Yoꞌoꞌ kaꞌán a̱ xaꞌa̱ꞌ ña̱ tyituní ne̱ yivi̱ꞌ, te̱ Ndiosí nduuꞌ ña̱ kaꞌán naaꞌ xinu̱ a̱ uun xïnu̱ a̱
16
Ku̱vi̱ tyi̱tuní mi̱iꞌ e̱ꞌ ña̱ sa̱a̱ e̱ꞌ,
ndisu̱ Yahvé nduuꞌ ña̱ kaꞌán naaꞌ xinu̱ a̱.
2 Nuu̱ꞌ mi̱iꞌ ne̱ yivi̱ꞌ ndii,
ña̱ va̱ꞌa̱ nduuꞌ sa̱kuuꞌ ña̱ xaaꞌ ni̱a̱,
ndisu̱ Yahvé ndii,
xiní a̱ nde̱e̱ ña̱ xanini nimá ni̱a̱.
3 Yo̱o̱ ka̱ nduuꞌ ña̱ sa̱a̱ u̱nꞌ ndii,
xi̱ꞌna̱ ka̱ xiinꞌ Yahvé kaꞌa̱n u̱nꞌ xaꞌa̱ꞌ a̱,
te̱ ña̱ ja̱a̱nꞌ tyi̱ndi̱e̱eꞌ yoꞌó te̱ xinu̱ va̱ꞌa̱ ña̱ tyituní u̱nꞌ ja̱a̱nꞌ.
4 Sa̱kuuꞌ ña̱ꞌa̱ ña̱ ni̱ xa̱ꞌa̱ Yahvé ndii,
yoo i̱i̱n xaꞌa̱ꞌ na ni̱ xa̱ꞌa̱ ña̱ꞌaꞌ a̱,
nde̱e̱ te̱ xaaꞌ ña̱ ni̱a̱ꞌa ndii,
ni̱ xa̱ꞌa̱ ña̱ꞌaꞌ a̱ te̱ ko̱o̱ ra̱ tu̱ndoꞌo̱ꞌ kivi̱ꞌ soꞌo̱ꞌ ndiꞌiꞌ kii̱ꞌ ka̱tunꞌ ña̱ꞌaꞌ Ndiosí.
5 Yahvé ndii,
ndasiꞌ a̱ ña̱ xaaꞌ ne̱ ñuñuꞌ.
Ña̱ nda̱ku nduuꞌ a̱ ndii,
sa̱ndoꞌoꞌ ña̱ꞌaꞌ a̱.
6 Xaꞌa̱ꞌ a̱ ña̱ kuvita i̱ni̱ e̱ꞌ xaꞌa̱ꞌ ne̱ yivi̱ꞌ xiinꞌ xaꞌa̱ꞌ a̱ ña̱ ndani̱ ña̱ꞌaꞌ e̱ꞌ ndii,
yoo kaꞌnuꞌ i̱ni̱ e̱ꞌ xaꞌa̱ꞌ ku̱a̱tyi̱ ni̱a̱,
te̱ xaꞌa̱ꞌ a̱ ña̱ yiꞌvi e̱ꞌ Yahvé na xäaꞌ e̱ꞌ ña̱ ni̱a̱ꞌa.
7 Kii̱ꞌ xtani̱ Yahvé ña̱ xaaꞌ ne̱ yivi̱ꞌ ndii,
nde̱e̱ ne̱ ndasiꞌ taꞌanꞌ xiinꞌ ni̱a̱ nakoó ña̱ mani̱ꞌ xiinꞌ ni̱a̱ xa̱a̱ a̱.
8 Va̱ꞌa̱ ka̱ tee̱ꞌ siee ku̱i̱ti̱ꞌ ña̱ꞌa̱ ku̱miꞌ e̱ꞌ,
ndisu̱ sa̱tyuunꞌ nda̱ku e̱ꞌ,
te̱ sa̱kanꞌ ña̱ ku̱miꞌ e̱ꞌ kuaꞌa̱ꞌ ña̱ kuiꞌnaꞌ,
te̱ ku̱ndu̱u̱ e̱ꞌ ne̱ ni̱a̱ꞌa.
