Yoꞌoꞌ kaꞌán ka̱ a̱ xaꞌa̱ꞌ i̱i̱n ña̱ꞌaꞌ ñaꞌ yoo i̱i̱ꞌ ñaꞌ xakuitaꞌ te̱ yivi̱ꞌ
7
Yu̱vaꞌ kuaꞌa i̱,
sa̱xinu̱ u̱nꞌ sa̱kuuꞌ ña̱ kaꞌán i̱ xiinꞌ u̱nꞌ,
te̱ ta̱xa̱ꞌa̱ u̱nꞌ tu̱ꞌu̱n yu̱ꞌuꞌ i̱.
2 Sa̱xinu̱ u̱nꞌ sa̱kuuꞌ ña̱ kaꞌán tyuunꞌ i̱,
te̱ ku̱ti̱a̱ku̱ u̱nꞌ,
ko̱to̱ va̱ u̱nꞌ tu̱ꞌu̱n nde̱iꞌ ña̱ kaꞌán i̱ xiinꞌ u̱nꞌ nde̱e̱ naa xitoꞌ u̱nꞌ ndu̱tyiꞌ nuu̱ꞌ u̱nꞌ.
3 Sa̱tiín a̱ ku̱ꞌu̱n nuu̱ꞌ nda̱ꞌaꞌ u̱nꞌ,
te̱ ke̱ꞌi̱ a̱ nde̱e̱ ma̱aꞌ ti̱xi̱n nimá u̱nꞌ.
4 Ku̱ndani̱ u̱nꞌ ña̱ xini tuní nde̱e̱ naa ñaꞌ taꞌanꞌ mi̱iꞌ u̱nꞌ,
ku̱ndani̱ tu̱ u̱nꞌ ña̱ ndityi nde̱e̱ naa ne̱ i̱i̱n kuuꞌ ya̱ti̱n xiinꞌ u̱nꞌ.
5 Te̱ ña̱ ja̱a̱nꞌ ko̱to̱ yoꞌó te̱ kü̱miꞌ u̱nꞌ ñaꞌ siꞌi i̱nga̱ te̱ yivi̱ꞌ,
te̱ ko̱to̱ tu̱ a̱ yoꞌó te̱ kä̱ndi̱xaꞌ u̱nꞌ ña̱ nda̱tu̱nꞌ kaꞌán ña̱ꞌaꞌ ñaꞌ xakuitaꞌ te̱ yivi̱ꞌ xiinꞌ u̱nꞌ.
6 Untaꞌ kii̱ꞌ iinꞌ yuꞌu̱ ti̱xi̱n vi̱ꞌe̱ i̱,
te̱ xitoꞌ i̱ ki̱ꞌe̱ iinꞌ i̱ ndii,
7 ni̱ xi̱ni̱ i̱ kuaꞌa̱n ndiaꞌviꞌ te̱ sa̱va̱,
te̱ na̱a̱ꞌ kuuꞌ,
te̱ te̱i̱n te̱ ja̱a̱nꞌ kaꞌni̱ i̱i̱n ra̱,
te̱ köo̱ꞌ xa̱tyiꞌ ka̱ ña̱ xini tuní.
8 Te̱ ni̱ xi̱ni̱ i̱ xkaꞌndíá ra̱ kuaꞌa̱n ra̱ xiki̱ꞌ ya̱ꞌya̱,
i̱tyiꞌ ña̱ kuaꞌa̱n vi̱ꞌe̱ ñaꞌ siꞌi i̱nga̱ te̱ yivi̱ꞌ naá ra̱ kuaꞌa̱n ra̱.
9 Te̱ xa̱kuaa̱ꞌ nuuꞌ kii̱ꞌ xa̱ kuuꞌ i̱i̱n yaví nduuꞌ a̱
kii̱ꞌ xa̱ xa̱ꞌaꞌ kuuꞌ ñu̱u i̱i̱n yaví ndiaaꞌ.
10 Te̱ numi̱ꞌ va̱ ni̱ ku̱ya̱ti̱n i̱i̱n ña̱ꞌaꞌ nuu̱ꞌ ra̱,
te̱ ni̱ nda̱sa̱va̱ꞌa̱ xiinꞌ miiꞌ aꞌ nde̱e̱ naa i̱i̱n ña̱ꞌaꞌ ñaꞌ xiko̱ꞌ xiinꞌ miiꞌ,
te̱ tyu̱u̱n va̱ aꞌ ku̱ni̱ xaꞌanꞌ aꞌ te̱ yivi̱ꞌ.
