24
Ndiöo̱ꞌ i̱ni̱ u̱nꞌ xaꞌa̱ꞌ ña̱ kumiꞌ ne̱ xaaꞌ ña̱ ni̱a̱ꞌa,
ni̱ nde̱e̱ käꞌa̱n tu̱ nimá u̱nꞌ ki̱ꞌi̱n taꞌanꞌ u̱nꞌ xiinꞌ ni̱a̱.
2 Sa̱kanꞌ ña̱ xiinꞌ nimá ni̱a̱ ndii,
xa̱ nuu̱ꞌ ña̱ ni̱a̱ꞌa tyituní ni̱a̱ sa̱a̱ ni̱a̱,
te̱ xa̱ nuu̱ꞌ xaꞌa̱ꞌ ña̱ ni̱a̱ꞌa ña̱ xaaꞌ ni̱a̱ ndatuꞌunꞌ ni̱a̱.
3 Xiinꞌ ña̱ xini tuní xaꞌa ne̱ yivi̱ꞌ vi̱ꞌe̱ ni̱a̱,
te̱ naaꞌ ko̱to̱ kaxiꞌ ne̱ yivi̱ꞌ a̱ ndii,
na̱ꞌaꞌ ku̱i̱i̱n a̱.
4 Xiinꞌ ña̱ xini tuní sakutuꞌ ne̱ yivi̱ꞌ vi̱ꞌe̱ ni̱a̱,
sa̱kuuꞌ nuu̱ꞌ ña̱ vikaꞌ xiinꞌ ña̱ꞌa̱ ña̱ ndiaa yaꞌviꞌ va̱.
5 Ndiaa yaꞌviꞌ ka̱ ña̱ xini tuní te̱ sa̱kanꞌ ña̱ ndi̱e̱eꞌ e̱ꞌ,
te̱ va̱ꞌa̱ ka̱ ña̱ ku̱miꞌ e̱ꞌ ña̱ xini tuní te̱ sa̱kanꞌ ña̱ ku̱miꞌ e̱ꞌ kuaꞌa̱ꞌ ndi̱e̱e̱ꞌ e̱ꞌ.
6 Sa̱kanꞌ na kuiiꞌ küꞌu̱n u̱nꞌ ti̱i̱n u̱nꞌ ñuꞌu̱ naaꞌ tiäa̱ꞌan tyi̱tuní va̱ꞌa̱ u̱nꞌ,
naaꞌ yoo kuaꞌa̱ꞌ te̱ taxiꞌ tu̱ꞌu̱n nde̱iꞌ nuu̱ꞌ u̱nꞌ ndii,
ke̱ta̱ va̱ꞌa̱ u̱nꞌ.
7 Ña̱ xini tuní ndii,
xikaꞌ va̱ yoo a̱ nuu̱ꞌ ne̱ küuꞌ kaxiꞌ,
te̱ miiꞌ nakayá te̱ kuuꞌ nu̱uꞌ nuu̱ꞌ ñu̱u̱ ndii,
köo̱ꞌ xa̱tyiꞌ a̱ ku̱vi̱ kaꞌa̱n ni̱a̱.
8 Yo̱o̱ ka̱ xa̱nuu̱ꞌ xanini sa̱a̱ ni̱a̱ ña̱ ni̱a̱ꞌa ndii,
kaꞌa̱n ne̱ yivi̱ꞌ ña̱ te̱ tyu̱u̱n va̱ sa̱a̱ ña̱ ni̱a̱ꞌa nduuꞌ ra̱.
9 Sa̱kuuꞌ ña̱ tyituní ne̱ küuꞌ kaxiꞌ ndii,
ku̱a̱tyi̱ nduuꞌ a̱,
te̱ nde̱e̱ i̱i̱n ne̱ yivi̱ꞌ küni ko̱to ne̱ xandiꞌiꞌ.
10 Naaꞌ yatyi̱ va̱ ndokoꞌ ña̱ ndi̱e̱eꞌ u̱nꞌ kii̱ꞌ yoo tu̱ndoꞌo̱ꞌ nuu̱ꞌ kivi̱ꞌ ñu̱u̱ u̱nꞌ ndii,
köo̱ꞌ kuaꞌa̱ꞌ xa̱tyiꞌ ndi̱e̱e̱ꞌ u̱nꞌ na sa̱kanꞌ.
