ndaꞌvi kuuꞌ xatyuunꞌ nda̱ku
te̱ sa̱kanꞌ ña̱ ku̱ndu̱u̱ e̱ꞌ ne̱ vika̱ꞌ,
ne̱ xätyuunꞌ nda̱ku.
7 Yo̱o̱ ka̱ saxinú tu̱ꞌu̱n nde̱iꞌ Ndiosí ndii,
siꞌe̱ a̱ ne̱ xini tuní nduuꞌ ni̱a̱,
ndisu̱ yo̱o̱ ka̱ ndiakaꞌ taꞌanꞌ kutu̱ꞌ xiinꞌ ne̱ ti̱xi̱n va̱ ku̱xi̱ ndii,
sakaꞌanꞌ ni̱a̱ yu̱vaꞌ siꞌiꞌ ni̱a̱.
8 Yo̱o̱ ka̱ xavikaꞌ xiinꞌ miiꞌ xiinꞌ xu̱ꞌunꞌ ña̱ kendiaa̱ꞌ yaꞌviꞌ ni̱a̱ xata̱ꞌ xu̱ꞌunꞌ ña̱ satatu ni̱a̱ ne̱ yivi̱ꞌ ndii,
nda̱ꞌaꞌ ne̱ mani̱ꞌ kuuꞌ xiinꞌ ne̱ ndaꞌvi kuuꞌ ndoo̱ a̱.
9 Yo̱o̱ ka̱ küni ta̱xi̱ so̱ꞌo̱ ña̱ kaꞌán tu̱ꞌu̱n nde̱iꞌ Ndiosí ndii,
ndasiꞌ tu̱ Ndiosí si̱u̱ꞌunꞌ ña̱ kaꞌán ni̱a̱ xiinꞌ a̱.
10 Yo̱o̱ ka̱ xakaꞌ ne̱ yivi̱ꞌ,
ne̱ xatyuunꞌ nda̱ku,
te̱ sa̱a̱ ni̱a̱ ña̱ ni̱a̱ꞌa ndii,
mi̱iꞌ ne̱ xakaꞌ ña̱ꞌaꞌ ja̱a̱nꞌ koyo̱ nuu̱ꞌ ña̱ tyituní ni̱a̱ ja̱a̱nꞌ,
ndisu̱ ne̱ xatyuunꞌ nda̱ku ndii,
ña̱ va̱ꞌa̱ na̱ti̱i̱n ni̱a̱ sa̱a̱ Ndiosí.
11 Ne̱ vika̱ꞌ xanini ndii,
ne̱ xini tuní yaꞌa̱ nduuꞌ ni̱a̱,
ndisu̱ ne̱ ndaꞌvi kuuꞌ,
te̱ xini tuní tu̱ ni̱a̱ ndii,
ku̱vi̱ ko̱to̱ ku̱a̱ꞌa̱ ni̱a̱ ne̱ vika̱ꞌ ja̱a̱nꞌ.
12 Kii̱ꞌ ketaꞌ va̱ꞌa̱ ne̱ xatyuunꞌ nda̱ku ndii,
sa̱kuuꞌ ne̱ yivi̱ꞌ va̱ꞌa̱ kuni,
ndisu̱ kii̱ꞌ ketaꞌ va̱ꞌa̱ ne̱ xaaꞌ ña̱ ni̱a̱ꞌa ndii,
sa̱kuuꞌ ne̱ yivi̱ꞌ tisi̱ꞌe.
13 Yo̱o̱ ka̱ tisi̱ꞌe ku̱a̱tyi̱ ña̱ xaaꞌ ni̱a̱ nuu̱ꞌ Ndiosí ndii,
ki̱ë̱e̱ va̱ꞌa̱ ni̱a̱ sa̱a̱ a̱,
ndisu̱ naaꞌ naꞌma̱ ni̱a̱ ku̱a̱tyi̱ ni̱a̱ ja̱a̱nꞌ,
te̱ sä̱a̱ ka̱ ni̱a̱ a̱ ndii,
ko̱o̱ kaꞌnuꞌ i̱ni̱ Ndiosí xaꞌa̱ꞌ ni̱a̱.