11 Ñaꞌ ja̱a̱nꞌ ndii,
i̱i̱n ña̱ꞌaꞌ ñaꞌ so̱ꞌo̱ va̱ nduuꞌ aꞌ,
te̱ käꞌanꞌ tu̱ nuu̱ꞌ aꞌ,
te̱ köo̱ꞌ kivi̱ꞌ nduꞌu̱ꞌ tu̱ aꞌ vi̱ꞌe̱ aꞌ.
12 Ñaꞌ ja̱a̱nꞌ ndii,
xaá xikaꞌ aꞌ ya̱ꞌya̱,
te̱ xaá tu̱ku̱u̱ xikaꞌ aꞌ ma̱ꞌiꞌ ya̱ꞌvi̱,
te̱ xaá tu̱ku̱u̱ xikuiín aꞌ i̱ꞌi̱n xiki̱ꞌ ya̱ꞌya̱ ndiatuꞌ aꞌ te̱ yivi̱ꞌ te̱ ka̱vi̱koꞌ aꞌ ra̱.
13 Ni̱ nu̱mi̱ aꞌ te̱ sa̱va̱ ja̱a̱nꞌ,
te̱ ni̱ tyi̱to aꞌ yu̱ꞌuꞌ ra̱,
te̱ nde̱e̱ siee nï̱ ka̱ꞌa̱n nuu̱ꞌ aꞌ,
te̱ ni̱ xto̱ꞌni̱ aꞌ nuu̱ꞌ ra̱,
te̱ ni̱ kaꞌa̱n aꞌ xiinꞌ ra̱ ndii:
14 “Vi̱ti̱n ni̱ na̱soko̱ꞌ i̱ ki̱tiꞌ nuu̱ꞌ Ndiosí xaꞌa̱ꞌ a̱ ña̱ nakoó i̱ ña̱ mani̱ꞌ xiinꞌ a̱,
te̱ xa̱ ni̱ sa̱xinu̱ i̱ kuento i̱ ña̱ ni̱ ta̱xi̱ i̱ nuu̱ꞌ a̱,
xaꞌa̱ꞌ a̱ ja̱a̱nꞌ na kuiiꞌ naá nde̱i̱i̱ꞌ ku̱xi̱ e̱ꞌ.
15 Sa̱kanꞌ na ni̱ ke̱ta̱ i̱ nandukuꞌ i̱ yoꞌó,
ni̱ kaꞌa̱n va̱ nimá i̱ ku̱ni̱ nuu̱ꞌ u̱nꞌ,
te̱ xa̱ ni̱ xaꞌa̱n ku̱ni̱ taꞌanꞌ i̱ xiinꞌ u̱nꞌ.
16 Xa̱ ni̱ nda̱ki̱n i̱ i̱i̱n ti̱ka̱tyiꞌ nda̱tu̱nꞌ va̱ nuu̱ꞌ tunꞌ xi̱to̱ i̱,
te̱ i̱i̱n ti̱ka̱tyiꞌ ña̱ kuaꞌa̱ꞌ va̱ tiaku̱ nduuꞌ a̱,
te̱ ni̱ ku̱a̱ꞌa̱ a̱ xiinꞌ mi̱iꞌ ndiꞌiꞌ yuꞌva̱ lino,
te̱ nde̱e̱ ñu̱ꞌuꞌ Egipto ni̱ sa̱ta̱ꞌ i̱ e̱.
17 Te̱ sa̱kanꞌ tu̱ xa̱ ni̱ xa̱ti̱a̱ i̱ ña̱ xavixínꞌ nuu̱ꞌ tunꞌ xi̱to̱ i̱
ña̱ naniꞌ mirra,
xiinꞌ ña̱ naniꞌ áloe,
xiinꞌ soo̱ꞌ kanela.
18 Ni̱a̱ꞌa̱ xiinꞌ i̱ te̱ kusu̱n e̱ꞌ nde̱e̱ nda̱ꞌni̱ e̱ꞌ,
ni̱a̱ꞌa̱ xiinꞌ i̱ te̱ sa̱sánaꞌ xiinꞌ miiꞌ e̱ꞌ nde̱e̱ kitu̱ꞌ.
19 I̱i̱ꞌ i̱ ndii,
köo̱ꞌ ra̱ nduꞌu̱ꞌ vi̱ꞌe̱,
sa̱kanꞌ ña̱ kuaꞌa̱n xikaꞌ ra̱.
