Yoꞌoꞌ kaꞌán a̱ xaꞌa̱ꞌ sa̱a̱ xaaꞌ te̱ xatyuunꞌ nda̱ku xiinꞌ xaꞌa̱ꞌ sa̱a̱ xaaꞌ te̱ xaaꞌ ña̱ ni̱a̱ꞌa
10
Ña̱ yo̱ꞌo̱ꞌ nduuꞌ ña̱ xini tuní ña̱ kaꞌa̱n yuꞌu̱,
Salomón.
Va̱ꞌa̱ va̱ kuni i̱i̱n yu̱vaꞌ kii̱ꞌ te̱ xini tuní nduuꞌ tiaa̱ siꞌe̱ ra̱,
ndisu̱ i̱i̱n te̱ küuꞌ kaxiꞌ ndii,
sakusutyiꞌ va̱ ra̱ i̱ni̱ si̱ꞌiꞌ ra̱.
2 Ña̱ vikaꞌ ne̱ yivi̱ꞌ,
ña̱ xakuiꞌnaꞌ ni̱a̱ ndii,
tyïndieeꞌ kuaꞌa̱ꞌ a̱,
ndisu̱ ña̱ xatyuunꞌ nda̱ku e̱ꞌ ndii,
sandoó ndiká a̱ yooꞌ nuu̱ꞌ ña̱ xiꞌí.
3 Ne̱ xatyuunꞌ nda̱ku ndii,
tä̱xi̱ Yahvé ña̱ ku̱vi̱ ni̱a̱ so̱ko̱,
ndisu̱ ne̱ xaaꞌ ña̱ ni̱a̱ꞌa ndii,
tä̱xi̱ a̱ sa̱a̱ ni̱a̱ ña̱ xikán nimá ni̱a̱ sa̱a̱ ni̱a̱.
4 Te̱ suxa̱nꞌ ndii,
yatyi̱ va̱ kuuꞌ ndaꞌvi ra̱,
ndisu̱ te̱ si̱ni va̱ sa̱tyuunꞌ ndii,
kuuꞌ vikaꞌ ra̱.
5 Te̱ sa̱va̱,
te̱ nakaya ña̱ saviꞌ kii̱ꞌ nakuixaꞌ a̱ ndii,
te̱ xini tuní nduuꞌ ra̱,
ndisu̱ te̱ kixín i̱i̱n keꞌinꞌ kii̱ꞌ nakuixaꞌ ña̱ saviꞌ ndii,
i̱i̱n te̱ kuäsa̱ꞌ kaꞌanꞌ nuu̱ꞌ nduuꞌ ra̱.
6 Sañuꞌuꞌ Ndiosí te̱ xatyuunꞌ nda̱ku,
ndisu̱ kuento ña̱ kaꞌán te̱ xaaꞌ ña̱ ni̱a̱ꞌa ndii,
tiasi a̱ ña̱ ki̱ni̱ ña̱ xaaꞌ ra̱.
7 Kii̱ꞌ xiꞌí i̱i̱n te̱ xatyuunꞌ nda̱ku ndii,
tyi̱ndi̱e̱eꞌ ña̱ va̱ꞌa̱ ña̱ ni̱ xa̱a̱ ra̱ ne̱ yivi̱ꞌ kii̱ꞌ nakaꞌanꞌ ni̱a̱ xaꞌa̱ꞌ ra̱,
ndisu̱ kii̱ꞌ xiꞌí te̱ xaaꞌ ña̱ ni̱a̱ꞌa ndii,
köo̱ꞌ nakaꞌanꞌ xa̱tyiꞌ ka̱ xaꞌa̱ꞌ te̱ ja̱a̱nꞌ.
8 Te̱ xini tuní ndii,
saxinú ra̱ tu̱ꞌu̱n nde̱iꞌ xiinꞌ ka̱niiꞌ nimá ra̱,
ndisu̱ ne̱ kaꞌán mi̱iꞌ ndiꞌiꞌ ña̱ kuäsa̱ꞌ kuní ndii,
ko̱o̱ ni̱a̱ tu̱ndoꞌo̱ꞌ.
