21
Nimá i̱i̱n rey nda̱ꞌaꞌ Yahvé ndii,
nduuꞌ a̱ nde̱e̱ naa tyi̱tyi̱ miiꞌ kuaꞌa̱n kuaꞌa̱ꞌ va̱ ti̱kui,
te̱ mi̱iꞌ Yahvé niaꞌá ña̱ꞌaꞌ miiꞌ kuní a̱ kuꞌu̱n raꞌ.
2 Nuu̱ꞌ mi̱iꞌ ne̱ yivi̱ꞌ ndii,
ña̱ va̱ꞌa̱ nduuꞌ sa̱kuuꞌ ña̱ xaaꞌ ni̱a̱,
ndisu̱ Yahvé ndii,
xiní a̱ nde̱e̱ ña̱ xanini nimá ni̱a̱.
3 Yahvé ndii,
xtani̱ ka̱ a̱ ña̱ sa̱tyuunꞌ nda̱ku e̱ꞌ xiinꞌ ña̱ sa̱tyuunꞌ e̱ꞌ sa̱a̱ kaꞌán tyuunꞌ nde̱iꞌ a̱
te̱ sa̱kanꞌ ña̱ xaꞌmiꞌ e̱ꞌ kitiꞌ nuu̱ꞌ a̱.
4 Ña̱ teiꞌ ne̱ yivi̱ꞌ xiinꞌ ña̱ ñuñuꞌ nimá ni̱a̱
xiinꞌ ña̱ ni̱a̱ꞌa ña̱ xaaꞌ ni̱a̱ ndii,
ku̱a̱tyi̱ nduuꞌ a̱ nuu̱ꞌ Yahvé.
5 Naaꞌ tyituní va̱ꞌa̱ ne̱ yivi̱ꞌ te̱ sa̱a̱ ni̱a̱ tyu̱u̱n nuu̱ꞌ ni̱a̱ ndii,
ke̱ta̱ va̱ꞌa̱ kuaꞌa̱ꞌ ni̱a̱ xiinꞌ a̱,
ndisu̱ naaꞌ sa̱a̱ kiꞌi̱ꞌ ni̱a̱ tyu̱u̱n nuu̱ꞌ ni̱a̱ ja̱a̱nꞌ ndii,
sa̱ndaꞌvi xiinꞌ miiꞌ ndi̱ꞌi̱ ni̱a̱.
6 Ña̱ vikaꞌ ña̱ kaya ne̱ yivi̱ꞌ xiinꞌ tu̱ꞌu̱n vixi̱ ndii,
yatyi̱ va̱ ndiꞌiꞌ a̱ nde̱e̱ naa viko̱ꞌ nu̱ꞌuꞌ,
te̱ i̱i̱n xaꞌaꞌ ku̱i̱ti̱ꞌ va̱ꞌa̱ kuni ne̱ yivi̱ꞌ xaaꞌ a̱,
ndisu̱ xa̱ xaꞌa̱ꞌ ña̱ ja̱a̱nꞌ ku̱vi̱ ni̱a̱.
7 Ne̱ xaaꞌ ña̱ ni̱a̱ꞌa ndii,
xa̱ mi̱iꞌ ña̱ ni̱a̱ꞌa ña̱ xaaꞌ ni̱a̱ ja̱a̱nꞌ ka̱ꞌni̱ꞌ ña̱ꞌaꞌ,
sa̱kanꞌ ña̱ nï̱ kuni̱ ni̱a̱ sa̱tyuunꞌ nda̱ku ni̱a̱.
8 Ne̱ yivi̱ꞌ,
ne̱ xaaꞌ ña̱ ni̱a̱ꞌa ndii,
köo̱ꞌ kivi̱ꞌ xatyuunꞌ nda̱ku ni̱a̱,
süu̱ꞌ ja̱a̱nꞌ ndii,
mi̱iꞌ ndiꞌiꞌ tu̱ꞌu̱n vixi̱ kaꞌán ni̱a̱,
ndisu̱ ne̱ yivi̱ꞌ,
ne̱ xatyuunꞌ nda̱ku ndii,
ña̱ va̱ꞌa̱ xaaꞌ ne̱ ja̱a̱nꞌ.
