14
Ña̱ꞌaꞌ,
ñaꞌ xini tuní ndii,
xitoꞌ va̱ꞌa̱ aꞌ ne̱ i̱i̱n kuuꞌ xiinꞌ aꞌ,
te̱ ndieeꞌ ti̱ꞌvi̱ ni̱a̱ xaaꞌ aꞌ,
ndisu̱ ña̱ꞌaꞌ,
ñaꞌ küuꞌ kaxiꞌ ndii,
xa̱ mi̱iꞌ aꞌ nduuꞌ aꞌ te̱ sanduxín aꞌ miiꞌ nduꞌu̱ꞌ aꞌ xiinꞌ ña̱ xaaꞌ aꞌ.
2 Ne̱ xikaꞌ i̱tyiꞌ va̱ꞌa̱ ndii,
yiꞌvi ni̱a̱ Yahvé,
ndisu̱ ne̱ xikaꞌ i̱tyiꞌ ni̱a̱ꞌa ndii,
ndasiꞌ ña̱ꞌaꞌ ni̱a̱.
3 Ne̱ küuꞌ kaxiꞌ ndii,
xa̱ nuu̱ꞌ kaꞌán ni̱nu̱ ni̱a̱,
te̱ ña̱ kaꞌán ni̱nu̱ ni̱a̱ ja̱a̱nꞌ nanduuꞌ nde̱e̱ naa ndu̱ku̱ tunꞌ xaá xata̱ꞌ ni̱a̱,
ndisu̱ tu̱ꞌu̱n kaaꞌ va̱ꞌa̱ ña̱ kaꞌán ne̱ xini tuní ndii,
tyindieeꞌ ña̱ꞌaꞌ a̱.
4 Naaꞌ köo̱ꞌ ki̱tiꞌ tiꞌ taꞌviꞌ ñu̱ꞌuꞌ kumiꞌ i̱i̱n te̱ yivi̱ꞌ ndii,
köo̱ꞌ xa̱tyiꞌ ña̱ saviꞌ ta̱xa̱ꞌa̱ ra̱ ti̱xi̱n yaka̱ ra̱,
ndisu̱ naa kumiꞌ ra̱ i̱i̱n tiꞌ taꞌviꞌ ñu̱ꞌuꞌ,
tiꞌ ndi̱e̱eꞌ va̱ ndii,
kuaꞌa̱ꞌ ña̱ saviꞌ na̱ka̱ya̱ ra̱.
5 Ne̱ ndieeꞌ yu̱ꞌuꞌ,
ne̱ xatyuunꞌ nda̱ku ndii,
xïni xaꞌanꞌ ni̱a̱,
ndisu̱ ne̱ ndieeꞌ yu̱ꞌuꞌ sikiꞌ ndii,
xa̱ mi̱iꞌ ndiꞌiꞌ tu̱ꞌu̱n vixi̱ ndieeꞌ yu̱ꞌuꞌ ni̱a̱.
6 Ne̱ xïtoꞌ kaꞌnuꞌ ndii,
köo̱ꞌ ña̱ xini tuní ndoó xíniꞌ ni̱a̱ tee̱ꞌ nde̱e̱ sakuaa̱n ni̱a̱ a̱,
ndisu̱ ne̱ ndityi ndii,
köo̱ꞌ ña̱ vixi vi̱ꞌ ña̱ xini tuní nuu̱ꞌ ne̱ ja̱a̱nꞌ.
7 Kï̱ꞌi̱n taꞌanꞌ u̱nꞌ xiinꞌ ne̱ küuꞌ kaxiꞌ,
sa̱kanꞌ ña̱ köo̱ꞌ nde̱e̱ i̱i̱n ña̱ xini tuní ku̱vi̱ sa̱niaꞌá ne̱ ja̱a̱nꞌ yoꞌó.
8 Ne̱ xini tuní ndii,
ña̱ xini tuní ni̱a̱ ja̱a̱nꞌ xaaꞌ sa̱kanꞌ te̱ xiní ni̱a̱ ndee ña̱ nduuꞌ ña̱ va̱ꞌa̱ sa̱a̱ ni̱a̱,
ndisu̱ ne̱ küuꞌ kaxiꞌ ndii,
xa̱ mi̱iꞌ ña̱ küuꞌ kaxiꞌ ña̱ xaaꞌ ni̱a̱ ja̱a̱nꞌ xini xaꞌanꞌ ña̱ꞌaꞌ.
