Yoꞌoꞌ ku̱a̱xi̱ i̱nga̱ ña̱ xini tuní ña̱ ni̱ kaꞌa̱n rey Salomón
25
Yoꞌoꞌ ku̱a̱xi̱ ka̱ ña̱ xini tuní ña̱ ni̱ kaꞌa̱n Salomón ña̱ ni̱ na̱ti̱soꞌ xa̱aꞌ te̱ yivi̱ꞌ,
te̱ ni̱ xika̱ nu̱u̱ nuu̱ꞌ rey Ezequías,
te̱ ni̱ xa̱ꞌndi̱a̱ tyuunꞌ nuu̱ꞌ ñu̱ꞌuꞌ Judá.
2 Mi̱iꞌ ku̱i̱ti̱ꞌ Ndiosí kumiꞌ nde̱iꞌ te̱ ti̱si̱ꞌe a̱ ña̱ xiní mi̱iꞌ ku̱i̱ti̱ꞌ a̱,
te̱ kiꞌinꞌ kaꞌnuꞌ ne̱ yivi̱ꞌ rey xaꞌa̱ꞌ a̱ ña̱ xanduxa̱ꞌ ra̱ te̱ ku̱nda̱ni̱ ra̱ ña̱ yoo si̱ꞌe.
3 Köo̱ꞌ nde̱e̱ i̱i̱n ne̱ yivi̱ꞌ,
ne̱ ku̱vi̱ ku̱nda̱ni̱ sa̱a̱ vi̱ꞌ sukun ndi̱viꞌ uun sa̱a̱ vi̱ꞌ kunu ti̱xi̱n ñu̱ꞌuꞌ i̱i̱n yivi̱ꞌ,
ni̱ nde̱e̱ köo̱ꞌ tu̱ ne̱ yivi̱ꞌ,
ne̱ ku̱vi̱ ku̱nda̱ni̱ sa̱a̱ xanini nimá rey.
4 Ta̱va̱ꞌ ndo̱ꞌ xi̱ꞌeꞌ ña̱ ndisoꞌ plata,
te̱ ndu̱nda̱tu̱nꞌ a̱,
te̱ ka̱sa̱ꞌa̱ te̱ tuxiꞌ ka̱a̱ i̱i̱n copa xa̱aꞌ xiinꞌ a̱.
5 Te̱ sa̱kanꞌ tu̱ kuní a̱ ta̱va̱ꞌ ndo̱ꞌ te̱ xaaꞌ ña̱ ni̱a̱ꞌa,
te̱ xatyuunꞌ nuu̱ꞌ rey,
sa̱kanꞌ te̱ ndoo̱ mi̱iꞌ ndiꞌiꞌ te̱ xatyuunꞌ nda̱ku miiꞌ xaꞌndia tyuunꞌ rey ja̱a̱nꞌ.
6 Sä̱tyieé xiinꞌ miiꞌ u̱nꞌ nuu̱ꞌ i̱i̱n rey,
ni̱ nde̱e̱ kü̱nduꞌu̱ꞌ tu̱ u̱nꞌ nuu̱ꞌ tei̱ miiꞌ ndieeꞌ te̱ kuuꞌ kaꞌnuꞌ.
7 Sa̱kanꞌ ña̱ va̱ꞌa̱ ka̱ nduuꞌ a̱ naaꞌ mi̱iꞌ rey ja̱a̱nꞌ kaꞌa̱n xiinꞌ u̱nꞌ ndii:
“Kuaꞌan ka̱a̱ yoꞌoꞌ ku̱nduꞌu̱ꞌ u̱nꞌ”,
katyi̱ ra̱,
te̱ sa̱kanꞌ ña̱ sa̱kaꞌanꞌ xiinꞌ miiꞌ u̱nꞌ nuu̱ꞌ kuaꞌa̱ꞌ te̱ kaꞌnuꞌ,
te̱ ndieeꞌ xiinꞌ ra̱ ja̱a̱nꞌ.
Te̱ naaꞌ ni̱ xi̱ni̱ u̱nꞌ xaaꞌ i̱i̱n ne̱ yivi̱ꞌ ña̱ vä̱ꞌa̱ ndii,
8 küꞌu̱n kiꞌi̱ꞌ va̱ u̱nꞌ te̱ tyi̱nduꞌu̱ꞌ u̱nꞌ ku̱a̱tyi̱ xaꞌa̱ꞌ ni̱a̱ nuu̱ꞌ te̱ xaꞌnú ku̱a̱tyi̱.
