Yoꞌoꞌ kanaꞌ ña̱ xini tuní yooꞌ te̱ ku̱ni̱ so̱ꞌo̱ e̱ꞌ ña̱ kaꞌán a̱
8
Ku̱ni̱ so̱ꞌo̱ ndo̱ꞌ,
kanaꞌ ña̱ xini tuní ndoꞌó,
te̱ ku̱ni̱ so̱ꞌo̱ tu̱ ndo̱ꞌ kii̱ꞌ kaꞌán tiꞌeꞌ ña̱ ndityi xiinꞌ ndo̱ꞌ.
2 Xikuiín a̱ nde̱e̱ xíniꞌ i̱kuꞌ miiꞌ sukun va̱ ya̱ti̱n yu̱ꞌuꞌ i̱tyiꞌ,
te̱ xikuiín tu̱ a̱ miiꞌ nataꞌvíꞌ i̱tyiꞌ.
3 Te̱ xikuiín tu̱ a̱ yiꞌeꞌ ñu̱u̱ miiꞌ koꞌniꞌ ne̱ yivi̱ꞌ,
te̱ yiꞌeꞌ ñu̱u̱ ja̱a̱nꞌ iinꞌ a̱ te̱ kaꞌán tiꞌeꞌ a̱ ndii:
4 “Ndoꞌó te̱ yivi̱ꞌ,
sa̱kuuꞌ ndoꞌó kanaꞌ i̱,
kaꞌán tiꞌeꞌ i̱ xiinꞌ sa̱kuuꞌ ndoꞌó,
te̱ yivi̱ꞌ i̱i̱n yivi̱ꞌ.
5 Ndoꞌó,
ne̱ na̱a̱ꞌ kuuꞌ,
na̱ka̱ni̱ni̱ va̱ꞌa̱ ndo̱ꞌ,
te̱ ndoꞌó,
ne̱ küuꞌ kaxiꞌ,
niaꞌa̱ na̱ ndo̱ꞌ siee ña̱ kundani̱.
6 Ku̱ni̱ so̱ꞌo̱ ndo̱ꞌ,
sa̱kanꞌ ña̱ yoo ña̱ va̱ꞌa̱ va̱ kuni kaꞌa̱n i̱ xiinꞌ ndo̱ꞌ,
te̱ sa̱kuuꞌ ña̱ kaꞌa̱n i̱ ndii,
ña̱ ndi̱xa̱ nduuꞌ a̱,
7 sa̱kanꞌ ña̱,
ña̱ nda̱ku ku̱i̱ti̱ꞌ ndatuꞌunꞌ i̱,
te̱ ndasiꞌ i̱ sa̱kuuꞌ nuu̱ꞌ tu̱ꞌu̱n vixi̱.
8 Sa̱kuuꞌ tu̱ꞌu̱n nde̱iꞌ ña̱ kaꞌán i̱ ndii,
ña̱ nda̱ku nduuꞌ a̱,
te̱ köo̱ꞌ nde̱e̱ siee ña̱ ni̱a̱ꞌa kaꞌni̱ xiinꞌ a̱,
ni̱ nde̱e̱ köo̱ꞌ tu̱ ña̱ sikiꞌ kaꞌni̱ xiinꞌ a̱.
9 Sa̱kuuꞌ ne̱ kumiꞌ ña̱ kundani̱ ndii,
tü̱ndoꞌo̱ꞌ xa̱tyiꞌ te̱ ku̱nda̱ni̱ ni̱a̱ ña̱ kaꞌán i̱ ja̱a̱nꞌ,
te̱ ne̱ kumiꞌ ña̱ xini tuní ndii,
ku̱nda̱ni̱ kaxiꞌ ni̱a̱ sa̱kuuꞌ a̱.
10 Va̱ꞌa̱ ka̱ na̱ti̱i̱n ndo̱ꞌ ña̱ saniaꞌá i̱,
te̱ sa̱kanꞌ ña̱ na̱ti̱i̱n ndo̱ꞌ xu̱ꞌunꞌ yuu̱ꞌ plata,
te̱ va̱ꞌa̱ ka̱ ña̱ na̱ti̱i̱n ndo̱ꞌ ña̱ xini tuní te̱ sa̱kanꞌ ña̱ na̱ti̱i̱n ndo̱ꞌ oro.
