Yoꞌoꞌ nakataꞌ xiinꞌ miiꞌ ña̱ xini tuní xiinꞌ ña̱ꞌaꞌ ñaꞌ küuꞌ kaxiꞌ
9
Ni̱ xa̱ꞌa̱ ña̱ xini tuní vi̱ꞌe̱ a̱,
te̱ ni̱ xa̱ta̱ a̱ uxa̱ taꞌan ndu̱yu̱ xaꞌa̱ꞌ vi̱ꞌe̱ ja̱a̱nꞌ.
2 Ni̱ xa̱va̱ꞌa̱ a̱ kuaꞌa̱ꞌ ña̱ xaxi̱ꞌ,
te̱ ni̱ na̱saka̱ꞌ a̱ vino xiinꞌ ña̱ xavixínꞌ,
te̱ ni̱ sa̱kooꞌ tu̱ꞌva̱ tu̱ a̱ mesa.
3 Te̱ ni̱ ti̱ꞌviꞌ a̱ ña̱ꞌaꞌ ñaꞌ xikaꞌ nuuꞌ nuu̱ꞌ a̱
xíniꞌ i̱kuꞌ miiꞌ sukun ya̱ti̱n ñu̱u̱ ja̱a̱nꞌ,
te̱ ku̱a̱aꞌ tiꞌeꞌ ni̱a̱,
4 kaꞌa̱n ni̱a̱ ndii:
“Ndoꞌó,
ne̱ na̱a̱ꞌ kuuꞌ ndii,
ni̱a̱ꞌa̱ ndo̱ꞌ yoꞌoꞌ xiinꞌ ndu̱”,
katyi̱ ni̱a̱.
Te̱ xiinꞌ ne̱ xänini va̱ꞌa̱ ni̱ kaꞌa̱n a̱ ndii:
5 “Ni̱a̱ꞌa̱ ndo̱ꞌ te̱ ku̱xi̱ ndo̱ꞌ ña̱ xaxi̱ꞌ ña̱ ni̱ xa̱va̱ꞌa̱ i̱,
te̱ ko̱ꞌo̱ tu̱ ndo̱ꞌ vino,
te̱ ni̱ na̱saka̱ꞌ i̱ xiinꞌ ña̱ xavixínꞌ.
6 Na̱ko̱o̱ ndo̱ꞌ ña̱ na̱a̱ꞌ kuuꞌ ndo̱ꞌ te̱ xa̱ꞌaꞌ ndo̱ꞌ ku̱ti̱a̱ku̱ ndo̱ꞌ,
te̱ ka̱ka̱ ndo̱ꞌ nde̱e̱ naa ne̱ yivi̱ꞌ,
ne̱ xanini va̱ꞌa̱”,
katyi̱ ni̱a̱.
7 Yo̱o̱ ka̱ ndiaa yu̱ꞌuꞌ i̱i̱n ne̱ xandiꞌiꞌ ndii,
kaꞌa̱n ki̱ni̱ ne̱ ja̱a̱nꞌ xiinꞌ ni̱a̱,
te̱ yo̱o̱ ka̱ ndiaa yu̱ꞌuꞌ i̱i̱n ne̱ xaaꞌ ña̱ ni̱a̱ꞌa ndii,
sa̱tu̱xuꞌví ña̱ꞌaꞌ ne̱ ja̱a̱nꞌ.
8 Sa̱kanꞌ na kuiiꞌ kü̱ndi̱ꞌni̱ u̱nꞌ ko̱ndi̱a̱ yu̱ꞌuꞌ i̱i̱n ne̱ xandiꞌiꞌ,
ko̱to̱ ku̱nda̱siꞌ ni̱a̱ yoꞌó.
Va̱ꞌa̱ ka̱ ne̱ xini tuní ko̱ndi̱a̱ yu̱ꞌuꞌ u̱nꞌ te̱ ku̱ndani̱ ni̱a̱ yoꞌó.
