Yoꞌoꞌ kaꞌán a̱ xaꞌa̱ꞌ ña̱ ko̱to̱ xiinꞌ miiꞌ e̱ꞌ nuu̱ꞌ ña̱ꞌaꞌ ñaꞌ xasiki̱ꞌ xiinꞌ mi̱iꞌ
5
Yu̱vaꞌ kuaꞌa i̱,
ku̱ni̱ so̱ꞌo̱ kaxiꞌ va̱ u̱nꞌ ña̱ xini tuní ña̱ saniaꞌá i̱ yoꞌó,
te̱ tyu̱nxaꞌaꞌ tu̱ u̱nꞌ ña̱ ndityi ña̱ kaꞌán i̱ xiinꞌ u̱nꞌ.
2 Sa̱kanꞌ te̱ ta̱xa̱ꞌa̱ u̱nꞌ nde̱iꞌ,
te̱ nda̱tuꞌunꞌ u̱nꞌ xiinꞌ ña̱ xini tuní.
3 Ku̱a̱tyi̱ ndii,
ña̱ꞌaꞌ ñaꞌ xasiki̱ꞌ xiinꞌ miiꞌ ndii,
nda̱tu̱nꞌ va̱ kaꞌán aꞌ,
te̱ ii̱ꞌ tu̱ ndatuꞌunꞌ aꞌ nde̱e̱ naa xa̱ꞌa̱n oliva.
4 Ndisu̱ soꞌo̱ꞌ ndiꞌiꞌ ndii,
kuaꞌa̱ꞌ ka̱ tu̱ndoꞌo̱ꞌ taxiꞌ aꞌ,
te̱ nduuꞌ aꞌ nde̱e̱ naa ña̱ uva̱ ña̱ ñuꞌuꞌ ti̱xi̱n ki̱tiꞌ.
Te̱ xíinꞌ ka̱ tu̱ aꞌ te̱ sa̱kanꞌ ityi̱ ña̱ xíinꞌ uvi̱ sa̱aꞌ taꞌviꞌ.
5 Te̱ xikaꞌ xiinꞌ ñaꞌ ja̱a̱nꞌ ndii,
te̱ xa̱ yoo ku̱vi̱ nduuꞌ ra̱,
te̱ kuaꞌa̱n nda̱ku ra̱ ñu̱u̱ ndi̱i.
6 Sa̱kanꞌ ña̱,
ñaꞌ ja̱a̱nꞌ ndii,
xäaꞌ aꞌ kuenta kuuꞌ i̱tyiꞌ ña̱ taxiꞌ kivi̱ꞌ ñu̱u̱,
ni̱ nde̱e̱ kuäsa̱ꞌ naá nimá aꞌ ña̱ i̱yo̱ ña̱ yoo i̱tyiꞌ miiꞌ xikaꞌ aꞌ.
7 Yu̱vaꞌ kuaꞌa i̱,
tyu̱u̱n xaꞌaꞌ va̱ u̱nꞌ ña̱ kaꞌa̱n i̱ xiinꞌ u̱nꞌ vi̱ti̱n,
te̱ nä̱ko̱o̱ u̱nꞌ tu̱ꞌu̱n va̱ꞌa̱ ña̱ ndiaa yu̱ꞌuꞌ i̱ yoꞌó.
8 Ku̱xi̱o̱o̱ u̱nꞌ nuu̱ꞌ ñaꞌ ja̱a̱nꞌ,
te̱ ni̱ nde̱e̱ kü̱ya̱ti̱n u̱nꞌ yiꞌeꞌ vi̱ꞌe̱ miiꞌ nduꞌu̱ꞌ aꞌ.
9 Naaꞌ sa̱a̱ u̱nꞌ ña̱ ja̱a̱nꞌ ndii,
köo̱ꞌ ki̱ꞌi̱n kaꞌnuꞌ ka̱ yoꞌó,
te̱ ndo̱ñuꞌuꞌ saka ndo̱o̱ sa̱kuuꞌ ña̱ ni̱ xa̱tyuunꞌ uꞌvi̱ va̱ u̱nꞌ,
te̱ ni̱ ka̱ya̱ u̱nꞌ u̱n sa̱a̱ ne̱ yivi̱ꞌ,
ne̱ kuënta xiinꞌ a̱.
