22
Va̱ꞌa̱ ka̱ ña̱ kaꞌán va̱ꞌa̱ ne̱ yivi̱ꞌ xaꞌa̱ꞌ e̱ꞌ ña̱ xatyuunꞌ nda̱ku e̱ꞌ te̱ sa̱kanꞌ ña̱ ku̱miꞌ e̱ꞌ kuaꞌa̱ꞌ va̱ ña̱ vikaꞌ,
te̱ va̱ꞌa̱ ka̱ ña̱ kiꞌinꞌ kaꞌnuꞌ ne̱ yivi̱ꞌ yooꞌ te̱ sa̱kanꞌ ña̱ ku̱miꞌ e̱ꞌ kuaꞌa̱ꞌ xu̱ꞌunꞌ plata,
uun kuaꞌa̱ꞌ xu̱ꞌunꞌ oro.
2 Ne̱ vika̱ꞌ ni̱,
xiinꞌ ne̱ ndaꞌvi kuuꞌ ni̱ ndii,
i̱i̱n ni̱ nda̱ꞌaꞌ iinꞌ e̱ꞌ nuu̱ꞌ Ndiosí,
sa̱kanꞌ ña̱ mi̱iꞌ Yahvé ni̱ xa̱ꞌa̱ sa̱kuuꞌ e̱ꞌ.
3 Ne̱ kuuꞌ kaxiꞌ ndii,
kuuꞌ xiooꞌ ni̱a̱ kii̱ꞌ xini ni̱a̱ yooꞌ ña̱ i̱yo̱ nuu̱ꞌ i̱tyiꞌ miiꞌ kuaꞌa̱n ni̱a̱,
ndisu̱ ne̱ na̱a̱ꞌ kuuꞌ ndii,
kuaꞌa̱n naa kuaꞌa̱n ne̱ ja̱a̱nꞌ nde̱e̱ naa ne̱ kuiꞌe nuu̱ꞌ,
te̱ tuxuꞌví ni̱a̱.
4 Ña̱ ndaꞌvi kuuꞌ nimá ne̱ yivi̱ꞌ xiinꞌ ña̱ yiꞌvi ni̱a̱ Yahvé ndii,
taxiꞌ a̱ ña̱ vikaꞌ nda̱ꞌaꞌ ni̱a̱,
te̱ taxiꞌ tu̱ a̱ kiꞌinꞌ kaꞌnuꞌ ña̱ꞌaꞌ ne̱ yivi̱ꞌ,
te̱ taxiꞌ tu̱ a̱ na̱kaa̱ kivi̱ꞌ ñu̱u̱ ni̱a̱.
5 Ne̱ yivi̱ꞌ,
ne̱ xaaꞌ ña̱ ni̱a̱ꞌa ndii,
yoo kuaꞌa̱ꞌ ña̱ kueinꞌ xiinꞌ ña̱ sikiꞌ nuu̱ꞌ kivi̱ꞌ ñu̱u̱ ni̱a̱,
te̱ nduuꞌ a̱ nde̱e̱ naa i̱ñu̱ vi̱ꞌ xiinꞌ tunꞌ íiꞌ,
ndisu̱ ne̱ kuni ka̱ka̱ na̱ꞌaꞌ i̱i̱n yivi̱ꞌ ndii,
xitoꞌ xiinꞌ miiꞌ ni̱a̱ nuu̱ꞌ ña̱ ni̱a̱ꞌa ja̱a̱nꞌ.
6 Sa̱niaꞌá ndo̱ꞌ siꞌe̱ ndo̱ꞌ sa̱a̱ ni̱a̱ ña̱ va̱ꞌa̱ nde̱e̱ ña̱ kualiꞌ ni̱a̱,
sa̱kanꞌ te̱ kii̱ꞌ ku̱i̱xa̱ ni̱a̱ ndii,
nä̱ko̱o̱ ni̱a̱ ña̱ xaaꞌ ni̱a̱ ña̱ va̱ꞌa̱ ja̱a̱nꞌ.
7 Ne̱ vika̱ꞌ xaꞌndia tyuunꞌ nuu̱ꞌ ne̱ ndaꞌvi kuuꞌ,
te̱ yo̱o̱ ka̱ tatu xu̱ꞌunꞌ nuu̱ꞌ ne̱ vika̱ꞌ ja̱a̱nꞌ ndii,
ne̱ xikaꞌ nuuꞌ nuu̱ꞌ ne̱ ja̱a̱nꞌ nanduuꞌ ni̱a̱.
8 Ne̱ xaaꞌ ña̱ ni̱a̱ꞌa ndii,
ki̱xi̱n kuaꞌa̱ꞌ kuiꞌe̱ ku̱ndo̱ꞌo̱ ni̱a̱,
te̱ sa̱nduxín ndi̱ꞌi̱ ña̱ꞌaꞌ ña̱ ni̱a̱ꞌa ña̱ xaaꞌ ni̱a̱ xiinꞌ ne̱ yivi̱ꞌ ja̱a̱nꞌ,
te̱ ña̱ xandia tyuunꞌ ni̱a̱ ña̱ nduuꞌ nde̱e̱ naa ka̱roti ndii,
ndo̱ñuꞌuꞌ ndi̱ꞌi̱ a̱.