9 Nde̱e̱ va̱ꞌa̱ ka̱ ku̱nduꞌu̱ꞌ i̱i̱n nda̱a̱ꞌ mi̱iꞌ e̱ꞌ i̱i̱n xaanꞌ xata̱ꞌ vi̱ꞌe̱,
te̱ sa̱kanꞌ ña̱ ku̱nduꞌu̱ꞌ e̱ꞌ xiinꞌ ñaꞌ siꞌi e̱ꞌ i̱i̱n vi̱ꞌe̱ tyie̱ nda̱tu̱nꞌ va̱ ñaꞌ xtani̱ va̱ ku̱ntaꞌanꞌ xiinꞌ e̱ꞌ.
10 Ne̱ xaaꞌ ña̱ ni̱a̱ꞌa ndii,
xa̱ nuu̱ꞌ ña̱ ni̱a̱ꞌa kaꞌán nimá ni̱a̱ sa̱a̱ ni̱a̱,
te̱ köo̱ꞌ kivi̱ꞌ nandani̱ ni̱a̱ ña̱ ndoꞌoꞌ ne̱ yivi̱ꞌ,
ne̱ ndieeꞌ ya̱ti̱n vi̱ꞌe̱ ni̱a̱.
11 Naaꞌ ku̱tunꞌ e̱ꞌ ne̱ xandiꞌiꞌ ndii,
ku̱ni̱ ne̱ na̱a̱ꞌ ku̱u̱ ña̱ ja̱a̱nꞌ,
te̱ sa̱a̱ ni̱a̱ ña̱ va̱ꞌa̱.
Te̱ naaꞌ ku̱tunꞌ e̱ꞌ ne̱ kuuꞌ kaxiꞌ ndii,
so̱ꞌo̱ ku̱u̱ xini tuní ka̱ ni̱a̱.
12 Ndiosí,
ña̱ xatyuunꞌ nda̱ku ndii,
xitoꞌ a̱ sa̱a̱ ndoꞌoꞌ ne̱ xaaꞌ ña̱ ni̱a̱ꞌa,
te̱ xini a̱ sa̱a̱ nduxín miiꞌ ndieeꞌ ne̱ ja̱a̱nꞌ xaaꞌ ña̱ ni̱a̱ꞌa ña̱ xaaꞌ ni̱a̱.
13 Yo̱o̱ ka̱ xïinꞌ tyi̱ndi̱e̱eꞌ ne̱ ndaꞌvi kuuꞌ kii̱ꞌ kaꞌán ndaꞌvi ni̱a̱ ndii,
sa̱kanꞌ tu̱ ku̱ndo̱ꞌo̱ mi̱iꞌ ni̱a̱ kii̱ꞌ kaꞌa̱n ndaꞌvi ni̱a̱ ndukuꞌ ni̱a̱ ne̱ tyi̱ndi̱e̱eꞌ ña̱ꞌaꞌ,
te̱ köo̱ꞌ ku̱i̱i̱n tyi̱ndi̱e̱eꞌ ña̱ꞌaꞌ.
14 Tu̱mani̱ꞌ ña̱ taxiꞌ si̱ꞌe e̱ꞌ nda̱ꞌaꞌ ne̱ yivi̱ꞌ kii̱ꞌ xiꞌé ni̱a̱ ndii,
nuuꞌ ka̱ꞌniꞌ nimá ni̱a̱ xaaꞌ a̱,
te̱ xu̱ꞌunꞌ ña̱ taxiꞌ e̱ꞌ nda̱ꞌaꞌ ne̱ yivi̱ꞌ te̱ ko̱o̱ taxi̱nꞌ yu̱ꞌuꞌ ni̱a̱ kii̱ꞌ xiꞌé xa̱va̱ꞌa̱ ni̱a̱ ndii,
natyinaá mani̱ꞌ a̱ nimá ni̱a̱.
15 Ne̱ yivi̱ꞌ,
ne̱ xatyuunꞌ nda̱ku ndii,
va̱ꞌa̱ kuni ni̱a̱ kii̱ꞌ xaꞌnú nda̱ku kuesí ku̱a̱tyi̱,
ndisu̱ ne̱ xaaꞌ ña̱ ni̱a̱ꞌa ndii,
yiꞌvi ni̱a̱ nde̱e̱ kisiꞌ vi̱ꞌ ña̱ꞌaꞌ a̱ xaaꞌ ña̱ ja̱a̱nꞌ.
