13
Kii̱ꞌ kutunꞌ i̱i̱n yu̱vaꞌ tiaa̱ siꞌe̱ ra̱ te̱ natiinꞌ va̱ꞌa̱ te̱ ja̱a̱nꞌ tu̱ꞌu̱n nde̱iꞌ ndii,
te̱ xini tuní nduuꞌ ra̱,
ndisu̱ naaꞌ i̱i̱n te̱ küuꞌ kaxiꞌ nduuꞌ siꞌe̱ ra̱ ja̱a̱nꞌ ndii,
nä̱ti̱i̱n ra̱ a̱ tee̱ꞌ ndee kutu̱nꞌ ra̱.
2 Ne̱ yivi̱ꞌ,
ne̱ kaꞌán ña̱ va̱ꞌa̱ ndii,
ña̱ va̱ꞌa̱ tu̱ na̱ti̱i̱n ni̱a̱ ku̱ti̱a̱ku̱ ni̱a̱,
ndisu̱ ne̱ sikiꞌ ndii,
xa̱ nuu̱ꞌ ña̱ ni̱a̱ꞌa kuni sa̱a̱ ni̱a̱.
3 Ne̱ yivi̱ꞌ,
ne̱ xitoꞌ ña̱ kaꞌán ni̱a̱ ndii,
na̱ꞌaꞌ ka̱ka̱ ni̱a̱ i̱i̱n yivi̱ꞌ,
ndisu̱ ne̱ xïinꞌ a̱ ko̱o̱ taxi̱nꞌ yu̱ꞌuꞌ ndii,
mi̱iꞌ ni̱a̱ sanduxín i̱tyiꞌ kuaꞌa̱n ni̱a̱.
4 Ne̱ suxa̱nꞌ ndii,
kuaꞌa̱ꞌ ña̱ꞌa̱ xikán nimá ni̱a̱ xaꞌa̱ꞌ,
ndisu̱ nde̱e̱ i̱i̱n a̱ köo̱ꞌ natiinꞌ ni̱a̱,
te̱ ndii ne̱ si̱ni sa̱tyuunꞌ ndii,
ku̱vikaꞌ ni̱a̱.
5 Ne̱ xatyuunꞌ nda̱ku ndii,
ndasiꞌ ni̱a̱ tu̱ꞌu̱n vixi̱,
ndisu̱ ne̱ xaaꞌ ña̱ ni̱a̱ꞌa ndii,
xa̱ nuu̱ꞌ ña̱ kaꞌanꞌ nuu̱ꞌ xiinꞌ ña̱ ndasiꞌ ne̱ yivi̱ꞌ xaaꞌ ni̱a̱.
6 Ne̱ yivi̱ꞌ,
ne̱ xatyuunꞌ nda̱ku ndii,
xitoꞌ ña̱ꞌaꞌ ña̱ xatyuunꞌ nda̱ku ni̱a̱ ja̱a̱nꞌ,
ndisu̱ ne̱ xaaꞌ ña̱ ni̱a̱ꞌa ndii,
xa̱ mi̱iꞌ ku̱a̱tyi̱ ña̱ xaaꞌ ni̱a̱ ja̱a̱nꞌ xaꞌni̱ꞌ ña̱ꞌaꞌ.
7 Yoo sa̱va̱ ne̱ ndaꞌvi kuuꞌ,
ne̱ kuuꞌ nde̱e̱ naa ne̱ vika̱ꞌ,
ndisu̱ köo̱ꞌ xa̱tyiꞌ ña̱ꞌa̱ ni̱a̱.
Te̱ yoo sa̱va̱ tu̱ku̱ ne̱ vika̱ꞌ,
ne̱ kuuꞌ nde̱e̱ naa ne̱ ndaꞌvi kuuꞌ,
ndisu̱ yoo kuaꞌa̱ꞌ ña̱ vikaꞌ ni̱a̱.
8 Ne̱ vika̱ꞌ ndii,
ku̱vi̱ tya̱ꞌvi̱ ni̱a̱ xaꞌa̱ꞌ kivi̱ꞌ ñu̱u̱ ni̱a̱ nda̱ꞌaꞌ te̱ kuni ka̱ꞌni̱ꞌ ña̱ꞌaꞌ te̱ kaku̱ ni̱a̱,
ndisu̱ ne̱ ndaꞌvi kuuꞌ ndii,
köo̱ꞌ nde̱e̱ i̱i̱n ña̱ ku̱vi̱ tya̱ꞌvi̱ ni̱a̱ xaꞌa̱ꞌ kivi̱ꞌ ñu̱u̱ ni̱a̱ nda̱ꞌaꞌ ne̱ kuni ka̱ꞌni̱ꞌ ña̱ꞌaꞌ.