Sa̱kanꞌ ña̱ i̱nga̱ te̱ ndieeꞌ yu̱ꞌuꞌ ku̱vi̱ kaꞌa̱n ña̱ süu̱ꞌ ña̱ ndi̱xa̱ kaꞌán u̱nꞌ,
te̱ soꞌo̱ꞌ ndiꞌiꞌ ndii,
ku̱u̱ ka̱ꞌa̱n nuu̱ꞌ u̱nꞌ kii̱ꞌ köo̱ꞌ ka̱ ña̱ꞌa̱ niꞌi̱ꞌ u̱nꞌ kaꞌa̱n u̱nꞌ.
9 Na̱kaꞌa̱n u̱nꞌ xaꞌa̱ꞌ u̱nꞌ naaꞌ yoo u̱nꞌ tu̱ꞌu̱n kuiꞌe̱ xiinꞌ i̱i̱n ne̱ i̱i̱n kuuꞌ xiinꞌ u̱nꞌ,
te̱ ndä̱tuꞌunꞌ u̱nꞌ xaꞌa̱ꞌ ña̱ ni̱ yoo̱ si̱ꞌe ja̱a̱nꞌ nuu̱ꞌ i̱nga̱ ne̱ yivi̱ꞌ.
10 Sa̱kanꞌ ña̱ naaꞌ sa̱a̱ u̱nꞌ ña̱ ja̱a̱nꞌ ndii,
kaꞌa̱n ne̱ yivi̱ꞌ ña̱ te̱ vixi̱ nduuꞌ u̱nꞌ,
te̱ köo̱ꞌ a̱ ku̱vi̱ sa̱a̱ ka̱ u̱nꞌ te̱ sa̱vi̱kuiín u̱nꞌ ña̱ kani̱a̱ꞌa ne̱ yivi̱ꞌ xaꞌa̱ꞌ u̱nꞌ.
11 Kii̱ꞌ kaꞌán ne̱ yivi̱ꞌ tu̱ꞌu̱n nde̱iꞌ va̱ꞌa̱ nuu̱ꞌ e̱ꞌ sa̱va̱ ni̱ ña̱ kuní a̱ ndii,
nduuꞌ a̱ nde̱e̱ naa manzana ña̱ ni̱ ku̱a̱ꞌa̱ xiinꞌ oro,
te̱ ñuꞌuꞌ a̱ ti̱xi̱n ya̱xinꞌ ña̱ ni̱ ku̱a̱ꞌa̱ xiinꞌ plata.
12 Ña̱ ndiaa yu̱ꞌuꞌ ne̱ xini tuní ne̱ yivi̱ꞌ ndii,
nduuꞌ a̱ nuu̱ꞌ ni̱a̱
nde̱e̱ naa ka̱xun nda̱ꞌaꞌ ña̱ ni̱ ku̱a̱ꞌa̱ xiinꞌ oro uun nduuꞌ a̱ nde̱e̱ naa siki̱ suku̱nꞌ ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro.
13 Nde̱e̱ naa sandikó ka̱xi̱n ña̱ kuunꞌ ni̱a̱ꞌa̱ i̱i̱n yivi̱ꞌ kii̱ꞌ nakaya ne̱ yivi̱ꞌ ña̱ saviꞌ ndii,
niiꞌ sa̱kanꞌ tu̱ sandikó ne̱ kuaꞌa̱n xiinꞌ kuento,
ne̱ xatyuunꞌ nda̱ku nimá,
te̱ ni̱ ti̱ꞌviꞌ ña̱ꞌaꞌ,
sa̱kanꞌ ña̱ natyinaá va̱ꞌa̱ ni̱a̱ nimá xto̱ꞌo̱ ni̱a̱ kii̱ꞌ yatyi̱ va̱ naxaá ni̱a̱ xiinꞌ kuento.
14 Yo̱o̱ ka̱ kaꞌán ña̱ ta̱xi̱ ni̱a̱ i̱i̱n tu̱mani̱ꞌ,
te̱ köo̱ꞌ a̱ taxiꞌ ni̱a̱ ndii,
nduuꞌ ni̱a̱ nde̱e̱ naa viko̱ꞌ i̱tyi uun nde̱e̱ naa tatyi̱ꞌ ña̱ köo̱ꞌ savi̱ꞌ sakuunꞌ.
