15
Kii̱ꞌ nakuiinꞌ mani̱ꞌ ne̱ yivi̱ꞌ ña̱ kaꞌán e̱ꞌ xiinꞌ ni̱a̱ ndii,
sanuuꞌ ni̱a̱ ña̱ xiꞌé e̱ꞌ,
ndisu̱ naaꞌ nakuiinꞌ xiꞌé ni̱a̱ ña̱ kaꞌán e̱ꞌ xiinꞌ ni̱a̱ ndii,
so̱ꞌo̱ sanasaáꞌ ka̱ ni̱a̱ yooꞌ.
2 Ña̱ kaꞌán ne̱ xini tuní ndii,
mi̱iꞌ ndiꞌiꞌ ña̱ xini tuní nduuꞌ a̱,
ndisu̱ ña̱ kaꞌán ne̱ küuꞌ kaxiꞌ ndii,
mi̱iꞌ ndiꞌiꞌ ña̱ kuäsa̱ꞌ kuní nduuꞌ a̱.
3 Yahvé ndii,
xitoꞌ ndo̱so̱ꞌ a̱ ka̱niiꞌ i̱i̱n yivi̱ꞌ,
te̱ tyuunꞌ xaꞌaꞌ a̱ ña̱ xaaꞌ ne̱ yivi̱ꞌ,
ne̱ xaaꞌ ña̱ ni̱a̱ꞌa xiinꞌ ne̱ xaaꞌ ña̱ va̱ꞌa̱.
4 Kii̱ꞌ kaꞌán mani̱ꞌ e̱ꞌ xiinꞌ ne̱ yivi̱ꞌ ndii,
nduuꞌ a̱ nde̱e̱ naa i̱tunꞌ,
tunꞌ taxiꞌ kivi̱ꞌ ñu̱u̱ ni̱a̱,
ndisu̱ kii̱ꞌ xini xaꞌanꞌ e̱ꞌ ni̱a̱ ndii xiinꞌ ña̱ káꞌa̱n e̱ꞌ,
so̱ꞌo̱ satuxuꞌví ndi̱ꞌi̱ ka̱ e̱ꞌ nimá ni̱a̱.
5 Ne̱ küuꞌ kaxiꞌ ndii,
nätiinꞌ ni̱a̱ ña̱ kutunꞌ ña̱ꞌaꞌ yu̱vaꞌ siꞌiꞌ ni̱a̱,
ndisu̱ ne̱ natiinꞌ ña̱ kutunꞌ ña̱ꞌaꞌ yu̱vaꞌ siꞌiꞌ ni̱a̱ ndii,
niaꞌá ni̱a̱ ña̱ ne̱ xini tuní nduuꞌ ni̱a̱.
6 Vi̱ꞌe̱ ne̱ xatyuunꞌ nda̱ku ndii,
yooꞌ kuaꞌa̱ꞌ ña̱ vikaꞌ,
ndisu̱ ña̱ kanandoo ne̱ xaaꞌ ña̱ ni̱a̱ꞌa ndii,
tu̱ꞌu̱n kuiꞌe̱ ku̱i̱ti̱ꞌ skoꞌniꞌ ña̱ꞌaꞌ a̱.
7 Ne̱ xini tuní ndii,
xa̱ mi̱iꞌ ndiꞌiꞌ ña̱ xini tuní kaꞌán ni̱a̱,
ndisu̱ ne̱ küuꞌ kaxiꞌ ndii,
köo̱ꞌ xa̱tyiꞌ ña̱ kaaꞌ va̱ꞌa̱ ku̱a̱xi̱ nimá ne̱ ja̱a̱nꞌ,
te̱ kaꞌa̱n ni̱a̱ a̱ xiinꞌ ne̱ yivi̱ꞌ.
8 Yahvé ndii,
ndasiꞌ a̱ ña̱ nasoko̱ꞌ ne̱ xaaꞌ ña̱ ni̱a̱ꞌa nuu̱ꞌ a̱,
ndisu̱ va̱ꞌa̱ kuni a̱ natiinꞌ a̱ ña̱ kaꞌán ne̱ xatyuunꞌ nda̱ku.
9 Yahvé ndii,
ndasiꞌ a̱ sa̱kuuꞌ ña̱ xaaꞌ ne̱ xikaꞌ i̱tyiꞌ ni̱a̱ꞌa,
ndisu̱ ndani̱ a̱ ne̱ xatyuunꞌ nda̱ku.
