23
Kii̱ꞌ nduꞌu̱ꞌ u̱nꞌ xixiꞌ u̱nꞌ xiinꞌ i̱i̱n te̱ kaꞌnuꞌ va̱ ndii,
na̱ka̱ꞌanꞌ u̱nꞌ yoo nduꞌu̱ꞌ xixiꞌ xiinꞌ u̱nꞌ.
2 Tee̱ꞌ ndee xiꞌí xa̱va̱ꞌa̱ u̱nꞌ so̱ko̱ ndii,
sa̱ndi̱e̱ni xiinꞌ miiꞌ u̱nꞌ,
te̱ kuiee ku̱xi̱ u̱nꞌ.
3 Ndiöo̱ꞌ i̱ni̱ u̱nꞌ ka̱xi̱ꞌ ndiꞌiꞌ u̱nꞌ ña̱ xaxi̱ꞌ asi̱nꞌ va̱ ña̱ ni̱ xa̱ni̱ ra̱ nuu̱ꞌ u̱nꞌ ja̱a̱nꞌ,
sa̱kanꞌ ña̱ tee̱ꞌ kueinꞌ xini xaꞌanꞌ ku̱i̱ti̱ꞌ ra̱ yoꞌó xiinꞌ ña̱ ja̱a̱nꞌ.
4 Sä̱ndoꞌoꞌ xiinꞌ miiꞌ u̱nꞌ xatyuunꞌ u̱nꞌ xa̱nuu̱ꞌ xaꞌa̱ꞌ ña̱ ku̱vikaꞌ u̱nꞌ,
va̱ꞌa̱ ka̱ ku̱ndu̱u̱ u̱nꞌ te̱ xini tuní,
te̱ ku̱ni̱ u̱nꞌ a̱ma̱a̱ xa̱ ni̱a̱ni̱ ña̱ kumiꞌ u̱nꞌ ku̱ti̱a̱ku̱ u̱nꞌ.
5 Sa̱kanꞌ ña̱ ña̱ vikaꞌ ja̱a̱nꞌ ndii,
i̱i̱n kani̱ꞌ ku̱i̱ti̱ꞌ kumiꞌ u̱nꞌ te̱ kii̱ꞌ na̱ko̱to̱ u̱nꞌ miiꞌ ndieeꞌ a̱ ndii,
köo̱ꞌ ka̱ a̱ ndieeꞌ,
ku̱a̱tyi̱ ndii,
yatyi̱ va̱ kuaꞌa̱n a̱ nde̱e̱ naa xaaꞌ tasu̱ꞌ kii̱ꞌ taꞌnuꞌ riꞌ nde̱e̱ naa yoo vi̱ꞌ ndi̱xi̱n a̱.
6 Nä̱ku̱i̱i̱n yu̱ꞌuꞌ u̱nꞌ ku̱xi̱ u̱nꞌ vi̱ꞌe̱ ne̱ xiꞌndi̱a̱ꞌ,
ni̱ nde̱e̱ ndiöo̱ꞌ i̱ni̱ tu̱ u̱nꞌ xaꞌa̱ꞌ ña̱ xaxi̱ꞌ ña̱ asi̱nꞌ va̱ ña̱ itaꞌ nuu̱ꞌ mesa ni̱a̱ xaxi̱ꞌ ni̱a̱.
7 Sa̱kanꞌ ña̱ sa̱a̱ niiꞌ xanini ni̱a̱ xiinꞌ nimá ni̱a̱ ndii,
niiꞌ sa̱kanꞌ tu̱ ne̱ nduuꞌ ni̱a̱.
Kaꞌán ku̱i̱ti̱ꞌ ni̱a̱ xiinꞌ u̱nꞌ ndii:
“Ku̱xi̱ u̱nꞌ,
te̱ ko̱ꞌo̱ u̱nꞌ”,
katyi ni̱a̱.
Ndisu̱ süu̱ꞌ xiinꞌ i̱i̱n ka̱niiꞌ nimá ni̱a̱ te̱ kaꞌán ni̱a̱ ña̱ ja̱a̱nꞌ xiinꞌ u̱nꞌ.
8 Kii̱ꞌ ndi̱ꞌi̱ ku̱xi̱ u̱nꞌ siee ña̱ ni̱ ta̱xi̱ ni̱a̱ ja̱a̱nꞌ ndii,
ndu̱xa̱n ndi̱ꞌi̱ u̱nꞌ u̱n,
te̱ ña̱ va̱ꞌa̱ va̱ ña̱ ni̱ kaꞌa̱n u̱nꞌ kii̱ꞌ ni̱ ta̱xi̱ ni̱a̱ ña̱ ni̱ xi̱xi̱ u̱nꞌ ja̱a̱nꞌ ndii,
kuäsa̱ꞌ ndiaa yaꞌviꞌ xa̱tyiꞌ a̱.
