Yoꞌoꞌ kaꞌán a̱ xaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ Ndiosí xiinꞌ xaꞌa̱ꞌ ña̱ kuäsa̱ꞌ kuní xa̱tyiꞌ ndiosí saka
Kaꞌnuꞌ va̱ ña̱ nduuꞌ Ndiosí.
135
Na sa̱kaꞌnuꞌ e̱ꞌ Yahvé,
xto̱ꞌo̱ e̱ꞌ.
Na sa̱kaꞌnuꞌ e̱ꞌ Yahvé,
na sa̱kaꞌnuꞌ ña̱ꞌaꞌ ndoꞌó,
ne̱ xikaꞌ nuuꞌ nuu̱ꞌ a̱.
2 Ndoꞌó,
ne̱ ndieeꞌ xikaꞌ nuuꞌ nuu̱ꞌ a̱ ti̱xi̱n yu̱kunꞌ a̱,
ndoꞌó,
ne̱ xikaꞌ nuuꞌ nuu̱ꞌ Ndiosí ña̱ xakaꞌnuꞌ e̱ꞌ nuu̱ꞌ ki̱ꞌe̱ yu̱kunꞌ a̱.
3 Na sa̱kaꞌnuꞌ e̱ꞌ Yahvé,
sa̱kanꞌ ña̱ va̱ꞌa̱ va̱ nduuꞌ a̱,
na ka̱ta̱ e̱ꞌ ya̱a̱ nani̱ꞌ nuu̱ꞌ a̱,
sa̱kanꞌ ña̱ vi̱ta va̱ nimá a̱ xini a̱ yooꞌ.
4 Sa̱kanꞌ ña̱ ni̱ na̱ka̱xi̱n a̱ yooꞌ,
ne̱ vi̱ꞌe̱ Jacob,
te̱ ku̱ndu̱u̱ e̱ꞌ ndi̱ti̱a̱ mi̱iꞌ a̱,
ni̱ na̱ka̱xi̱n a̱ yooꞌ,
ne̱ Israel,
te̱ ku̱ndu̱u̱ e̱ꞌ ña̱ꞌa̱ mi̱iꞌ a̱,
te̱ ndiaa yaꞌviꞌ va̱ e̱ꞌ nuu̱ꞌ a̱.
5 Xiní kaxiꞌ yuꞌu̱ ña̱ Yahvé ndii,
ña̱ kaꞌnuꞌ va̱ nduuꞌ a̱,
te̱ ña̱ kaꞌnuꞌ ka̱ nduuꞌ a̱ te̱ sa̱kuuꞌ i̱nga̱ nuu̱ꞌ ndiosí ña̱ yoo.
6 Te̱ Yahvé ndii,
xaaꞌ a̱ ndiaa ka̱ ña̱ kuní mi̱iꞌ a̱ ka̱niiꞌ ndi̱viꞌ xiinꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱,
te̱ sa̱kanꞌ tu̱ xaaꞌ a̱ ña̱ kuní mi̱iꞌ a̱ ka̱niiꞌ nuu̱ꞌ mi̱ni̱ kaꞌnuꞌ xiinꞌ ka̱niiꞌ nde̱ma̱aꞌ ti̱xi̱n mi̱ni̱ ja̱a̱nꞌ miiꞌ kunu va̱ a̱.
7 Ndiosí ja̱a̱nꞌ xaaꞌ sa̱kanꞌ te̱ nakoó viko̱ꞌ ña̱ ku̱a̱xi̱ nde̱e̱ miiꞌ xaꞌa̱n ndi̱ꞌi̱ i̱i̱n yivi̱ꞌ,
te̱ su̱vi̱ tu̱ a̱ xaaꞌ sa̱kanꞌ te̱ xikaꞌ ñuꞌu̱ savi̱ꞌ kii̱ꞌ kuunꞌ savi̱ꞌ,
te̱ su̱vi̱ tu̱ a̱ tiꞌviꞌ tatyi̱ꞌ ndi̱e̱eꞌ te̱ xikaꞌ a̱ tava̱ꞌ ña̱ꞌaꞌ a̱ nde̱e̱ miiꞌ ñuꞌuꞌ va̱ꞌa̱ a̱.
