19
Va̱ꞌa̱ ka̱ ña̱ ku̱ndu̱u̱ e̱ꞌ ne̱ ndaꞌvi kuuꞌ xatyuunꞌ nda̱ku
te̱ sa̱kanꞌ ña̱ ku̱ndu̱u̱ e̱ꞌ ne̱ kuiꞌna̱ꞌ xini xaꞌanꞌ.
2 Nde̱e̱ xikoó ni̱ tyi̱tuní e̱ꞌ sa̱a̱ e̱ꞌ i̱i̱n tyu̱u̱n naaꞌ köo̱ꞌ ña̱ xini tuní kumiꞌ e̱ꞌ.
Yo̱o̱ ka̱ yatyi̱ va̱ xaaꞌ i̱i̱n tyu̱u̱n ndii,
kë̱ta̱ va̱ꞌa̱ tyu̱u̱n ja̱a̱nꞌ.
3 Ña̱ küuꞌ kaxiꞌ mi̱iꞌ ne̱ yivi̱ꞌ te̱ xaꞌni̱ꞌ xiinꞌ mi̱iꞌ ni̱a̱,
te̱ soꞌo̱ꞌ ndiꞌiꞌ te̱ nasaáꞌ nimá ni̱a̱ xini ni̱a̱ Yahvé xaꞌa̱ꞌ ña̱ ndoꞌoꞌ ni̱a̱.
4 Ne̱ vika̱ꞌ ndii,
yoo kuaꞌa̱ꞌ ne̱ va̱ꞌa̱ ndiakaꞌ taꞌanꞌ xiinꞌ ni̱a̱,
ndisu̱ ne̱ ndaꞌvi kuuꞌ ndii,
nakooꞌ i̱i̱n nda̱a̱ꞌ ndiꞌiꞌ ña̱ꞌaꞌ ne̱ va̱ꞌa̱ ndiakaꞌ taꞌanꞌ xiinꞌ ni̱a̱.
5 Ne̱ yivi̱ꞌ,
ne̱ ndieeꞌ yu̱ꞌuꞌ sikiꞌ ndii,
käku̱ ni̱a̱ nuu̱ꞌ ña̱ sa̱ndoꞌoꞌ ña̱ꞌaꞌ ne̱ yivi̱ꞌ,
te̱ sa̱kanꞌ tu̱ ne̱ xini xaꞌanꞌ ndii,
käku̱ tu̱ ne̱ ja̱a̱nꞌ nuu̱ꞌ ña̱ sa̱ndoꞌoꞌ ña̱ꞌaꞌ ne̱ yivi̱ꞌ.
6 Te̱ yivi̱ꞌ,
te̱ xaꞌndia tyuunꞌ,
te̱ kuatiaꞌ va̱ ndii,
kuaꞌa̱ꞌ ne̱ yivi̱ꞌ nandukuꞌ ña̱ꞌaꞌ,
sa̱kanꞌ ña̱ kuní ni̱a̱ ña̱ tyi̱ndi̱e̱eꞌ ña̱ꞌaꞌ ra̱.
Te̱ sa̱kuuꞌ ne̱ yivi̱ꞌ ndiakaꞌ taꞌanꞌ va̱ꞌa̱ xiinꞌ te̱ xamaníꞌ kuaꞌa̱ꞌ ña̱ꞌa̱.
7 Sa̱kuuꞌ ne̱ i̱i̱n kuuꞌ xiinꞌ i̱i̱n te̱ ndaꞌvi kuuꞌ ndii,
sanuuꞌ ña̱ꞌaꞌ ni̱a̱.
Te̱ ne̱ ndiakaꞌ taꞌanꞌ kutu̱ꞌ xiinꞌ ra̱ ndii,
nakooꞌ i̱i̱n nda̱a̱ꞌ xa̱tyiꞌ ña̱ꞌaꞌ ni̱a̱.
