26
Vä̱ꞌa̱ yoo a̱ naaꞌ ku̱u̱n ka̱xi̱n kivi̱ꞌ ña̱ i̱ꞌniꞌ ni̱ nde̱e̱ vä̱ꞌa̱ tu̱ yoo a̱ naaꞌ ku̱u̱n savi̱ꞌ kivi̱ꞌ ña̱ nakaya te̱ yivi̱ꞌ ña̱ saviꞌ,
te̱ sa̱kanꞌ tu̱ vä̱ꞌa̱ yoo a̱ naaꞌ ki̱ꞌi̱n kaꞌnuꞌ ne̱ yivi̱ꞌ i̱i̱n te̱ küuꞌ kaxiꞌ.
2 Ña̱ sanatyaꞌanꞌ ne̱ yivi̱ꞌ yooꞌ ndii,
nduuꞌ a̱ nde̱e̱ naa sa̱a̱,
tiꞌ ni̱ xita̱ i̱ꞌnu̱ taꞌnuꞌ riꞌ miiꞌ ka̱,
uun nde̱e̱ naa ti̱xi̱koꞌ tiꞌ taꞌnuꞌ ndi̱viꞌ.
Sa̱kanꞌ ña̱ naaꞌ köo̱ꞌ a̱ xaaꞌ e̱ꞌ xiinꞌ ne̱ yivi̱ꞌ te̱ sa̱na̱tyaꞌanꞌ ni̱a̱ yooꞌ ndii,
xäa̱ ña̱ ja̱a̱nꞌ ku̱ndo̱ꞌo̱ e̱ꞌ.
3 Kuei ndii,
i̱i̱nꞌ kuní a̱ su̱ku̱ꞌ e̱ꞌ xata̱ꞌ riꞌ te̱ ku̱maso riꞌ,
te̱ mburru ndii,
ka̱a̱ kuní a̱ tyu̱ꞌu̱n e̱ꞌ yu̱ꞌuꞌ riꞌ te̱ ku̱maso riꞌ,
te̱ küuꞌ kaxiꞌ ndii,
ndu̱ku̱ kuní a̱ su̱ku̱ꞌ e̱ꞌ xata̱ꞌ ra̱,
te̱ ku̱ni̱ so̱ꞌo̱ ra̱.
4 Köo̱ꞌ kivi̱ꞌ na̱ku̱i̱i̱n u̱nꞌ ña̱ kuäsa̱ꞌ kuní naa ña̱ kaꞌán ne̱ küuꞌ kaxiꞌ,
ko̱to̱ ka̱ na̱ndu̱u̱ tu̱ mi̱iꞌ u̱nꞌ ne̱ küuꞌ kaxiꞌ nde̱e̱ naa ne̱ ja̱a̱nꞌ.
5 Na̱ku̱i̱i̱n u̱nꞌ ña̱ kaꞌán ne̱ küuꞌ kaxiꞌ sa̱a̱ xataꞌa̱n na̱ku̱i̱i̱n u̱nꞌ nuu̱ꞌ ña̱ küuꞌ kaxiꞌ ña̱ kaꞌán ni̱a̱ ja̱a̱nꞌ,
sa̱kanꞌ te̱ kä̱ni̱ni̱ ni̱a̱ ña̱ i̱i̱n ne̱ xini tuní va̱ nduuꞌ ni̱a̱,
sa̱a̱ tuu mi̱iꞌ ni̱a̱.
6 Naaꞌ ndu̱kuꞌ e̱ꞌ i̱i̱n ne̱ küuꞌ kaxiꞌ te̱ ti̱ꞌviꞌ e̱ꞌ ni̱a̱ xiinꞌ kuento nuu̱ꞌ i̱i̱n ne̱ yivi̱ꞌ ndii,
nduuꞌ a̱ nde̱e̱ naa ke̱ndoso̱ꞌ e̱ꞌ xaꞌa̱ꞌ e̱ꞌ uun nde̱e̱ naa ko̱ꞌo̱ e̱ꞌ tata̱nꞌ xatu̱.
7 Kuäsa̱ꞌ xa̱tyiꞌ kuní a̱ ña̱ sa̱a̱ i̱i̱n ne̱ küuꞌ kaxiꞌ ña̱ nduxa̱ꞌ te̱ kaꞌa̱n ni̱a̱ ña̱ xini tuní,
sa̱kanꞌ ña̱ nduuꞌ a̱ nde̱e̱ naa ña̱ sa̱a̱ i̱i̱n ne̱ kuiꞌe xaꞌa̱ꞌ ña̱ nduxa̱ꞌ te̱ ka̱ka̱ ni̱a̱.
8 Ña̱ kiꞌinꞌ kaꞌnuꞌ e̱ꞌ ne̱ küuꞌ kaxiꞌ ndii,
i̱i̱n ña̱ kuäsa̱ꞌ kuní xa̱tyiꞌ nduuꞌ a̱,
sa̱kanꞌ ña̱ nduuꞌ a̱ nde̱e̱ naa sa̱tiín ndi̱a̱a̱ e̱ꞌ yuu̱ꞌ ti̱xi̱n tiuu̱ꞌ.