9 Ne̱ küuꞌ kaxiꞌ ndii,
xïkán ne̱ ja̱a̱nꞌ ña̱ kaꞌnuꞌ i̱ni̱ nuu̱ꞌ ne̱ yivi̱ꞌ xaꞌa̱ꞌ ku̱a̱tyi̱ ña̱ xaaꞌ ni̱a̱,
süu̱ꞌ ja̱a̱nꞌ ndii,
xandiꞌiꞌ ku̱i̱ti̱ꞌ ni̱a̱,
ndisu̱ ne̱ xatyuunꞌ nda̱ku ndii,
va̱ꞌa̱ nimá ni̱a̱,
te̱ xikán ni̱a̱ ña̱ kaꞌnuꞌ i̱ni̱ nuu̱ꞌ ne̱ yivi̱ꞌ xaꞌa̱ꞌ ña̱ vä̱ꞌa̱ ña̱ xaaꞌ ni̱a̱ xiinꞌ ne̱ ja̱a̱nꞌ.
10 I̱ꞌi̱n ne̱ yivi̱ꞌ xiní yo̱o̱ nduuꞌ ña̱ sandoꞌoꞌ nimá mi̱iꞌ ni̱a̱,
te̱ nde̱e̱ i̱i̱n ne̱ tukuꞌ kü̱vi̱ tyi̱ꞌni̱ xiinꞌ miiꞌ xaꞌa̱ꞌ ña̱ va̱ꞌa̱ kuni nimá ni̱a̱.
11 Vi̱ꞌe̱ va̱ꞌa̱ miiꞌ ndieeꞌ ne̱ xaaꞌ ña̱ ni̱a̱ꞌa ndii,
nduxi̱n xa̱tyiꞌ a̱,
ndisu̱ vi̱ꞌe̱ ndaꞌvi miiꞌ ndieeꞌ ne̱ xatyuunꞌ nda̱ku ndii,
köo̱ꞌ kivi̱ꞌ nduxi̱n ña̱ ja̱a̱nꞌ.
12 Yoo sa̱va̱ ña̱ xaaꞌ ne̱ yivi̱ꞌ ña̱ tuu ni̱a̱ ndii,
ña̱ va̱ꞌa̱ nduuꞌ a̱,
ndisu̱ miiꞌ kuꞌu̱n ndi̱ꞌi̱ a̱ ndii,
ña̱ xiꞌí nduuꞌ a̱.
13 Nde̱e̱ ña̱ xakú xa̱va̱ꞌa̱ ne̱ yivi̱ꞌ ndii,
nde̱e̱ nimá ni̱a̱ uꞌvi̱ xaaꞌ a̱,
te̱ kii̱ꞌ ndiꞌiꞌ ña̱ va̱ꞌa̱ kuni ni̱a̱ ja̱a̱nꞌ te̱ xaꞌaꞌ ña̱ sutyiꞌ i̱ni̱ ni̱a̱.
14 Ne̱ küuꞌ kaxiꞌ xa̱tyiꞌ ndii,
nde̱e̱ mi̱iꞌ ni̱a̱ kündieni ka̱ nuu̱ꞌ ña̱ vä̱ꞌa̱ ña̱ xaaꞌ ni̱a̱,
ndisu̱ ne̱ yivi̱ꞌ,
ne̱ xaaꞌ ña̱ va̱ꞌa̱ ndii,
sa̱ñuꞌuꞌ ña̱ꞌaꞌ Ndiosí xaꞌa̱ꞌ ña̱ va̱ꞌa̱ ña̱ xaaꞌ ni̱a̱.
15 Ne̱ na̱a̱ꞌ kuuꞌ ndii,
kandixaꞌ ni̱a̱ sa̱kuuꞌ ña̱ kaꞌán ne̱ yivi̱ꞌ xiinꞌ ni̱a̱,
ndisu̱ ne̱ kuuꞌ kaxiꞌ ndii,
xitoꞌ xa̱va̱ꞌa̱ ne̱ ja̱a̱nꞌ miiꞌ xeꞌní ni̱a̱ kuaꞌa̱n ni̱a̱.
16 Ne̱ xini tuní ndii,
yiꞌvi ni̱a̱ sa̱a̱ ni̱a̱ ña̱ ni̱a̱ꞌa,
sa̱kanꞌ na kuxiooꞌ ni̱a̱ miiꞌ yoo a̱,
ndisu̱ ne̱ küuꞌ kaxiꞌ ndii,
ñuñuꞌ ni̱a̱,
te̱ nde̱e̱ i̱i̱n ña̱ꞌa̱ yïꞌvi ni̱a̱ sa̱a̱ ni̱a̱.
17 Ne̱ yivi̱ꞌ,
ne̱ kuiꞌe̱ va̱ ndii,
yatyi̱ va̱ xaaꞌ ni̱a̱ ña̱ ni̱a̱ꞌa,
te̱ ne̱ tyituní si̱ꞌe ña̱ ni̱a̱ꞌa ndii,
ndasiꞌ ña̱ꞌaꞌ ne̱ yivi̱ꞌ.
