17
Va̱ꞌa̱ ka̱ ku̱xi̱ e̱ꞌ tee̱ꞌ xita̱ꞌ i̱tyiꞌ,
ndisu̱ ku̱ndi̱e̱e̱ mani̱ꞌ e̱ꞌ,
te̱ sa̱kanꞌ ña̱ ku̱miꞌ e̱ꞌ kuaꞌa̱ꞌ va̱ ña̱ xaxi̱ꞌ,
ndisu̱ xa̱ nuu̱ꞌ ku̱ntaꞌanꞌ e̱ꞌ te̱ ku̱ndi̱e̱e̱ e̱ꞌ.
2 Ne̱ xikaꞌ nuuꞌ so̱ꞌo̱,
ne̱ xini tuní ndii,
ku̱ndu̱u̱ ni̱a̱ ne̱ ka̱ꞌndi̱a̱ tyuunꞌ nuu̱ꞌ tiaa̱ siꞌe̱ xto̱ꞌo̱ ni̱a̱ xaꞌa̱ꞌ a̱ ña̱ te̱ küuꞌ kaxiꞌ nduuꞌ tiaa̱ siꞌe̱ xto̱ꞌo̱ ni̱a̱ ja̱a̱nꞌ.
Te̱ ndoo̱ tu̱ tyaaꞌ ña̱ꞌa̱ xto̱ꞌo̱ ni̱a̱ ja̱a̱nꞌ nda̱ꞌaꞌ ni̱a̱ nde̱e̱ naa ndoo̱ a̱ nda̱ꞌaꞌ i̱nga̱ tiaa̱ siꞌe̱ xto̱ꞌo̱ ni̱a̱ ja̱a̱nꞌ.
3 Ka̱a̱ va̱ꞌa̱ oro xiinꞌ ka̱a̱ va̱ꞌa̱ plata ndii,
nuu̱ꞌ ñuꞌu̱ xaꞌmiꞌ ne̱ yivi̱ꞌ a̱ te̱ ku̱ni̱ ni̱a̱ naaꞌ ka̱a̱ va̱ꞌa̱ xna̱ꞌa̱ nduuꞌ a̱,
ndisu̱ Yahvé ndii,
nimá e̱ꞌ xitoꞌ a̱ ja̱a̱nꞌ naaꞌ ña̱ va̱ꞌa̱ nduuꞌ a̱.
4 Ne̱ xaaꞌ ña̱ ni̱a̱ꞌa ndii,
kaꞌán ndi̱e̱eꞌ va̱ nimá ni̱a̱ ku̱ni̱ so̱ꞌo̱ ni̱a̱ tu̱ꞌu̱n vixi̱,
te̱ ne̱ kaꞌán tu̱ꞌu̱n vixi̱ ndii,
tyuunꞌ xaꞌaꞌ va̱ ni̱a̱ ña̱ kaꞌán ne̱ xaaꞌ ña̱ ni̱a̱ꞌa.
5 Ne̱ xandiꞌiꞌ xiinꞌ ne̱ ndaꞌvi kuuꞌ ndii,
xiinꞌ Ndiosí,
ña̱ ni̱ xa̱ꞌa̱ ña̱ꞌaꞌ,
xandiꞌiꞌ ni̱a̱,
te̱ ne̱ va̱ꞌa̱ kuni kii̱ꞌ ndokueinꞌ ne̱ yivi̱ꞌ ja̱a̱nꞌ ndii,
ka̱ni̱ ña̱ꞌaꞌ Ndiosí.
6 Ne̱ xi̱xa̱ velo ndii,
si̱a̱niꞌ ni̱a̱ nduuꞌ ne̱ xaaꞌ sa̱kanꞌ te̱ va̱ꞌa̱ kuni ni̱a̱,
te̱ yu̱vaꞌ siꞌiꞌ ndii,
tiaa̱ siꞌe̱ ni̱a̱ nduuꞌ te̱ xaaꞌ sa̱kanꞌ te̱ kaꞌán va̱ꞌa̱ ne̱ yivi̱ꞌ xaꞌa̱ꞌ ni̱a̱.