11 Ndiaa yaꞌviꞌ ka̱ ña̱ xini tuní te̱ sa̱kanꞌ yuu̱ꞌ nda̱tu̱nꞌ ña̱ naniꞌ rubí,
te̱ ndiaa yaꞌviꞌ ka̱ tu̱ a̱ te̱ sa̱kanꞌ sa̱kuuꞌ ña̱ ku̱vi̱ ndi̱o̱o̱ꞌ i̱ni̱ e̱ꞌ xaꞌa̱ꞌ.
12 ’Yuꞌu̱,
ña̱ xini tuní ndii,
yoo ingaꞌ i̱ xiinꞌ ña̱ kuuꞌ kaxiꞌ,
te̱ xiní i̱ miiꞌ ki̱ꞌi̱n i̱ tu̱ꞌu̱n nde̱iꞌ va̱ꞌa̱ ka̱,
te̱ xiní tu̱ i̱ nde̱e̱ ña̱ nduuꞌ ña̱ va̱ꞌa̱ uun ña̱ vä̱ꞌa̱.
13 Te̱ sa̱kuuꞌ ne̱ yiꞌvi Yahvé ndii,
ndasiꞌ ni̱a̱ ña̱ ni̱a̱ꞌa,
xaꞌa̱ꞌ a̱ ja̱a̱nꞌ na yuꞌu̱ ndii,
ndasiꞌ i̱ ña̱ ñuñuꞌ xiinꞌ ña̱ kaniꞌiꞌ xiinꞌ miiꞌ,
te̱ ndasiꞌ tu̱ i̱ ña̱ xaaꞌ ne̱ xikaꞌ i̱tyiꞌ ni̱a̱ꞌa,
xiinꞌ ña̱ kaꞌán ne̱ va̱ꞌa̱ yu̱ꞌuꞌ.
14 Yuꞌu̱ kumiꞌ tu̱ꞌu̱n nde̱iꞌ xiinꞌ ña̱ kuuꞌ kaxiꞌ,
yuꞌu̱ kumiꞌ tu̱ ña̱ ndi̱e̱eꞌ xiinꞌ ña̱ ndityi.
15 Yuꞌu̱ xaaꞌ sa̱kanꞌ te̱ xaꞌndia tyuunꞌ nda̱ku rey,
te̱ yuꞌu̱ xaaꞌ tu̱ sa̱kanꞌ te̱ xaꞌnú nda̱ku kuesí ku̱a̱tyi̱ ne̱ yivi̱ꞌ.
16 Yuꞌu̱ xaaꞌ sa̱kanꞌ te̱ xaꞌndia tyuunꞌ nda̱ku te̱ kuuꞌ nu̱uꞌ,
te̱ yuꞌu̱ xaaꞌ tu̱ sa̱kanꞌ te̱ xaꞌndia tyuunꞌ nda̱ku,
te̱ xaꞌnú nda̱ku ku̱a̱tyi̱ ne̱ yivi̱ꞌ nuu̱ꞌ ñu̱ꞌuꞌ i̱i̱n yivi̱ꞌ.
17 Ku̱ndani̱ i̱ sa̱kuuꞌ ne̱ kundani̱ yuꞌu̱,
te̱ ne̱ nandukuꞌ yuꞌu̱ ndii,
ku̱ni̱ ni̱a̱ yuꞌu̱.
18 Kumiꞌ i̱ ña̱ vikaꞌ xiinꞌ ña̱ kiꞌinꞌ kaꞌnuꞌ,
te̱ kumiꞌ tu̱ i̱ ña̱ xatyuunꞌ nda̱ku xiinꞌ ña̱ ko̱o̱ va̱ꞌa̱ ne̱ yivi̱ꞌ nde̱e̱ ndiꞌiꞌ ni̱ kivi̱ꞌ.
19 Ndiaa yaꞌviꞌ ka̱ ña̱ tyu̱u̱n ña̱ taxiꞌ yuꞌu̱ te̱ sa̱kanꞌ oro,
te̱ ndiaa yaꞌviꞌ ka̱ a̱ te̱ sa̱kanꞌ oro ña̱ va̱ꞌa̱ ka̱,
te̱ va̱ꞌa̱ ka̱ tyaꞌvi̱ yuꞌu̱ te̱ sa̱kanꞌ ña̱ ndiaa yaꞌviꞌ xu̱ꞌunꞌ yuu̱ꞌ plata va̱ꞌa̱ ka̱.
