Yoꞌoꞌ kaꞌán a̱ xaꞌa̱ꞌ ña̱ vä̱ꞌa̱ ku̱ndu̱u̱ e̱ꞌ te̱ suxa̱nꞌ uun te̱ vixi̱
6
Yu̱vaꞌ kuaꞌa i̱,
naaꞌ ni̱ tyi̱ka̱ndi̱a̱ u̱nꞌ kuento u̱nꞌ ña̱ tya̱ꞌvi̱ u̱nꞌ xaꞌa̱ꞌ ña̱ ndisoꞌ ikaꞌ i̱i̱n te̱ xiní taꞌanꞌ xiinꞌ u̱nꞌ,
uun ni̱ ta̱xi̱ u̱nꞌ kuento u̱nꞌ ña̱ na̱ta̱xi̱ u̱nꞌ ña̱ ndisoꞌ ikaꞌ i̱i̱n te̱ ndi̱va̱ꞌa̱,
2 uun naaꞌ xa̱ ni̱ xi̱kuꞌu̱n u̱nꞌ xiinꞌ tu̱ꞌu̱n yu̱ꞌuꞌ mi̱iꞌ u̱nꞌ xaꞌa̱ꞌ a̱ ña̱ ni̱ ta̱xi̱ u̱nꞌ kuento ja̱a̱nꞌ,
te̱ xa̱ ni̱ na̱suku̱ꞌ tu̱ꞌu̱n yu̱ꞌuꞌ mi̱iꞌ u̱nꞌ ja̱a̱nꞌ yoꞌó ndii,
3 yu̱vaꞌ kuaꞌa i̱,
ña̱ yo̱ꞌo̱ꞌ kuní a̱ sa̱a̱ u̱nꞌ vi̱ti̱n,
te̱ ku̱vi̱ sa̱kakú xiinꞌ miiꞌ u̱nꞌ.
Sa̱kanꞌ ña̱ xa̱ ni̱ xi̱kuꞌu̱n u̱nꞌ nda̱ꞌaꞌ te̱ xiní taꞌanꞌ xiinꞌ u̱nꞌ ja̱a̱nꞌ.
Kuaꞌan kiꞌi̱ꞌ miiꞌ nduꞌu̱ꞌ te̱ xiní taꞌanꞌ xiinꞌ u̱nꞌ ja̱a̱nꞌ,
te̱ ku̱i̱i̱n xitiꞌ u̱nꞌ nuu̱ꞌ ra̱ te̱ kaꞌa̱n ndaꞌvi u̱nꞌ xiinꞌ ra̱ na sa̱a̱ ra̱ ña̱ va̱ꞌa̱ te̱ sa̱ndoyoꞌ ra̱ kivi̱ꞌ u̱nꞌ nuu̱ꞌ tu̱tu̱ miiꞌ yoso̱ꞌ ña̱ ndisoꞌ ikaꞌ ra̱ ja̱a̱nꞌ.
4 Tä̱xi̱ u̱nꞌ yaꞌa̱ kivi̱ꞌ xaꞌa̱ꞌ ña̱ ja̱a̱nꞌ,
numi̱ꞌ te̱ sa̱a̱ u̱nꞌ u̱n,
ni̱ nde̱e̱ ndiätuꞌ ka̱ u̱nꞌ nde̱e̱ sa̱xinu̱ u̱nꞌ ña̱ ja̱a̱nꞌ.
5 Sa̱kakú xiinꞌ miiꞌ kiꞌi̱ꞌ u̱nꞌ nde̱e̱ naa xaaꞌ i̱su̱ sakakú xiinꞌ miiꞌ riꞌ nda̱ꞌaꞌ te̱ kuni ka̱ꞌni̱ꞌ ña̱ꞌaꞌ,
uun nde̱e̱ naa xaaꞌ sa̱a̱ sa̱kakú xiinꞌ miiꞌ riꞌ nuu̱ꞌ ña̱ sékun ña̱ꞌaꞌ te̱ yivi̱ꞌ.
