11
Yahvé ndii,
ndasiꞌ a̱ ne̱ xätaꞌ xinu̱ ña̱ꞌa̱,
ndisu̱ va̱ꞌa̱ kuni a̱ xini a̱ ne̱ xataꞌ xinu̱ a̱.
2 Ne̱ ñuñuꞌ ndii,
sa̱kaꞌanꞌ ña̱ꞌaꞌ ña̱ ñuñuꞌ ni̱a̱ ja̱a̱nꞌ,
ndisu̱ ne̱ ndaꞌvi kuuꞌ nimá ndii,
kumiꞌ ne̱ ja̱a̱nꞌ ña̱ xini tuní.
3 Ne̱ yivi̱ꞌ,
ne̱ xatyuunꞌ nda̱ku ndii,
ña̱ xatyuunꞌ nda̱ku ni̱a̱ ja̱a̱nꞌ ndasanda̱ku i̱tyiꞌ xikaꞌ ni̱a̱,
ndisu̱ ne̱ xaaꞌ ña̱ ni̱a̱ꞌa ndii,
xa̱ mi̱iꞌ ña̱ ni̱a̱ꞌa ña̱ xaaꞌ ni̱a̱ ja̱a̱nꞌ sa̱ndo̱ñuꞌuꞌ ña̱ꞌaꞌ.
4 Ña̱ vikaꞌ ndii,
kü̱vi̱ xa̱tyiꞌ tyi̱ndi̱e̱eꞌ a̱ ne̱ yivi̱ꞌ kii̱ꞌ xaa̱ kivi̱ꞌ ña̱ sa̱naꞌmá ña̱ꞌaꞌ Ndiosí,
ndisu̱ ña̱ xatyuunꞌ nda̱ku e̱ꞌ ndii,
sa̱kakú a̱ yooꞌ nuu̱ꞌ ña̱ xiꞌí.
5 Ne̱ i̱i̱n nda̱a̱ꞌ nimá ndii,
ña̱ xatyuunꞌ nda̱ku ni̱a̱ ndasanda̱ku i̱tyiꞌ xikaꞌ ni̱a̱,
ndisu̱ ne̱ xaaꞌ ña̱ ni̱a̱ꞌa ndii,
xa̱ mi̱iꞌ ña̱ ni̱a̱ꞌa ña̱ xaaꞌ ni̱a̱ ja̱a̱nꞌ tavi̱ ña̱ꞌaꞌ.
6 Ne̱ xatyuunꞌ nda̱ku ndii,
sandoó ndiká ña̱ꞌaꞌ ña̱ xatyuunꞌ nda̱ku ni̱a̱ ja̱a̱nꞌ nuu̱ꞌ ña̱ ni̱a̱ꞌa,
ndisu̱ ne̱ xini xaꞌanꞌ ndii,
namaꞌ mi̱iꞌ ni̱a̱ nuu̱ꞌ ña̱ ndioo̱ꞌ i̱ni̱ ni̱a̱ xaꞌa̱ꞌ.
7 Kii̱ꞌ xiꞌí ne̱ xaaꞌ ña̱ ni̱a̱ꞌa ndii,
xiꞌí tu̱ ña̱ ndiatuꞌ i̱ni̱ ni̱a̱ xaꞌa̱ꞌ xiinꞌ ni̱a̱.
Sa̱kanꞌ ña̱ ña̱ ndi̱e̱eꞌ mi̱iꞌ ku̱i̱ti̱ꞌ ni̱a̱,
ña̱ kuäsa̱ꞌ kuní nuu̱ꞌ Ndiosí,
i̱ni̱ ni̱a̱ xini ni̱a̱.
8 Ne̱ xatyuunꞌ nda̱ku ndii,
sakakú ña̱ꞌaꞌ Ndiosí nuu̱ꞌ ña̱ ndoꞌoꞌ ni̱a̱.
Te̱ ne̱ xaaꞌ ña̱ ni̱a̱ꞌa koꞌniꞌ a̱ nuu̱ꞌ tu̱ndoꞌo̱ꞌ.
