Ndiosí nduuꞌ ña̱ niaꞌá yooꞌ sa̱a̱ ka̱ka̱ e̱ꞌ i̱i̱n yivi̱ꞌ
20
Yo̱o̱ ka̱ xiꞌiꞌ vino ndii,
ne̱ küuꞌ kaxiꞌ nduuꞌ ni̱a̱,
te̱ ndi̱xi̱ teꞌ xatu̱ ka̱ ndii,
sakuntaꞌanꞌ raꞌ ne̱ yivi̱ꞌ.
Te̱ ne̱ xtani̱ va̱ ko̱ꞌo̱ ndi̱xi̱ ndii,
kö̱o̱ ña̱ xini tuní kaꞌán ni̱a̱.
2 Kii̱ꞌ nasaáꞌ i̱i̱n rey ndii,
ndeꞌí ra̱ nde̱e̱ naa i̱i̱n lion kii̱ꞌ xiꞌé riꞌ,
te̱ yo̱o̱ ka̱ sanasaáꞌ ña̱ꞌaꞌ ndii,
kueinꞌ kuuꞌ ni̱a̱ te̱ ka̱ꞌni̱ꞌ ña̱ꞌaꞌ ra̱.
3 Yo̱o̱ ka̱ savikuiín ne̱ yivi̱ꞌ kii̱ꞌ kuntaꞌanꞌ ni̱a̱ ndii,
xataꞌa̱n ki̱ꞌi̱n kaꞌnuꞌ ña̱ꞌaꞌ e̱ꞌ,
ndisu̱ ne̱ küuꞌ kaxiꞌ ndii,
so̱ꞌo̱ tyuꞌu̱ꞌ ndiꞌiꞌ ni̱a̱ ne̱ yivi̱ꞌ ja̱a̱nꞌ ña̱ ndi̱e̱eꞌ ka̱ ku̱ntaꞌanꞌ ni̱a̱.
4 Te̱ suxa̱nꞌ ndii,
tyïꞌiꞌ ra̱ kivi̱ꞌ ña̱ kuní a̱ sa̱a̱ ra̱ tyu̱u̱n ja̱a̱nꞌ,
te̱ kii̱ꞌ xaa̱ kivi̱ꞌ ña̱ nakaya ne̱ yivi̱ꞌ ña̱ saviꞌ ndii,
kaka̱n ra̱ ña̱ ka̱xi̱ꞌ ra̱ nuu̱ꞌ ne̱ yivi̱ꞌ,
ndisu̱ köo̱ꞌ a̱ niꞌi̱ꞌ ra̱.
5 Tee̱ꞌ ndee nde̱ma̱aꞌ ti̱xi̱n nimá ne̱ yivi̱ꞌ ñuꞌuꞌ tu̱ꞌu̱n nde̱iꞌ va̱ꞌa̱ ndii,
ku̱vi̱ ku̱nda̱ni̱ ne̱ yivi̱ꞌ,
ne̱ xini tuní sa̱a̱ yoo a̱.
6 Kuaꞌa̱ꞌ va̱ ne̱ yivi̱ꞌ kaꞌán ña̱ nduuꞌ ni̱a̱ ne̱ ndiakaꞌ taꞌanꞌ va̱ꞌa̱ xiinꞌ e̱ꞌ,
ndisu̱ köo̱ꞌ nde̱e̱ i̱i̱n e̱ꞌ ku̱vi̱ niꞌi̱ꞌ ne̱ ku̱vi̱ ku̱i̱ni̱ xna̱ꞌa̱ e̱ꞌ ku̱ni̱ e̱ꞌ.
7 Ne̱ xatyuunꞌ nda̱ku ndii,
xikaꞌ ni̱a̱ xaaꞌ ni̱a̱ ña̱ va̱ꞌa̱,
te̱ siꞌe̱ ni̱a̱,
ne̱ ndikún ña̱ va̱ꞌa̱ ña̱ xaaꞌ ni̱a̱ ja̱a̱nꞌ ndii,
sa̱ñuꞌuꞌ va̱ ña̱ꞌaꞌ Ndiosí.