9 Ne̱ xatyuunꞌ nda̱ku ndii,
nduuꞌ kivi̱ꞌ ñu̱u̱ ni̱a̱ nde̱e̱ naa ñuꞌu̱,
te̱ va̱ꞌa̱ kuni ni̱a̱ xikaꞌ ni̱a̱,
ndisu̱ kivi̱ꞌ ñu̱u̱ ne̱ xaaꞌ ña̱ ni̱a̱ꞌa ndii,
nduuꞌ a̱ nde̱e̱ naa ka̱a̱ tuún ña̱ xa̱ ni̱ ndaꞌva̱.
10 Ne̱ yivi̱ꞌ,
ne̱ ñuñuꞌ ndii,
tu̱nkuiꞌe̱ ku̱i̱ti̱ꞌ sakakuꞌ ni̱a̱,
ndisu̱ ne̱ xini so̱ꞌo̱ tu̱ꞌu̱n nde̱iꞌ ndii,
te̱ xini tuní nduuꞌ ni̱a̱.
11 Ña̱ vikaꞌ,
ña̱ nakaya kuiꞌnaꞌ ne̱ yivi̱ꞌ ndii,
yatyi̱ va̱ ndiꞌiꞌ a̱,
ndisu̱ ña̱ vikaꞌ ña̱ sandoꞌoꞌ xiinꞌ miiꞌ ne̱ yivi̱ꞌ te̱ kaya ni̱a̱ a̱ ndii,
so̱ꞌo̱ kuuꞌ kuaꞌa̱ꞌ ka̱ a̱ sa̱a̱ kivi̱ꞌ.
12 Kii̱ꞌ na̱ꞌaꞌ va̱ ndiatuꞌ i̱ni̱ ne̱ yivi̱ꞌ xaꞌa̱ꞌ ña̱ꞌa̱ ndii,
ndoꞌoꞌ nimá ni̱a̱,
ndisu̱ kii̱ꞌ niꞌíꞌ ni̱a̱ ña̱ kaꞌán nimá ni̱a̱ xaꞌa̱ꞌ ndii,
nduuꞌ a̱ nde̱e̱ naa i̱tunꞌ,
tunꞌ taxiꞌ kivi̱ꞌ ñu̱u̱.
13 Ne̱ yivi̱ꞌ,
ne̱ ndasiꞌ tu̱ꞌu̱n nde̱iꞌ ndii,
ku̱ndo̱ꞌo̱ mi̱iꞌ ni̱a̱ xaꞌa̱ꞌ ña̱ ja̱a̱nꞌ,
ndisu̱ ne̱ yivi̱ꞌ,
ne̱ taxiꞌ so̱ꞌo̱ tu̱ꞌu̱n nde̱iꞌ ndii,
ki̱e̱e̱ va̱ꞌa̱ ni̱a̱.
14 Tu̱ꞌu̱n nde̱iꞌ ña̱ kaꞌán ne̱ xini tuní ndii,
nduuꞌ a̱ nde̱e̱ naa ti̱ko̱ꞌyoꞌ miiꞌ kieeꞌ kivi̱ꞌ ñu̱u̱,
te̱ ne̱ natiinꞌ tu̱ꞌu̱n nde̱iꞌ ja̱a̱nꞌ ndii,
sakakú xiinꞌ miiꞌ ni̱a̱ nuu̱ꞌ ña̱ xikuꞌún ne̱ yivi̱ꞌ,
te̱ xiꞌí ni̱a̱.
15 Ne̱ yivi̱ꞌ,
ne̱ kuuꞌ kaxiꞌ ndii,
kaꞌán va̱ꞌa̱ ne̱ yivi̱ꞌ xaꞌa̱ꞌ ni̱a̱,
ndisu̱ ne̱ sikiꞌ ndii,
kuaꞌa̱n nda̱ku mi̱iꞌ ni̱a̱ miiꞌ ndo̱ñuꞌuꞌ ni̱a̱.
16 Ne̱ yivi̱ꞌ,
ne̱ xini tuní ndii,
nakanini ni̱a̱ ña̱ kuní ka̱ sa̱a̱ ni̱a̱ ndee ka̱ nuu̱ꞌ ña̱ꞌa̱,
ndisu̱ ne̱ küuꞌ kaxiꞌ ndii,
nde̱e̱ kaꞌán ñuñuꞌ vi̱ꞌ ni̱a̱ xaꞌa̱ꞌ ña̱ küuꞌ kaxiꞌ ña̱ xaaꞌ ni̱a̱.