6 Te̱ yoꞌó,
te̱ suxa̱nꞌ,
ko̱to̱ u̱nꞌ sa̱a̱ xaaꞌ ti̱o̱koꞌ,
tyu̱u̱n xaꞌaꞌ va̱ u̱nꞌ sa̱a̱ xatyuunꞌ riꞌ te̱ ku̱ndu̱u̱ u̱nꞌ te̱ xini tuní.
7 Tiꞌ ja̱a̱nꞌ ndii,
köo̱ꞌ te̱ kuuꞌ nu̱uꞌ nuu̱ꞌ riꞌ,
ni̱ nde̱e̱ köo̱ꞌ tu̱ te̱ xaꞌndia tyuunꞌ nuu̱ꞌ riꞌ,
ni̱ nde̱e̱ köo̱ꞌ tu̱ xto̱ꞌo̱ riꞌ.
8 Nde̱e̱ sa̱a̱ ka̱ ni̱ ndii,
ñu̱miꞌ taxaꞌa riꞌ ña̱ xaxi̱ꞌ riꞌ kii̱ꞌ xaa̱ yoo̱ꞌ vi̱xi̱n,
te̱ nakaya riꞌ ña̱ ka̱xi̱ꞌ riꞌ kii̱ꞌ nakuixaꞌ ña̱ saviꞌ.
9 Ndisu̱ yoꞌó,
te̱ suxa̱nꞌ,
¿a̱ma̱a̱ vi̱ꞌ kuꞌu̱n ndi̱koꞌ u̱nꞌ ña̱ kixín u̱nꞌ?
¿A̱ma̱a̱ vi̱ꞌ ndo̱to̱ nuu̱ꞌ u̱nꞌ ña̱ kixín u̱nꞌ,
te̱ ndo̱koo̱ u̱nꞌ?
10 Kaꞌán u̱nꞌ ndii:
“Kuni kusu̱n ka̱ i̱ nde̱e̱ siee,
kuni nda̱si̱ ka̱ i̱ ndu̱tyiꞌ nuu̱ꞌ i̱ i̱i̱n xaꞌaꞌ,
kuni ka̱nduꞌu̱ꞌ ka̱ i̱ i̱i̱n kani̱ꞌ nu̱mi̱ nda̱ꞌaꞌ i̱ te̱ na̱ndiee̱ꞌ i̱”,
katyi u̱nꞌ.
11 Naaꞌ sa̱a̱ naa xaaꞌ u̱nꞌ sa̱kanꞌ ndii,
i̱i̱n xaa̱ ku̱i̱ti̱ꞌ ña̱ natiín vi̱ꞌe̱ u̱nꞌ nde̱e̱ naa i̱i̱n te̱ kuiꞌna̱ꞌ,
te̱ ña̱ ndaꞌvi kuuꞌ xaa̱ miiꞌ nduꞌu̱ꞌ u̱nꞌ nde̱e̱ naa i̱i̱n te̱ niꞌiꞌ ityi̱.
12 I̱i̱n te̱ yivi̱ꞌ,
te̱ xaaꞌ ña̱ ni̱a̱ꞌa,
uun te̱ xaaꞌ ña̱ kuäsa̱ꞌ kuní ndii,
xa̱ nuu̱ꞌ tu̱ꞌu̱n vixi̱ kaꞌán ra̱ xikaꞌ ra̱.
13 Nakuaní ra̱ i̱i̱n nda̱a̱ꞌ ndu̱tyiꞌ nuu̱ꞌ ra̱ nuu̱ꞌ ne̱ yivi̱ꞌ sakaꞌaꞌ ra̱ xaꞌa̱ꞌ ra̱ nuu̱ꞌ i̱nga̱ ne̱ yivi̱ꞌ te̱ kaꞌán ra̱ xiinꞌ ni̱a̱,
te̱ saniaꞌá nuu̱ꞌ nda̱ꞌaꞌ ra̱ ne̱ yivi̱ꞌ.