10 Ne̱ nakooꞌ i̱tyiꞌ va̱ꞌa̱ te̱ xaaꞌ ni̱a̱ ña̱ ni̱a̱ꞌa ndii,
kuní a̱ kutu̱nꞌ ndi̱e̱eꞌ ni̱a̱ te̱ na̱ndi̱koꞌ ni̱a̱ nuu̱ꞌ i̱tyiꞌ va̱ꞌa̱,
ndisu̱ ne̱ xïinꞌ kutu̱nꞌ ndii,
ne̱ xa̱ yoo ku̱vi̱ nduuꞌ ni̱a̱.
11 Naaꞌ xiní Yahvé miiꞌ yoo ña̱ xiꞌí xiinꞌ miiꞌ yoo ñu̱u̱ ndi̱i ndii,
katyi̱ ka̱ vi̱ꞌ e̱ꞌ ña̱ xanini nimá ne̱ yivi̱ꞌ i̱i̱n yivi̱ꞌ ndii,
xiní a̱ sa̱kuuꞌ ña̱ ja̱a̱nꞌ.
12 Ne̱ xandiꞌiꞌ ndii,
xtäni̱ ne̱ ja̱a̱nꞌ kutu̱nꞌ ni̱a̱ xaꞌa̱ꞌ ña̱ ni̱a̱ꞌa ña̱ xaaꞌ ni̱a̱,
sa̱kanꞌ na kuiiꞌ kusiinꞌ ni̱a̱ nuu̱ꞌ ne̱ xini tuní.
13 I̱i̱n ne̱ yivi̱ꞌ,
kii̱ꞌ va̱ꞌa̱ kuni nimá ni̱a̱ ndii,
sii̱ꞌ kaaꞌ nuu̱ꞌ ni̱a̱,
ndisu̱ kii̱ꞌ väꞌa̱ kuni nimá ni̱a̱ ndii,
ndi̱i,
xitoꞌ ni̱a̱.
14 Ne̱ xtani̱ va̱ ku̱ni̱ ña̱ xini tuní ndii,
sakuaa̱n uꞌvi̱ va̱ ni̱a̱ a̱,
ndisu̱ ne̱ küuꞌ kaxiꞌ ndii,
xa̱ nuu̱ꞌ ña̱ kuäsa̱ꞌ kuní xtani̱ ni̱a̱ sa̱a̱ ni̱a̱.
15 Ne̱ yoo tu̱ndoꞌo̱ꞌ nuu̱ꞌ kivi̱ꞌ ñu̱u̱ ndii,
köo̱ꞌ nde̱e̱ i̱i̱n kivi̱ꞌ va̱ꞌa̱ kuni ne̱ ja̱a̱nꞌ,
ndisu̱ ne̱ va̱ꞌa̱ kuni ndii,
sa̱kuuꞌ kivi̱ꞌ va̱ꞌa̱ kuni nimá ne̱ ja̱a̱nꞌ nde̱e̱ naa vi̱koꞌ yoo sa̱a̱ kivi̱ꞌ nuu̱ꞌ ni̱a̱.
16 Va̱ꞌa̱ ka̱ ña̱ ku̱ndu̱u̱ e̱ꞌ ne̱ ndaꞌvi kuuꞌ,
te̱ yiꞌvi e̱ꞌ Yahvé,
te̱ sa̱kanꞌ ña̱ ku̱ndu̱u̱ e̱ꞌ ne̱ vika̱ꞌ,
te̱ yoo kuaꞌa̱ꞌ ña̱ sandiꞌni̱ nimá e̱ꞌ.
17 Tee̱ꞌ ndee yu̱va̱ ku̱i̱ti̱ꞌ ku̱xi̱ e̱ꞌ ndii,
köo̱ꞌ a̱ xaaꞌ a̱ naaꞌ ndani̱ taꞌanꞌ e̱ꞌ miiꞌ ndieeꞌ e̱ꞌ,
te̱ sa̱kanꞌ ña̱ ku̱xi̱ e̱ꞌ mi̱iꞌ ndiꞌiꞌ nde̱i̱ꞌ si̱ndiki̱ꞌ naaꞌ ndasiꞌ taꞌanꞌ e̱ꞌ miiꞌ ndieeꞌ e̱ꞌ.