8 Kii̱ꞌ xikunduꞌu̱ꞌ rey nuu̱ꞌ tei̱ kaꞌnuꞌ ra̱,
te̱ kaꞌnu̱ ra̱ ku̱a̱tyi̱ ne̱ yivi̱ꞌ ndii,
tyunxaꞌaꞌ ndiꞌi̱ va̱ ra̱ te̱ ku̱ni̱ ra̱ yo̱o̱ kaꞌán ña̱ ndi̱xa̱ uun yo̱o̱ kaꞌán tu̱ꞌu̱n vixi̱.
9 Köo̱ꞌ nde̱e̱ i̱i̱n ne̱ yivi̱ꞌ,
ne̱ ku̱vi̱ kaꞌa̱n ndii:
“Xa̱ ni̱ nda̱sa̱ndo̱o̱ i̱ nimá i̱,
te̱ köo̱ꞌ ka̱ nde̱e̱ i̱i̱n ku̱a̱tyi̱ ndisoꞌ i̱”,
katyi̱ ni̱a̱.
10 Yahvé ndii,
ndasiꞌ a̱ ña̱ xätaꞌ xinu̱ ne̱ yivi̱ꞌ ña̱ꞌa̱,
te̱ sa̱kanꞌ tu̱ ña̱ tyüꞌunꞌ xinu̱ ni̱a̱ ña̱ꞌa̱.
11 Ne̱ kuatyi̱ꞌ kualiꞌ ndii,
xiinꞌ sa̱a̱ kuuꞌ ni̱a̱ ku̱vi̱ ku̱ni̱ e̱ꞌ ndee nuu̱ꞌ ne̱ yivi̱ꞌ nduuꞌ ni̱a̱,
naaꞌ ne̱ xatyuunꞌ nda̱ku nduuꞌ ni̱a̱,
uun ne̱ sa̱tyuunꞌ va̱ꞌa̱ nduuꞌ nia̱.
12 Yahvé ni̱ xa̱ꞌa̱ so̱ꞌo̱ e̱ꞌ te̱ ku̱vi̱ ku̱ni̱ so̱ꞌo̱ e̱ꞌ,
te̱ ni̱ xa̱ꞌa̱ tu̱ a̱ ndu̱tyiꞌ nuu̱ꞌ e̱ꞌ te̱ ku̱vi̱ ko̱to̱ e̱ꞌ.
13 Naaꞌ xa̱ nuu̱ꞌ kuni kusu̱n ku̱i̱ti̱ꞌ u̱nꞌ ndii,
sa̱ndaꞌvi xiinꞌ miiꞌ u̱nꞌ,
va̱ꞌa̱ ka̱ ku̱ndi̱to̱ u̱nꞌ te̱ ko̱o̱ kuaꞌa̱ꞌ ña̱ ka̱xi̱ꞌ u̱nꞌ.
14 Ne̱ yivi̱ꞌ,
ne̱ sata̱ꞌ ña̱ꞌa̱ kaꞌán ndii:
“Vä̱ꞌa̱ xa̱tyiꞌ ña̱ xiko̱ꞌ u̱nꞌ,
te̱ ya̱ꞌvi̱ va̱ a̱”,
katyi ni̱a̱.
Ndisu̱ kii̱ꞌ ndi̱ꞌi̱ sa̱ta̱ꞌ ni̱a̱ ña̱ ja̱a̱nꞌ,
te̱ ke̱ta̱ ni̱a̱ kuaꞌa̱n ni̱a̱ kaꞌán ñuñuꞌ ni̱a̱ xiinꞌ nimá ni̱a̱ ña̱ va̱ꞌa̱ va̱ ni̱ ki̱e̱e̱ ni̱a̱ xiinꞌ ña̱ ni̱ sa̱ta̱ꞌ ni̱a̱ ja̱a̱nꞌ.
15 Ndiaa yaꞌviꞌ ka̱ ne̱ yivi̱ꞌ,
ne̱ xitoꞌ yu̱ꞌuꞌ kii̱ꞌ ndatuꞌunꞌ ni̱a̱
te̱ sa̱kanꞌ oro xiinꞌ kuaꞌa̱ꞌ yuu̱ꞌ nda̱tu̱nꞌ.
16 Ne̱ yivi̱ꞌ,
ne̱ ni̱ tyi̱ka̱ndi̱a̱ kuento ña̱ tya̱ꞌvi̱ ni̱a̱ xaꞌa̱ꞌ ña̱ ndisoꞌ ikaꞌ i̱i̱n ne̱ tukuꞌ ndii,
tu̱ꞌu̱n ndo̱ꞌ toto̱ ña̱ niꞌnuꞌ ni̱a̱ nda̱ꞌaꞌ ni̱a̱.