9 Sä̱a̱ u̱nꞌ ña̱ nduxa̱ꞌ te̱ ku̱ni̱ so̱ꞌo̱ ne̱ küuꞌ kaxiꞌ tu̱ꞌu̱n nde̱iꞌ ña̱ saniaꞌá ña̱ꞌaꞌ u̱nꞌ,
sa̱kanꞌ ña̱ ku̱ndi̱ꞌi̱ ku̱i̱ti̱ꞌ ni̱a̱ xiinꞌ ña̱ xini tuní ña̱ kaꞌán u̱nꞌ xiinꞌ ni̱a̱.
10 Nä̱ma̱ u̱nꞌ miiꞌ kuaꞌa̱n xeꞌinꞌ ya̱taꞌ ñu̱ꞌuꞌ u̱nꞌ te̱ ku̱ni̱ xaꞌanꞌ u̱nꞌ ña̱ni̱ taꞌanꞌ u̱nꞌ,
ni̱ nde̱e̱ nä̱ꞌi̱ tu̱ u̱nꞌ ñu̱ꞌuꞌ ña̱ ni̱ ndoo̱ nda̱ꞌaꞌ ne̱ köo̱ꞌ yu̱vaꞌ siꞌiꞌ.
11 Sa̱kanꞌ ña̱ Ndiosí kaꞌnuꞌ va̱ nduuꞌ ña̱ nakaꞌán xaꞌa̱ꞌ ni̱a̱,
te̱ mi̱iꞌ ña̱ ja̱a̱nꞌ ku̱ntaꞌanꞌ xiinꞌ u̱nꞌ te̱ na̱kaꞌa̱n a̱ xaꞌa̱ꞌ ne̱ ja̱a̱nꞌ.
12 Nimá u̱nꞌ ta̱xa̱ꞌa̱ u̱nꞌ ña̱ saniaꞌá ne̱ yivi̱ꞌ yoꞌó,
te̱ ku̱ni̱ so̱ꞌo̱ u̱nꞌ ña̱ xini tuní ña̱ saniaꞌá ni̱a̱ yoꞌó.
13 Käꞌa̱n yu̱ꞌuꞌ u̱nꞌ te̱ ku̱tunꞌ u̱nꞌ ne̱ sa̱va̱ siꞌe̱ u̱nꞌ kii̱ꞌ xaso̱ꞌo̱ ni̱a̱,
sa̱kanꞌ ña̱ naaꞌ su̱ku̱ꞌ u̱nꞌ ndiaꞌviꞌ ndu̱ku̱ i̱i̱nꞌ ni̱a̱ ndii,
kü̱vi̱ ni̱a̱.
14 Süu̱ꞌ ja̱a̱nꞌ ndii,
tyi̱ndi̱e̱eꞌ ña̱ꞌaꞌ a̱ naaꞌ ku̱tunꞌ ña̱ꞌaꞌ u̱nꞌ xiinꞌ ndu̱ku̱,
sa̱kanꞌ te̱ sa̱kakú ña̱ꞌaꞌ u̱nꞌ ña̱ ku̱vi̱ xa̱tyiꞌ ni̱a̱ nuu̱ꞌ Ndiosí.
15 Yu̱vaꞌ kuaꞌa i̱,
naaꞌ ña̱ xini tuní nduuꞌ nimá u̱nꞌ ndii,
va̱ꞌa̱ yaꞌa̱ tu̱ ku̱ni̱ nimá yuꞌu̱.
16 Va̱ꞌa̱ va̱ ku̱ni̱ nimá i̱ sa̱a̱ u̱nꞌ
kii̱ꞌ ku̱ni̱ i̱ kaꞌa̱n u̱nꞌ ña̱ nda̱ku sa̱a̱ xataꞌa̱n kaꞌa̱n u̱nꞌ.
17 Ndiöo̱ꞌ i̱ni̱ u̱nꞌ xaꞌa̱ꞌ ña̱ kumiꞌ ne̱ xaaꞌ ña̱ ni̱a̱ꞌa,
süu̱ꞌ ja̱a̱nꞌ ndii,
va̱ꞌa̱ ka̱ Yahvé ku̱yi̱ꞌvi u̱nꞌ i̱ꞌi̱n kivi̱ꞌ kuaꞌa̱n.