17 Ne̱ yivi̱ꞌ,
ne̱ kuaꞌa̱n xiinꞌ kuento ne̱ küuꞌ kaxiꞌ ndii,
tu̱n kuiꞌe̱ ku̱i̱ti̱ꞌ sakakuꞌ ni̱a̱ nuu̱ꞌ e̱ꞌ,
ndisu̱ ne̱ kuaꞌa̱n xiinꞌ kuento ne̱ kuuꞌ kaxiꞌ ndii,
kuniani̱ tu̱n kuiꞌe̱ xaaꞌ ni̱a̱ nuu̱ꞌ e̱ꞌ.
18 Ne̱ yivi̱ꞌ,
ne̱ küni na̱ti̱i̱n tu̱ꞌu̱n nde̱iꞌ ndii,
ku̱u̱ ndaꞌvi ni̱a̱,
te̱ köo̱ꞌ ki̱ꞌi̱n kaꞌnuꞌ tu̱ ña̱ꞌaꞌ,
ndisu̱ ne̱ yivi̱ꞌ,
ne̱ natiinꞌ ña̱ kaniꞌ kuento ña̱ꞌaꞌ ne̱ yivi̱ꞌ ndii,
ki̱ꞌi̱n kaꞌnuꞌ va̱ ña̱ꞌaꞌ ne̱ yivi̱ꞌ.
19 Va̱ꞌa̱ kuni ne̱ yivi̱ꞌ kii̱ꞌ xinú ña̱ kaꞌán nimá ni̱a̱ xaꞌa̱ꞌ,
ndisu̱ ne̱ küuꞌ kaxiꞌ ndii,
küni na̱ko̱o̱ ni̱a̱ ña̱ ni̱a̱ꞌa ña̱ xaaꞌ ni̱a̱.
20 Yo̱o̱ ka̱ nitaꞌanꞌ kutu̱ꞌ xiinꞌ ne̱ xini tuní ndii,
na̱ndu̱u̱ ni̱a̱ ne̱ xini tuní,
ndisu̱ yo̱o̱ ka̱ nitaꞌanꞌ kutu̱ꞌ xiinꞌ ne̱ küuꞌ kaxiꞌ ndii,
sati̱viꞌ ndi̱ꞌi̱ ña̱ꞌaꞌ ni̱a̱.
21 Ne̱ xaaꞌ ku̱a̱tyi̱ ndii,
yoo va̱ tu̱nkuiꞌe̱ nuu̱ꞌ kivi̱ꞌ ñu̱u̱ ni̱a̱,
ndisu̱ ne̱ xatyuunꞌ nda̱ku ndii,
kuaꞌa̱ꞌ va̱ ña̱ va̱ꞌa̱ niꞌi̱ꞌ ni̱a̱.
22 Ne̱ yivi̱ꞌ va̱ꞌa̱,
kii̱ꞌ xiꞌí ni̱a̱ ndii,
nakooꞌ tu̱ ni̱a̱ ña̱ vikaꞌ ni̱a̱ nda̱ꞌaꞌ si̱a̱niꞌ ni̱a̱,
ndisu̱ ña̱ vikaꞌ ne̱ xaaꞌ ku̱a̱tyi̱ ndii,
nda̱ꞌaꞌ ne̱ xatyuunꞌ nda̱ku ndoo̱ sa̱kuuꞌ a̱.
23 Nuu̱ꞌ ñu̱ꞌuꞌ miiꞌ xatyuunꞌ ne̱ ndaꞌvi kuuꞌ ndii,
yoo kuaꞌa̱ꞌ ña̱ xaxi̱ꞌ,
ndisu̱ kuaꞌa̱ꞌ va̱ a̱ ndoñuꞌuꞌ saka xaꞌa̱ꞌ a̱ ña̱ xätyuunꞌ nda̱ku ne̱ yivi̱ꞌ xiinꞌ a̱.
24 Yo̱o̱ ka̱ kütunꞌ siꞌe̱ ni̱a̱ kii̱ꞌ xaso̱ꞌo̱ ni̱a̱ ndii,
kuäsa̱ꞌ ndani̱ ña̱ꞌaꞌ ni̱a̱,
ndisu̱ ne̱ ndani̱ xna̱ꞌa̱ siꞌe̱ ni̱a̱ ndii,
nde̱e̱ kii̱ꞌ kualiꞌ ne̱ ja̱a̱nꞌ te̱ xaꞌaꞌ ni̱a̱ kutunꞌ ña̱ꞌaꞌ ni̱a̱ kii̱ꞌ xaso̱ꞌo̱ ni̱a̱.
25 Ne̱ xatyuunꞌ nda̱ku ndii,
xixiꞌ ni̱a̱ nde̱e̱ ndaꞌni ni̱a̱,
ndisu̱ ne̱ xaaꞌ ña̱ ni̱a̱ꞌa ndii,
köo̱ꞌ kivi̱ꞌ xixiꞌ ndaꞌni ne̱ ja̱a̱nꞌ.