Te̱ na ndoo̱ a̱ nda̱ꞌaꞌ ndo̱ꞌ nde̱e̱ ska̱tyiꞌ na̱tyaꞌvi̱ ne̱ tukuꞌ ja̱a̱nꞌ ña̱ ndisoꞌ ikaꞌ ni̱a̱ ndoꞌó.
17 Asi̱nꞌ tu̱ꞌu̱n vixi̱ nuu̱ꞌ ne̱ yivi̱ꞌ nde̱e̱ naa xita̱ꞌ va̱ꞌa̱ ña̱ ni̱ xa̱kuiꞌnaꞌ ni̱a̱ te̱ xixiꞌ ni̱a̱,
ndisu̱ kii̱ꞌ yaꞌa̱ kivi̱ꞌ ndii,
sa̱ndoꞌoꞌ va̱ ña̱ꞌaꞌ a̱ tu̱ꞌu̱n vixi̱ ja̱a̱nꞌ.
18 Naaꞌ yoo ne̱ yivi̱ꞌ,
ne̱ kaꞌa̱n tu̱ꞌu̱n nde̱iꞌ va̱ꞌa̱ va̱ nuu̱ꞌ e̱ꞌ kii̱ꞌ tyituní e̱ꞌ sa̱a̱ e̱ꞌ ndiaa ka̱ tyu̱u̱n ndii,
xinu̱ a̱.
Naaꞌ kuni ku̱ntaꞌanꞌ e̱ꞌ xiinꞌ i̱i̱n ñu̱u̱ te̱ kuni ke̱ta̱ va̱ꞌa̱ e̱ꞌ ndii,
kuní a̱ ndu̱kuꞌ e̱ꞌ ne̱ yivi̱ꞌ,
ne̱ xini tuní,
ne̱ kaꞌa̱n xiinꞌ e̱ꞌ ndee ña̱ kuní a̱ sa̱a̱ e̱ꞌ te̱ ke̱ta̱ va̱ꞌa̱ e̱ꞌ.
19 Ne̱ yivi̱ꞌ,
ne̱ xtani̱ va̱ tu̱ꞌu̱n vixi̱ ndii,
ndatuꞌunꞌ ndo̱o̱ ni̱a̱ nuu̱ꞌ ne̱ yivi̱ꞌ sa̱kuuꞌ ña̱ kaꞌán si̱ꞌe e̱ꞌ xiinꞌ ni̱a̱.
Xaꞌa̱ꞌ a̱ ja̱a̱nꞌ na kï̱ꞌi̱n taꞌanꞌ e̱ꞌ xiinꞌ ne̱ vixi̱.
20 Yo̱o̱ ka̱ sanatyaꞌanꞌ yu̱vaꞌ ni̱a̱,
uun si̱ꞌiꞌ ni̱a̱ ndii,
i̱yo̱ va̱ ku̱ndo̱ꞌo̱ ni̱a̱ te̱ kuvi̱ ni̱a̱,
nde̱e̱ naa xaaꞌ a̱ kii̱ꞌ ndaꞌva e̱ꞌ ñuꞌu̱ te̱ kui̱i̱n yaví ndiaaꞌ xa̱tyiꞌ.
21 Ña̱ vikaꞌ ña̱ yatyi̱ va̱ niꞌíꞌ ne̱ yivi̱ꞌ ndii,
kü̱ndu̱u̱ a̱ ña̱ va̱ꞌa̱ nuu̱ꞌ kivi̱ꞌ ñu̱u̱ ni̱a̱ kii̱ꞌ yaꞌa̱ kivi̱ꞌ.
22 Käꞌa̱n ndo̱ꞌ xiinꞌ nimá ndo̱ꞌ ndii:
“Sa̱a̱ tu̱ yuꞌu̱ ña̱ ni̱a̱ꞌa xiinꞌ ne̱ yivi̱ꞌ,
ne̱ ni̱ xa̱a̱ ña̱ ni̱a̱ꞌa xiinꞌ i̱”,
katyi̱ ndo̱ꞌ.