16 Yo̱o̱ ka̱ nakooꞌ ña̱ xini tuní te̱ xaaꞌ ni̱a̱ ña̱ ni̱a̱ꞌa ndii,
ne̱ xa̱ yoo kuꞌu̱n ñu̱u̱ ndi̱i nduuꞌ ni̱a̱.
17 Yo̱o̱ ka̱ xtani̱ va̱ ña̱ sii̱ꞌ ndii,
ku̱u̱ ndaꞌvi ndi̱ꞌi̱ ni̱a̱,
te̱ yo̱o̱ ka̱ xtani̱ va̱ ko̱ꞌo̱ vino,
te̱ xtani̱ va̱ tu̱ ni̱a̱ kusi̱ki̱ꞌ saka ni̱a̱ xa̱ꞌa̱n oliva xavixínꞌ ndii,
köo̱ꞌ kivi̱ꞌ ku̱vikaꞌ ni̱a̱.
18 Ne̱ yivi̱ꞌ,
ne̱ xaaꞌ ña̱ ni̱a̱ꞌa,
ku̱ndo̱ꞌo̱ sa̱a̱ Ndiosí xaꞌa̱ꞌ ña̱ ni̱a̱ꞌa ña̱ kuni sa̱a̱ ni̱a̱ xiinꞌ ne̱ xatyuunꞌ nda̱ku.
Te̱ ne̱ sikiꞌ na̱tyaꞌvi̱ xaꞌa̱ꞌ ña̱ tiin sikiꞌ ni̱a̱ ne̱ yivi̱ꞌ,
ne̱ xatyuunꞌ nda̱ku.
19 Nde̱e̱ va̱ꞌa̱ ka̱ ku̱nduꞌu̱ꞌ i̱i̱n nda̱a̱ꞌ mi̱iꞌ e̱ꞌ miiꞌ i̱tyi kaaꞌ,
te̱ sa̱kanꞌ ña̱ ku̱nduꞌu̱ꞌ e̱ꞌ xiinꞌ ñaꞌ siꞌi e̱ꞌ ñaꞌ xtani̱ va̱ ku̱ntaꞌanꞌ xiinꞌ e̱ꞌ.
20 Vi̱ꞌe̱ ne̱ xini tuní ndii,
yoo kuaꞌa̱ꞌ ña̱ vikaꞌ,
te̱ yoo tu̱ xa̱ꞌa̱n oliva xavixínꞌ,
ndisu̱ ne̱ küuꞌ kaxiꞌ ndii,
i̱i̱n kani̱ꞌ ku̱i̱ti̱ꞌ te̱ xaꞌni̱ꞌ saka ni̱a̱ sa̱kuuꞌ ña̱ kanandoo ni̱a̱.
21 Ne̱ kuni sa̱tyuunꞌ nda̱ku,
te̱ kuni ku̱vi̱ta tu̱ i̱ni̱ ni̱a̱ xaꞌa̱ꞌ ne̱ yivi̱ꞌ ndii,
na̱ti̱i̱n ni̱a̱ kivi̱ꞌ ñu̱u̱ xiinꞌ sa̱kuuꞌ ña̱ kuní nuu̱ꞌ ni̱a̱ xiinꞌ ña̱ ki̱ꞌi̱n kaꞌnuꞌ ña̱ꞌaꞌ ne̱ yivi̱ꞌ.
22 Ne̱ xini tuní ndii,
va̱a̱ꞌ ku̱i̱ti̱ꞌ sa̱nduva ni̱a̱ nama̱ ña̱ ndasiꞌ i̱ꞌnu̱ kutu̱ꞌ i̱i̱n ñu̱u̱ miiꞌ ndieeꞌ te̱ kooꞌ tyukuuꞌ va̱,
te̱ ko̱ꞌni̱ ni̱a̱ ñu̱u̱ ja̱a̱nꞌ te̱ sa̱ndo̱ñuꞌuꞌ ni̱a̱ sa̱kuuꞌ ña̱ ndi̱e̱eꞌ ña̱ i̱ni̱ ne̱ ndieeꞌ ñu̱u̱ ja̱a̱nꞌ xini ni̱a̱.