Tee̱ꞌ ndee kaꞌa̱n ndaꞌvi ra̱ xiinꞌ ne̱ xiní taꞌanꞌ xiinꞌ ra̱ ja̱a̱nꞌ ña̱ tyi̱ndi̱e̱eꞌ ña̱ꞌaꞌ ni̱a̱ ndii,
köo̱ꞌ ka̱ ne̱ ja̱a̱nꞌ yoo i̱kanꞌ xiinꞌ ra̱.
8 Yo̱o̱ ka̱ natiinꞌ ña̱ xini tuní ndii,
ne̱ ndani̱ xiinꞌ miiꞌ nduuꞌ ni̱a̱,
te̱ yo̱o̱ ka̱ taxaꞌa ña̱ ndityi ni̱a̱ ndii,
ki̱e̱e̱ va̱ꞌa̱ ni̱a̱ xiinꞌ sa̱kuuꞌ ña̱ sa̱a̱ ni̱a̱.
9 Ne̱ yivi̱ꞌ,
ne̱ ndieeꞌ yu̱ꞌuꞌ sikiꞌ ndii,
käku̱ ni̱a̱ nuu̱ꞌ ña̱ ka̱ni̱ ña̱ꞌaꞌ kuesí,
te̱ sa̱kanꞌ tu̱ ne̱ xini xaꞌanꞌ ndii,
sa̱nduxín xiinꞌ miiꞌ xa̱tyiꞌ ni̱a̱.
10 Vä̱ꞌa̱ xa̱tyiꞌ yoo a̱ ña̱ nda̱tu̱nꞌ ko̱o̱ miiꞌ ku̱nduꞌu̱ꞌ i̱i̱n ne̱ küuꞌ kaxiꞌ,
ni̱ nde̱e̱ vä̱ꞌa̱ xa̱tyiꞌ tu̱ yoo a̱ ña̱ i̱i̱n ne̱ xikaꞌ nuuꞌ so̱ꞌo̱ ku̱ndu̱u̱ ne̱ xaꞌndia tyuunꞌ nuu̱ꞌ ne̱ kuuꞌ kaꞌnuꞌ.
11 Ne̱ yivi̱ꞌ,
ne̱ kuuꞌ kaxiꞌ ndii,
näsaáꞌ ni̱a̱ꞌa̱ ni̱a̱,
te̱ kiꞌinꞌ kaꞌnuꞌ ña̱ꞌaꞌ ne̱ yivi̱ꞌ xaꞌa̱ꞌ a̱ ña̱ yoo kaꞌnuꞌ i̱ni̱ ni̱a̱ xaꞌa̱ꞌ ne̱ yivi̱ꞌ,
ne̱ xaaꞌ ña̱ vä̱ꞌa̱ xiinꞌ ni̱a̱.
12 Kii̱ꞌ nasaáꞌ i̱i̱n rey ndii,
ndeꞌí ra̱ nde̱e̱ naa i̱i̱n lion sa̱va̱ kii̱ꞌ xiꞌé riꞌ,
ndisu̱ ña̱ va̱ꞌa̱ nimá ra̱ xini ra̱ ne̱ yivi̱ꞌ ndii,
nduuꞌ a̱ nde̱e̱ naa yuyuꞌ kii̱ꞌ kuunꞌ a̱ xaꞌa̱ꞌ kuꞌu̱.
13 I̱i̱n te̱ küuꞌ kaxiꞌ ndii,
sandoꞌoꞌ va̱ ra̱ yu̱vaꞌ ra̱.
I̱i̱n ña̱ꞌaꞌ,
ñaꞌ xtani̱ va̱ ku̱ntaꞌanꞌ xiinꞌ i̱i̱ꞌ aꞌ ndii,
nduuꞌ aꞌ nde̱e̱ naa ti̱kui,
teꞌ toó te̱ toó ti̱xi̱n vi̱ꞌe̱ miiꞌ xiꞌi̱n.
14 Yu̱vaꞌ siꞌiꞌ ndii,
ku̱vi̱ na̱ko̱o̱ ni̱a̱ nda̱ꞌaꞌ siꞌe̱ ni̱a̱ vi̱ꞌe̱ xiinꞌ ña̱ vikaꞌ ni̱a̱,
ndisu̱ Yahvé taxiꞌ ña̱ꞌaꞌ ñaꞌ xini tuní nda̱ꞌaꞌ te̱ yivi̱ꞌ ku̱ndu̱u̱ ñaꞌ siꞌi ra̱.