7 Ña̱ ndatuꞌunꞌ va̱ꞌa̱ ne̱ yivi̱ꞌ ndii,
kü̱vi̱ xa̱tyiꞌ kaꞌa̱n i̱i̱n ne̱ küuꞌ kaxiꞌ ña̱ ja̱a̱nꞌ,
katyi̱ ka̱ vi̱ꞌ e̱ꞌ te̱ xaꞌndia tyuunꞌ ndii,
kü̱vi̱ xa̱tyiꞌ ka̱ kaꞌa̱n te̱ ja̱a̱nꞌ tu̱ꞌu̱n vixi̱.
8 Ne̱ yivi̱ꞌ,
ne̱ xtani̱ ki̱ꞌi̱n sikiꞌ xu̱ꞌunꞌ nda̱ꞌaꞌ ne̱ yivi̱ꞌ ndii,
nde̱e̱ naa yuu̱ꞌ nda̱tu̱nꞌ nduuꞌ a̱ nuu̱ꞌ ni̱a̱,
te̱ miiꞌ ka̱ kuaꞌa̱n ni̱a̱ ndii,
ketaꞌ va̱ꞌa̱ ni̱a̱ xiinꞌ ña̱ xaaꞌ ni̱a̱.
9 Yo̱o̱ ka̱ yoo kaꞌnuꞌ i̱ni̱ xaꞌa̱ꞌ ña̱ vä̱ꞌa̱ ña̱ ni̱ xa̱a̱ i̱i̱n ne̱ yivi̱ꞌ xiinꞌ ni̱a̱ ndii,
niaꞌá ni̱a̱ ne̱ ja̱a̱nꞌ ña̱ ndani̱ ña̱ꞌaꞌ ni̱a̱,
ndisu̱ yo̱o̱ ka̱ kiku̱ꞌ ña̱ ni̱a̱ꞌa ña̱ ni̱ xa̱a̱ ne̱ yivi̱ꞌ ja̱a̱nꞌ xiinꞌ ni̱a̱ ndii,
saxiooꞌ ndi̱ꞌi̱ ni̱a̱ ne̱ xiní taꞌanꞌ xiinꞌ ni̱a̱.
10 I̱i̱n ne̱ kuuꞌ kaxiꞌ ndii,
untaꞌ ku̱i̱ti̱ꞌ ko̱ndi̱a̱ yu̱ꞌuꞌ ña̱ꞌaꞌ ne̱ yivi̱ꞌ te̱ ka̱ndi̱xaꞌ ni̱a̱,
te̱ ne̱ küuꞌ kaxiꞌ ndii,
tee̱ꞌ ndee su̱ku̱ꞌ yo̱ꞌoꞌ ña̱ꞌaꞌ ne̱ yivi̱ꞌ siento i̱tyiꞌ ndii,
köo̱ꞌ kivi̱ꞌ ka̱ndi̱xaꞌ ka̱ mi̱iꞌ ne̱ ja̱a̱nꞌ.
11 Ne̱ xaaꞌ ña̱ ni̱a̱ꞌa ndii,
xakiꞌi̱ꞌ ña̱ꞌaꞌ a̱ te̱ sa̱a̱ ka̱ ni̱a̱ ña̱ ni̱a̱ꞌa,
ndisu̱ kii̱ꞌ na̱ti̱i̱n ña̱ꞌaꞌ te̱ yivi̱ꞌ,
te̱ kaꞌán nde̱iꞌ ndii,
ka̱xi̱ꞌ uꞌvi̱ xa̱va̱ꞌa̱ ni̱a̱ nda̱ꞌaꞌ te̱ ja̱a̱nꞌ.
12 Va̱ꞌa̱ ka̱ na̱taꞌanꞌ yooꞌ xiinꞌ i̱i̱n oso tiata̱nꞌ,
tiꞌ ni̱ xa̱kuiꞌnaꞌ te̱ yivi̱ꞌ oso kualiꞌ siꞌe̱,
te̱ sa̱kanꞌ ña̱ na̱taꞌanꞌ e̱ꞌ xiinꞌ ne̱ küuꞌ kaxiꞌ kii̱ꞌ xaaꞌ ni̱a̱ ña̱ ni̱a̱ꞌa.