10 Ne̱ yivi̱ꞌ ndi̱va̱ꞌa̱ ka̱xi̱ꞌ ña̱ vikaꞌ u̱nꞌ ja̱a̱nꞌ nde̱e̱ nda̱ꞌni̱ ni̱a̱,
te̱ i̱nga̱ ne̱ yivi̱ꞌ na̱ka̱ya̱ ña̱ ni̱ ndo̱ꞌo̱ u̱nꞌ xiinꞌ kuꞌu̱n vi̱ꞌe̱ ni̱a̱.
11 Te̱ soꞌo̱ꞌ ndiꞌiꞌ ndii,
ku̱a̱ku̱ sutyiꞌ i̱ni̱ va̱ u̱nꞌ
kii̱ꞌ ka̱xi̱ꞌ kuiꞌe̱ ñu̱ꞌuꞌ ndeꞌi̱ u̱nꞌ.
12 Sa̱kanꞌ te̱ kaꞌa̱n u̱nꞌ ndii:
“Xa̱ va̱ꞌa̱ na sa̱kanꞌ te̱ ni̱ xini so̱ꞌo̱ i̱ tu̱ꞌu̱n nde̱iꞌ ña̱ ni̱ kaꞌa̱n yu̱vaꞌ i̱ xiinꞌ i̱.
Vä̱ꞌa̱ xa̱tyiꞌ ni̱ xa̱a̱ i̱ ña̱ nï̱ ta̱xi̱ so̱ꞌo̱ i̱ ña̱ ni̱ ka̱ni̱ kuento yu̱vaꞌ i̱ yuꞌu̱.
13 Nï̱ xi̱ni̱ so̱ꞌo̱ i̱ yu̱ꞌuꞌ te̱ ni̱ sa̱niaꞌá yuꞌu̱,
te̱ nï̱ ta̱xi̱ so̱ꞌo̱ tu̱ i̱ yu̱ꞌuꞌ te̱ ni̱ kaꞌa̱n ña̱ kaaꞌ tuní xiinꞌ i̱.
14 Xa̱ ni̱ xa̱a̱ i̱ yatinꞌ sa̱kuuꞌ nuu̱ꞌ ña̱ ni̱a̱ꞌa,
te̱ xa̱ yoo i̱ nduxi̱n xa̱tyiꞌ i̱,
te̱ vi̱ti̱n ndii,
sa̱kuuꞌ ne̱ yivi̱ꞌ ku̱ni̱ ña̱ ka̱ꞌa̱n ña̱ ni̱ xaa̱ i̱,
te̱ ku̱ni̱ tu̱ ña̱ꞌaꞌ ne̱ nakayá xakaꞌnuꞌ Ndiosí”,
katyi̱ u̱nꞌ.
15 Va̱ꞌa̱ ka̱ ko̱ꞌo̱ u̱nꞌ ti̱kui,
teꞌ naá poso mi̱iꞌ u̱nꞌ,
te̱ ti̱kui,
teꞌ kuaꞌa̱ꞌ va̱ kieeꞌ ti̱ko̱yoꞌ mi̱iꞌ ku̱i̱ti̱ꞌ u̱nꞌ ko̱ꞌo̱ u̱nꞌ.
16 Vä̱ꞌa̱ yoo a̱ naaꞌ kuiti̱a̱ saka ti̱kui,
teꞌ kieeꞌ ti̱ko̱ꞌyoꞌ u̱nꞌ ya̱ꞌya̱,
ña̱ ka̱nduꞌu̱ꞌ ñaꞌ siꞌi u̱nꞌ xiinꞌ ndiaa ka̱ te̱ yivi̱ꞌ,
te̱ xikaꞌ sii̱ꞌ ya̱ꞌya̱.
