12
Ne̱ xtani̱ ña̱ kani kuento ña̱ꞌaꞌ ne̱ yivi̱ꞌ ndii,
xtani̱ tu̱ ni̱a̱ ña̱ xini tuní,
ndisu̱ ne̱ ndasiꞌ ña̱ kani kuento ña̱ꞌaꞌ ne̱ yivi̱ꞌ ndii,
ne̱ küuꞌ kaxiꞌ nduuꞌ ni̱a̱.
2 Ne̱ yivi̱ꞌ va̱ꞌa̱ ndii,
sañuꞌuꞌ ña̱ꞌaꞌ Yahvé,
ndisu̱ ne̱ yivi̱ꞌ,
ne̱ xaaꞌ ña̱ ni̱a̱ꞌa ndii,
ka̱tunꞌ ña̱ꞌaꞌ a̱.
3 Nde̱e̱ i̱i̱n ne̱ xaaꞌ ña̱ ni̱a̱ꞌa ndii,
köo̱ꞌ kivi̱ꞌ ka̱ka̱ va̱ꞌa̱ ni̱a̱ i̱i̱n yivi̱ꞌ,
ndisu̱ ne̱ xatyuunꞌ nda̱ku ndii,
ka̱ka̱ va̱ꞌa̱ ne̱ ja̱a̱nꞌ i̱i̱n yivi̱ꞌ,
te̱ na̱kaa̱ kuaꞌa̱ꞌ ne̱ si̱a̱niꞌ xikaꞌ ni̱a̱.
4 Ña̱ꞌaꞌ,
ñaꞌ va̱ꞌa̱ nimá ndii,
nduuꞌ aꞌ nde̱e̱ naa corona nda̱tu̱nꞌ tunꞌ nduꞌu̱ꞌ xíniꞌ i̱i̱ꞌ aꞌ,
ndisu̱ ña̱ꞌaꞌ,
ña̱ ni̱a̱ꞌa ndii,
nduuꞌ aꞌ nde̱e̱ naa ndi̱kindiꞌ,
tiꞌ xaxi̱ꞌ i̱kiꞌ i̱i̱ꞌ aꞌ.
5 Ña̱ tyituní ne̱ xatyuunꞌ nda̱ku ndii,
ña̱ nda̱ku nduuꞌ a̱,
ndisu̱ nde̱iꞌ ña̱ kaꞌán ne̱ xaaꞌ ña̱ ni̱a̱ꞌa ndii,
ña̱ xini xaꞌanꞌ nduuꞌ a̱.
6 Sa̱kuuꞌ ña̱ kaꞌán ne̱ xaaꞌ ña̱ ni̱a̱ꞌa ndii,
nduuꞌ a̱ nde̱e̱ naa te̱ yivi̱ꞌ,
te̱ ndieeꞌ si̱ꞌe i̱tyiꞌ ndiatuꞌ ra̱ te̱ ka̱ꞌni̱ꞌ ra̱ i̱i̱n te̱ yivi̱ꞌ,
ndisu̱ ña̱ kaꞌán ne̱ xatyuunꞌ nda̱ku ndii,
sa̱kakú ña̱ꞌaꞌ a̱ nuu̱ꞌ ña̱ ni̱a̱ꞌa.
7 Kii̱ꞌ xiꞌí ne̱ xaaꞌ ña̱ ni̱a̱ꞌa ndii,
köo̱ꞌ nakaꞌanꞌ xa̱tyiꞌ ka̱ xaꞌa̱ꞌ ni̱a̱,
ndisu̱ vi̱ꞌe̱ ne̱ xatyuunꞌ nda̱ku ndii,
köo̱ꞌ kivi̱ꞌ nduxi̱n a̱.
8 Te̱ yivi̱ꞌ,
te̱ xini tuní ndii,
kiꞌinꞌ kaꞌnuꞌ ña̱ꞌaꞌ ne̱ yivi̱ꞌ xaꞌa̱ꞌ a̱ ña̱ xini tuní va̱ ra̱,
ndisu̱ te̱ na̱a̱ꞌ kuuꞌ ndii,
ku̱nda̱siꞌ ndiꞌiꞌ ña̱ꞌaꞌ ni̱a̱.
9 Va̱ꞌa̱ ka̱ kuaꞌa̱n ne̱ ndaꞌvi kuuꞌ,
te̱ nde̱e̱ ne̱ xikaꞌ nu̱u̱ so̱ꞌo̱ nuu̱ꞌ ni̱a̱ yoo,
te̱ sa̱kanꞌ ne̱ kaꞌán ñuñuꞌ,
te̱ köo̱ꞌ nde̱e̱ ña̱ ka̱xi̱ꞌ ni̱a̱ miiꞌ ndieeꞌ ni̱a̱.