14 Sañuꞌuꞌ va̱ Ndiosí ne̱ yivi̱ꞌ,
ne̱ yiꞌvi sa̱a̱ ni̱a̱ ku̱a̱tyi̱,
ndisu̱ ne̱ xaxi̱i̱ nimá ni̱a̱,
te̱ küni na̱ko̱o̱ ni̱a̱ ña̱ xaaꞌ ni̱a̱ ku̱a̱tyi̱ ja̱a̱nꞌ ndii,
koyo̱ ni̱a̱ nuu̱ꞌ ña̱ kueinꞌ.
15 Naaꞌ i̱i̱n te̱ xaaꞌ ña̱ ni̱a̱ꞌa ka̱ꞌndi̱a̱ tyuunꞌ nuu̱ꞌ ne̱ ndaꞌvi kuuꞌ ndii,
i̱i̱n ña̱ i̱yo̱ va̱ nduuꞌ a̱,
sa̱kanꞌ ña̱ nduuꞌ ra̱ nde̱e̱ naa i̱i̱n lion kii̱ꞌ xiña riꞌ uun nduuꞌ ra̱ nde̱e̱ naa i̱i̱n oso kii̱ꞌ xiꞌí va̱ riꞌ so̱ko̱.
16 I̱i̱n te̱ xaꞌndia tyuunꞌ,
te̱ köo̱ꞌ ña̱ xini tuní ndii,
nda̱sa̱kuaꞌa̱ꞌ ka̱ ra̱ ña̱ ndoꞌoꞌ ne̱ ñu̱u̱ ra̱,
ndisu̱ i̱i̱n te̱ xtäni̱ ndi̱o̱o̱ꞌ i̱ni̱ xaꞌa̱ꞌ ña̱ꞌa̱ i̱nga̱ ne̱ yivi̱ꞌ ndii,
na̱kaa̱ kivi̱ꞌ ñu̱u̱ ra̱.
17 Yo̱o̱ ka̱ ni̱ xa̱ꞌni̱ꞌ i̱i̱n ne̱ yivi̱ꞌ ndii,
köo̱ꞌ kivi̱ꞌ ka̱ka̱ mani̱ꞌ ra̱ nde̱e̱ kuꞌu̱n ra̱ yavi̱ ndi̱i̱,
te̱ nde̱e̱ i̱i̱n köo̱ꞌ na̱ka̱si̱ ña̱ꞌaꞌ.
18 Ne̱ xatyuunꞌ nda̱ku ndii,
köyo̱ ni̱a̱ nuu̱ꞌ ña̱ kueinꞌ,
ndisu̱ ne̱ xaaꞌ ña̱ ni̱a̱ꞌa ndii,
i̱i̱n koyo̱ ku̱i̱ti̱ꞌ ni̱a̱ nuu̱ꞌ ña̱ kueinꞌ.
19 Yo̱o̱ ka̱ xatyuunꞌ uꞌvi̱ va̱ ndii,
yoo kuaꞌa̱ꞌ ña̱ xaxi̱ꞌ miiꞌ nduꞌu̱ꞌ ra̱,
ndisu̱ yo̱o̱ ka̱ xaaꞌ ña̱ kuäsa̱ꞌ kuní ndii,
köo̱ꞌ kivi̱ꞌ ku̱vikaꞌ ra̱.
20 Ne̱ yivi̱ꞌ,
ne̱ xatyuunꞌ nda̱ku ndii,
sa̱ñuꞌuꞌ va̱ ña̱ꞌaꞌ Ndiosí,
ndisu̱ ne̱ kiꞌi̱ꞌ va̱ xavikaꞌ xiinꞌ miiꞌ xiinꞌ ña̱ tuꞌunꞌ ni̱a̱ nda̱ꞌaꞌ ne̱ yivi̱ꞌ ndii,
ka̱ni̱ ña̱ꞌaꞌ Ndiosí.