9 Ku̱vi̱ tyi̱tuní mi̱iꞌ e̱ꞌ ña̱ sa̱a̱ e̱ꞌ,
ndisu̱ Yahvé nduuꞌ ña̱ kaꞌa̱n tuní ndee ña̱ ku̱ndo̱ꞌo̱ e̱ꞌ.
10 Mi̱iꞌ Ndiosí sakaꞌán rey kii̱ꞌ sanaꞌmá ra̱ ne̱ yivi̱ꞌ,
sa̱kanꞌ na kuiiꞌ kuäsa̱ꞌ katunꞌ nianí ra̱ ne̱ yivi̱ꞌ kii̱ꞌ katunꞌ ña̱ꞌaꞌ ra̱.
11 Kuní Yahvé ña̱ kii̱ꞌ xataꞌ e̱ꞌ ña̱ꞌa̱ uun kii̱ꞌ tyuꞌunꞌ e̱ꞌ e̱ ndii,
va̱ꞌa̱ ka̱ ka̱ta̱ xinu̱ e̱ꞌ e̱,
te̱ tyu̱ꞌu̱n xinu̱ tu̱ e̱ꞌ e̱,
sa̱kanꞌ ña̱ sa̱kuuꞌ ña̱ tyuꞌunꞌ e̱ꞌ ña̱ꞌa̱ ja̱a̱nꞌ xiinꞌ ña̱ xataꞌ e̱ꞌ e̱ ndii,
ña̱ꞌa̱ mi̱iꞌ Yahvé nduuꞌ a̱.
12 I̱i̱n rey ndii,
ndasiꞌ ra̱ ne̱ xaaꞌ ña̱ ni̱a̱ꞌa,
sa̱kanꞌ ña̱ ña̱ xatyuunꞌ nda̱ku nduuꞌ ña̱ xaaꞌ sa̱kanꞌ te̱ va̱ꞌa̱ kuaꞌa̱n miiꞌ xaꞌndia tyuunꞌ ra̱ ja̱a̱nꞌ.
13 Sa̱kuuꞌ rey ndii,
va̱ꞌa̱ kuni ra̱ kii̱ꞌ kaꞌán ne̱ xini tuní,
ne̱ xatyuunꞌ nda̱ku xiinꞌ ra̱,
te̱ ndani̱ ra̱ ne̱ kaꞌán nda̱ku xiinꞌ ra̱.
14 Kii̱ꞌ xiꞌé va̱ rey ndii,
i̱yo̱ ka̱ꞌni̱ꞌ ra̱ ne̱ yivi̱ꞌ,
ndisu̱ ne̱ xini tuní ndii,
ku̱vi̱ sa̱nuuꞌ ne̱ ja̱a̱nꞌ ña̱ xiꞌé rey ja̱a̱nꞌ.
15 Kii̱ꞌ va̱ꞌa̱ kuni rey ndii,
kä̱ꞌni̱ꞌ ra̱ ne̱ yivi̱ꞌ,
te̱ ña̱ va̱ꞌa̱ ña̱ xaaꞌ ra̱ xaꞌa̱ꞌ ne̱ yivi̱ꞌ ndii,
nduuꞌ a̱ nde̱e̱ naa viko̱ꞌ ña̱ sakuunꞌ savi̱ꞌ ña̱ kuunꞌ i̱ꞌnu̱.
16 Ndiaa yaꞌviꞌ ka̱ a̱ ña̱ sa̱kuaa̱n e̱ꞌ ña̱ xini tuní te̱ sa̱kanꞌ ña̱ ku̱miꞌ e̱ꞌ kuaꞌa̱ꞌ oro,
te̱ ndiaa yaꞌviꞌ ka̱ tu̱ ña̱ ku̱ndu̱u̱ e̱ꞌ te̱ ndityi te̱ sa̱kanꞌ ña̱ ku̱miꞌ e̱ꞌ kuaꞌa̱ꞌ xu̱ꞌunꞌ yuu̱ꞌ plata.