10 Ne̱ xatyuunꞌ nda̱ku ndii,
nde̱e̱ ki̱tiꞌ sa̱na̱ ni̱a̱ xitoꞌ ni̱a̱,
ndisu̱ ne̱ xaaꞌ ña̱ ni̱a̱ꞌa ndii,
kuäsa̱ꞌ xa̱tyiꞌ ndani̱ ne̱ ja̱a̱nꞌ nde̱e̱ i̱i̱n ña̱ꞌa̱.
11 Ne̱ xatyuunꞌ uꞌvi̱ va̱ ndii,
yoo kuaꞌa̱ꞌ ña̱ xaxi̱ꞌ ni̱a̱,
ndisu̱ ne̱ ndikún xata̱ꞌ ne̱ xikaꞌ sii̱ꞌ ndii,
ne̱ köo̱ꞌ ña̱ xanini nduuꞌ ni̱a̱.
12 I̱ꞌi̱n ne̱ kuiꞌna̱ꞌ ndii,
kaꞌán va̱ nimá ni̱a̱ xaꞌa̱ꞌ ña̱ xakuiꞌnaꞌ i̱nga̱ ne̱ kuiꞌna̱ꞌ xiinꞌ ni̱a̱,
ndisu̱ ne̱ xatyuunꞌ nda̱ku ndii,
xatyuunꞌ xiinꞌ nda̱ꞌaꞌ ne̱ ja̱a̱nꞌ,
te̱ yoo ña̱ xaxi̱ꞌ ni̱a̱.
13 Ne̱ xaaꞌ ña̱ ni̱a̱ꞌa ndii,
xa̱ xiinꞌ kuento ña̱ kaꞌán mi̱iꞌ ni̱a̱ te̱ namaꞌ ni̱a̱ nuu̱ꞌ ku̱a̱tyi̱,
ndisu̱ ne̱ xatyuunꞌ nda̱ku ndii,
ketaꞌ va̱ꞌa̱ ni̱a̱ nuu̱ꞌ ndee ka̱ tu̱ndoꞌo̱ꞌ ña̱ yoo nuu̱ꞌ ni̱a̱.
14 I̱ꞌi̱n ne̱ yivi̱ꞌ na̱tyaꞌvi̱ xaꞌa̱ꞌ i̱ꞌi̱n kuento ña̱ kaꞌán ni̱a̱,
te̱ natyaꞌvi̱ mi̱iꞌ tu̱ sa̱kuuꞌ ne̱ yivi̱ꞌ xaꞌa̱ꞌ ña̱ xaaꞌ ni̱a̱.
15 Ne̱ küuꞌ kaxiꞌ xanini mi̱iꞌ ndii,
i̱tyiꞌ nda̱ku xikaꞌ ni̱a̱,
ndisu̱ ne̱ xini tuní ndii,
taxiꞌ so̱ꞌo̱ ni̱a̱ tu̱ꞌu̱n nde̱iꞌ ña̱ kaꞌán ne̱ yivi̱ꞌ xiinꞌ ni̱a̱.
16 Ne̱ küuꞌ kaxiꞌ ndii,
yatyi̱ va̱ nasaáꞌ ni̱a̱ kii̱ꞌ kaꞌán ki̱ni̱ ne̱ yivi̱ꞌ xiinꞌ ni̱a̱,
ndisu̱ ne̱ kuuꞌ kaxiꞌ ndii,
yoo kaꞌnuꞌ i̱ni̱ ni̱a̱ xaꞌa̱ꞌ ña̱ kaꞌán ki̱ni̱ ne̱ yivi̱ꞌ xiinꞌ ni̱a̱.
17 Ne̱ ndieeꞌ yu̱ꞌuꞌ,
ne̱ xatyuunꞌ nda̱ku ndii,
ña̱ ndi̱xa̱ kaꞌán ni̱a̱,
ndisu̱ ne̱ ndieeꞌ yu̱ꞌuꞌ,
ne̱ sikiꞌ ndii,
mi̱iꞌ ndiꞌiꞌ tu̱ꞌu̱n vixi̱ kaꞌán ni̱a̱.
18 Ne̱ xïtoꞌ sa̱a̱ kaꞌán ni̱a̱ ndii,
satuxuꞌví ni̱a̱ ne̱ yivi̱ꞌ,
ne̱ xini so̱ꞌo̱ ña̱ kaꞌán ni̱a̱,
nde̱e̱ naa xaꞌndia i̱i̱n ityi̱ xíinꞌ va̱,
ndisu̱ yaa̱ꞌ ne̱ xini tuní ndii,
nduuꞌ a̱ nde̱e̱ naa tata̱nꞌ ña̱ sandaꞌa.