18 Sa̱kanꞌ te̱ ki̱e̱e̱ va̱ꞌa̱ u̱nꞌ nuu̱ꞌ kuꞌu̱n e̱ꞌ,
te̱ ña̱ ndituni̱ u̱nꞌ xaꞌa̱ꞌ ndii,
na̱ti̱i̱n xna̱ꞌa̱ u̱nꞌ u̱n.
19 Yu̱vaꞌ kuaꞌa i̱,
ku̱ni̱ so̱ꞌo̱ u̱nꞌ ña̱ kaꞌán i̱ te̱ ku̱ndu̱u̱ u̱nꞌ te̱ xini tuní,
te̱ kuaꞌa̱n naa kuaꞌa̱n u̱nꞌ ña̱ xaaꞌ u̱nꞌ ña̱ va̱ꞌa̱.
20 Kï̱ꞌi̱n taꞌanꞌ u̱nꞌ xiinꞌ ne̱ xini̱,
ni̱ nde̱e̱ kï̱ꞌi̱n taꞌanꞌ tu̱ u̱nꞌ xiinꞌ ne̱ ti̱xi̱n va̱ ku̱xi̱.
21 Sa̱kanꞌ ña̱ ne̱ xini̱ ja̱a̱nꞌ xiinꞌ ne̱ ti̱xi̱n va̱ ku̱xi̱ ndii,
ne̱ xandaꞌvi xiinꞌ miiꞌ nduuꞌ ni̱a̱,
te̱ xaꞌa̱ꞌ a̱ ña̱ xa̱ nuu̱ꞌ kixín i̱i̱n keꞌinꞌ ku̱i̱ti̱ꞌ ni̱a̱ ndii,
toto̱ tiaꞌndia ku̱i̱ti̱ꞌ ku̱i̱ꞌnu̱ ni̱a̱ ka̱ka̱ ni̱a̱.
22 Ku̱ni̱ so̱ꞌo̱ u̱nꞌ ña̱ kaꞌán yu̱vaꞌ u̱nꞌ,
te̱ ni̱ sa̱kuaꞌnuꞌ yoꞌó,
te̱ kü̱nda̱siꞌ u̱nꞌ si̱ꞌiꞌ u̱nꞌ kii̱ꞌ ku̱i̱xa̱ tyi̱.
23 Na̱ti̱i̱n u̱nꞌ ña̱ nda̱ku,
te̱ köo̱ꞌ kivi̱ꞌ xi̱ko̱ꞌ u̱nꞌ u̱n,
ndu̱kuꞌ tu̱ u̱nꞌ ña̱ xini tuní xiinꞌ ña̱ kundani̱ xiinꞌ ña̱ ndityi.
24 Va̱ꞌa̱ va̱ kuni yu̱vaꞌ i̱i̱n ne̱ xatyuunꞌ nda̱ku,
te̱ yu̱vaꞌ i̱i̱n ne̱ xini tuní ndii,
va̱ꞌa̱ va̱ kuni ra̱ xini ra̱ siꞌe̱ ra̱ ja̱a̱nꞌ.
25 Sa̱kanꞌ na kuiiꞌ sa̱kuatiaꞌ u̱nꞌ nimá yu̱vaꞌ u̱nꞌ xiinꞌ nimá si̱ꞌiꞌ u̱nꞌ,
te̱ na sii̱ꞌ ku̱ni̱ si̱ꞌiꞌ u̱nꞌ ñaꞌ ni̱ sa̱kakuꞌ yoꞌó.
26 Yu̱vaꞌ kuaꞌa i̱,
tyu̱nxaꞌaꞌ va̱ u̱nꞌ ña̱ kaꞌán i̱ xiinꞌ u̱nꞌ,
te̱ ko̱to̱ va̱ u̱nꞌ sa̱a̱ xatyuunꞌ i̱ te̱ ña̱ ja̱a̱nꞌ va̱ꞌa̱ kuni u̱nꞌ sa̱a̱ u̱nꞌ.
27 Ña̱ꞌaꞌ,
ñaꞌ xiko̱ꞌ xiinꞌ miiꞌ ndii,
nduuꞌ aꞌ nde̱e̱ naa i̱i̱n poso kunu va̱,
ndisu̱ ña̱ꞌaꞌ,
ñaꞌ xeꞌní ndo̱so̱ꞌ i̱i̱ꞌ ndii,
nduuꞌ aꞌ nde̱e̱ naa i̱i̱n poso kunu va̱,
te̱ teiinꞌ tu̱ a̱.