9 Ne̱ xasuviꞌ xiinꞌ miiꞌ ndii,
xiinꞌ tu̱ꞌu̱n vixi̱ ña̱ kaꞌán ni̱a̱ sanduxín ni̱a̱ ne̱ yivi̱ꞌ xiinꞌ ni̱a̱,
ndisu̱ ne̱ xatyuunꞌ nda̱ku ndii,
kaku̱ ne̱ ja̱a̱nꞌ sa̱a̱ ña̱ xini tuní ni̱a̱.
10 Kii̱ꞌ kieeꞌ va̱ꞌa̱ ne̱ xatyuunꞌ nda̱ku ndii,
sa̱kuuꞌ ne̱ ndieeꞌ ñu̱u̱ ni̱a̱ xakaꞌnuꞌ.
Te̱ kii̱ꞌ xiꞌí ne̱ xaaꞌ ña̱ ni̱a̱ꞌa ndii,
vi̱koꞌ vi̱ꞌ xaꞌa ne̱ yivi̱ꞌ ña̱ va̱ꞌa̱ kuni ni̱a̱.
11 Ña̱ sañuꞌuꞌ Ndiosí ne̱ xatyuunꞌ nda̱ku ndii,
su̱vi̱ a̱ xaaꞌ sa̱kanꞌ te̱ kuaꞌa̱n ku̱a̱ꞌnu̱ ñu̱u̱ miiꞌ ndieeꞌ ni̱a̱,
ndisu̱ ña̱ kaꞌán ne̱ xaaꞌ ña̱ ni̱a̱ꞌa ndii,
sanduxín ndi̱ꞌi̱ ni̱a̱ ñu̱u̱ miiꞌ ndieeꞌ ni̱a̱.
12 Ne̱ küuꞌ kaxiꞌ ndii,
kaꞌán ki̱ni̱ ni̱a̱ xaꞌa̱ꞌ ne̱ xiní taꞌanꞌ xiinꞌ ni̱a̱,
ndisu̱ ne̱ kuuꞌ kaxiꞌ ndii,
nde̱e̱ i̱i̱n ña̱ꞌa̱ käꞌán ni̱a̱ xaꞌa̱ꞌ ne̱ yivi̱ꞌ.
13 Ne̱ vixi̱ ndii,
sa̱kuuꞌ ña̱ kaꞌán si̱ꞌe ne̱ yivi̱ꞌ xiinꞌ ni̱a̱ ndatuꞌunꞌ ndo̱o̱ ni̱a̱ nuu̱ꞌ i̱nga̱ ne̱ yivi̱ꞌ,
ndisu̱ ne̱ xatyuunꞌ nda̱ku ndii,
ku̱vi̱ i̱ni̱ e̱ꞌ ku̱ni̱ e̱ꞌ ni̱a̱,
sa̱kanꞌ ña̱ käꞌán ni̱a̱ xiinꞌ nde̱e̱ i̱i̱n ne̱ yivi̱ꞌ ña̱ ndatuꞌunꞌ si̱ꞌe e̱ꞌ nuu̱ꞌ ni̱a̱.
14 I̱i̱n te̱ xaꞌndia tyuunꞌ kuuꞌ nu̱uꞌ,
te̱ köo̱ꞌ ña̱ xini tuní kumiꞌ ndii,
sanduxín ra̱ ñu̱ꞌuꞌ miiꞌ xaꞌndia tyuunꞌ ra̱,
ndisu̱ naaꞌ yoo kuaꞌa̱ꞌ te̱ taxiꞌ tu̱ꞌu̱n nde̱iꞌ nuu̱ꞌ ra̱ ndii,
kaku̱ ñu̱u̱ ja̱a̱nꞌ sa̱a̱ ra̱.
15 Yo̱o̱ ka̱ taxiꞌ kuento ni̱a̱ ña̱ tya̱ꞌvi̱ ni̱a̱ xaꞌa̱ꞌ ña̱ ndisoꞌ ikaꞌ i̱nga̱ ne̱ yivi̱ꞌ,
naaꞌ tyä̱ꞌvi̱ ne̱ yivi̱ꞌ ja̱a̱nꞌ kuenta ni̱a̱ ndii,
vä̱ꞌa̱ xa̱tyiꞌ kuaꞌa̱n ne̱ taxiꞌ kuento ja̱a̱nꞌ,
ndisu̱ ne̱ xïinꞌ tyi̱ꞌni̱ xiinꞌ miiꞌ xaꞌa̱ꞌ kuenta i̱nga̱ ne̱ yivi̱ꞌ ndii,
va̱ꞌa̱ ndieeꞌ ni̱a̱.
