18
Ne̱ xiꞌndi̱a̱ꞌ ndii,
xaꞌa̱ꞌ ña̱ kuní nuu̱ꞌ mi̱iꞌ ku̱i̱ti̱ꞌ ni̱a̱ ndiꞌni̱ ni̱a̱,
te̱ xikuitaꞌnú ni̱a̱ nuu̱ꞌ sa̱kuuꞌ ne̱ yivi̱ꞌ,
ne̱ taxiꞌ tu̱ꞌu̱n nde̱iꞌ va̱ꞌa̱.
2 Ne̱ küuꞌ kaxiꞌ ndii,
nde̱e̱ siee käꞌán nimá ne̱ ja̱a̱nꞌ sa̱kuaa̱n ni̱a̱ ña̱ xini tuní,
süu̱ꞌ ja̱a̱nꞌ ndii,
ña̱ kaꞌán mi̱iꞌ ku̱i̱ti̱ꞌ ni̱a̱ ndiaa yaꞌviꞌ nuu̱ꞌ ni̱a̱.
3 Yo̱o̱ ka̱ xaaꞌ ña̱ ni̱a̱ꞌa ndii,
nanaꞌaꞌ te̱ sa̱kaꞌanꞌ ña̱ꞌaꞌ ne̱ yivi̱ꞌ,
te̱ yo̱o̱ ka̱ kuuꞌ ñuñuꞌ ndii,
nanaꞌaꞌ te̱ kö̱to̱ kaꞌnuꞌ ka̱ ña̱ꞌaꞌ ne̱ yivi̱ꞌ.
4 Kuento xini tuní ña̱ ndatuꞌunꞌ ne̱ yivi̱ꞌ ndii,
nduuꞌ a̱ nde̱e̱ naa ti̱kui mi̱ni̱ kaꞌnuꞌ kunu va̱,
te̱ ña̱ xini tuní ndii,
kieeꞌ a̱ yu̱ꞌuꞌ ne̱ xini tuní nde̱e̱ naa ti̱kui i̱ti̱a̱ kii̱ꞌ nakaá raꞌ kuaꞌa̱n raꞌ.
5 Vä̱ꞌa̱ yoo a̱ ña̱ sandoó ndiká kuesí ne̱ ndisoꞌ ku̱a̱tyi̱,
te̱ sä̱a̱ ra̱ ña̱ nda̱ku xaꞌa̱ꞌ ne̱ xatyuunꞌ nda̱ku.
6 Kii̱ꞌ kaꞌán i̱i̱n ne̱ küuꞌ kaxiꞌ ndii,
sakuntaꞌanꞌ ni̱a̱ ne̱ yivi̱ꞌ,
te̱ xiinꞌ ña̱ kaꞌán ni̱a̱ ndukuꞌ ni̱a̱ ña̱ ku̱tunꞌ ña̱ꞌaꞌ ne̱ yivi̱ꞌ.
7 Xa̱ xiinꞌ ña̱ kaꞌán mi̱iꞌ ne̱ küuꞌ kaxiꞌ te̱ sanduxín xiinꞌ miiꞌ ni̱a̱,
te̱ xa̱ yu̱ꞌuꞌ miiꞌ ni̱a̱ xaaꞌ sa̱kanꞌ te̱ ku̱ndo̱ꞌo̱ xa̱va̱ꞌa̱ ni̱a̱.
8 Kuento ña̱ kaꞌán ne̱ vixi̱ ndii,
nduuꞌ a̱ nde̱e̱ naa nduu̱ꞌ vixi̱ ña̱ asi̱nꞌ va̱,
ndisu̱ koꞌniꞌ a̱ nde̱e̱ ma̱aꞌ ti̱xi̱n nimá ne̱ yivi̱ꞌ.
9 Ne̱ suxa̱nꞌ xiinꞌ ne̱ sanduxín ña̱ꞌa̱ ndii,
i̱i̱n ni̱ nda̱ꞌaꞌ xatyuunꞌ ni̱a̱ xaꞌa̱ꞌ a̱ ña̱ ni̱a̱ꞌa va̱ ni̱a̱.
10 Yahvé Ndiosí ndii,
nduuꞌ a̱ nde̱e̱ naa i̱i̱n vi̱ꞌe̱ sukun va̱,
te̱ nuu̱ꞌ ña̱ ja̱a̱nꞌ kuaꞌa̱n ne̱ xatyuunꞌ nda̱ku te̱ sakakú ña̱ꞌaꞌ a̱.