19 Ña̱ nda̱ku ña̱ kaꞌán ne̱ yivi̱ꞌ ndii,
yoo a̱ nde̱e̱ ndiꞌiꞌ ni̱ kivi̱ꞌ,
ndisu̱ tu̱ꞌu̱n vixi̱ ndii,
numi̱ꞌ te̱ natuví ña̱ ja̱a̱nꞌ.
20 Ne̱ xanini sa̱a̱ ña̱ ni̱a̱ꞌa ndii,
mi̱iꞌ ndiꞌiꞌ ña̱ xini xaꞌanꞌ ñuꞌuꞌ nimá ni̱a̱,
ndisu̱ ne̱ xanini xaꞌa̱ꞌ mi̱iꞌ ndiꞌiꞌ ña̱ va̱ꞌa̱ ndii,
va̱ꞌa̱ kuni nimá ni̱a̱ xikaꞌ ni̱a̱.
21 Ne̱ xatyuunꞌ nda̱ku ndii,
köo̱ꞌ nde̱e̱ i̱i̱n ña̱ ni̱a̱ꞌa ku̱ndo̱ꞌo̱ ni̱a̱,
ndisu̱ ne̱ xaaꞌ ña̱ ni̱a̱ꞌa ndii,
xa̱ mi̱iꞌ ndiꞌiꞌ tu̱ndoꞌo̱ꞌ yoo nuu̱ꞌ kivi̱ꞌ ñu̱u̱ ni̱a̱.
22 Ne̱ kaꞌán tu̱ꞌu̱n vixi̱ ndii,
ndasiꞌ Yahvé sa̱kuuꞌ ña̱ kaꞌán ni̱a̱,
ndisu̱ ne̱ xatyuunꞌ nda̱ku ndii,
va̱ꞌa̱ kuni a̱ xini ña̱ꞌaꞌ a̱.
23 Ne̱ xini tuní ndii,
kuäsa̱ꞌ kaꞌán ni̱nu̱ ni̱a̱ xaꞌa̱ꞌ a̱ ña̱ xini tuní ni̱a̱,
ndisu̱ ne̱ küuꞌ kaxiꞌ ndii,
kaꞌán ni̱a̱ nuu̱ꞌ sa̱kuuꞌ ne̱ yivi̱ꞌ ña̱ kuäsa̱ꞌ kuní ña̱ xaaꞌ ni̱a̱.
24 Ne̱ xatyuunꞌ va̱ ndii,
ku̱ndu̱u̱ ni̱a̱ ne̱ kuuꞌ nu̱uꞌ nuu̱ꞌ i̱nga̱ ka̱ ne̱ yivi̱ꞌ,
ndisu̱ ne̱ suxa̱nꞌ ndii,
ku̱ndu̱u̱ ni̱a̱ ne̱ ka̱ka̱ nu̱u̱ so̱ꞌo̱ nuu̱ꞌ ne̱ yivi̱ꞌ.
25 Ña̱ ndiꞌni̱ nimá ne̱ yivi̱ꞌ ndii,
sa̱kusutyiꞌ a̱ i̱ni̱ ni̱a̱,
ndisu̱ kii̱ꞌ kaꞌán i̱i̱n ne̱ yivi̱ꞌ i̱i̱n kuento va̱ꞌa̱ xiinꞌ ni̱a̱ ndii,
xakuatiaꞌ a̱ nimá ni̱a̱.
26 Ne̱ xatyuunꞌ nda̱ku ndii,
tu̱ꞌu̱n nde̱iꞌ va̱ꞌa̱ kaꞌán ni̱a̱ xiinꞌ ne̱ xiní taꞌanꞌ xiinꞌ ni̱a̱,
ndisu̱ ne̱ xaaꞌ ña̱ ni̱a̱ꞌa ndii,
sasanaꞌ ndiꞌiꞌ ña̱ꞌaꞌ ni̱a̱.
27 Ne̱ suxa̱nꞌ ndii,
ni̱ nde̱e̱ ki̱tiꞌ,
tiꞌ xaꞌni̱ꞌ ni̱a̱,
küni sa̱va̱ꞌa̱ ni̱a̱ ku̱xi̱ ni̱a̱,
ndisu̱ ne̱ si̱ni sa̱tyuunꞌ ndii,
tiinꞌ va̱ꞌa̱ ni̱a̱ ña̱ vikaꞌ ni̱a̱ ña̱ kaya ni̱a̱.
28 Ne̱ xatyuunꞌ nda̱ku ndii,
i̱tyiꞌ ña̱ taxiꞌ kivi̱ꞌ ñu̱u̱ xikaꞌ ni̱a̱,
te̱ i̱tyiꞌ ja̱a̱nꞌ ndii,
köo̱ꞌ ña̱ xiꞌí ne̱ yivi̱ꞌ nuu̱ꞌ a̱.