15 Ña̱ kuiee i̱ni̱ e̱ꞌ ndii,
ku̱vi̱ sa̱nuuꞌ a̱ nimá i̱i̱n rey te̱ sa̱a̱ ra̱ i̱i̱n ña̱ va̱ꞌa̱ xaꞌa̱ꞌ e̱ꞌ,
te̱ ña̱ ndatuꞌunꞌ mani̱ꞌ e̱ꞌ ndii,
nde̱e̱ ne̱ yivi̱ꞌ,
ne̱ xi̱i̱ va̱,
na̱ku̱i̱i̱n yu̱ꞌuꞌ sa̱a̱ ni̱a̱ ña̱ xikán e̱ꞌ nuu̱ꞌ ni̱a̱.
16 Naaꞌ ni̱ xi̱ni̱ u̱nꞌ miiꞌ yoo ñuñu̱ꞌ i̱tunꞌ ndii,
kö̱ꞌo̱ kuaꞌa̱ꞌ va̱ u̱nꞌ u̱n,
sa̱kanꞌ ña̱ i̱yo̱ sa̱nduxanꞌ a̱ yoꞌó.
17 Küꞌu̱n tyito̱ va̱ u̱nꞌ vi̱ꞌe̱ ne̱ ndieeꞌ ya̱ti̱n miiꞌ nduꞌu̱ꞌ u̱nꞌ,
säa̱ꞌ i̱i̱n kii̱ꞌ ku̱suxanꞌ ni̱a̱ sa̱a̱ u̱nꞌ,
te̱ ku̱nda̱siꞌ ni̱a̱ yoꞌó.
18 Yo̱o̱ ka̱ kaꞌán tu̱ꞌu̱n vixi̱ xaꞌa̱ꞌ i̱nga̱ ne̱ yivi̱ꞌ xiinꞌ ni̱a̱ ndii,
satuxuꞌví ña̱ꞌaꞌ ni̱a̱ nde̱e̱ naa yatya kii̱ꞌ xaꞌndia a̱ i̱tunꞌ
uun nde̱e̱ naa xaꞌndia ña̱ꞌaꞌ ni̱a̱ xiinꞌ ityi̱ uun nde̱e̱ naa kiniꞌ ña̱ꞌaꞌ ni̱a̱ xiinꞌ kuxi̱,
tunꞌ xíinꞌ va̱ nuu̱ꞌ.
19 Naaꞌ i̱ni̱ e̱ꞌ xini e̱ꞌ ne̱ sikiꞌ kii̱ꞌ yoo tu̱ndoꞌo̱ꞌ nuu̱ꞌ kivi̱ꞌ ñu̱u̱ e̱ꞌ ndii,
nduuꞌ a̱ nde̱e̱ naa ka̱xi̱ꞌ e̱ꞌ ña̱ꞌa̱ xiinꞌ nu̱ꞌu̱ e̱ꞌ ña̱ xa̱ ni̱ taꞌvi̱ꞌ uun nde̱e̱ naa kuꞌu̱n e̱ꞌ tee̱ꞌ ndee xa̱ ni̱ taꞌnu̱ i̱i̱n nda̱a̱ꞌ xaꞌa̱ꞌ e̱ꞌ.
20 Naaꞌ ka̱ta̱ e̱ꞌ ya̱a̱ sii̱ꞌ kuaꞌa̱n nuu̱ꞌ i̱i̱n ne̱ yivi̱ꞌ,
ne̱ sutyiꞌ i̱ni̱ nimá ndii,
nduuꞌ a̱ nde̱e̱ naa ta̱va̱ꞌ e̱ꞌ toto̱ e̱ꞌ kivi̱ꞌ ña̱ vi̱xi̱n va̱ xini e̱ꞌ uun nde̱e̱ naa ka̱ki̱n e̱ꞌ ndi̱xi̱ i̱yaꞌ nuu̱ꞌ a̱ miiꞌ kuꞌví ndi̱a̱a̱ e̱ꞌ.
21 Naaꞌ xiꞌí ne̱ ndasiꞌ taꞌanꞌ xiinꞌ u̱nꞌ so̱ko̱ ndii,
ta̱xi̱ u̱nꞌ xita̱ꞌ ku̱xi̱ ni̱a̱,
te̱ naaꞌ ityí i̱ni̱ ni̱a̱ ndii,
ta̱xi̱ u̱nꞌ ti̱kui ko̱ꞌo̱ ni̱a̱.