16 Ña̱ꞌaꞌ,
ñaꞌ va̱ꞌa̱ nimá ndii,
kanandoo aꞌ kuaꞌa̱ꞌ ne̱ kiꞌinꞌ kaꞌnuꞌ ña̱ꞌaꞌ,
te̱ yivi̱ꞌ,
te̱ kuiꞌe̱ va̱ ndii,
ña̱ vikaꞌ ku̱i̱ti̱ꞌ kuaꞌa̱ꞌ va̱ kanandoo ra̱.
17 Ne̱ yivi̱ꞌ,
ne̱ vi̱ta nimá ndii,
ña̱ va̱ꞌa̱ xaaꞌ ni̱a̱ xaꞌa̱ꞌ mi̱iꞌ ni̱a̱,
ndisu̱ ne̱ yivi̱ꞌ,
te̱ kuiꞌe̱ va̱ ndii,
sandoꞌoꞌ xiinꞌ miiꞌ mi̱iꞌ ni̱a̱.
18 Ne̱ yivi̱ꞌ,
ne̱ ni̱a̱ꞌa va̱ ndii,
i̱i̱n kani̱ꞌ ku̱i̱ti̱ꞌ ku̱vikaꞌ ni̱a̱,
ndisu̱ ne̱ yivi̱ꞌ,
ne̱ xatyuunꞌ nda̱ku ndii,
köo̱ꞌ kivi̱ꞌ ndi̱ꞌi̱ ña̱ va̱ꞌa̱ ña̱ na̱ti̱i̱n ni̱a̱.
19 Ne̱ xatyuunꞌ nda̱ku ndii,
na̱ti̱i̱n ni̱a̱ kivi̱ꞌ ñu̱u̱,
ndisu̱ ne̱ xaaꞌ ña̱ ni̱a̱ꞌa ndii,
ña̱ ku̱vi̱ ku̱i̱ti̱ꞌ ne̱ ja̱a̱nꞌ na̱ti̱i̱n ni̱a̱.
20 Ndasiꞌ Yahvé ne̱ ni̱a̱ꞌa nimá,
ndisu̱ va̱ꞌa̱ kuni a̱ xini a̱ ne̱ xikaꞌ nda̱ku i̱tyiꞌ a̱.
21 Ne̱ xaaꞌ ña̱ ni̱a̱ꞌa ndii,
ña̱ nda̱ku nduuꞌ a̱ ña̱ ko̱o̱ ni̱a̱ tu̱ndoꞌo̱ꞌ,
ndisu̱ ne̱ si̱a̱niꞌ xikaꞌ te̱ xatyuunꞌ nda̱ku ndii,
sa̱kakú ña̱ꞌaꞌ Ndiosí nuu̱ꞌ tu̱ndoꞌo̱ꞌ.
22 I̱i̱n ña̱ꞌaꞌ,
ñaꞌ lu̱vi̱ va̱ kaaꞌ,
te̱ köo̱ꞌ ña̱ xanini aꞌ ndii,
nduuꞌ aꞌ nde̱e̱ naa ka̱xun nda̱ꞌaꞌ ña̱ ni̱ ku̱a̱ꞌa̱ xiinꞌ oro,
te̱ taxkoꞌ a̱ yu̱ꞌuꞌ kini̱ ku̱i̱ti̱ꞌ.
23 Ne̱ xatyuunꞌ nda̱ku ndii,
ku̱vi̱ ndiatuꞌ ni̱a̱ ña̱ ko̱o̱ va̱ꞌa̱ ni̱a̱,
ndisu̱ ne̱ xaaꞌ ña̱ ni̱a̱ꞌa ndii,
ña̱ ka̱tunꞌ ña̱ꞌaꞌ Ndiosí ku̱i̱ti̱ꞌ ndiatuꞌ ni̱a̱.