9 Ne̱ yivi̱ꞌ,
ne̱ va̱ꞌa̱ nimá ndii,
sa̱ñuꞌuꞌ ña̱ꞌaꞌ Ndiosí,
sa̱kanꞌ ña̱ taxiꞌ ni̱a̱ ña̱ xaxi̱ꞌ ni̱a̱ xixiꞌ ne̱ ndaꞌvi kuuꞌ.
10 Ta̱xiꞌ ndo̱ꞌ te̱ xandiꞌiꞌ,
te̱ kuꞌu̱n ndi̱ꞌi̱ ña̱ sakuntaꞌanꞌ ra̱ ne̱ yivi̱ꞌ,
te̱ ndi̱ꞌi̱ tu̱ tu̱nkuiꞌe̱ xiinꞌ ña̱ kuaaꞌ i̱ꞌni̱ nuu̱ꞌ taꞌanꞌ ne̱ yivi̱ꞌ.
11 Ne̱ yivi̱ꞌ,
ne̱ xtani̱ va̱ ku̱ndu̱u̱ ni̱a̱ ne̱ i̱i̱n nda̱a̱ꞌ nimá,
te̱ nda̱tu̱nꞌ tu̱ ndatuꞌunꞌ ni̱a̱ ndii,
ku̱ndani̱ ña̱ꞌaꞌ rey,
te̱ ku̱ndi̱a̱ka̱ taꞌanꞌ va̱ꞌa̱ ra̱ xiinꞌ ni̱a̱.
12 Xitoꞌ va̱ Yahvé ne̱ xini tuní,
ndisu̱ sanduxín a̱ ña̱ tyituní ne̱ xini xaꞌanꞌ.
13 Te̱ suxa̱nꞌ kaꞌán ndii:
“Yoo i̱i̱n lion ki̱ꞌe̱,
naaꞌ ke̱ta̱ i̱ ndii,
ka̱xi̱ꞌ riꞌ yuꞌu̱”,
katyi ra̱.
14 Yu̱ꞌuꞌ ña̱ꞌaꞌ,
ñaꞌ kumiꞌ te̱ yivi̱ꞌ ndii,
nduuꞌ a̱ nde̱e̱ naa i̱i̱n yavi̱ kunu va̱,
te̱ i̱kanꞌ koyo̱ te̱ yivi̱ꞌ,
te̱ xa̱ ni̱ na̱tya̱ꞌa̱n ni̱ xa̱a̱ Yahvé.
15 Nimá ne̱ sa̱va̱ ndii,
tyituꞌ vi̱ꞌ a̱ ñuꞌuꞌ ña̱ küuꞌ kaxiꞌ,
ndisu̱ naaꞌ kutu̱nꞌ ni̱a̱ ndii,
na̱ko̱o̱ ni̱a̱ ña̱ ja̱a̱nꞌ.
16 Yo̱o̱ ka̱ sa̱ndoꞌoꞌ ne̱ ndaꞌvi kuuꞌ te̱ ku̱u̱ vikaꞌ ni̱a̱,
uun sa̱mani̱ꞌ ni̱a̱ ña̱ꞌa̱ ni̱a̱ i̱nga̱ ne̱ vika̱ꞌ ndii,
ku̱u̱ ndaꞌvi xa̱tyiꞌ ni̱a̱.
Yoꞌoꞌ ku̱a̱xi̱ nde̱iꞌ ña̱ kaꞌán te̱ xini tuní
17 Tyu̱nxaꞌaꞌ va̱ u̱nꞌ ña̱ kaꞌán ne̱ xini tuní,
te̱ nimá u̱nꞌ ta̱xa̱ꞌa̱ u̱nꞌ ña̱ xini tuní ña̱ kaꞌán i̱ xiinꞌ u̱nꞌ.
18 Sa̱kanꞌ ña̱ va̱ꞌa̱ yoo a̱ naaꞌ ta̱xa̱ꞌa̱ u̱nꞌ ña̱ kaꞌán i̱ xiinꞌ u̱nꞌ yoꞌoꞌ nimá u̱nꞌ,
te̱ ku̱vi̱ na̱ka̱ꞌanꞌ xiinꞌ xíniꞌ u̱nꞌ sa̱kuuꞌ a̱ kii̱ꞌ kaꞌa̱n u̱nꞌ u̱n nuu̱ꞌ ne̱ yivi̱ꞌ.
19 Te̱ xaꞌa̱ꞌ a̱ ña̱ kuní i̱ ña̱ i̱ni̱ u̱nꞌ ku̱ni̱ u̱nꞌ Yahvé ndii,
sa̱niaꞌá tu̱ i̱ yoꞌó tu̱ꞌu̱n nde̱iꞌ ja̱a̱nꞌ vi̱ti̱n.