17 Ne̱ yivi̱ꞌ,
ne̱ xatyuunꞌ nda̱ku ndii,
kuxiooꞌ ni̱a̱ nuu̱ꞌ ña̱ ni̱a̱ꞌa,
te̱ ne̱ xaaꞌ ña̱ ja̱a̱nꞌ ndii,
xitoꞌ xiinꞌ miiꞌ ni̱a̱ te̱ köo̱ꞌ ka̱ꞌni̱ꞌ ña̱ꞌaꞌ.
18 Ne̱ xatyié xiinꞌ miiꞌ ndii,
nä̱kaa̱ kuaꞌa̱ꞌ ni̱a̱ xiinꞌ ña̱ xaaꞌ ni̱a̱,
te̱ ne̱ kaniꞌiꞌ xiinꞌ miiꞌ ndii,
yatyi̱ va̱ ko̱o̱ tu̱ndoꞌo̱ꞌ nuu̱ꞌ kivi̱ꞌ ñu̱u̱ ni̱a̱.
19 Va̱ꞌa̱ ka̱ ku̱ndu̱u̱ e̱ꞌ ne̱ ndaꞌvi kuuꞌ nimá te̱i̱n ne̱ ndaꞌvi kuuꞌ
te̱ sa̱kanꞌ ña̱ na̱ta̱ꞌviꞌ e̱ꞌ ña̱ kuiꞌnaꞌ xiinꞌ ne̱ xatyieé xiinꞌ miiꞌ.
20 Yo̱o̱ ka̱ taxiꞌ so̱ꞌo̱ ña̱ ndiaa yu̱ꞌuꞌ ña̱ꞌaꞌ ne̱ yivi̱ꞌ ndii,
ki̱e̱e̱ va̱ꞌa̱ ni̱a̱,
te̱ ne̱ i̱ni̱ xini Yahvé ndii,
va̱ꞌa̱ va̱ kuni ni̱a̱.
21 Ne̱ kumiꞌ ña̱ xini tuní ndii,
kaꞌa̱n ne̱ yivi̱ꞌ ña̱ i̱i̱n ne̱ ndityi va̱ nduuꞌ ni̱a̱,
te̱ kii̱ꞌ tyu̱u̱n va̱ e̱ꞌ nda̱tuꞌunꞌ e̱ꞌ ndii,
yatyi̱ ka̱ kandixaꞌ ne̱ yivi̱ꞌ ña̱ kaꞌán e̱ꞌ.
22 Ne̱ kumiꞌ ña̱ xanini va̱ꞌa̱ ndii,
na̱kaa̱ kivi̱ꞌ ñu̱u̱ ni̱a̱,
te̱ nduuꞌ ni̱a̱ nde̱e̱ naa ti̱ko̱ꞌyoꞌ,
ndisu̱ tu̱ndoꞌo̱ꞌ ña̱ ndoꞌoꞌ ne̱ küuꞌ kaxiꞌ ndii,
xa̱ su̱vi̱ nduuꞌ ña̱ küuꞌ kaxiꞌ ni̱a̱ ja̱a̱nꞌ.
23 Nimá ne̱ xini tuní ndii,
mi̱iꞌ ndiꞌiꞌ kuento xini tuní kieeꞌ,
te̱ kuento ña̱ kaꞌán ni̱a̱ ndii,
yatyi̱ ka̱ kandixaꞌ ne̱ yivi̱ꞌ a̱.
24 Kuento vi̱ta ña̱ kaꞌán ne̱ yivi̱ꞌ ndii,
nduuꞌ a̱ nde̱e̱ naa ñuñu̱ꞌ,
te̱ nde̱e̱ naa xavixí a̱ nimá e̱ꞌ,
te̱ taxiꞌ a̱ ndi̱e̱e̱ꞌ i̱kiꞌ e̱ꞌ.
25 Yoo ne̱ yivi̱ꞌ,
ne̱ xanini ña̱ sa̱va̱ ña̱ xaaꞌ ni̱a̱ ndii,
ña̱ va̱ꞌa̱ nduuꞌ a̱,
ndisu̱ miiꞌ kuꞌu̱n ndi̱ꞌi̱ a̱ ndii,
ña̱ xiꞌí nduuꞌ a̱.