15 Kuiꞌe̱ suxanꞌ ndii,
sakusún xiꞌí a̱ ne̱ yivi̱ꞌ.
Ne̱ suxa̱nꞌ ndii,
ka̱ka̱ so̱ko va̱ ni̱a̱.
16 Yo̱o̱ ka̱ saxinú tu̱ꞌu̱n nde̱iꞌ ndii,
xitoꞌ ni̱a̱ nimá ni̱a̱,
ndisu̱ yo̱o̱ ka̱ saxiooꞌ a̱ ndii,
ndo̱ñuꞌuꞌ saka ni̱a̱.
17 Yo̱o̱ ka̱ tyindieeꞌ ne̱ ndaꞌvi kuuꞌ ndii,
nde̱e̱ naa mi̱iꞌ Yahvé tyindieeꞌ ni̱a̱,
te̱ mi̱iꞌ Yahvé ja̱a̱nꞌ na̱tyaꞌvi̱ ña̱ꞌaꞌ.
18 Ku̱tunꞌ ndo̱ꞌ siꞌe̱ ndo̱ꞌ ña̱ kuní ka̱ ku̱i̱xa̱ ni̱a̱,
sa̱kanꞌ te̱ kü̱ndu̱u̱ ndo̱ꞌ ne̱ ku̱miꞌ ku̱a̱tyi̱ xaꞌa̱ꞌ ni̱a̱ naaꞌ kuaꞌa̱n sa̱kanꞌ ku̱vi̱ ni̱a̱ xaꞌa̱ꞌ ña̱ ni̱a̱ꞌa ña̱ sa̱a̱ ni̱a̱.
19 Yo̱o̱ ka̱ yatyi̱ va̱ nasaáꞌ ndii,
tya̱ꞌvi̱ mi̱iꞌ ni̱a̱ xaꞌa̱ꞌ ña̱ ni̱a̱ꞌa ña̱ sa̱a̱ ni̱a̱,
te̱ naaꞌ na̱kaꞌa̱n yo̱o̱ ka̱ xaꞌa̱ꞌ ni̱a̱ ndii,
nanaꞌaꞌ te̱ sa̱a̱ ni̱ tu̱ku̱u̱ ni̱a̱ ña̱ ni̱a̱ꞌa ja̱a̱nꞌ,
te̱ kuni̱ a̱ na̱kaꞌa̱n tu̱ku̱u̱ ne̱ yivi̱ꞌ ja̱a̱nꞌ xaꞌa̱ꞌ ni̱a̱.
20 Ku̱ni̱ so̱ꞌo̱ u̱nꞌ sa̱kuuꞌ tu̱ꞌu̱n nde̱iꞌ ña̱ kaꞌán ne̱ yivi̱ꞌ xiinꞌ u̱nꞌ,
te̱ na̱ti̱i̱n tu̱ u̱nꞌ ña̱ kutunꞌ ni̱a̱ yoꞌó,
te̱ ku̱ndu̱u̱ u̱nꞌ te̱ xini tuní kii̱ꞌ xaa̱ u̱nꞌ ku̱ndu̱u̱ u̱nꞌ te̱ xi̱xa̱.
21 Ne̱ yivi̱ꞌ i̱i̱n yivi̱ꞌ ndii,
ku̱vi̱ tyi̱tuní ni̱a̱ xaꞌa̱ꞌ kuaꞌa̱ꞌ ña̱ sa̱a̱ ni̱a̱,
ndisu̱ ña̱ tyituní mi̱iꞌ Yahvé ku̱i̱ti̱ꞌ nduuꞌ ña̱ xinú ndi̱ꞌi̱.
22 Ña̱ ndiatuꞌ i̱ni̱ e̱ꞌ xaꞌa̱ꞌ i̱i̱n ne̱ yivi̱ꞌ ndii,
ña̱ vi̱ta nimá ni̱a̱ nduuꞌ a̱.