21 Vä̱ꞌa̱ xa̱tyiꞌ yoo a̱ ña̱ tyi̱tu̱n ko̱o̱ i̱ni̱ e̱ꞌ ku̱ni̱ e̱ꞌ ne̱ yivi̱ꞌ,
yoo sa̱va̱ ne̱ yivi̱ꞌ ndii,
nde̱e̱ xaꞌa̱ꞌ siee ku̱i̱ti̱ꞌ xita̱ꞌ va̱ꞌa̱ xindoó nimá ni̱a̱ sa̱a̱ ni̱a̱ ña̱ ni̱a̱ꞌa.
22 Ne̱ xikán va̱ nimá xaꞌa̱ꞌ ña̱ vikaꞌ ndii,
kiꞌi̱ꞌ va̱ kuni ku̱vikaꞌ ni̱a̱,
ndisu̱ xïní ni̱a̱ ña̱ so̱ꞌo̱ xandaꞌvi xiinꞌ miiꞌ ka̱ ni̱a̱.
23 Kii̱ꞌ yaꞌa̱ kivi̱ꞌ ndii,
tyindiaa yaꞌviꞌ ka̱ ne̱ yivi̱ꞌ,
ne̱ kaꞌán nda̱ku xiinꞌ ni̱a,
ña̱ vä̱ꞌa̱ yoo ña̱ xaaꞌ ni̱a̱,
te̱ sa̱kanꞌ ne̱ yivi̱ꞌ,
ne̱ kaꞌán tu̱n kaso̱ꞌ ni̱nu̱ ku̱i̱ti̱ꞌ,
ña̱ va̱ꞌa̱ yoo sa̱kuuꞌ ña̱ xaaꞌ ni̱a̱.
24 Yo̱o̱ ka̱ xakuiꞌnaꞌ ña̱ꞌa̱ yu̱vaꞌ ni̱a̱ uun ña̱ꞌa̱ si̱ꞌiꞌ ni̱a̱,
te̱ kaꞌán ni̱a̱ ña̱ süu̱ꞌ ña̱ ni̱a̱ꞌa nduuꞌ ña̱ xaaꞌ ni̱a̱ ja̱a̱nꞌ ndii,
i̱i̱n katyi kuuꞌ ni̱a̱ xiinꞌ i̱i̱n te̱ xaꞌni̱ꞌ ne̱ yivi̱ꞌ.
25 Ne̱ xikán va̱ nimá xaꞌa̱ꞌ ña̱ꞌa̱ ndii,
ne̱ yivi̱ꞌ ku̱i̱ti̱ꞌ sakuntaꞌanꞌ ni̱a̱,
ndisu̱ ne̱ i̱ni̱ xini Yahvé ndii,
kieeꞌ va̱ꞌa̱ ni̱a̱ xaaꞌ a̱.
26 Ne̱ i̱ni̱ xini ña̱ ndityi mi̱iꞌ ku̱i̱ti̱ꞌ ni̱a̱ ndii,
ne̱ küuꞌ kaxiꞌ nduuꞌ ni̱a̱,
ndisu̱ ne̱ ndikún ña̱ kaꞌán ña̱ xini tuní ndii,
köo̱ꞌ a̱ ku̱ndo̱ꞌo̱ ni̱a̱.
27 Yo̱o̱ ka̱ tyindieeꞌ ne̱ ndaꞌvi kuuꞌ ndii,
köo̱ꞌ kivi̱ꞌ ku̱ndo̱ꞌo̱ ni̱a̱ xaꞌa̱ꞌ ña̱ ka̱xi̱ꞌ ni̱a̱,
ndisu̱ ne̱ xiꞌndi̱a̱ꞌ ña̱ꞌa̱ ni̱a̱ ndii,
ne̱ xa̱ yoo na̱tya̱ꞌa̱nꞌ nduuꞌ ni̱a̱.
28 Kii̱ꞌ xaꞌndia tyuunꞌ ne̱ xaaꞌ ña̱ ni̱a̱ꞌa ndii,
sa̱kuuꞌ ne̱ yivi̱ꞌ tisi̱ꞌe,
te̱ kii̱ꞌ xiꞌí ne̱ xaaꞌ ña̱ ni̱a̱ꞌa ja̱a̱nꞌ ndii,
so̱ꞌo̱ nanduuꞌ kuaꞌa̱ꞌ ka̱ ne̱ xatyuunꞌ nda̱ku kieeꞌ va̱ꞌa̱.