18 Ne̱ yivi̱ꞌ,
ne̱ yatyi̱ va̱ nasaáꞌ ndii,
sakuntaꞌanꞌ ni̱a̱ ne̱ yivi̱ꞌ,
ndisu̱ ne̱ yivi̱ꞌ,
ne̱ na̱ꞌaꞌ te̱ nasaáꞌ ndii,
savikuiín ni̱a̱ ña̱ kuntaꞌanꞌ ne̱ yivi̱ꞌ ja̱a̱nꞌ.
19 Ne̱ suxa̱nꞌ ndii,
tu̱ndoꞌo̱ꞌ va̱ nuu̱ꞌ ni̱a̱ te̱ xikaꞌ ni̱a̱ i̱i̱n yivi̱ꞌ,
te̱ nduuꞌ a̱ nde̱e̱ naa i̱tyiꞌ miiꞌ yoo kuaꞌa̱ꞌ va̱ i̱ñu̱ꞌ,
ndisu̱ ne̱ xatyuunꞌ nda̱ku ndii,
kuäsa̱ꞌ xa̱tyiꞌ tu̱ndoꞌo̱ꞌ nuu̱ꞌ ne̱ ja̱a̱nꞌ te̱ xikaꞌ ni̱a̱ i̱i̱n yivi̱ꞌ,
te̱ nduuꞌ a̱ nde̱e̱ naa ya̱ꞌya̱ kaꞌnuꞌ miiꞌ xa̱ ni̱ nda̱sa̱va̱ꞌa̱ te̱ yivi̱ꞌ.
20 Va̱ꞌa̱ va̱ kuni i̱i̱n yu̱vaꞌ kii̱ꞌ te̱ xini tuní nduuꞌ tiaa̱ siꞌe̱ ra̱,
ndisu̱ kii̱ꞌ i̱i̱n te̱ küuꞌ kaxiꞌ nduuꞌ siꞌe̱ i̱i̱n ña̱ꞌaꞌ ndii,
ndasiꞌ ra̱ si̱ꞌiꞌ ra̱.
21 Ne̱ na̱a̱ꞌ kuuꞌ ndii,
va̱ꞌa̱ kuni ni̱a̱ xaaꞌ ni̱a̱ ña̱ ni̱a̱ꞌa,
ndisu̱ ne̱ xini tuní ndii,
kuaꞌa̱n naa kuaꞌa̱n ni̱a̱ nuu̱ꞌ i̱tyiꞌ va̱ꞌa̱.
22 Kii̱ꞌ köo̱ꞌ i̱i̱n ne̱ kaꞌa̱n tuní va̱ꞌa̱ nuu̱ꞌ e̱ꞌ ndii,
xïnu̱ ña̱ tyituní e̱ꞌ xaꞌa̱ꞌ,
ndisu̱ naaꞌ yoo kuaꞌa̱ꞌ ne̱ kaꞌa̱n tuní va̱ꞌa̱ nuu̱ꞌ e̱ꞌ ndii,
xinu̱ sa̱kuuꞌ a̱.
23 Va̱ꞌa̱ va̱ kuni i̱i̱n ne̱ yivi̱ꞌ kii̱ꞌ taxiꞌ ni̱a̱ i̱i̱n tu̱ꞌu̱n nde̱iꞌ va̱ꞌa̱ nuu̱ꞌ ne̱ yivi̱ꞌ.
Va̱ꞌa̱ ka̱ vi̱ꞌ kuni ni̱a̱ naaꞌ taxiꞌ ni̱a̱ tu̱ꞌu̱n nde̱iꞌ ja̱a̱nꞌ sa̱va̱ ni̱ kii̱ꞌ kuní a̱.
24 Ne̱ xini tuní ndii,
ndi̱viꞌ ndiatuꞌ i̱ni̱ ni̱a̱ kuꞌu̱n ni̱a̱ kii̱ꞌ ku̱vi̱ ni̱a̱,
te̱ kü̱naa̱ ni̱a̱ ti̱xi̱n yavi̱ ndi̱i̱ nde̱e̱ ndiꞌiꞌ ni̱ kivi̱ꞌ.
25 Yahvé ndii,
sanduxín xa̱tyiꞌ a̱ vi̱ꞌe̱ miiꞌ ndieeꞌ ne̱ ñuñuꞌ,
ndisu̱ xitoꞌ a̱ ña̱ꞌa̱ ña̱ kumiꞌ ña̱ꞌaꞌ kuaa̱nꞌ.