20 Ni̱ ke̱ꞌi̱ i̱ oko̱ uxi̱ taꞌan tu̱ꞌu̱n nde̱iꞌ miiꞌ ku̱a̱xi̱ mi̱iꞌ ndiꞌiꞌ ña̱ kaniꞌ kuento xiinꞌ ña̱ xini tuní.
21 Sa̱kanꞌ te̱ ku̱nda̱ni̱ u̱nꞌ ndee ña̱ nduuꞌ ña̱ ndi̱xa̱,
te̱ ña̱ ja̱a̱nꞌ ko̱ni̱ꞌi̱ u̱nꞌ kuꞌu̱n u̱nꞌ nuu̱ꞌ ne̱ ni̱ ti̱ꞌviꞌ yoꞌó,
te̱ ku̱vi̱ na̱ku̱i̱i̱n va̱ꞌa̱ u̱nꞌ nuu̱ꞌ ni̱a̱.
22 Sä̱kuiꞌnaꞌ ndo̱ꞌ ña̱ꞌa̱ ne̱ ndaꞌvi kuuꞌ,
sa̱kanꞌ ña̱ ne̱ ndaꞌvi kuuꞌ nduuꞌ ni̱a̱.
Ni̱ nde̱e̱ kï̱ꞌi̱n tu̱ ndo̱ꞌ xu̱ꞌunꞌ nda̱ꞌaꞌ ne̱ yivi̱ꞌ te̱ sa̱taví ku̱a̱tyi̱ ndi̱ꞌi̱ ndo̱ꞌ ne̱ ndaꞌvi kuuꞌ ja̱a̱nꞌ nuu̱ꞌ kuesí.
23 Sa̱kanꞌ ña̱ Yahvé nduuꞌ ña̱ nakaꞌán xaꞌa̱ꞌ ne̱ ja̱a̱nꞌ,
te̱ ka̱ꞌni̱ꞌ a̱ sa̱kuuꞌ ne̱ tuꞌunꞌ ña̱ꞌa̱ nda̱ꞌaꞌ ne̱ ndaꞌvi kuuꞌ ja̱a̱nꞌ.
24 Kï̱ꞌi̱n taꞌanꞌ u̱nꞌ xiinꞌ ne̱ kuiꞌe̱ va̱,
ni̱ nde̱e̱ kï̱ꞌi̱n taꞌanꞌ tu̱ u̱nꞌ xiinꞌ ne̱ yatyi̱ va̱ nasaáꞌ.
25 Sa̱kanꞌ ña̱ ku̱ni̱ u̱nꞌ sa̱a̱ u̱nꞌ ña̱ xaaꞌ ne̱ ja̱a̱nꞌ,
te̱ i̱yo̱ ka̱ꞌni̱ꞌ xiinꞌ miiꞌ mi̱iꞌ u̱nꞌ.
26 Nde̱e̱ i̱i̱n kivi̱ꞌ tä̱xi̱ u̱nꞌ kuento u̱nꞌ ña̱ tya̱ꞌvi̱ u̱nꞌ xaꞌa̱ꞌ ña̱ ndisoꞌ ikaꞌ i̱nga̱ ne̱ yivi̱ꞌ,
ni̱ nde̱e̱ kü̱ndu̱u̱ tu̱ u̱nꞌ ne̱ tyiꞌniꞌ xiinꞌ miiꞌ kii̱ꞌ tatu i̱i̱n ne̱ yivi̱ꞌ xu̱ꞌunꞌ.
27 Sa̱kanꞌ ña̱ naaꞌ kü̱vi̱ tya̱ꞌvi̱ u̱nꞌ xu̱ꞌunꞌ ja̱a̱nꞌ ndii,
nde̱e̱ tunꞌ xto̱ miiꞌ kixín u̱nꞌ na̱ꞌi̱ ni̱a̱ nda̱ꞌaꞌ u̱nꞌ.
28 Nä̱ma̱ ndo̱ꞌ miiꞌ kuaꞌa̱n xeꞌinꞌ ñu̱ꞌuꞌ ndo̱ꞌ ña̱ xa̱ itaꞌ nde̱e̱ xta̱ꞌanꞌ va̱,
sa̱kanꞌ ña̱ xeꞌinꞌ ja̱a̱nꞌ ndii,
te̱ xii̱ꞌ ya̱taꞌ ndo̱ꞌ ni̱ xa̱ta̱ a̱ xta̱ꞌanꞌ i̱i̱n yivi̱ꞌ.
29 Naaꞌ yoo i̱i̱n te̱ yivi̱ꞌ,
te̱ ka̱ma̱ va̱ sa̱tyuunꞌ ndii,
nuu̱ꞌ rey ku̱i̱ti̱ꞌ ka̱ka̱ nu̱u̱ te̱ ja̱a̱nꞌ,
te̱ köo̱ꞌ kivi̱ꞌ ka̱ka̱ nu̱u̱ ra̱ nuu̱ꞌ ne̱ yivi̱ꞌ ndaꞌvi so̱ꞌo̱.