17 Ñaꞌ siꞌi u̱nꞌ,
ñaꞌ nduuꞌ nde̱e̱ naa ti̱ko̱ꞌyoꞌ xiinꞌ ti̱kui ja̱a̱nꞌ ndii,
ña̱ꞌa̱ i̱i̱n nda̱a̱ꞌ mi̱iꞌ u̱nꞌ nduuꞌ a̱.
Te̱ köo̱ꞌ kivi̱ꞌ ta̱xi̱ u̱nꞌ raꞌ nda̱ꞌaꞌ i̱nga̱ te̱ yivi̱ꞌ ndi̱va̱ꞌa̱.
18 Na sa̱ñuꞌuꞌ Ndiosí ti̱ko̱ꞌyoꞌ u̱nꞌ ña̱ nduuꞌ kuenta mi̱iꞌ u̱nꞌ,
te̱ na sii̱ꞌ ku̱ni̱ u̱nꞌ ku̱nduꞌu̱ꞌ u̱nꞌ xiinꞌ ñaꞌ siꞌi u̱nꞌ ja̱a̱nꞌ ñaꞌ ni̱ tu̱ndaꞌa̱ꞌ xiinꞌ u̱nꞌ nde̱e̱ kii̱ꞌ nduuꞌ u̱nꞌ te̱ sa̱va̱.
19 Ñaꞌ ja̱a̱nꞌ ndii,
va̱ꞌa̱ nimá aꞌ,
te̱ sii̱ꞌ tu̱ i̱ni̱ aꞌ nde̱e̱ naa i̱i̱n i̱su̱ siꞌi tiakiꞌ.
Te̱ na sa̱ndaꞌniꞌ aꞌ yoꞌó sa̱a̱ kivi̱ꞌ xiinꞌ ña̱ naya̱kun nda̱ꞌaꞌ u̱nꞌ ndo̱soꞌ aꞌ.
Te̱ na köo̱ꞌ kivi̱ꞌ xa̱vi u̱nꞌ sa̱a̱ ña̱ ndani̱ aꞌ yoꞌó.
20 Yu̱vaꞌ kuaꞌa i̱,
¿ndiotyun na taxiꞌ u̱nꞌ ña̱ xakuitaꞌ ñaꞌ siꞌi i̱nga̱ te̱ yivi̱ꞌ yoꞌó,
te̱ ndiotyun na naya̱kun ndaꞌaꞌ u̱nꞌ ndo̱soꞌ ñaꞌ yoo i̱i̱ꞌ?
21 Sa̱kanꞌ ña̱ xitoꞌ Yahvé ña̱ xaaꞌ sa̱kuuꞌ te̱ yivi̱ꞌ,
te̱ tyuunꞌ xaꞌaꞌ a̱ i̱ꞌi̱n ña̱ xaaꞌ ra̱.
22 I̱i̱n te̱ xaaꞌ ña̱ ni̱a̱ꞌa ndii,
na̱ma̱ mi̱iꞌ ra̱ nuu̱ꞌ ña̱ ni̱a̱ꞌa ña̱ xaaꞌ ra̱ ja̱a̱nꞌ,
te̱ nduuꞌ a̱ nde̱e̱ naa yo̱ꞌoꞌ ña̱ sékun ña̱ꞌaꞌ,
te̱ kü̱vi̱ ka̱ ndi̱e̱ꞌni̱ ra̱ nuu̱ꞌ ku̱a̱tyi̱ ja̱a̱nꞌ.
23 Ka̱ꞌni̱ꞌ xiinꞌ miiꞌ mi̱iꞌ ra̱ xaꞌa̱ꞌ a̱ ña̱ nï̱ xi̱i̱n ra̱ na̱ti̱i̱n ra̱ ña̱ ndiaa yu̱ꞌuꞌ ña̱ꞌaꞌ yu̱vaꞌ siꞌiꞌ ra̱.
Te̱ ndo̱ñuꞌuꞌ xa̱tyiꞌ ra̱ xaꞌa̱ꞌ a̱ ña̱ nï̱ ku̱u̱ kaxiꞌ ra̱.