Te̱ va̱ꞌa̱ ka̱ yoo a̱ ña̱ ku̱ndu̱u̱ e̱ꞌ ne̱ ndaꞌvi kuuꞌ te̱ sa̱kanꞌ ña̱ ku̱ndu̱u̱ e̱ꞌ ne̱ xini xaꞌanꞌ.
23 Ña̱ yiꞌvi e̱ꞌ Yahvé ndii,
taxiꞌ a̱ na̱kaa̱ kivi̱ꞌ ñu̱u̱ e̱ꞌ,
te̱ xitoꞌ a̱ yooꞌ nuu̱ꞌ ndee ka̱ ña̱ kueinꞌ,
te̱ köo̱ꞌ a̱ ku̱ndo̱ꞌo̱ e̱ꞌ.
24 Ne̱ suxa̱nꞌ ndii,
kiꞌeꞌ ni̱a̱ koꞌo̱ꞌ miiꞌ naá ña̱ xaxi̱ꞌ,
ndisu̱ ni̱ nde̱e̱ kündieni ni̱a̱ ta̱a̱nꞌ ni̱a̱ ña̱ xaxi̱ꞌ ja̱a̱nꞌ yu̱ꞌuꞌ ni̱a̱ xaꞌa̱ꞌ a̱ ña̱ suxanꞌ xa̱va̱ꞌa̱ ni̱a̱.
25 Naaꞌ ku̱tunꞌ e̱ꞌ ne̱ xandiꞌiꞌ ndii,
ku̱ni̱ ne̱ na̱a̱ꞌ ku̱u̱ ña̱ ja̱a̱nꞌ,
te̱ sa̱a̱ ni̱a̱ ña̱ va̱ꞌa̱.
Te̱ naaꞌ ku̱tunꞌ e̱ꞌ ne̱ kuuꞌ kaxiꞌ ndii,
so̱ꞌo̱ ku̱u̱ xini tuní ka̱ ni̱a̱.
26 Yo̱o̱ ka̱ mi̱iꞌ kuuꞌ xiinꞌ yu̱vaꞌ ni̱a̱,
te̱ taxiꞌ ni̱a̱ si̱ꞌiꞌ ni̱a̱ vi̱ꞌe̱ ni̱a̱ ndii,
i̱i̱n ña̱ ka̱ꞌa̱n va̱ kaaꞌ nduuꞌ ña̱ ja̱a̱nꞌ,
te̱ su̱ꞌu̱n va̱ ña̱ xaaꞌ ne̱ yivi̱ꞌ ña̱ ja̱a̱nꞌ xiinꞌ yu̱vaꞌ siꞌiꞌ ni̱a̱.
27 Yu̱vaꞌ kuaꞌa i̱,
naaꞌ na̱ko̱o̱ u̱nꞌ ña̱ xini so̱ꞌo̱ u̱nꞌ tu̱ꞌu̱n nde̱iꞌ ndii,
ku̱u̱ xikaꞌ ndiꞌiꞌ u̱nꞌ nuu̱ꞌ tu̱ꞌu̱n nde̱iꞌ va̱ꞌa̱ ña̱ taxiꞌ ña̱ xini tuní.
28 Ne̱ ndieeꞌ yu̱ꞌuꞌ sikiꞌ ndii,
xandiꞌiꞌ ku̱i̱ti̱ꞌ ni̱a̱ xiinꞌ kuesí,
te̱ xaꞌnú ku̱a̱tyi̱,
te̱ ña̱ kaꞌán ni̱a̱ ndii,
mi̱iꞌ ndiꞌiꞌ ña̱ ni̱a̱ꞌa nduuꞌ a̱.
29 Ne̱ xandiꞌiꞌ ndii,
xa̱ yoo tu̱ꞌva̱ ndu̱ku̱ tunꞌ kutu̱nꞌ ni̱a̱,
te̱ xa̱ yoo tu̱ꞌva̱ tu̱ xata̱ꞌ ne̱ küuꞌ kaxiꞌ te̱ kutu̱nꞌ ni̱a̱.