24 Ne̱ küuꞌ xiꞌndi̱a̱ꞌ ña̱ꞌa̱ ni̱a̱ kii̱ꞌ taxiꞌ ni̱a̱ a̱ ndii,
kuaꞌa̱ꞌ ka̱ a̱ na̱ti̱i̱n ni̱a̱ sa̱a̱ Ndiosí,
ndisu̱ ne̱ kuuꞌ xiꞌndi̱a̱ꞌ ña̱ꞌa̱ ni̱a̱ kii̱ꞌ taxiꞌ ni̱a̱ a̱ te̱ täxiꞌ xinu̱ ni̱a̱ a̱ ndii,
so̱ꞌo̱ kuuꞌ ndaꞌvi ndi̱ꞌi̱ ni̱a̱.
25 Ne̱ va̱ꞌa̱ nimá ndii,
ki̱e̱e̱ va̱ꞌa̱ ni̱a̱.
Te̱ ne̱ taxiꞌ ti̱kui xiꞌiꞌ ne̱ i̱tyiꞌ i̱ni̱ ndii,
ta̱xi̱ tu̱ ne̱ yivi̱ꞌ ti̱kui ko̱ꞌo̱ ne̱ ja̱a̱nꞌ nde̱e̱ nda̱ꞌni̱ ni̱a̱ kii̱ꞌ ityi̱ i̱ni̱ ni̱a̱.
26 Ne̱ nda̱si̱ꞌ nuu̱ꞌ kii̱ꞌ nakaya ni̱a̱ kuaꞌa̱ꞌ va̱ ndi̱kinꞌ trigo ndii,
sanatyaꞌanꞌ ña̱ꞌaꞌ ne̱ yivi̱ꞌ,
ndisu̱ ne̱ xiko̱ꞌ ña̱ ja̱a̱nꞌ kii̱ꞌ yoo so̱ko̱ ndii,
sañuꞌuꞌ ña̱ꞌaꞌ ni̱a̱.
27 Ne̱ xaaꞌ ña̱ va̱ꞌa̱ ndii,
ña̱ va̱ꞌa̱ natiinꞌ ni̱a̱ nda̱ꞌaꞌ ne̱ yivi̱ꞌ,
ndisu̱ ne̱ xaaꞌ ña̱ ni̱a̱ꞌa ndii,
mi̱iꞌ ni̱a̱ ku̱ndo̱ꞌo̱ ña̱ ja̱a̱nꞌ.
28 Ne̱ i̱ni̱ xini ña̱ vikaꞌ ni̱a̱ ndii,
ndo̱ñuꞌuꞌ ni̱a̱,
ndisu̱ ne̱ xatyuunꞌ nda̱ku ndii,
na̱ku̱naa̱ ndi̱e̱e̱ꞌ ni̱a̱ nde̱e̱ naa i̱tunꞌ kii̱ꞌ nduuꞌ iti̱a̱ꞌ nu̱ꞌ.
29 Ne̱ sakakuꞌ tu̱ꞌu̱n kuiꞌe̱ xiinꞌ ne̱ ndieeꞌ vi̱ꞌe̱ mi̱iꞌ ni̱a̱ ndii,
ku̱u̱ ndaꞌvi xa̱tyiꞌ ni̱a̱.
Te̱ ne̱ küuꞌ kaxiꞌ ndii,
ne̱ ka̱ka̱ nu̱u̱ nuu̱ꞌ ne̱ xini tuní ku̱ndu̱u̱ ni̱a̱.
30 Ña̱ kanandoo ne̱ xaaꞌ ña̱ va̱ꞌa̱ ndii,
nduuꞌ a̱ nde̱e̱ naa i̱tunꞌ,
tunꞌ taxiꞌ kivi̱ꞌ ñu̱u̱ e̱ꞌ.
Te̱ ña̱ kanandoo ne̱ xaaꞌ ña̱ xini tuní ndii,
ña̱ ku̱ndani̱ ña̱ꞌaꞌ ne̱ yivi̱ꞌ nduuꞌ a̱.
31 Naaꞌ ña̱ nda̱ku nduuꞌ a̱ ña̱ nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ natiinꞌ ne̱ xatyuunꞌ nda̱ku ña̱ kanandoo ni̱a̱ sa̱a̱ Ndiosí ndii,
sa̱a̱ ka̱ vi̱ꞌ tu̱ ku̱ndo̱ꞌo̱ ne̱ xaaꞌ ña̱ ni̱a̱ꞌa xiinꞌ ne̱ xaaꞌ ku̱a̱tyi̱.