14 Xa̱ mi̱iꞌ ndiꞌiꞌ ña̱ ni̱a̱ꞌa ñuꞌuꞌ nimá ra̱,
te̱ xa̱ nuu̱ꞌ ña̱ ni̱a̱ꞌa kuni sa̱a̱ ra̱,
te̱ sa̱a̱ kivi̱ꞌ xikaꞌ ra̱ sakuntaꞌanꞌ ra̱ ne̱ yivi̱ꞌ.
15 Xaꞌa̱ꞌ a̱ ja̱a̱nꞌ na i̱i̱n xaa̱ kiꞌi̱ꞌ ku̱i̱ti̱ꞌ ña̱ sa̱ndoꞌoꞌ ña̱ꞌaꞌ,
te̱ kiꞌi̱ꞌ va̱ ki̱xi̱n ña̱ kaꞌnu̱ ña̱ꞌaꞌ,
te̱ nïꞌi̱ꞌ ra̱ tata̱nꞌ a̱.
16 Yoo iñu̱ taꞌan ña̱ꞌa̱ ña̱ ndasiꞌ Yahvé,
uun nde̱e̱ uxa̱ taꞌan kuuꞌ a̱ ña̱ nde̱e̱ ña̱ xtäni̱ nimá a̱:
17 ne̱ yivi̱ꞌ,
ne̱ ñuñuꞌ,
xiinꞌ ne̱ yivi̱ꞌ,
ne̱ vixi̱,
xiinꞌ ne̱ yivi̱ꞌ,
ne̱ xaꞌni̱ꞌ ne̱ yivi̱ꞌ ne̱ köo̱ꞌ ku̱a̱tyi̱,
18 xiinꞌ ne̱ yivi̱ꞌ,
ne̱ tyituní ña̱ ni̱a̱ꞌa ña̱ sa̱a̱ ni̱a̱,
xiinꞌ ne̱ yivi̱ꞌ,
ne̱ kiꞌi̱ꞌ va̱ kuaꞌa̱n te̱ sa̱a̱ ni̱a̱ ña̱ ni̱a̱ꞌa,
19 xiinꞌ ne̱ yivi̱ꞌ,
ne̱ ndieeꞌ yu̱ꞌuꞌ sikiꞌ,
te̱ kaꞌán ni̱a̱ tu̱ꞌu̱n vixi̱,
xiinꞌ ne̱ yivi̱ꞌ,
ne̱ sakuntaꞌanꞌ ne̱ i̱i̱n kuuꞌ xiinꞌ ni̱a̱.
20 Yu̱vaꞌ kuaꞌa i̱,
sa̱xinu̱ u̱nꞌ ña̱ kaꞌán tyuunꞌ yu̱vaꞌ u̱nꞌ xiinꞌ u̱nꞌ,
te̱ nä̱ko̱o̱ u̱nꞌ ña̱ saniaꞌá si̱ꞌiꞌ u̱nꞌ yoꞌó.
21 Ta̱xa̱ꞌa̱ va̱ꞌa̱ u̱nꞌ ña̱ kaꞌán tyuunꞌ ni̱a̱ xiinꞌ u̱nꞌ ti̱xi̱n nimá u̱nꞌ.
Sa̱tiín a̱ te̱ tyu̱ꞌu̱n a̱ suku̱nꞌ u̱nꞌ.
22 Kii̱ꞌ kuaꞌa̱n u̱nꞌ i̱tyiꞌ ndii,
niaꞌa̱ a̱ yoꞌó ndee i̱tyiꞌ kuꞌu̱n u̱nꞌ.
Te̱ kii̱ꞌ kusu̱n u̱nꞌ ndii,
ko̱to̱ a̱ yoꞌó.