11 Sa̱kakú u̱nꞌ ne̱ xa̱ ni̱ katu̱nꞌ te̱ ku̱vi̱ ni̱a̱,
te̱ sa̱kakú ña̱ꞌaꞌ u̱nꞌ ña̱ kuní ka̱ na̱xaa̱ ni̱a̱ miiꞌ ka̱ꞌni̱ꞌ ña̱ꞌaꞌ te̱ yivi̱ꞌ tee̱ꞌ ndee köo̱ꞌ a̱ ni̱ xaaꞌ ni̱a̱.
12 Sa̱kanꞌ ña̱ naaꞌ kaꞌa̱n ndo̱ꞌ ndii:
“Nï̱ xi̱ni̱ ndu̱ kuento”,
katyi̱ ndo̱ꞌ.
Ndiosí ndii,
xiní a̱ sa̱a̱ iinꞌ nimá sa̱kuuꞌ e̱ꞌ,
te̱ xitoꞌ a̱ nimá u̱nꞌ te̱ xiní tu̱ a̱ sa̱a̱ kaaꞌ a̱.
Te̱ mi̱iꞌ a̱ tya̱ꞌvi̱ i̱ꞌi̱n ne̱ yivi̱ꞌ xaꞌa̱ꞌ ña̱ xaaꞌ ni̱a̱.
13 Yu̱vaꞌ kuaꞌa i̱,
ko̱ꞌo̱ u̱nꞌ ñuñu̱ꞌ sa̱kanꞌ ña̱ asi̱nꞌ va̱ a̱,
te̱ ka̱xi̱ꞌ u̱nꞌ tu̱tu̱ yoko̱ sa̱kanꞌ ña̱ vixi̱ a̱ kii̱ꞌ xaxi̱ꞌ e̱ꞌ.
14 Nde̱e̱ naa sa̱kanꞌ vi̱ꞌ tu̱ vixi̱ ña̱ va̱ꞌa̱ ña̱ kundani̱ u̱nꞌ xaꞌa̱ꞌ ña̱ xini tuní xaꞌa̱ꞌ nimá u̱nꞌ,
naaꞌ na̱ti̱i̱n u̱nꞌ u̱n ndii,
va̱ꞌa̱ ka̱ka̱ u̱nꞌ i̱i̱n yivi̱ꞌ nuu̱ꞌ kuꞌu̱n e̱ꞌ,
te̱ na̱ti̱i̱n u̱nꞌ ña̱ ndiatuꞌ i̱ni̱ u̱nꞌ xaꞌa̱ꞌ.
15 Ndoꞌó,
ne̱ xaaꞌ ña̱ ni̱a̱ꞌa,
níäniꞌ ndo̱ꞌ vi̱ꞌe̱ ne̱ xatyuunꞌ nda̱ku,
ni̱ nde̱e̱ sä̱kuiꞌnaꞌ tu̱ ndo̱ꞌ ña̱ꞌa̱ ni̱a̱ ña̱ yoo vi̱ꞌe̱ ni̱a̱.
16 Sa̱kanꞌ ña̱ tee̱ꞌ ndee tu̱vi̱ꞌ ne̱ xatyuunꞌ nda̱ku ja̱a̱nꞌ uxa̱ taꞌan i̱tyiꞌ ndii,
ndo̱ndi̱tyi̱ tu̱ku̱u̱ ni̱a̱,
ndisu̱ ne̱ xaaꞌ ña̱ ni̱a̱ꞌa ndii,
untaꞌ ku̱i̱ti̱ꞌ tu̱vi̱ꞌ ne̱ ja̱a̱nꞌ te̱ ku̱vi̱ xa̱tyiꞌ ni̱a̱.
17 Nä̱ku̱a̱tiaꞌ u̱nꞌ kii̱ꞌ ndo̱kueinꞌ ne̱ ndasiꞌ taꞌanꞌ xiinꞌ u̱nꞌ,
ni̱ nde̱e̱ nä̱ku̱a̱tiaꞌ tu̱ nimá u̱nꞌ kii̱ꞌ yoo tu̱ndoꞌo̱ꞌ nuu̱ꞌ ni̱a̱.
18 Sa̱kanꞌ ña̱ Yahvé ndii,
ku̱ni̱ a̱ ña̱ sa̱a̱ u̱nꞌ ja̱a̱nꞌ,
te̱ na̱saa̱ꞌ a̱ ku̱ni̱ a̱ yoꞌó,
te̱ kä̱siꞌe̱ ka̱ a̱ ku̱ni̱ a̱ ne̱ ja̱a̱nꞌ.