20 Ni̱ na̱ꞌi̱ ra̱ mata̱ miiꞌ naá sa̱kuuꞌ xu̱ꞌunꞌ ndisoꞌ ra̱ kuaꞌa̱n ra̱,
te̱ na̱ndi̱koꞌ ra̱ nde̱e̱ kii̱ꞌ na̱ndu̱u̱ niiꞌ yoo̱ꞌ vi̱ꞌ”,
ni̱ katyi̱ aꞌ xiinꞌ ra̱.
21 Sa̱kanꞌ ni̱ xa̱a̱ aꞌ,
te̱ ni̱ ka̱vi̱koꞌ ña̱ꞌaꞌ aꞌ xiinꞌ ña̱ nda̱tu̱nꞌ ni̱ kaꞌa̱n aꞌ xiinꞌ ra̱,
te̱ ni̱ xa̱kuitaꞌ ña̱ꞌaꞌ aꞌ xiinꞌ ña̱ va̱ꞌa̱ va̱ ni̱ kaꞌa̱n aꞌ xiinꞌ ra̱.
22 Xa̱kaꞌán e̱ꞌ te̱ ni̱ xi̱ku̱ndiku̱n ra̱ xata̱ꞌ aꞌ kuaꞌa̱n ra̱ nde̱e̱ naa i̱i̱n si̱ndiki̱ꞌ,
tiꞌ kañuuꞌ te̱ yivi̱ꞌ kuaꞌa̱n ka̱ꞌni̱ꞌ ra̱,
uun nde̱e̱ naa i̱i̱n te̱ küuꞌ kaxiꞌ te̱ kuaꞌa̱n ku̱naa̱ vi̱ꞌe̱ ka̱a̱ miiꞌ ko̱o̱ ra̱ tu̱ndoꞌo̱ꞌ xaꞌa̱ꞌ ña̱ ni̱ xa̱a̱ ra̱.
23 Ni̱ xa̱a̱ tu̱ ra̱ nde̱e̱ naa i̱i̱n sa̱a̱,
tiꞌ taꞌnuꞌ nda̱ku kuaꞌa̱n miiꞌ yoo ñu̱nu̱ꞌ ña̱ vi̱kuꞌu̱n riꞌ,
te̱ xïní riꞌ ña̱ i̱kanꞌ ka̱ꞌni̱ꞌ te̱ yivi̱ꞌ riꞌ xiinꞌ kuxi̱,
nde̱e̱ kii̱ꞌ kuxi̱ ra̱ tunꞌ ja̱a̱nꞌ ti̱xi̱n nimá riꞌ.
24 Yu̱vaꞌ kuaꞌa i̱,
sa̱kanꞌ na kuiiꞌ ku̱ni̱ so̱ꞌo̱ u̱nꞌ ña̱ kaꞌán i̱ xiinꞌ u̱nꞌ,
te̱ tyu̱u̱n xaꞌaꞌ va̱ u̱nꞌ sa̱kuuꞌ tu̱ꞌu̱n nde̱iꞌ ña̱ kaꞌán i̱ xiinꞌ u̱nꞌ.
25 Tä̱xi̱ u̱nꞌ ka̱vi̱koꞌ nimá u̱nꞌ yoꞌó te̱ kuꞌu̱n u̱nꞌ xiinꞌ ña̱ꞌaꞌ ja̱a̱nꞌ,
ni̱ nde̱e̱ sä̱sanaꞌ tu̱ u̱nꞌ xíniꞌ u̱nꞌ te̱ ku̱ndiku̱n u̱nꞌ i̱tyiꞌ miiꞌ kuaꞌa̱n aꞌ.
26 Sa̱kanꞌ ña̱ xa̱ kuaꞌa̱ꞌ va̱ te̱ yivi̱ꞌ ni̱ xiꞌi̱ xaꞌa̱ꞌ aꞌ,
nde̱e̱ te̱ yivi̱ꞌ,
te̱ kooꞌ tyukuuꞌ,
xa̱ ni̱ xiꞌi̱ xaꞌa̱ꞌ aꞌ.
27 I̱tyiꞌ ña̱ kuaꞌa̱n vi̱ꞌe̱ ñaꞌ ja̱a̱nꞌ ndii,
nde̱e̱ naa i̱tyiꞌ ña̱ kuaꞌa̱n yavi̱ ndi̱i̱ nduuꞌ a̱,
te̱ kuaꞌa̱n nda̱ku a̱ miiꞌ yoo ña̱ xiꞌí.