18 Ne̱ küuꞌ kaxiꞌ ndii,
ña̱ küuꞌ kaxiꞌ ja̱a̱nꞌ ndoo̱ nda̱ꞌaꞌ ni̱a̱,
ndisu̱ ne̱ kuuꞌ kaxiꞌ ndii,
so̱ꞌo̱ ku̱u̱ xini tuní ka̱ ni̱a̱.
19 Ne̱ xaaꞌ ña̱ ni̱a̱ꞌa ndii,
ku̱i̱ta̱ xitiꞌ ni̱a̱ nuu̱ꞌ ne̱ xaaꞌ ña̱ va̱ꞌa̱,
te̱ ne̱ ni̱a̱ꞌa ndii,
kaꞌa̱n ndaꞌvi ni̱a̱ nuu̱ꞌ ne̱ xatyuunꞌ nda̱ku ku̱i̱ta̱ ni̱a̱ yiꞌeꞌ ne̱ ja̱a̱nꞌ.
20 Ne̱ ndaꞌvi kuuꞌ ndii,
nde̱e̱ ne̱ xiní taꞌanꞌ xiinꞌ ni̱a̱ ndasiꞌ ña̱ꞌaꞌ,
ndisu̱ ne̱ vika̱ꞌ ndii,
yoo kuaꞌa̱ꞌ xa̱va̱ꞌa̱ ne̱ xiní taꞌanꞌ xiinꞌ ne̱ ja̱a̱nꞌ.
21 Yo̱o̱ ka̱ ndasiꞌ ne̱ yivi̱ꞌ xiinꞌ ni̱a̱ ndii,
ku̱a̱tyi̱ xaaꞌ ni̱a̱,
ndisu̱ ne̱ kuuꞌ ndaꞌvi i̱ni̱ xaꞌa̱ꞌ ne̱ ndaꞌvi kuuꞌ ndii,
va̱ꞌa̱ va̱ kuni ni̱a̱.
22 Ne̱ tyituní sa̱a̱ ña̱ ni̱a̱ꞌa ndii,
ndoñuꞌuꞌ ni̱a̱,
ndisu̱ ne̱ tyituní sa̱a̱ ña̱ va̱ꞌa̱ ndii,
na̱ti̱i̱n ni̱a̱ ña̱ kundani̱ ña̱ꞌaꞌ ne̱ yivi̱ꞌ xiinꞌ ña̱ ku̱u̱ ndaꞌvi i̱ni̱ ne̱ yivi̱ꞌ xaꞌa̱ꞌ ni̱a̱.
23 Ne̱ xatyuunꞌ va̱ ndii,
nakaya ni̱a̱ kuaꞌa̱ꞌ ña̱ꞌa̱,
ndisu̱ ne̱ xa̱ nuu̱ꞌ ndatuꞌunꞌ ku̱i̱ti̱ꞌ ndii,
so̱ꞌo̱ kuuꞌ ndaꞌvi ndi̱ꞌi̱ ni̱a̱.
24 Ña̱ vikaꞌ ne̱ xini tuní ndii,
nduuꞌ a̱ nde̱e̱ naa corona nduꞌu̱ꞌ xíniꞌ ni̱a̱,
ndisu̱ ne̱ küuꞌ kaxiꞌ ndii,
ña̱ küuꞌ kaxiꞌ ña̱ xaaꞌ ku̱i̱ti̱ꞌ ni̱a̱ nduuꞌ nde̱e̱ naa corona nduꞌu̱ꞌ xíniꞌ ni̱a̱.
25 Te̱ ndieeꞌ yu̱ꞌuꞌ,
te̱ kaꞌán nda̱ku ndii,
sakakú ra̱ ne̱ yivi̱ꞌ,
ndisu̱ te̱ ndieeꞌ yu̱ꞌuꞌ,
te̱ kaꞌán tu̱ꞌu̱n vixi̱ ndii,
xaꞌni̱ꞌ ndiꞌiꞌ ra̱ ne̱ yivi̱ꞌ.
26 Ne̱ yivi̱ꞌ,
ne̱ yiꞌvi Yahvé ndii,
xitoꞌ ña̱ꞌaꞌ a̱,
te̱ ña̱ ja̱a̱nꞌ tu̱ ku̱ndu̱u̱ ña̱ sa̱kakú siꞌe̱ ni̱a̱ nuu̱ꞌ tu̱ndoꞌo̱ꞌ.
27 Ña̱ yiꞌvi e̱ꞌ Yahvé nduuꞌ ña̱ taxiꞌ kivi̱ꞌ ñu̱u̱ e̱ꞌ,
te̱ sakakú tu̱ a̱ yooꞌ nuu̱ꞌ ña̱ kuni se̱kun ña̱ xiꞌí.