9 Te̱ ne̱ xini tuní sa̱niaꞌá u̱nꞌ te̱ ku̱u̱ xini tuní ka̱ ni̱a̱,
te̱ ne̱ xatyuunꞌ nda̱ku sa̱niaꞌá u̱nꞌ te̱ so̱ꞌo̱ sa̱tyuunꞌ nda̱ku ka̱ ni̱a̱.
10 Ña̱ yiꞌvi e̱ꞌ Yahvé nduuꞌ xaꞌndu̱ ña̱ xini tuní,
te̱ ña̱ xiní ndiꞌi̱ e̱ꞌ xaꞌa̱ꞌ Ndiosí su̱ꞌu̱n nduuꞌ ña̱ kundityi e̱ꞌ.
11 Ña̱ xini tuní sa̱na̱kaá ka̱ kivi̱ꞌ ka̱ka̱ u̱nꞌ i̱i̱n yivi̱ꞌ,
te̱ kuaꞌa̱ꞌ ka̱ tu̱ kuiya̱ ta̱xi̱ a̱ ku̱ti̱a̱ku̱ u̱nꞌ.
12 Naaꞌ na̱ndu̱u̱ u̱nꞌ ne̱ xini tuní ndii,
ña̱ va̱ꞌa̱ mi̱iꞌ u̱nꞌ nduuꞌ a̱,
ndisu̱ naaꞌ sa̱xi̱o̱o̱ u̱nꞌ ña̱ xini tuní ja̱a̱nꞌ ndii,
mi̱iꞌ u̱nꞌ na̱tyaꞌvi̱ xaꞌa̱ꞌ a̱.
13 I̱i̱n ña̱ꞌaꞌ ñaꞌ küuꞌ kaxiꞌ ndii,
ñaꞌ tiäkú yu̱ꞌuꞌ nduuꞌ aꞌ,
tee̱ꞌ ndee xäaꞌ aꞌ kuenta ndii,
i̱i̱n ñaꞌ köo̱ꞌ nuu̱ꞌ nduuꞌ aꞌ.
14 Xikunduꞌu̱ꞌ aꞌ nuu̱ꞌ tei̱ yiꞌeꞌ vi̱ꞌe̱ aꞌ,
te̱ xikunduꞌu̱ꞌ tu̱ aꞌ miiꞌ sukun xtoꞌniꞌ miiꞌ naá ñu̱u̱ aꞌ.
15 Te̱ kanaꞌ a̱ ne̱ yivi̱ꞌ,
ne̱ xkaꞌndíá kuaꞌa̱n i̱tyiꞌ i̱kanꞌ,
ne̱ yivi̱ꞌ,
ne̱ xkaꞌndíá kuaꞌa̱n nda̱ku te̱ sa̱a̱ nia̱ tyu̱u̱n nuu̱ꞌ nia̱.
16 Ne̱ na̱a̱ꞌ kuuꞌ kaꞌán aꞌ xiinꞌ ndii:
“Ndiꞌvi̱ ndo̱ꞌ vi̱ꞌe̱ i̱ xiinꞌ i̱”,
katyi aꞌ.
Te̱ ne̱ xänini va̱ꞌa̱ kaꞌán aꞌ xiinꞌ ndii:
17 “Ti̱kui,
teꞌ xakuiꞌnaꞌ e̱ꞌ ndii,
vi̱xi̱n ka̱ teꞌ ja̱a̱nꞌ,
te̱ xita̱ꞌ va̱ꞌa̱ ña̱ xixiꞌ si̱ꞌe e̱ꞌ ndii,
asi̱nꞌ ka̱ ña̱ ja̱a̱nꞌ”,
katyi aꞌ.
18 Ndisu̱ xïní ne̱ ja̱a̱nꞌ ña̱ i̱kanꞌ yoo ña̱ xiꞌí,
te̱ ne̱ yivi̱ꞌ,
ne̱ ni̱ ta̱tu̱ aꞌ ndieeꞌ i̱kanꞌ ndii,
nde̱e̱ ma̱aꞌ ti̱xi̱n yavi̱ ndi̱i̱ ñuꞌuꞌ ni̱a̱.