9 Kuäsa̱ꞌ xa̱tyiꞌ kuní a̱ ña̱ sa̱a̱ i̱i̱n ne̱ küuꞌ kaxiꞌ ña̱ nduxa̱ꞌ te̱ kaꞌa̱n ni̱a̱ ña̱ xini tuní,
sa̱kanꞌ ña̱ nduuꞌ a̱ nde̱e̱ naa kii̱ꞌ kiꞌví i̱ñu̱ꞌ nda̱ꞌaꞌ i̱i̱n ne̱ xini̱ te̱ kuäsa̱ꞌ xini uꞌvi̱ ni̱a̱.
10 Yo̱o̱ ka̱ taxiꞌ tyu̱u̱n vi̱ꞌe̱ ni̱a̱ nda̱ꞌaꞌ i̱i̱n ne̱ küuꞌ kaxiꞌ ndii,
nduuꞌ ni̱a̱ nde̱e̱ naa i̱i̱n te̱ xatia kuxi̱ miiꞌ xkaꞌndíá yo̱o̱ ka̱ kuaꞌa̱n.
11 Sa̱a̱ niiꞌ xaaꞌ naya̱ꞌ ña̱ nakaxi̱ꞌ riꞌ suxa̱n yu̱ꞌuꞌ riꞌ ndii,
niiꞌ sa̱kanꞌ xaaꞌ tu̱ ne̱ küuꞌ kaxiꞌ ña̱ xaaꞌ te̱ xaaꞌ ni̱a̱ ña̱ küuꞌ kaxiꞌ ña̱ xa̱ xaaꞌ ni̱a̱.
12 Nde̱e̱ ku̱vi̱ ka̱ ku̱ndi̱a̱tu̱ i̱ni̱ e̱ꞌ ña̱ na̱ma̱ ne̱ küuꞌ kaxiꞌ nimá ni̱a̱,
te̱ sa̱kanꞌ i̱i̱n ne̱ tuu ña̱ ne̱ xiní va̱ nduuꞌ ni̱a̱ nuu̱ꞌ mi̱iꞌ ni̱a̱.
13 Ne̱ suxa̱nꞌ kaꞌán ndii:
“Yoo i̱i̱n lion i̱tyiꞌ,
te̱ xikaꞌ tu̱ riꞌ sa̱kuuꞌ ya̱ꞌya̱”,
katyi ni̱a̱.
14 Nde̱e̱ naa xaaꞌ vitu̱ꞌ yiꞌeꞌ ña̱ tuvi̱ꞌ a̱ kii̱ꞌ nuníáꞌ a̱ ndii,
niiꞌ sa̱kanꞌ tu̱ xaaꞌ ne̱ suxa̱nꞌ tuvi̱ꞌ ni̱a̱ xikaꞌ ni̱a̱ nuu̱ꞌ tunꞌ xto̱ miiꞌ kixín ni̱a̱.
15 Ne̱ suxa̱nꞌ ndii,
kiꞌeꞌ ni̱a̱ koꞌo̱ꞌ miiꞌ naá ña̱ xaxi̱ꞌ,
ndisu̱ ni̱ nde̱e̱ kündieni ni̱a̱ ta̱a̱nꞌ ni̱a̱ ña̱ xaxi̱ꞌ ja̱a̱nꞌ yu̱ꞌuꞌ ni̱a̱ xaꞌa̱ꞌ a̱ ña̱ suxanꞌ xa̱va̱ꞌa̱ ni̱a̱.
16 Ne̱ suxa̱nꞌ ndii,
xini tuní ka̱ mi̱iꞌ ni̱a̱ tuu ni̱a̱,
te̱ sa̱kanꞌ uxa̱ taꞌan ne̱ xini tuní,
ne̱ taxiꞌ nde̱iꞌ.
17 Yo̱o̱ ka̱ tyiꞌniꞌ xiinꞌ miiꞌ miiꞌ kuntaꞌanꞌ i̱nga̱ ne̱ yivi̱ꞌ ndii,
ne̱ küuꞌ kaxiꞌ xa̱tyiꞌ nduuꞌ ni̱a̱ nde̱e̱ naa xaaꞌ i̱i̱n ne̱ xita̱ꞌ so̱ꞌo̱ naya̱ꞌ.
18 Nde̱e̱ naa i̱i̱n te̱ yivi̱ꞌ,
te̱ küuꞌ kaxiꞌ nduuꞌ,
te̱ xatia kuxi̱ tunꞌ ndatin ñuꞌu̱ nuu̱ꞌ,
te̱ xaꞌni̱ꞌ ra̱ ne̱ yivi̱ꞌ,
19 nde̱e̱ naa sa̱kanꞌ nduuꞌ tu̱ te̱ yivi̱ꞌ,
te̱ xini xaꞌanꞌ te̱ xiní taꞌanꞌ xiinꞌ ra̱.
Ndi̱ꞌi̱ ja̱a̱nꞌ te̱ kaꞌán ra̱ ndii:
“Si̱ki̱ ku̱i̱ti̱ꞌ xaaꞌ i̱”,
katyi ra̱.