26 Yahvé ndii,
ndasiꞌ a̱ ña̱ tyituní ne̱ xaaꞌ ña̱ ni̱a̱ꞌa,
ndisu̱ va̱ꞌa̱ kuni a̱ xini a̱ ña̱ tyituní ne̱ xaaꞌ ña̱ va̱ꞌa̱.
27 Ne̱ yivi̱ꞌ,
ne̱ xtani̱ va̱ ki̱ꞌi̱n xu̱ꞌunꞌ nda̱ꞌaꞌ ne̱ yivi̱ꞌ xiinꞌ ña̱ xini xaꞌanꞌ ndii,
sanduxín ndi̱ꞌi̱ ni̱a̱ ne̱ ndieeꞌ vi̱ꞌe̱ ni̱a̱,
ndisu̱ ne̱ ndasiꞌ ña̱ sa̱a̱ ni̱a̱ ña̱ ja̱a̱nꞌ ndii,
na̱ꞌaꞌ ku̱ti̱a̱ku̱ ni̱a̱.
28 Ne̱ xatyuunꞌ nda̱ku ndii,
xanini va̱ꞌa̱ ni̱a̱ ña̱ kuní ka̱ kaꞌa̱n ni̱a̱ ndiaa ka̱ ña̱ꞌa̱,
ndisu̱ ne̱ xaaꞌ ña̱ ni̱a̱ꞌa ndii,
sa̱a̱ ka̱ iinꞌ yu̱ꞌuꞌ ni̱a̱,
te̱ kaꞌán ni̱a̱.
29 Yahvé ndii,
xikaꞌ yoo a̱ nuu̱ꞌ ne̱ xaaꞌ ña̱ ni̱a̱ꞌa,
ndisu̱ ne̱ xatyuunꞌ nda̱ku ndii,
xini so̱ꞌo̱ a̱ kii̱ꞌ kaꞌán ni̱a̱ xiinꞌ a̱.
30 Kii̱ꞌ sii̱ꞌ kuni ne̱ yivi̱ꞌ te̱ xtoꞌniꞌ ni̱a̱ nuu̱ꞌ e̱ꞌ ndii,
va̱ꞌa̱ kuni nimá e̱ꞌ xaaꞌ ni̱a̱,
te̱ kii̱ꞌ taxiꞌ ne̱ yivi̱ꞌ i̱i̱n tu̱ꞌu̱n va̱ꞌa̱ nuu̱ꞌ e̱ꞌ ndii,
natyinaá a̱ ña̱ ndi̱e̱e̱ꞌ e̱ꞌ.
31 Yo̱o̱ ka̱ xini so̱ꞌo̱ ña̱ ndiaa yu̱ꞌuꞌ va̱ꞌa̱ ña̱ꞌaꞌ ne̱ yivi̱ꞌ ndii,
na̱ndu̱u̱ ni̱a̱ ne̱ xini tuní nde̱e̱ naa ne̱ ndiaa yu̱ꞌuꞌ ña̱ꞌaꞌ ja̱a̱nꞌ.
32 Naaꞌ sa̱xi̱o̱o̱ yo̱o̱ ka̱ ña̱ ndiaa yu̱ꞌuꞌ va̱ꞌa̱ ña̱ꞌaꞌ ne̱ yivi̱ꞌ ndii,
ndäni̱ xiinꞌ miiꞌ ni̱a̱,
ndisu̱ naaꞌ tyu̱nxaꞌaꞌ ni̱a̱ ña̱ kaꞌán ne̱ ndiaa yu̱ꞌuꞌ ña̱ꞌaꞌ ja̱a̱nꞌ ndii,
na̱ndu̱u̱ ni̱a̱ ne̱ xini tuní yaꞌa̱.
33 Ña̱ yiꞌvi e̱ꞌ Yahvé nduuꞌ ña̱ saniaꞌá yooꞌ ku̱ndu̱u̱ e̱ꞌ ne̱ xini tuní,
te̱ ña̱ ndaꞌvi kuuꞌ nimá e̱ꞌ nduuꞌ ña̱ xaaꞌ sa̱kanꞌ te̱ kiꞌinꞌ kaꞌnuꞌ ne̱ yivi̱ꞌ yooꞌ.