9 Te̱ xikaꞌ nda̱ku i̱i̱n yivi̱ꞌ ndii,
xïkaꞌ nimá ra̱ kuaꞌa̱n ra̱,
ndisu̱ te̱ xikaꞌ xaaꞌ ña̱ ni̱a̱ꞌa ndii,
ne̱ꞌi̱ nda̱ꞌaꞌ ña̱ꞌaꞌ ne̱ yivi̱ꞌ te̱ na̱tuvi̱ ndo̱o̱ ña̱ xaaꞌ ra̱.
10 Yo̱o̱ ka̱ ndasi i̱i̱n ndu̱tyiꞌ nuu̱ꞌ ni̱a̱ te̱ nakuiinꞌ yu̱ꞌuꞌ ni̱a̱ ña̱ sa̱a̱ ne̱ yivi̱ꞌ ña̱ ni̱a̱ꞌa ndii,
kuaꞌa̱ꞌ va̱ tu̱ꞌu̱n kuiꞌe̱ sa̱kaꞌndi ni̱a̱,
ndisu̱ te̱ kaꞌán mi̱iꞌ ndiꞌiꞌ ña̱ kuäsa̱ꞌ kuní ndii,
ko̱o̱ ra̱ tu̱ndoꞌo̱ꞌ.
11 Sa̱kuuꞌ ña̱ kaꞌán te̱ xatyuunꞌ nda̱ku ndii,
nduuꞌ a̱ nde̱e̱ naa miiꞌ kieeꞌ kivi̱ꞌ ñu̱u̱ e̱ꞌ,
ndisu̱ te̱ küuꞌ kaxiꞌ ndii,
xa̱ nuu̱ꞌ ña̱ ni̱a̱ꞌa kieeꞌ yu̱ꞌuꞌ ra̱.
12 Ña̱ ndasiꞌ taꞌanꞌ ne̱ yivi̱ꞌ ndii,
sakuntaꞌanꞌ ña̱ꞌaꞌ a̱,
ndisu̱ ña̱ ndani̱ taꞌanꞌ e̱ꞌ ndii,
yoo kaꞌnuꞌ i̱ni̱ e̱ꞌ xaꞌa̱ꞌ ña̱ vä̱ꞌa̱ ña̱ xaaꞌ ne̱ yivi̱ꞌ xiinꞌ e̱ꞌ.
13 Ne̱ xini tuní ndii,
xa̱ mi̱iꞌ ndiꞌiꞌ ña̱ xini tuní ndatuꞌunꞌ nia̱,
ndisu̱ ne̱ küuꞌ kaxiꞌ ndii,
xiinꞌ ka̱roti kutu̱nꞌ nia̱.
14 Ne̱ xini tuní ndii,
taxaꞌa nia̱ ña̱ xini tuní nia̱ kii̱ꞌ küní a̱ kaꞌa̱n nia̱ a̱,
ndisu̱ kii̱ꞌ kaꞌán na kaꞌán ne̱ küuꞌ kaxiꞌ ndii,
i̱i̱n kani̱ꞌ va̱ te̱ sa̱kakuꞌ nia̱ tu̱ꞌu̱n kuiꞌe̱.
15 Ne̱ vika̱ꞌ ndii,
ña̱ vikaꞌ nia̱ taxiꞌ ndi̱e̱e̱ꞌ nia̱,
te̱ nduuꞌ a̱ nde̱e̱ naa i̱i̱n ñu̱u̱ ña̱ ndasi kutu̱ꞌ xiinꞌ nama̱.
Te̱ ne̱ ndaꞌvi kuuꞌ ndii,
ña̱ natiín nia̱ xaꞌni̱ꞌ ndiꞌiꞌ ña̱ꞌaꞌ.