20 Yuꞌu̱ ndii,
i̱tyiꞌ nda̱ku xikaꞌ i̱,
te̱ i̱tyiꞌ miiꞌ xikaꞌ ne̱ yivi̱ꞌ,
ne̱ xatyuunꞌ nda̱ku,
kuaꞌa̱n i̱.
21 Ne̱ ndani̱ yuꞌu̱ ndii,
na̱ti̱i̱n ni̱a̱ ña̱ vikaꞌ sa̱a̱ i̱,
te̱ sa̱kutuꞌ i̱ vi̱ꞌe̱ ni̱a̱ miiꞌ taxaꞌa ni̱a̱ ña̱ vikaꞌ ni̱a̱.
22 ’Ni̱ xa̱ꞌa̱ Yahvé yuꞌu̱ nde̱e̱ ña̱ nu̱uꞌ,
nde̱e̱ kii̱ꞌ kuní ka̱ ka̱sa̱ꞌa̱ a̱ sa̱kuuꞌ i̱nga̱ nuu̱ꞌ ña̱ꞌa̱.
23 Ni̱ xa̱ꞌa̱ Ndiosí yuꞌu̱ nde̱e̱ xta̱ꞌanꞌ i̱i̱n yivi̱ꞌ xa̱va̱ꞌa̱,
ni̱ xa̱ꞌa̱ a̱ yuꞌu̱ ña̱ kuní ka̱ ka̱sa̱ꞌa̱ a̱ ñu̱ꞌuꞌ i̱i̱n yivi̱ꞌ.
24 Ni̱ xi̱koo̱ i̱ ña̱ kuní ka̱ ka̱sa̱ꞌa̱ Ndiosí mi̱ni̱ kaꞌnuꞌ,
te̱ ni̱ tuvi̱ i̱ kii̱ꞌ kuní ka̱ ko̱o̱ sa̱kuuꞌ ti̱ko̱ꞌyoꞌ naꞌnuꞌ miiꞌ kieeꞌ kuaꞌa̱ꞌ va̱ ti̱kui.
25 Ni̱ tuvi̱ i̱ kii̱ꞌ kuní ka̱ na̱koo̱ i̱kuꞌ naꞌnuꞌ va̱,
te̱ ni̱ tuvi̱ i̱ kii̱ꞌ kuní ka̱ na̱kuita̱ xiki̱ꞌ naꞌnuꞌ va̱.
26 Te̱ xa̱ yoo yuꞌu̱ kii̱ꞌ kuní ka̱ ka̱sa̱ꞌa̱ Yahvé ñu̱ꞌuꞌ i̱i̱n yivi̱ꞌ xiinꞌ kii̱ꞌ kuní ka̱ ka̱sa̱ꞌa̱ a̱ kuꞌu̱,
xiinꞌ kii̱ꞌ kuní ka̱ ka̱sa̱ꞌa̱ a̱ ya̱kaꞌ ña̱ ni̱ ti̱i̱n a̱,
te̱ ni̱ xa̱ꞌa̱ a̱ ñu̱ꞌuꞌ i̱i̱n yivi̱ꞌ.
27 Kii̱ꞌ ni̱ xa̱ꞌa̱ Ndiosí ndi̱viꞌ ndii,
i̱kanꞌ ni̱ yoo̱ i̱ xiinꞌ a̱,
te̱ i̱kanꞌ tu̱ ni̱ yoo̱ i̱ xiinꞌ a̱ kii̱ꞌ ni̱ tyi̱ka̱nduꞌu̱ꞌ a̱ ñu̱ꞌuꞌ i̱i̱n yivi̱ꞌ te̱i̱n tatyi̱ꞌ.
28 Te̱ i̱kanꞌ tu̱ ni̱ yoo̱ i̱ xiinꞌ a̱ kii̱ꞌ ni̱ ta̱ndi̱e̱e̱ a̱ viko̱ꞌ ndi̱viꞌ,
te̱ i̱kanꞌ tu̱ ni̱ yoo̱ i̱ xiinꞌ a̱ kii̱ꞌ ni̱ xa̱ꞌa̱ a̱ ti̱ko̱ꞌyoꞌ naꞌnuꞌ ti̱xi̱n ñu̱ꞌuꞌ nde̱e̱ ma̱aꞌ.