Te̱ kii̱ꞌ ndo̱to̱ u̱nꞌ ndii,
kaꞌa̱n a̱ xiinꞌ u̱nꞌ ndee ña̱ va̱ꞌa̱ sa̱a̱ u̱nꞌ.
23 Sa̱kanꞌ ña̱ ña̱ kaꞌán tyuunꞌ ni̱a̱ xiinꞌ u̱nꞌ ja̱a̱nꞌ ndii,
nduuꞌ a̱ nde̱e̱ naa ka̱a̱ tuún nuu̱ꞌ u̱nꞌ.
Te̱ ña̱ saniaꞌá ni̱a̱ yoꞌó ndii,
nde̱e̱ naa ñuꞌu̱ nduuꞌ a̱.
Te̱ ña̱ kutunꞌ ni̱a̱ yoꞌó ndii,
nduuꞌ a̱ nde̱e̱ naa i̱tyiꞌ ña̱ kuaꞌa̱n miiꞌ yoo kivi̱ꞌ ñu̱u̱.
24 Te̱ ko̱to̱ a̱ yoꞌó nuu̱ꞌ ña̱ꞌaꞌ ñaꞌ xaaꞌ ña̱ ni̱a̱ꞌa,
te̱ ko̱to̱ tu̱ a̱ yoꞌó nuu̱ꞌ ña̱ꞌaꞌ ñaꞌ yoo i̱i̱ꞌ,
ñaꞌ xakuitaꞌ te̱ yivi̱ꞌ xiinꞌ ña̱ nda̱tu̱nꞌ ndatuꞌunꞌ aꞌ.
25 Ndiöo̱ꞌ i̱ni̱ u̱nꞌ ña̱ nda̱tu̱nꞌ aꞌ,
te̱ tä̱xi̱ u̱nꞌ ko̱to̱ ndiꞌe̱ꞌ aꞌ yoꞌó te̱ na̱ma̱ u̱nꞌ sa̱a̱ aꞌ xaꞌa̱ꞌ a̱ ña̱ nda̱tu̱nꞌ ndu̱tyiꞌ nuu̱ꞌ aꞌ.
26 Ña̱ꞌaꞌ,
ñaꞌ xiko̱ꞌ xiinꞌ miiꞌ ndii,
sa̱ndaꞌvi aꞌ yoꞌó,
ndisu̱ ña̱ꞌaꞌ ñaꞌ yoo i̱i̱ꞌ naaꞌ ku̱miꞌ ña̱ꞌaꞌ u̱nꞌ ndii,
ka̱ꞌni̱ꞌ i̱i̱ꞌ aꞌ ja̱a̱nꞌ yoꞌó xaꞌa̱ꞌ aꞌ.
27 Ku̱a̱tyi̱ ndii,
köo̱ꞌ nde̱e̱ i̱i̱n te̱ yivi̱ꞌ ku̱vi̱ ta̱a̱nꞌ ñuꞌu̱ ti̱keí ti̱a̱ꞌni̱ ra̱,
te̱ kö̱ko̱ toto̱ ra̱.
28 Te̱ köo̱ꞌ tu̱ nde̱e̱ i̱i̱n te̱ yivi̱ꞌ te̱ ku̱vi̱ kuꞌu̱n xaꞌaꞌ vityiꞌ nuu̱ꞌ ñuꞌu̱ ti̱keí,
te̱ kö̱ko̱ xaꞌa̱ꞌ ra̱.
29 Sa̱kanꞌ ku̱ndo̱ꞌo̱ te̱ yivi̱ꞌ,
te̱ kanduꞌu̱ꞌ xiinꞌ ñaꞌ siꞌi i̱nga̱ te̱ yivi̱ꞌ.
Nde̱e̱ i̱i̱n te̱ numiꞌ ña̱ꞌaꞌ ja̱a̱nꞌ käku̱ nuu̱ꞌ tu̱ndoꞌo̱ꞌ xaꞌa̱ꞌ ñaꞌ ja̱a̱nꞌ.