16 Ña̱ kanandoo ne̱ xatyuunꞌ nda̱ku ndii,
kivi̱ꞌ ñu̱u̱ nduuꞌ a̱,
ndisu̱ ne̱ xaaꞌ ña̱ ni̱a̱ꞌa ndii,
xa̱nuu̱ꞌ miiꞌ xaaꞌ nia̱ ku̱a̱tyi̱ ku̱i̱ti̱ꞌ xaꞌni̱ꞌ ndii̱ꞌ nia̱ xu̱ꞌunꞌ nia̱.
17 Ne̱ natiinꞌ ña̱ kutúnꞌ ni̱a̱ ndii,
i̱tyiꞌ ña̱ kuaꞌa̱n miiꞌ yoo kivi̱ꞌ ñu̱u̱ xikaꞌ ni̱a̱,
ndisu̱ ne̱ xäaꞌ kuenta kuuꞌ ña̱ kutúnꞌ ni̱a̱ ndii,
kuita̱ saka ni̱a̱.
18 Ne̱ sätuví ña̱ ndasiꞌ ni̱a̱ ne̱ yivi̱ꞌ ndii,
ne̱ vixi̱ nduuꞌ ni̱a̱.
Te̱ ne̱ kiku̱ꞌ ña̱ sataví ku̱a̱tyi̱ nianí i̱nga̱ ne̱ yivi̱ꞌ ndii,
ne̱ küuꞌ kaxiꞌ nduuꞌ ni̱a̱.
19 Ne̱ kuaꞌa̱ꞌ va̱ kaꞌán ndii,
kueinꞌ kuuꞌ ni̱a̱ te̱ kaꞌa̱n ni̱a̱ nde̱e̱ ña̱ xätaꞌa̱n kaꞌa̱n ni̱a̱ te̱ koyo̱ ni̱a̱ ku̱a̱tyi̱,
ndisu̱ ne̱ tiasi yu̱ꞌuꞌ ndii,
ne̱ kuuꞌ kaxiꞌ nduuꞌ ni̱a̱.
20 Kuento ña̱ kaꞌán ne̱ xatyuunꞌ nda̱ku ndii,
nde̱e̱ naa xu̱ꞌunꞌ plata nda̱tu̱nꞌ va̱ nduuꞌ a̱,
ndisu̱ nimá ne̱ küuꞌ kaxiꞌ ndii,
kuäsa̱ꞌ xa̱tyiꞌ ndiaa yaꞌviꞌ a̱.
21 Kuento ña̱ kaꞌán ne̱ xatyuunꞌ nda̱ku ndii,
tyindieeꞌ a̱ kuaꞌa̱ꞌ va̱ ne̱ yivi̱ꞌ,
ndisu̱ ne̱ küuꞌ kaxiꞌ ndii,
ku̱vi̱ ni̱a̱ xaꞌa̱ꞌ a̱ ña̱ köo̱ꞌ ña̱ xanini ni̱a̱.
22 Ña̱ sañuꞌuꞌ Yahvé yooꞌ ndii,
xavikaꞌ a̱ yooꞌ.
Te̱ köo̱ꞌ nde̱e̱ i̱i̱n ña̱ sutyiꞌ i̱ni̱ e̱ꞌ niꞌiꞌ taꞌanꞌ xiinꞌ ña̱ sañuꞌuꞌ a̱ yooꞌ ja̱a̱nꞌ.
23 Ne̱ küuꞌ kaxiꞌ ndii,
va̱ꞌa̱ kuni ni̱a̱ xaaꞌ ni̱a̱ ña̱ ni̱a̱ꞌa,
ndisu̱ ne̱ kuuꞌ kaxiꞌ ndii,
va̱ꞌa̱ kuni ni̱a̱ xini ni̱a̱ ña̱ xini tuní.
24 Ña̱ yiꞌvi ne̱ xaaꞌ ni̱a̱ꞌa ku̱ndo̱ꞌo̱ ni̱a̱ ndii,
ña̱ ja̱a̱nꞌ xna̱ꞌa̱ ku̱ndo̱ꞌo̱ ni̱a̱.
Te̱ ña̱ ndiatuꞌ i̱ni̱ ne̱ xatyuunꞌ nda̱ku xaꞌa̱ꞌ ndii,
na̱ti̱i̱n xna̱ꞌa̱ ni̱a̱ a̱.