26 Sa̱kuuꞌ ne̱ xatyuunꞌ ndii,
xaꞌa̱ꞌ mi̱iꞌ ni̱a̱ xatyuunꞌ ni̱a̱,
sa̱kanꞌ ña̱ xaꞌa̱ꞌ a̱ ña̱ xiꞌí ni̱a̱ so̱ko̱ na kuiiꞌ ndi̱e̱eꞌ ka̱ xatyuunꞌ ni̱a̱.
27 Ne̱ xaaꞌ ña̱ ni̱a̱ꞌa ndii,
nde̱e̱ nandukuꞌ ka̱ ni̱a̱ ña̱ ni̱a̱ꞌa sa̱a̱ ni̱a̱,
te̱ sa̱kuuꞌ ña̱ kaꞌán ni̱a̱ ndii,
nduuꞌ a̱ nde̱e̱ naa ñuꞌu̱ ndatin.
28 Ne̱ yivi̱ꞌ,
ne̱ xaaꞌ ña̱ ni̱a̱ꞌa ndii,
sakuntaꞌanꞌ ni̱a̱ ne̱ yivi̱ꞌ,
te̱ ne̱ kaꞌán tu̱ꞌu̱n vixi̱ ndii,
nataꞌviꞌ ni̱a̱ ne̱ yivi̱ꞌ xiinꞌ ne̱ xiní taꞌanꞌ xiinꞌ ni̱a̱.
29 Ne̱ yivi̱ꞌ,
ne̱ ni̱a̱ꞌa ndii,
xakuitaꞌ ni̱a̱ ne̱ yivi̱ꞌ xiinꞌ ni̱a̱,
te̱ sakakaꞌ ña̱ꞌaꞌ ni̱a̱ i̱tyiꞌ ña̱ kuäsa̱ꞌ kuní.
30 Ne̱ yivi̱ꞌ,
ne̱ kuni sa̱a̱ ña̱ ni̱a̱ꞌa ndii,
ndasi ni̱a̱ i̱i̱n ndu̱tyiꞌ nuu̱ꞌ ni̱a̱,
te̱ xaxi̱ꞌiꞌ ni̱a̱ i̱i̱n taꞌviꞌ i̱i̱nꞌ yu̱ꞌuꞌ ni̱a̱,
te̱ xaaꞌ ni̱a̱ ña̱ ni̱a̱ꞌa ja̱a̱nꞌ.
31 I̱xiꞌ ya̱a̱ ña̱ yoo xíniꞌ ne̱ yivi̱ꞌ kii̱ꞌ xixaꞌ ni̱a̱ ndii,
nduuꞌ a̱ nde̱e̱ naa i̱i̱n corona ña̱ kiꞌinꞌ kaꞌnuꞌ ña̱ꞌaꞌ ne̱ yivi̱ꞌ,
ña̱ ni̱ ka̱nandoo ni̱a̱ xaꞌa̱ꞌ a̱ ña̱ ni̱ xika̱ nda̱ku ni̱a̱ i̱i̱n yivi̱ꞌ.
32 Va̱ꞌa̱ ka̱ ña̱ ku̱ndu̱u̱ e̱ꞌ ne̱ maso nimá te̱ sa̱kanꞌ ña̱ ku̱ndu̱u̱ e̱ꞌ ne̱ ndi̱e̱ni.
Te̱ va̱ꞌa̱ ka̱ tu̱ ku̱vi̱ vi̱ko̱ niꞌiꞌ xiinꞌ miiꞌ e̱ꞌ nuu̱ꞌ ña̱ i̱ni̱ e̱ꞌ te̱ sa̱kanꞌ ka̱nandoo e̱ꞌ ka̱niiꞌ i̱i̱n ñu̱u̱ kaꞌnuꞌ.
33 Ku̱vi̱ ka̱ti̱n ne̱ yivi̱ꞌ nuu̱ꞌ toto̱ ni̱a̱,
te̱ ku̱ni̱ ni̱a̱ ndee ña̱ sa̱a̱ ni̱a̱,
ndisu̱ mi̱iꞌ Yahvé nduuꞌ ña̱ kaꞌán tuní sa̱a̱ koyo̱ ña̱ kati̱n ne̱ yivi̱ꞌ ja̱a̱nꞌ.