11 Ne̱ vika̱ꞌ xanini ndii,
ña̱ vikaꞌ ni̱a̱ nduuꞌ nde̱e̱ naa i̱i̱n vi̱ꞌe̱ sukun va̱ miiꞌ ku̱vi̱ kaku̱ ni̱a̱,
te̱ nduuꞌ a̱ nde̱e̱ naa nama̱ sukun va̱ xanini ni̱a̱.
12 Ne̱ yivi̱ꞌ i̱i̱n yivi̱ꞌ ndii,
xi̱ꞌna̱ ka̱ kuuꞌ ñuñuꞌ ni̱a̱,
ndi̱ꞌi̱ ja̱a̱nꞌ te̱ ku̱a̱xi̱ ña̱ ku̱u̱ ndaꞌvi xa̱tyiꞌ ni̱a̱,
te̱ xi̱ꞌna̱ ka̱ kuní a̱ ku̱ndu̱u̱ e̱ꞌ ne̱ ndaꞌvi kuuꞌ nimá te̱ sa̱kanꞌ vi̱ꞌ te̱ na̱ti̱i̱n e̱ꞌ ña̱ kiꞌinꞌ kaꞌnuꞌ.
13 Yo̱o̱ ka̱ nakuiinꞌ ña̱ kuní ka̱ ku̱ni̱ so̱ꞌo̱ ni̱a̱ ña̱ kaꞌa̱n ne̱ yivi̱ꞌ xiinꞌ ni̱a̱ ndii,
ne̱ küuꞌ kaxiꞌ nduuꞌ ni̱a̱,
te̱ ka̱ꞌa̱n va̱ tu̱ kaaꞌ ña̱ xaaꞌ ni̱a̱.
14 Ña̱ naá va̱ꞌa̱ nimá ne̱ yivi̱ꞌ te̱ ku̱vi̱ tyindieeꞌ ña̱ꞌaꞌ a̱ kii̱ꞌ kuni ku̱vi̱ ni̱a̱,
ndisu̱ naaꞌ ndiꞌni̱ nimá ni̱a̱ ndii,
köo̱ꞌ xa̱tyiꞌ ka̱ ña̱ ku̱vi̱ sa̱ndi̱e̱ni ña̱ꞌaꞌ nuu̱ꞌ kuiꞌe̱ ña̱ ndoꞌoꞌ ni̱a̱.
15 Ne̱ yivi̱ꞌ,
ne̱ ndityi ndii,
tyunxaꞌaꞌ va̱ ni̱a̱ ña̱ xini tuní ña̱ saniaꞌá ña̱ꞌaꞌ ne̱ yivi̱ꞌ,
te̱ xa̱ nuu̱ꞌ ña̱ xini tuní ku̱i̱ti̱ꞌ xini so̱ꞌo̱ ni̱a̱,
te̱ ku̱ndu̱u̱ ka̱ ni̱a̱ ne̱ xini tuní.
16 Xiinꞌ i̱i̱n tu̱mani̱ꞌ ku̱vi̱ kuꞌu̱n ko̱to̱ e̱ꞌ ne̱ yivi̱ꞌ,
te̱ xiinꞌ ña̱ ja̱a̱nꞌ tu̱ ku̱vi̱ na̱xaa̱ e̱ꞌ nde̱e̱ miiꞌ ndieeꞌ ne̱ kuuꞌ kaꞌnuꞌ.
17 Ne̱ yivi̱ꞌ,
ne̱ nakaꞌán xi̱ꞌna̱ xaꞌa̱ꞌ nuu̱ꞌ kuesí ndii,
nde̱e̱ naa ña̱ nda̱ku kaꞌán ni̱a̱ tuu e̱ꞌ kii̱ꞌ kuní ka̱ xaa̱ i̱nga̱ ne̱ xikaꞌ ku̱a̱tyi̱ xiinꞌ ni̱a̱,
ndisu̱ kii̱ꞌ xaa̱ ne̱ xikaꞌ ku̱a̱tyi̱ xiinꞌ ni̱a̱ ndii,
na̱tuvi̱ ndo̱o̱ sa̱kuuꞌ ña̱ ni̱ xa̱a̱ ni̱a̱.
18 Kii̱ꞌ yoo tu̱n kuiꞌe̱ te̱i̱n uvi̱ taꞌan ne̱ kaꞌnuꞌ ndii,
va̱ꞌa̱ ka̱ ka̱ti̱n ni̱a̱ te̱ ku̱ni̱ ni̱a̱ nde̱e̱ ña̱ kuní Ndiosí sa̱a̱ ni̱a̱ te̱ sa̱kuniani̱ ni̱a̱ tu̱n kuiꞌe̱ ja̱a̱nꞌ.