13 Naaꞌ sa̱na̱ndiko e̱ꞌ ña̱ vä̱ꞌa̱ xaꞌa̱ꞌ ña̱ va̱ꞌa̱ ña̱ xaaꞌ ne̱ yivi̱ꞌ xiinꞌ e̱ꞌ ndii,
köo̱ꞌ kivi̱ꞌ kuꞌu̱n ndi̱ꞌi̱ ña̱ ni̱a̱ꞌa miiꞌ ndieeꞌ e̱ꞌ.
14 Yo̱o̱ ka̱ taxiꞌ xaꞌaꞌ xiinꞌ ñuꞌu̱ ndii,
nduuꞌ ni̱a̱ nde̱e̱ naa ne̱ nuniaꞌ yiꞌeꞌ su̱nkaꞌ te̱ ki̱e̱e̱ kuaꞌa̱ꞌ ti̱kui.
Sa̱kanꞌ na kuiiꞌ va̱ꞌa̱ ka̱ vi̱kuii̱n e̱ꞌ xiinꞌ ña̱ kuntaꞌanꞌ e̱ꞌ ña̱ kuní ka̱ ku̱u̱ kuaꞌa̱ꞌ tu̱nkuiꞌe̱.
15 Yoo uvi̱ taꞌan ña̱ ndasiꞌ Yahvé,
ña̱ sandoó ndiká i̱i̱n kuesí ne̱ yoo ku̱a̱tyi̱,
te̱ katunꞌ ra̱ ne̱ köo̱ꞌ ku̱a̱tyi̱.
16 Köo̱ꞌ nde̱e̱ i̱i̱n xaꞌa̱ꞌ ña̱ ka̱ꞌni̱ꞌ e̱ꞌ xu̱ꞌunꞌ te̱ sa̱kuaa̱n i̱i̱n ne̱ küuꞌ kaxiꞌ,
sa̱kanꞌ ña̱ nde̱e̱ siee käꞌán nimá ni̱a̱ sa̱kuaa̱n ni̱a̱.
17 I̱i̱n ne̱ xiní taꞌanꞌ xna̱ꞌa̱ xiinꞌ e̱ꞌ ndii,
köo̱ꞌ kivi̱ꞌ na̱ko̱o̱ i̱i̱n nda̱a̱ꞌ ni̱a̱ yooꞌ,
te̱ kii̱ꞌ yoo tu̱ndoꞌo̱ꞌ nuu̱ꞌ e̱ꞌ ndii,
tyindieeꞌ ni̱a̱ yooꞌ nde̱e̱ naa ña̱ni̱ mi̱iꞌ e̱ꞌ.
18 Ne̱ küuꞌ kaxiꞌ nduuꞌ ne̱ yivi̱ꞌ,
ne̱ tyikandia kuento ña̱ tya̱ꞌvi̱ ni̱a̱ xaꞌa̱ꞌ ña̱ ndisoꞌ ikaꞌ i̱nga̱ ne̱ yivi̱ꞌ,
uun ta̱xi̱ ni̱a̱ kuento ni̱a̱ ña̱ ku̱ndu̱u̱ ni̱a̱ ne̱ vi̱kuꞌu̱n tya̱ꞌvi̱ xaꞌa̱ꞌ ña̱ ndisoꞌ ikaꞌ ne̱ xiní taꞌanꞌ xiinꞌ ni̱a̱.
19 Yo̱o̱ ka̱ xtani̱ va̱ kuntaꞌanꞌ xiinꞌ ne̱ yivi̱ꞌ ndii,
xtani̱ ni̱a̱ sa̱a̱ ni̱a̱ ku̱a̱tyi̱,
te̱ yo̱o̱ ka̱ kaꞌán ñuñuꞌ xaꞌa̱ꞌ sa̱kuuꞌ ña̱ vikaꞌ ña̱ kumiꞌ ni̱a̱ ndii,
yatyi̱ va̱ ku̱u̱ ndaꞌvi ni̱a̱.