19 Kü̱ndi̱ꞌni̱ nimá u̱nꞌ ku̱ni̱ u̱nꞌ ne̱ xaaꞌ ña̱ ni̱a̱ꞌa,
ni̱ nde̱e̱ ndiöo̱ꞌ tu̱ i̱ni̱ u̱nꞌ xaꞌa̱ꞌ ña̱ kumiꞌ ni̱a̱.
20 Sa̱kanꞌ ña̱ ne̱ xaaꞌ ña̱ ni̱a̱ꞌa ndii,
kuäsa̱ꞌ ki̱e̱e̱ va̱ꞌa̱ ni̱a̱ nuu̱ꞌ kuꞌu̱n e̱ꞌ,
te̱ ku̱vi̱ ndo̱o̱ sa̱kuuꞌ ne̱ jaa̱nꞌ,
te̱ köo̱ꞌ ka̱ ne̱ si̱a̱niꞌ ni̱a̱ ndoo̱ nuu̱ꞌ ñu̱ꞌuꞌ i̱i̱n yivi̱ꞌ.
21 Yu̱vaꞌ kuaꞌa i̱,
ku̱yi̱ꞌvi u̱nꞌ Yahvé,
te̱ ku̱yi̱ꞌvi tu̱ u̱nꞌ rey,
te̱ kï̱ꞌi̱n taꞌanꞌ u̱nꞌ xiinꞌ ne̱ teiꞌ.
22 Sa̱kanꞌ ña̱ i̱i̱n ki̱xi̱n ku̱i̱ti̱ꞌ tu̱ndoꞌo̱ꞌ ña̱ ku̱ndo̱ꞌo̱ ni̱a̱,
te̱ köo̱ꞌ xiní ndee nuu̱ꞌ tu̱ndoꞌo̱ꞌ ka̱ni̱ ña̱ꞌaꞌ Ndiosí,
uun rey ja̱a̱nꞌ.
Yoꞌoꞌ ku̱a̱xi̱ ka̱ ña̱ kaꞌán ne̱ xini tuní
23 Yoꞌoꞌ ku̱a̱xi̱ ka̱ ña̱ ni̱ kaꞌa̱n ne̱ xini tuní:
Vä̱ꞌa̱ yoo a̱ ña̱ na̱ka̱xi̱n kuesí ne̱ yivi̱ꞌ kii̱ꞌ xaꞌnú ra̱ ku̱a̱tyi̱ xaꞌa̱ꞌ ni̱a̱.
24 Kuesí,
te̱ kaꞌán xiinꞌ te̱ xaaꞌ ña̱ ni̱a̱ꞌa ndii:
“Köo̱ꞌ ku̱a̱tyi̱ yoꞌó”,
katyi ra̱.
Te̱ ja̱a̱nꞌ ndii,
kuaꞌa̱ꞌ va̱ ne̱ yivi̱ꞌ sa̱na̱tyaꞌanꞌ ña̱ꞌaꞌ,
te̱ ku̱nda̱siꞌ ña̱ꞌaꞌ ne̱ ndieeꞌ kiꞌinꞌ ñu̱u̱ kaꞌnuꞌ.
25 Ndisu̱ kuesí,
te̱ katunꞌ ne̱ xaaꞌ ña̱ ni̱a̱ꞌa ndii,
sa̱kuuꞌ ne̱ yivi̱ꞌ va̱ꞌa̱ kuni xini ña̱ꞌaꞌ,
te̱ sa̱ñuꞌuꞌ kuaꞌa̱ꞌ va̱ tu̱ ña̱ꞌaꞌ Ndiosí.
26 Kii̱ꞌ nakuiinꞌ va̱ꞌa̱ ne̱ yivi̱ꞌ ña̱ kaꞌán e̱ꞌ ndii,
nduuꞌ a̱ nde̱e̱ naa ña̱ tyíto te̱ yivi̱ꞌ nuu̱ꞌ ñaꞌ siꞌi ra̱.
27 Ña̱ kuní ka̱ ka̱sa̱ꞌa̱ u̱nꞌ vi̱ꞌe̱ u̱nꞌ ndii,
va̱ꞌa̱ ka̱ xi̱ꞌna̱ tyi̱tuní u̱nꞌ,
te̱ sa̱kooꞌ tu̱ꞌva̱ tu̱ u̱nꞌ ñu̱ꞌuꞌ miiꞌ sa̱tyuunꞌ u̱nꞌ.