19 Tu̱ndoꞌo̱ꞌ ka̱ te̱ na̱koo̱ e̱ꞌ ña̱ mani̱ꞌ xiinꞌ i̱i̱n ña̱ni̱ taꞌanꞌ e̱ꞌ te̱ ni̱ xa̱a̱ e̱ꞌ i̱i̱n ña̱ vä̱ꞌa̱ xiinꞌ,
te̱ sa̱kanꞌ ña̱ sa̱nduva e̱ꞌ i̱i̱n nama̱ ña̱ ndasi i̱ꞌnu̱ i̱i̱n ñu̱u̱ kaꞌnuꞌ.
Tu̱n kuiꞌe̱ ña̱ ndoꞌoꞌ e̱ꞌ xiinꞌ ña̱ni̱ taꞌanꞌ e̱ꞌ ndii,
nduuꞌ a̱ nde̱e̱ naa vitu̱ꞌ tunꞌ ndasi kutu̱ꞌ yiꞌeꞌ vi̱ꞌe̱ i̱i̱n rey,
te̱ nataꞌviꞌ a̱ ne̱ yivi̱ꞌ.
20 Kuento ndityi ña̱ kaꞌán i̱ꞌi̱n ne̱ yivi̱ꞌ ndii,
nduuꞌ a̱ nde̱e̱ naa ña̱ xaxi̱ꞌ ña̱ asi̱nꞌ va̱ ña̱ sandaꞌni ña̱ꞌaꞌ,
te̱ xiinꞌ kuento ña̱ kieeꞌ yu̱ꞌuꞌ ni̱a̱ sa̱ndaꞌni ni̱a̱ nimá ni̱a̱.
21 Ña̱ kaꞌán e̱ꞌ ndii,
ku̱vi̱ ta̱xi̱ a̱ ko̱o̱ e̱ꞌ i̱i̱n yivi̱ꞌ uun ka̱ꞌni̱ꞌ ne̱ yivi̱ꞌ yooꞌ naaꞌ kö̱to̱ e̱ꞌ sa̱a̱ kaꞌa̱n e̱ꞌ.
Yo̱o̱ ka̱ xïtoꞌ sa̱a̱ kaꞌán ni̱a̱ ndii,
na̱ti̱i̱n ni̱a̱ ña̱ xataꞌa̱n na̱ti̱i̱n ni̱a̱ xaꞌa̱ꞌ ña̱ kaꞌán ni̱a̱.
22 Te̱ yivi̱ꞌ,
te̱ niꞌíꞌ ña̱ꞌaꞌ ñaꞌ ku̱ndu̱u̱ ñaꞌ siꞌi ra̱ ndii,
ña̱ va̱ꞌa̱ niꞌíꞌ ra̱,
te̱ xiinꞌ ña̱ ja̱a̱nꞌ natiinꞌ ra̱ ña̱ sañuꞌuꞌ ña̱ꞌaꞌ Yahvé.
23 Ne̱ ndaꞌvi kuuꞌ ndii,
kaꞌán ndaꞌvi ni̱a̱ ña̱ ku̱vi̱ta i̱ni̱ ne̱ yivi̱ꞌ xaꞌa̱ꞌ ni̱a̱,
ndisu̱ ne̱ vika̱ꞌ ndii,
nakuiinꞌ xa̱ꞌa̱ ku̱i̱ti̱ꞌ ni̱a̱ nuu̱ꞌ ne̱ ja̱a̱nꞌ.
24 Yoo sa̱va̱ ne̱ yivi̱ꞌ ndii,
va̱ꞌa̱ ndiakaꞌ taꞌanꞌ ni̱a̱ xiinꞌ i̱nga̱ ne̱ yivi̱ꞌ xituu e̱ꞌ,
ndisu̱ mi̱iꞌ kuuꞌ xiinꞌ taꞌanꞌ ni̱a̱,
sa̱kanꞌ ña̱ süu̱ꞌ ne̱ xatyuunꞌ nda̱ku nduuꞌ ni̱a̱.
Te̱ yoo tu̱ sa̱va̱ ne̱ va̱ꞌa̱ ndiakaꞌ taꞌanꞌ yaꞌa̱ ka̱ te̱ sa̱kanꞌ xiinꞌ taꞌanꞌ mi̱iꞌ xa̱tyiꞌ ni̱a̱.