23 Ne̱ yivi̱ꞌ,
ne̱ xitoꞌ ña̱ kaꞌán ni̱a̱,
te̱ xitoꞌ tu̱ ni̱a̱ yaa̱ꞌ ni̱a̱ kii̱ꞌ ndatuꞌunꞌ ni̱a̱ ndii,
na̱ꞌaꞌ ka̱ka̱ ni̱a̱ i̱i̱n yivi̱ꞌ,
te̱ xïkaꞌ nimá ni̱a̱.
24 Ne̱ xandiꞌiꞌ ndii,
naniꞌ tu̱ ni̱a̱ ne̱ ñuñuꞌ uun ne̱ kaniꞌiꞌ xiinꞌ miiꞌ,
te̱ sa̱kuuꞌ ña̱ xaaꞌ ni̱a̱ ndii,
xa̱ mi̱iꞌ ndiꞌiꞌ ña̱ ñuñuꞌ ja̱a̱nꞌ nduuꞌ a̱.
25 Tee̱ꞌ ndee kuaꞌa̱ꞌ ña̱ꞌa̱ kaꞌán nimá ne̱ suxa̱nꞌ xaꞌa̱ꞌ ndii,
ku̱vi̱ ni̱a̱ so̱ko̱,
sa̱kanꞌ ña̱ suxanꞌ va̱ ni̱a̱ sa̱tyuunꞌ ni̱a̱.
26 Yo̱o̱ sa̱va̱ ne̱ yivi̱ꞌ ndii,
ndu̱viꞌ xikán nimá ni̱a̱ xaꞌa̱ꞌ ña̱ꞌa̱,
ndisu̱ ne̱ xatyuunꞌ nda̱ku ndii,
tiaa̱n tiaa̱n xamaníꞌ ni̱a̱ ne̱ yivi̱ꞌ kuaꞌa̱ꞌ ña̱ꞌa̱ ni̱a̱.
27 Ña̱ nasoko̱ꞌ ne̱ xaaꞌ ña̱ ni̱a̱ꞌa ndii,
ndasiꞌ Ndiosí a̱,
sa̱a̱ ka̱ vi̱ꞌ tu̱ kii̱ꞌ nasoko̱ꞌ ni̱a̱ a̱ xiinꞌ ña̱ kaꞌán ki̱ni̱ nimá ni̱a̱.
28 Ne̱ ndieeꞌ yu̱ꞌuꞌ xini xaꞌanꞌ ndii,
täxiꞌ ka̱ kuesí ndi̱e̱e̱ yu̱ꞌuꞌ ni̱a̱,
ndisu̱ ne̱ ndieeꞌ yu̱ꞌuꞌ ña̱ ndi̱xa̱ ndii,
ta̱xi̱ kuesí ndi̱e̱e̱ yu̱ꞌuꞌ ne̱ ja̱a̱nꞌ.
29 Ne̱ xaaꞌ ña̱ ni̱a̱ꞌa ndii,
xakuuꞌ ku̱i̱ti̱ꞌ ni̱a̱ nde̱e̱ naa ne̱ kö̱o̱ tu̱nkuiꞌe̱ xikaꞌ,
ndisu̱ ne̱ xatyuunꞌ nda̱ku ndii,
xanini va̱ꞌa̱ ni̱a̱ ña̱ kuní ka̱ sa̱a̱ ni̱a̱ i̱i̱n ña̱ꞌa̱.
30 Nuu̱ꞌ Yahvé ndii,
köo̱ꞌ ña̱ xini tuní ni̱ nde̱e̱ ña̱ ndityi
ni̱ nde̱e̱ tu̱ꞌu̱n nde̱iꞌ,
ña̱ ndiaa yaꞌviꞌ i̱i̱n yivi̱ꞌ yoꞌoꞌ,
ña̱ ku̱vi̱ ka̱nandoo ña̱ꞌaꞌ a̱.
31 Te̱ xíinꞌ,
te̱ yoso̱ꞌ kuei ndii,
sakooꞌ tu̱ꞌva̱ xiinꞌ miiꞌ ra̱ te̱ kuꞌu̱n ti̱i̱n ra̱ ñuꞌu̱,
ndisu̱ mi̱iꞌ Yahvé nduuꞌ ña̱ xaaꞌ sa̱kanꞌ te̱ ketaꞌ va̱ꞌa̱ ra̱ xiinꞌ ñuꞌu̱ ja̱a̱nꞌ.