Va̱ꞌa̱ ka̱ ndiatuꞌ ndo̱ꞌ ña̱ sa̱a̱ Yahvé,
te̱ ña̱ ja̱a̱nꞌ sa̱kakú ndoꞌó.
23 Yahvé ndii,
ndasiꞌ a̱ ña̱ xätaꞌ xinu̱ ne̱ yivi̱ꞌ ña̱ꞌa̱,
te̱ sa̱kanꞌ tu̱ ña̱ tyüꞌunꞌ xinú ni̱a̱ ña̱ꞌa̱.
24 Mi̱iꞌ Yahvé xaaꞌ sa̱kanꞌ te̱ xikaꞌ e̱ꞌ,
sa̱kanꞌ na kuiiꞌ nde̱e̱ i̱i̱n e̱ꞌ xïní ndee xaꞌa̱ꞌ na yoo tu̱ndoꞌo̱ꞌ nuu̱ꞌ kivi̱ꞌ ñu̱u̱ e̱ꞌ.
25 Kueinꞌ va̱ kuuꞌ ne̱ yivi̱ꞌ,
ne̱ taxiꞌ kiꞌi̱ꞌ kuento ni̱a̱ nuu̱ꞌ Yahvé,
te̱ kii̱ꞌ yaꞌa̱ kivi̱ꞌ te̱ na̱ka̱ni̱ni̱ ni̱a̱ ña̱ ya̱ꞌvi̱ va̱ ketaꞌ a̱ te̱ sa̱xinu̱ ni̱a̱ kuento ni̱a̱ ja̱a̱nꞌ.
26 Rey,
te̱ xini tuní ndii,
xatia ra̱ sa̱kuuꞌ te̱ xaaꞌ ña̱ ni̱a̱ꞌa nde̱e̱ naa xaaꞌ te̱ yivi̱ꞌ kii̱ꞌ sakayó ra̱ ndi̱kinꞌ trigo,
ndi̱ꞌi̱ ja̱a̱nꞌ te̱ sa̱taví ra̱ ndi̱kinꞌ ja̱a̱nꞌ xiinꞌ i̱i̱n yuu̱ꞌ ña̱ kuu̱nꞌ ra̱ a̱.
27 Nimá ne̱ yivi̱ꞌ nduuꞌ ñuꞌu̱ ña̱ niaꞌá nuu̱ꞌ Yahvé sa̱a̱ yoo ni̱a̱ nuu̱ꞌ a̱,
te̱ ña̱ ja̱a̱nꞌ nduuꞌ ña̱ xitoꞌ ndiꞌi̱ nde̱e̱ ma̱aꞌ ti̱xi̱n i̱ni̱ ni̱a̱ sa̱kuuꞌ ña̱ xanini nimá ni̱a̱.
28 Ña̱ kuvita nimá xiinꞌ ña̱ ndi̱xa̱ nduuꞌ ña̱ xitoꞌ rey te̱ xikaꞌ ra̱,
te̱ xaꞌa̱ꞌ a̱ ña̱ kuvita i̱ni̱ ra̱ xini ra̱ ne̱ yivi̱ꞌ na kuiiꞌ nduꞌu̱ꞌ ra̱ nuu̱ꞌ tei̱ miiꞌ xaꞌndia tyuunꞌ ra̱.
29 Te̱ sa̱va̱ ndii,
ña̱ ndi̱e̱eꞌ ra̱ nduuꞌ ña̱ nda̱tu̱nꞌ ra̱,
te̱ te̱ xi̱xa̱ ndii,
i̱xiꞌ ya̱a̱ xíniꞌ ra̱ nduuꞌ ña̱ nda̱tu̱nꞌ ra̱.
30 Ne̱ xaaꞌ ña̱ ni̱a̱ꞌa ndii,
ña̱ kutúnꞌ ni̱a̱ nde̱e̱ tuxuꞌví ni̱a̱ nduuꞌ ña̱ xaaꞌ sa̱kanꞌ te̱ na̱ko̱o̱ nia̱ ña̱ ni̱a̱ꞌa ña̱ xaaꞌ ni̱a̱,
te̱ ña̱ kutúnꞌ ni̱a̱ ja̱a̱nꞌ nduuꞌ tu̱ ña̱ ndasandooꞌ nde̱e̱ ma̱aꞌ ti̱xi̱n nimá ni̱a̱.