28 Ndï̱e̱e̱ yu̱ꞌuꞌ sikiꞌ u̱nꞌ xaꞌa̱ꞌ ne̱ yivi̱ꞌ xiinꞌ u̱nꞌ,
te̱ käꞌa̱n tu̱ u̱nꞌ tu̱ꞌu̱n vixi̱ kii̱ꞌ ndatuꞌunꞌ u̱nꞌ xaꞌa̱ꞌ ni̱a̱.
29 Te̱ köo̱ꞌ kivi̱ꞌ kaꞌa̱n u̱nꞌ xiinꞌ nimá u̱nꞌ ndii:
“Vi̱ti̱n na̱tyaꞌvi̱ ni̱a̱ yuꞌu̱ xaꞌa̱ꞌ ña̱ ni̱ xa̱a̱ ni̱a̱ xiinꞌ i̱.
Sa̱a̱ i̱ xiinꞌ ni̱a̱ sa̱a̱ niiꞌ ni̱ xa̱a̱ ni̱a̱ xiinꞌ i̱”,
katyi̱ u̱nꞌ.
30 Ni̱ xkaꞌndi̱a̱ i̱ nuu̱ꞌ ñu̱ꞌuꞌ miiꞌ xikaꞌ i̱i̱n te̱ suxa̱nꞌ,
te̱ ni̱ xkaꞌndi̱a̱ i̱ xi̱i̱nꞌ ñu̱ꞌuꞌ miiꞌ ni̱ tyi̱ꞌi̱ te̱ suxanꞌ ja̱a̱nꞌ yo̱ꞌoꞌ uva.
31 Te̱ ni̱ xi̱ni̱ i̱ ña̱ ka̱niiꞌ nuu̱ꞌ ñu̱ꞌuꞌ ja̱a̱nꞌ ndii,
mi̱iꞌ ndiꞌiꞌ i̱ñu̱ꞌ ni̱ xa̱ꞌnu̱,
te̱ ni̱ xi̱ni̱ tu̱ i̱ ña̱ ka̱niiꞌ nuu̱ꞌ ñu̱ꞌuꞌ ja̱a̱nꞌ ni̱ naku̱n i̱ti̱a̱ ni̱a̱ꞌa,
te̱ ni̱ ndu̱va̱ ndo̱o̱ tu̱ yuu̱ꞌ ko̱ra ña̱ ni̱ xa̱ꞌa̱ ra̱ ndasi i̱ꞌnu̱ ñu̱ꞌuꞌ ja̱a̱nꞌ.
32 Te̱ kii̱ꞌ xitoꞌ i̱ sa̱kuuꞌ ña̱ ja̱a̱nꞌ ndii,
ni̱ ta̱xa̱ꞌa̱ e̱ꞌ e̱ nimá i̱,
te̱ kii̱ꞌ ni̱ xi̱ni̱ e̱ꞌ e̱ ndii,
ni̱ ku̱nda̱ni̱ i̱ ña̱ vä̱ꞌa̱ sa̱a̱ i̱ ña̱ yo̱ꞌo̱ꞌ:
33 naaꞌ kusu̱n ka̱ e̱ꞌ nde̱e̱ siee,
te̱ kuni nda̱si̱ ka̱ e̱ꞌ ndu̱tyiꞌ nuu̱ꞌ e̱ꞌ i̱i̱n xaꞌaꞌ
uun kuni ka̱nduꞌu̱ꞌ ka̱ e̱ꞌ i̱i̱n kani̱ꞌ nu̱mi̱ nda̱ꞌaꞌ e̱ꞌ te̱ na̱ndiee̱ꞌ e̱ꞌ ndii,
34 i̱i̱n ki̱xi̱n ku̱i̱ti̱ꞌ ña̱ ndaꞌvi kuuꞌ vi̱ꞌe̱ e̱ꞌ nde̱e̱ naa i̱i̱n te̱ kuiꞌna̱ꞌ,
te̱ i̱i̱n ki̱xi̱n ku̱i̱ti̱ꞌ tu̱ ña̱ natiín vi̱ꞌe̱ e̱ꞌ nde̱e̱ naa i̱i̱n te̱ kuiꞌna̱ꞌ,
te̱ ñuꞌuꞌ i̱tyiꞌ xiinꞌ tu̱nxi,
te̱ sa̱ndoꞌoꞌ a̱ yooꞌ.