25 Kii̱ꞌ ki̱xi̱n ña̱ i̱yo̱ nuu̱ꞌ kivi̱ꞌ ñu̱u̱ ne̱ xaaꞌ ña̱ ni̱a̱ꞌa ndii,
sa̱ndo̱ñuꞌuꞌ xa̱tyiꞌ ña̱ꞌaꞌ a̱,
ndisu̱ ne̱ xatyuunꞌ nda̱ku ndii,
ku̱ti̱a̱ku̱ ni̱a̱ nde̱e̱ ndiꞌiꞌ ni̱ kivi̱ꞌ.
26 Ne̱ suxa̱nꞌ ndii,
sanasaáꞌ ni̱a̱ xto̱ꞌo̱ ni̱a̱,
te̱ nduuꞌ ni̱a̱ nde̱e̱ naa teꞌ ya̱ꞌaꞌ xiyáꞌ kii̱ꞌ koꞌniꞌ raꞌ xaꞌa̱ꞌ nu̱ꞌu̱ e̱ꞌ,
te̱ xakakanꞌ raꞌ a̱,
uun nde̱e̱ naa i̱nuꞌ limo kii̱ꞌ koꞌniꞌ a̱ ndu̱tyiꞌ nuu̱ꞌ e̱ꞌ.
27 Ña̱ yiꞌvi e̱ꞌ Yahvé ndii,
sa̱na̱kaá a̱ kivi̱ꞌ ñu̱u̱ e̱ꞌ,
ndisu̱ ne̱ xaaꞌ ña̱ ni̱a̱ꞌa ndii,
ke̱ndoso̱ꞌ Ndiosí kivi̱ꞌ ñu̱u̱ ni̱a̱.
28 Ña̱ ndiatuꞌ i̱ni̱ ne̱ xatyuunꞌ nda̱ku xaꞌa̱ꞌ ndii,
xakuatiaꞌ a̱ nimá ni̱a̱,
ndisu̱ ña̱ ndiatuꞌ i̱ni̱ ne̱ xaaꞌ ña̱ ni̱a̱ꞌa xaꞌa̱ꞌ ndii,
ndo̱ñuꞌuꞌ ndi̱ꞌi̱ a̱.
29 I̱tyiꞌ Yahvé ndii,
taxiꞌ a̱ ndi̱e̱e̱ꞌ ne̱ xatyuunꞌ nda̱ku,
ndisu̱ ne̱ xaaꞌ ña̱ ni̱a̱ꞌa ndii,
sanduxín ndi̱ꞌi̱ ña̱ꞌaꞌ a̱.
30 Ne̱ xatyuunꞌ nda̱ku ndii,
köo̱ꞌ kivi̱ꞌ sa̱na̱ xíniꞌ ni̱a̱,
ne̱ xaaꞌ ña̱ ni̱a̱ꞌa ndii,
sa̱ndo̱ñuꞌuꞌ ña̱ꞌaꞌ Ndiosí nuu̱ꞌ ñu̱ꞌuꞌ i̱i̱n yivi̱ꞌ.
31 Ña̱ kaꞌán ne̱ xini tuní ndii,
mi̱iꞌ ndiꞌiꞌ tu̱ꞌu̱n nde̱iꞌ va̱ꞌa̱ nduuꞌ a̱,
ndisu̱ ne̱ kaꞌán mi̱iꞌ ndiꞌiꞌ ña̱ ni̱a̱ꞌa ndii,
ka̱ꞌndi̱a̱ ne̱ yivi̱ꞌ yaa̱ꞌ ni̱a̱.
32 Ne̱ xatyuunꞌ nda̱ku ndii,
mi̱iꞌ ndiꞌiꞌ ña̱ va̱ꞌa̱ kaꞌán ni̱a̱,
ndisu̱ ne̱ xaaꞌ ña̱ ni̱a̱ꞌa ndii,
xa̱ nuu̱ꞌ ña̱ kuäsa̱ꞌ kuní kaꞌán ni̱a̱.