20 Naaꞌ köo̱ꞌ ka̱ tu̱tunꞌ ta̱a̱nꞌ e̱ꞌ nuu̱ꞌ ñuꞌu̱ ndii,
ndaꞌva̱ a̱,
te̱ naaꞌ köo̱ꞌ ka̱ ne̱ kaꞌán tu̱ꞌu̱n vixi̱ ndii,
vi̱kuii̱n ña̱ kuntaꞌanꞌ ne̱ yivi̱ꞌ.
21 Ti̱kei̱ kuní te̱ na̱ꞌmi̱ e̱ꞌ ñuꞌu̱,
te̱ tu̱tunꞌ kuní te̱ sa̱ndatin e̱ꞌ ñuꞌu̱.
Te̱ ne̱ xtani̱ va̱ ku̱ntaꞌanꞌ kuní te̱ xa̱ꞌaꞌ ne̱ yivi̱ꞌ ku̱ntaꞌanꞌ ni̱a̱.
22 Tu̱ꞌu̱n yu̱ꞌuꞌ ne̱ xini xaꞌanꞌ ndii,
nduuꞌ a̱ nde̱e̱ naa nduu̱ꞌ vixi̱ ña̱ asi̱nꞌ va̱,
ndisu̱ koꞌniꞌ a̱ nde̱e̱ ma̱aꞌ ti̱xi̱n nimá ne̱ yivi̱ꞌ.
23 Ña̱ nda̱tu̱nꞌ va̱ kaꞌán ne̱ yivi̱ꞌ xiinꞌ e̱ꞌ ndii,
ku̱vi̱ ti̱si̱ꞌe ni̱a̱ ña̱ ki̱ni̱ ña̱ xanini nimá ni̱a̱ xaꞌa̱ꞌ e̱ꞌ,
nde̱e̱ naa xaaꞌ ña̱ xakin ne̱ yivi̱ꞌ xa̱ꞌa̱n xiñu̱ xata̱ꞌ ki̱si̱ ña̱ ni̱ ku̱a̱ꞌa̱ xiinꞌ ñu̱ꞌuꞌ kixinꞌ.
24 Ne̱ ndasiꞌ ne̱ yivi̱ꞌ ndii,
tisi̱ꞌe ni̱a̱ ña̱ ja̱a̱nꞌ ti̱xi̱n nimá ni̱a̱ kii̱ꞌ ndatuꞌunꞌ ni̱a̱ xiinꞌ ne̱ yivi̱ꞌ,
ndisu̱ xini xaꞌanꞌ ku̱i̱ti̱ꞌ ña̱ꞌaꞌ ni̱a̱.
25 Kii̱ꞌ va̱ꞌa̱ va̱ kaꞌán ne jaa̱nꞌ xiinꞌ ndo̱ꞌ ndii,
kä̱ndi̱xaꞌ ña̱ꞌaꞌ ndo̱ꞌ,
sa̱kanꞌ ña̱ xakuuꞌ ku̱i̱ti̱ꞌ ni̱a̱.
Sa̱kanꞌ ña̱ tyituꞌ vi̱ꞌ nimá ni̱a̱ ñuꞌuꞌ uxa̱ taꞌanꞌ nuu̱ꞌ ña̱ ni̱a̱ꞌa.
26 Tee̱ꞌ ndee ti̱si̱ꞌe ni̱a̱ xiinꞌ ña̱ xini xaꞌanꞌ ña̱ xiꞌé ni̱a̱ xini ni̱a̱ ndoꞌó ndii,
na̱tuvi̱ sa̱kuuꞌ a̱ soꞌo̱ꞌ ndiꞌiꞌ nuu̱ꞌ kuaꞌa̱ꞌ ne̱ yivi̱ꞌ.
27 Naaꞌ xatiaꞌ i̱i̱n ne̱ yivi̱ꞌ i̱i̱n yavi̱ te̱ koyo̱ i̱nga̱ ne̱ yivi̱ꞌ i̱kanꞌ kaꞌanꞌ ni̱a̱ ndii,
mi̱iꞌ ni̱a̱ koyo̱ ti̱xi̱n a̱.
Te̱ naaꞌ sa̱tuvi̱ꞌ ni̱a̱ i̱i̱n yuu̱ꞌ te̱ tavi̱ a̱ i̱nga̱ ne̱ yivi̱ꞌ kaꞌanꞌ ni̱a̱ ndii,
siki̱ꞌ mi̱iꞌ ni̱a̱ na̱ma̱ yuu̱ꞌ ja̱a̱nꞌ.
28 Ne̱ kaꞌán tu̱ꞌu̱n vixi̱ ndii,
ndasiꞌ ni̱a̱ ne̱ satuxuꞌví ni̱a̱ xiinꞌ tu̱ꞌu̱n vixi̱ ña̱ kaꞌán ni̱a̱ ja̱a̱nꞌ,
te̱ ne̱ nda̱tu̱nꞌ kaꞌán xiinꞌ ne̱ yivi̱ꞌ ndii,
sasanaꞌ ni̱a̱ xíniꞌ ne̱ yivi̱ꞌ ja̱a̱nꞌ.