30 Köo̱ kuaꞌa̱ꞌ ku̱a̱tyi̱ kumiꞌ te̱ xakuiꞌna siee ña̱ ka̱xi̱ꞌ ra̱ ña̱ xa̱ iinꞌ ra̱ i̱kanꞌ ku̱i̱ti̱ꞌ xaꞌa̱ꞌ a̱ ña̱ xiꞌí ra̱ so̱ko̱.
31 Ndisu̱ naaꞌ ne̱ꞌi̱ nda̱ꞌaꞌ ña̱ꞌaꞌ ne̱ yivi̱ꞌ xakuiꞌnaꞌ ra̱ ndii,
na̱tyaꞌvi̱ ra̱ uxa̱ taꞌan i̱tyiꞌ ka̱ xaꞌa̱ꞌ ña̱ ni̱ xa̱kuiꞌnaꞌ ra̱ ja̱a̱nꞌ.
Te̱ nde̱e̱ sa̱kuuꞌ ña̱ꞌa̱ ña̱ kumiꞌ ra̱ vi̱ꞌe̱ ra̱ kuní a̱ na̱ta̱xi̱ ra̱ xaꞌa̱ꞌ ña̱ ja̱a̱nꞌ.
32 Ndisu̱ te̱ yivi̱ꞌ,
te̱ kanduꞌu̱ꞌ xiinꞌ ñaꞌ siꞌi i̱nga̱ te̱ yivi̱ꞌ ndii,
i̱i̱n te̱ köo̱ꞌ xa̱tyiꞌ ña̱ xanini nduuꞌ ra̱,
sa̱kanꞌ ña̱ nimá ra̱ sanduxín ra̱.
33 Te̱ ja̱a̱nꞌ ndii,
ka̱xi̱ꞌ ku̱i̱ti̱ꞌ ra̱ sa̱a̱ te̱ yivi̱ꞌ,
te̱ kaꞌa̱n ki̱ni̱ tu̱ ne̱ yivi̱ꞌ xaꞌa̱ꞌ ra̱.
Te̱ köo̱ꞌ kivi̱ꞌ kuꞌu̱n ndi̱koꞌ ña̱ ka̱ꞌa̱n ña̱ ku̱ndo̱ꞌo̱ ra̱ xaꞌa̱ꞌ ña̱ ja̱a̱nꞌ.
34 Sa̱kanꞌ ña̱ xaꞌa̱ꞌ a̱ ña̱ kuiñu i̱i̱ꞌ ña̱ꞌaꞌ ja̱a̱nꞌ ndii,
na̱saa̱ꞌ ra̱ nde̱e̱ naa ñuꞌu̱,
te̱ köo̱ꞌ kaꞌnuꞌ i̱ni̱ ra̱ xaꞌa̱ꞌ te̱ ja̱a̱nꞌ kii̱ꞌ ke̱ndiaa̱ꞌ yaꞌviꞌ ña̱ꞌaꞌ ra̱.
35 Te̱ ni̱ nde̱e̱ ku̱ï̱i̱n tu̱ ra̱ na̱ti̱i̱n ra̱ nde̱e̱ i̱i̱n nuu̱ꞌ tu̱mani̱ꞌ xaꞌa̱ꞌ ña̱ ja̱a̱nꞌ,
ni̱ nde̱e̱ ku̱ï̱i̱n tu̱ ra̱ ko̱o̱ kaꞌnuꞌ i̱ni̱ ra̱ xaꞌa̱ꞌ te̱ ni̱ ka̱nduꞌu̱ꞌ xiinꞌ ñaꞌ siꞌi ra̱ ja̱a̱nꞌ,
tee̱ꞌ ndee kuaꞌa̱ꞌ xa̱va̱ꞌa̱ tu̱mani̱ꞌ ta̱xi̱ te̱ ja̱a̱nꞌ nda̱ꞌaꞌ ra̱ xaꞌa̱ꞌ aꞌ.