22 Ku̱a̱tyi̱ ndii,
naaꞌ sa̱a̱ u̱nꞌ ña̱ ja̱a̱nꞌ ndii,
ka̱ꞌa̱n nuu̱ꞌ ni̱a̱ xaꞌa̱ꞌ ña̱ ni̱a̱ꞌa ña̱ ni̱ xa̱a̱ ni̱a̱ xiinꞌ u̱nꞌ ja̱a̱nꞌ,
te̱ sa̱ñuꞌuꞌ Yahvé yoꞌó.
23 Tatyi̱ꞌ ña̱ ku̱a̱xi̱ xíniꞌ i̱i̱n yivi̱ꞌ ndii,
sakuunꞌ a̱ savi̱ꞌ,
te̱ ña̱ ki̱ni̱ ndatuꞌunꞌ ne̱ yivi̱ꞌ ndii,
sanasaáꞌ ni̱a̱ ne̱ yivi̱ꞌ.
24 Nde̱e̱ va̱ꞌa̱ ka̱ ku̱nduꞌu̱ꞌ i̱i̱n nda̱a̱ꞌ mi̱iꞌ e̱ꞌ i̱i̱n xaanꞌ xata̱ꞌ vi̱ꞌe̱,
te̱ sa̱kanꞌ ña̱ ku̱nduꞌu̱ꞌ e̱ꞌ i̱i̱n vi̱ꞌe̱ tyie̱ nda̱tu̱nꞌ va̱ xiinꞌ ñaꞌ siꞌi e̱ꞌ ñaꞌ xtani̱ va̱ ku̱ntaꞌanꞌ aꞌ xiinꞌ e̱ꞌ.
25 Kii̱ꞌ xikaꞌ va̱ kieeꞌ i̱i̱n ne̱ yivi̱ꞌ te̱ ku̱a̱xi̱ ndi̱a̱ka̱ ni̱a̱ i̱i̱n tu̱ꞌu̱n xa̱aꞌ va̱ꞌa̱ va̱ nuu̱ꞌ e̱ꞌ ndii,
nduuꞌ a̱ nde̱e̱ naa kii̱ꞌ ityí va̱ i̱ni̱ e̱ꞌ te̱ xiꞌiꞌ e̱ꞌ ti̱kui vi̱xi̱n va̱.
26 Kii̱ꞌ sa̱koyó ne̱ xaaꞌ ña̱ ni̱a̱ꞌa i̱i̱n ne̱ xatyuunꞌ nda̱ku nuu̱ꞌ ku̱a̱tyi̱ ndii,
nduuꞌ ne̱ xatyuunꞌ nda̱ku ja̱a̱nꞌ nde̱e̱ naa ti̱kui i̱ti̱a̱ miiꞌ xatia ne̱ yivi̱ꞌ mi̱ꞌiꞌ uun nduuꞌ ni̱a̱ nde̱e̱ naa ti̱ko̱ꞌyoꞌ miiꞌ kieeꞌ ti̱kui ndeꞌi̱.
27 Vä̱ꞌa̱ yoo a̱ ña̱ ko̱ꞌo̱ e̱ꞌ kuaꞌa̱ꞌ va̱ ñuñu̱ꞌ,
ni̱ nde̱e̱ vä̱ꞌa̱ tu̱ yoo a̱ ña̱ ndu̱kuꞌ te̱ ndu̱kuꞌ tu̱ e̱ꞌ ña̱ ki̱ꞌi̱n kaꞌnuꞌ ne̱ yivi̱ꞌ yooꞌ.
28 Ne̱ yivi̱ꞌ,
ne̱ kü̱vi̱ vi̱ko̱ niꞌiꞌ xiinꞌ miiꞌ mi̱iꞌ nuu̱ꞌ ña̱ ni̱a̱ꞌa ña̱ xaaꞌ ni̱a̱ ndii,
nduuꞌ ni̱a̱ nde̱e̱ naa ñu̱u̱ ña̱ xa̱ ni̱ nduxi̱n ndo̱o̱ nama̱ ña̱ ndasi i̱ꞌnu̱ sa̱a̱ xinunduu xi̱i̱nꞌ a̱.