28 I̱i̱n rey,
te̱ xaꞌndia tyuunꞌ nuu̱ꞌ kuaꞌa̱ꞌ ne̱ yivi̱ꞌ ndii,
i̱i̱n ña̱ kiꞌinꞌ kaꞌnuꞌ tyie̱ va̱ nduuꞌ a̱,
ndisu̱ i̱i̱n te̱ xaꞌndia tyuunꞌ nuu̱ꞌ ndiaꞌviꞌ ku̱i̱ti̱ꞌ ne̱ yivi̱ꞌ ndii,
ña̱ xa̱ yoo nduxi̱n nduuꞌ miiꞌ xaꞌndia tyuunꞌ te̱ ja̱a̱nꞌ.
29 Ne̱ xini tuní xa̱va̱ꞌa̱ ndii,
näsaáꞌ ni̱a̱ꞌa̱ ne̱ ja̱a̱nꞌ,
ndisu̱ ne̱ yatyi̱ va̱ nasaáꞌ ndii,
süu̱ꞌ ne̱ kuuꞌ kaxiꞌ nduuꞌ ni̱a̱.
30 Ne̱ yivi̱ꞌ,
ne̱ yoo ña̱ mani̱ꞌ nimá ndii,
taxiꞌ a̱ yoo va̱ꞌa̱ ñu̱ꞌuꞌ ndeꞌi̱ ni̱a̱,
ndisu̱ ña̱ nda̱si̱ꞌ nuu̱ꞌ ne̱ yivi̱ꞌ ndii,
nduuꞌ a̱ nde̱e̱ naa kuiꞌe̱ xatu̱ ña̱ xaxi̱ꞌ i̱kiꞌ ni̱a̱.
31 Ne̱ yivi̱ꞌ,
ne̱ sandoꞌoꞌ ne̱ ndaꞌvi kuuꞌ ndii,
nuu̱ꞌ Ndiosí,
ña̱ ni̱ xa̱ꞌa̱ ña̱ꞌaꞌ,
nakuitá teiꞌ ni̱a̱,
ndisu̱ ne̱ kuuꞌ ndaꞌvi i̱ni̱ xaꞌa̱ꞌ ne̱ ndaꞌvi kuuꞌ ndii,
kiꞌinꞌ kaꞌnuꞌ ni̱a̱ Ndiosí.
32 Ne̱ xaaꞌ ña̱ ni̱a̱ꞌa ndii,
xa̱ mi̱iꞌ ña̱ ni̱a̱ꞌa ña̱ xaaꞌ ni̱a̱ ja̱a̱nꞌ ka̱ꞌni̱ꞌ ña̱ꞌaꞌ,
ndisu̱ ne̱ xatyuunꞌ nda̱ku ndii,
yoo miiꞌ ndiatuꞌ i̱ni̱ ne̱ ja̱a̱nꞌ na̱ndiee̱ꞌ ni̱a̱ kii̱ꞌ ku̱vi̱ ni̱a̱.
33 Ti̱xi̱n nimá ne̱ xanini va̱ꞌa̱ ndii,
yoo kuaꞌa̱ꞌ ña̱ xini tuní,
ndisu̱ ti̱xi̱n nimá ne̱ küuꞌ kaxiꞌ ndii,
köo̱ꞌ xa̱tyiꞌ ña̱ xini tuní yoo i̱kanꞌ.
34 Naaꞌ ndieeꞌ mi̱iꞌ ndiꞌiꞌ ne̱ xatyuunꞌ nda̱ku i̱i̱n ñu̱u̱ kaꞌnuꞌ ndii,
ña̱ ja̱a̱nꞌ nduuꞌ ña̱ kaniꞌiꞌ ñu̱u̱ ja̱a̱nꞌ,
ndisu̱ naaꞌ mi̱iꞌ ndiꞌiꞌ ne̱ xaaꞌ ku̱a̱tyi̱ ndieeꞌ ñu̱u̱ ja̱a̱nꞌ ndii,
sa̱kaꞌanꞌ ku̱i̱ti̱ꞌ ni̱a̱ sa̱kuuꞌ ne̱ ndieeꞌ ñu̱u̱ ja̱a̱nꞌ.
35 I̱i̱n ne̱ xikaꞌ nuuꞌ va̱ꞌa̱ xini tuní ndii,
ndani̱ ña̱ꞌaꞌ rey,
xto̱ꞌo̱ ni̱a̱,
ndisu̱ xiꞌé ra̱ xini ra̱ ne̱ xaaꞌ ña̱ sakaꞌanꞌ ña̱ꞌaꞌ nuu̱ꞌ ne̱ yivi̱ꞌ.