29 Te̱ i̱kanꞌ tu̱ ni̱ yoo̱ xiinꞌ a̱ kii̱ꞌ ni̱ xa̱ꞌa̱ a̱ xeꞌinꞌ miiꞌ kuꞌu̱n ndi̱koꞌ ti̱kui mi̱ni̱ kaꞌnuꞌ,
te̱ xkäꞌndi̱a̱ raꞌ miiꞌ ni̱ kaꞌa̱n tyuunꞌ a̱ xiinꞌ raꞌ.
Te̱ kii̱ꞌ ni̱ xa̱ꞌa̱ a̱ xaꞌndu̱ ñu̱ꞌuꞌ i̱i̱n yivi̱ꞌ ndii,
i̱kanꞌ tu̱ ni̱ yoo̱ i̱ xiinꞌ a̱,
30 xa̱ xi̱i̱nꞌ a̱ ja̱a̱nꞌ ni̱ yoo̱ i̱ tyindieeꞌ ña̱ꞌaꞌ i̱,
te̱ va̱ꞌa̱ va̱ kuni a̱ xini a̱ yuꞌu̱ i̱ꞌi̱n kivi̱ꞌ kuaꞌa̱n,
te̱ sa̱a̱ kivi̱ꞌ va̱ꞌa̱ kuni i̱ yoo i̱ nuu̱ꞌ a̱.
31 Te̱ va̱ꞌa̱ tu̱ kuni i̱ xini i̱ ñu̱ꞌuꞌ i̱i̱n yivi̱ꞌ ña̱ ni̱ xa̱ꞌa̱ a̱,
te̱ va̱ꞌa̱ yaꞌa̱ tu̱ kuni i̱ xini i̱ ne̱ yivi̱ꞌ,
ne̱ ni̱ ta̱ndi̱e̱e̱ a̱ nuu̱ꞌ ñu̱ꞌuꞌ i̱i̱n yivi̱ꞌ.
32 ’Te̱ vi̱ti̱n,
yu̱vaꞌ kuaꞌa i̱,
ku̱ni̱ so̱ꞌo̱ ndo̱ꞌ ña̱ kaꞌán i̱ xiinꞌ ndo̱ꞌ,
sa̱kanꞌ ña̱ yo̱o̱ ka̱ ndikún i̱tyiꞌ yuꞌu̱ ndii,
va̱ꞌa̱ va̱ kuni ni̱a̱.
33 Ku̱ni̱ so̱ꞌo̱ ndo̱ꞌ tu̱ꞌu̱n nde̱iꞌ ña̱ kaꞌán i̱,
te̱ ku̱ndu̱u̱ ndo̱ꞌ ne̱ xini tuní,
te̱ sä̱xi̱o̱o̱ ndo̱ꞌ a̱.
34 Va̱ꞌa̱ va̱ kuni yo̱o̱ ka̱ xini so̱ꞌo̱ ña̱ kaꞌán i̱,
te̱ sa̱a̱ kivi̱ꞌ ku̱a̱xi̱ ni̱a̱ vi̱ꞌe̱ i̱,
te̱ ndiatuꞌ ni̱a̱ yuꞌu̱ ke̱ta̱ i̱ te̱ nu̱niaꞌ i̱ yiꞌeꞌ nuu̱ꞌ ni̱a̱.
35 Sa̱kanꞌ ña̱ sa̱kuuꞌ ne̱ ku̱a̱xi̱ nuu̱ꞌ i̱ ndii,
na̱ti̱i̱n ni̱a̱ kivi̱ꞌ ñu̱u̱,
te̱ sa̱ñuꞌuꞌ tu̱ ña̱ꞌaꞌ Yahvé Ndiosí.
36 Ndisu̱ ne̱ saxiooꞌ yuꞌu̱ te̱ kani̱a̱ꞌa ni̱a̱ xaꞌa̱ꞌ i̱ ndii,
nimá mi̱iꞌ ni̱a̱ sanduxín ni̱a̱,
te̱ sa̱kuuꞌ ne̱ ndasiꞌ yuꞌu̱ ndii,
ne̱ xa̱ yoo ku̱vi̱ nduuꞌ ni̱a̱”,
katyi ña̱ xini tuní.