20 Nimá ne̱ xaaꞌ ña̱ ni̱a̱ꞌa ndii,
köo̱ꞌ kivi̱ꞌ ko̱o̱ mani̱ꞌ a̱ i̱i̱n yivi̱ꞌ,
te̱ ne̱ yivi̱ꞌ,
ne̱ xtani̱ va̱ kaꞌa̱n tu̱ꞌu̱n vixi̱ ndii,
koyo̱ ni̱a̱ nuu̱ꞌ ña̱ kueinꞌ.
21 Yu̱vaꞌ siꞌiꞌ i̱i̱n ne̱ küuꞌ kaxiꞌ ndii,
ndoꞌoꞌ va̱ ni̱a̱ xaaꞌ ni̱a̱,
te̱ köo̱ꞌ kivi̱ꞌ va̱ꞌa̱ kuni yu̱vaꞌ i̱i̱n ne̱ so̱ꞌo̱.
22 Kii̱ꞌ va̱ꞌa̱ kuni nimá e̱ꞌ ndii,
nduuꞌ a̱ nde̱e̱ naa tata̱nꞌ va̱ꞌa̱,
ndisu̱ kii̱ꞌ ndaꞌvi kuni nimá e̱ꞌ ndii,
sandiꞌiꞌ a̱ ña̱ ndi̱e̱e̱ꞌ e̱ꞌ.
23 Ne̱ xaaꞌ ña̱ ni̱a̱ꞌa ndii,
natiinꞌ si̱ꞌe ni̱a̱ xu̱ꞌunꞌ nda̱ꞌaꞌ ne̱ yivi̱ꞌ,
sa̱kanꞌ te̱ xätyuunꞌ nda̱ku ni̱a̱ xaꞌa̱ꞌ ña̱ ndoꞌoꞌ i̱nga̱ ne̱ yivi̱ꞌ.
24 Ne̱ kuuꞌ kaxiꞌ ndii,
tyunxaꞌaꞌ ni̱a̱ ña̱ xini tuní te̱ ku̱u̱ xini tuní ka̱ ni̱a̱,
ndisu̱ ne̱ küuꞌ kaxiꞌ ndii,
xikaꞌ sii̱ꞌ ku̱i̱ti̱ꞌ nimá ni̱a̱ miiꞌ ka̱ i̱i̱n yivi̱ꞌ.
25 Yu̱vaꞌ i̱i̱n ne̱ küuꞌ kaxiꞌ ndii,
sutyiꞌ va̱ i̱ni̱ ni̱a̱ xaꞌa̱ꞌ siꞌe̱ ni̱a̱ ja̱a̱nꞌ,
te̱ si̱ꞌiꞌ i̱i̱n ne̱ küuꞌ kaxiꞌ ndii,
ndoꞌoꞌ va̱ nimá aꞌ xaaꞌ ni̱a̱.
26 Vä̱ꞌa̱ yoo a̱ ña̱ kutu̱nꞌ i̱i̱n te̱ xatyuunꞌ nda̱ku,
ni̱ nde̱e̱ vä̱ꞌa̱ tu̱ yoo a̱ ña̱ sa̱tu̱xuꞌví e̱ꞌ te̱ kuuꞌ nu̱uꞌ xaꞌa̱ꞌ a̱ ña̱ xatyuunꞌ nda̱ku ra̱.
27 Ne̱ yivi̱ꞌ,
ne̱ xini tuní xna̱ꞌa̱ ndii,
xitoꞌ ku̱i̱ti̱ꞌ ne̱ ja̱a̱nꞌ ña̱ kaꞌán ni̱a̱,
te̱ ne̱ yivi̱ꞌ,
ne̱ kuuꞌ kaxiꞌ ndii,
nümi̱ꞌ te̱ nasaáꞌ ni̱a̱.
28 Nde̱e̱ ne̱ küuꞌ kaxiꞌ kaꞌán ne̱ yivi̱ꞌ ña̱ ne̱ xini tuní nduuꞌ ni̱a̱ naaꞌ yoo taxi̱nꞌ yu̱ꞌuꞌ ni̱a̱,
nde̱e̱ naa i̱i̱n ne̱ ndityi nduuꞌ ni̱a̱ naaꞌ käꞌán ni̱a̱ nde̱e̱ i̱i̱n ña̱ꞌa̱.