28 Tisi̱ꞌe aꞌ,
te̱ níániꞌ aꞌ te̱ yivi̱ꞌ nde̱e̱ naa te̱ kuiꞌna̱ꞌ,
te̱ ndi̱e̱eꞌ va̱ kaꞌán nimá aꞌ ña̱ kuaꞌa̱ꞌ ka̱ te̱ yivi̱ꞌ koyó nuu̱ꞌ ku̱a̱tyi̱ sa̱a̱ aꞌ.
29 Xiní kaxiꞌ e̱ꞌ ña̱ ne̱ ndoꞌoꞌ va̱,
te̱ kusutyiꞌ tu̱ i̱ni̱ ni̱a̱,
te̱ xtani̱ tu̱ ni̱a̱ ku̱ntaꞌanꞌ ni̱a̱,
te̱ kaꞌán ku̱a̱tyi̱ tu̱ ni̱a̱,
te̱ satuxuꞌví xiinꞌ miiꞌ tu̱ ni̱a̱ tee̱ꞌ ndee köo̱ꞌ nde̱e̱ i̱i̱n xaꞌa̱ꞌ,
te̱ ni̱ ku̱u̱ kuii̱ꞌ ndo̱o̱ nuu̱ꞌ ni̱a̱ ña̱ kuunꞌ i̱kiꞌ taꞌanꞌ ni̱a̱ ndii,
30 ne̱ xini̱,
ne̱ xiꞌiꞌ vino sa̱a̱ kivi̱ꞌ kuaꞌa̱n nduuꞌ ne̱ ndoꞌoꞌ sa̱kuuꞌ ña̱ ja̱a̱nꞌ,
te̱ sa̱kanꞌ tu̱ ndoꞌoꞌ ne̱ xikaꞌ ndukuꞌ i̱nga̱ nuu̱ꞌ ndi̱xi̱ xa̱aꞌ.
31 Kö̱to̱ u̱nꞌ ña̱ kuaꞌa nda̱tu̱nꞌ vino ja̱a̱nꞌ,
ni̱ nde̱e̱ kö̱to̱ tu̱ u̱nꞌ ña̱ tisó ra̱ ti̱xi̱n ya̱xinꞌ ni̱ nde̱e̱ kö̱to̱ tu̱ u̱nꞌ ña̱ va̱ꞌa̱ kuuꞌ suku̱nꞌ e̱ꞌ nakaa̱ꞌ raꞌ kii̱ꞌ xiꞌiꞌ e̱ꞌ ra̱.
32 Sa̱kanꞌ ña̱ soꞌo̱ꞌ ndiꞌiꞌ ndii,
xatu̱ raꞌ nde̱e̱ naa koo̱ꞌ xatu̱,
te̱ xatu̱ raꞌ nde̱e̱ naa koo̱ꞌ ka̱a̱ kii̱ꞌ xaxi̱ꞌ riꞌ ne̱ yivi̱ꞌ.
33 Kii̱ꞌ ko̱ꞌo̱ ndo̱ꞌ raꞌ ndii,
su̱vi̱ raꞌ sa̱a̱ sa̱kanꞌ te̱ sa̱tuví a̱ nuu̱ꞌ ndo̱ꞌ ña̱ ku̱ni̱ ndo̱ꞌ ña̱ köo̱ꞌ kivi̱ꞌ xini ndo̱ꞌ,
te̱ kaꞌa̱n ndo̱ꞌ ña̱ kuäsa̱ꞌ kuní.
34 Te̱ ki̱si̱ raꞌ ndoꞌó nde̱e̱ naa ne̱ kuaꞌa̱n nuu̱ꞌ mi̱ni̱ kaꞌnuꞌ,
uun ki̱si̱ raꞌ ndoꞌó nde̱e̱ naa te̱ nduꞌu̱ꞌ nuu̱ꞌ ndu̱yu̱,
tunꞌ itaꞌ xata̱ꞌ tunꞌ ndo̱oꞌ nuu̱ꞌ mi̱ni̱ kaꞌnuꞌ.
35 Sa̱kanꞌ te̱ kaꞌa̱n ndo̱ꞌ ndii:
“Ni̱ ku̱tunꞌ te̱ yivi̱ꞌ yuꞌu̱,
ndisu̱ nï̱ xi̱ni̱ uꞌvi̱ i̱,
ni̱ su̱ku̱ꞌ yo̱ꞌoꞌ ra̱ yuꞌu̱,
ndisu̱ nï̱ xi̱ni̱ i̱,
te̱ kii̱ꞌ ndo̱to̱ i̱ ndii,
tu̱ku̱ sa̱kanꞌ kuꞌu̱n ndu̱kuꞌ i̱ vino ko̱ꞌo̱ i̱”,
katyi̱ ndo̱ꞌ.