8 Te̱ Ndiosí ja̱a̱nꞌ tu̱ nduuꞌ ña̱ ni̱ xa̱a̱ sa̱kanꞌ,
te̱ ni̱ xiꞌi̱ sa̱kuuꞌ siꞌe̱ nu̱uꞌ ne̱ ndieeꞌ ñu̱ꞌuꞌ Egipto,
ni̱ xa̱ꞌni̱ꞌ a̱ sa̱kuuꞌ siꞌe̱ nu̱uꞌ ne̱ yivi̱ꞌ,
te̱ ni̱ xa̱ꞌni̱ꞌ tu̱ a̱ sa̱kuuꞌ siꞌe̱ nu̱uꞌ ki̱tiꞌ sana̱ ni̱a̱.
9 Ni̱ xa̱a̱ a̱ kuaꞌa̱ꞌ va̱ tyu̱u̱n kaꞌnuꞌ xiinꞌ ña̱ nandani̱ va̱ ka̱niiꞌ nuu̱ꞌ ñu̱ꞌuꞌ Egipto ja̱a̱nꞌ,
ni̱ xa̱a̱ a̱ ña̱ ja̱a̱nꞌ xiinꞌ mi̱iꞌ Faraón,
te̱ ni̱ xa̱a̱ tu̱ a̱ ña̱ ja̱a̱nꞌ xiinꞌ sa̱kuuꞌ ne̱ ñu̱u̱ ra̱.
10 Ni̱ xa̱ꞌni̱ꞌ tu̱ a̱ ne̱ yivi̱ꞌ,
ne̱ ndieeꞌ kiꞌinꞌ ñu̱ꞌuꞌ i̱i̱n yivi̱ꞌ,
te̱ ni̱ xa̱ꞌni̱ꞌ tu̱ a̱ kiꞌinꞌ rey,
te̱ kooꞌ tyukuuꞌ xa̱va̱ꞌa̱,
11 naa kuuꞌ rey Sehón,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ amorreo,
xiinꞌ naa kuuꞌ rey Og,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ ñu̱ꞌuꞌ Basán,
te̱ ni̱ xa̱ꞌni̱ꞌ tu̱ a̱ sa̱kuuꞌ rey,
te̱ ni̱ xa̱ꞌndi̱a̱ tyuunꞌ ka̱niiꞌ nuu̱ꞌ ñu̱ꞌuꞌ Canaán.
12 Te̱ ni̱ ta̱xi̱ Ndiosí ñu̱ꞌuꞌ sa̱kuuꞌ rey ja̱a̱nꞌ nda̱ꞌaꞌ ne̱ xii̱ꞌ ya̱taꞌ e̱ꞌ,
ne̱ vi̱ꞌe̱ Israel,
ku̱ndu̱u̱ ña̱ꞌa̱ ni̱a̱,
ña̱ ja̱a̱nꞌ ku̱ndu̱u̱ ña̱ ndoo̱ nda̱ꞌaꞌ ne̱ nduuꞌ kuenta a̱ ja̱a̱nꞌ.
13 Tákuiꞌe Yahvé,
yoꞌó ndii,
nde̱e̱ ndiꞌiꞌ ni̱ kivi̱ꞌ kaꞌa̱n va̱ꞌa̱ ne̱ yivi̱ꞌ xaꞌa̱ꞌ u̱nꞌ,
te̱ sa̱kuuꞌ ne̱ yivi̱ꞌ,
ne̱ tuví i̱i̱n yivi̱ꞌ,
nakaꞌanꞌ xaꞌa̱ꞌ u̱nꞌ nde̱e̱ ndiꞌiꞌ ni̱ kivi̱ꞌ.
14 Sa̱kanꞌ ña̱ sa̱tyuunꞌ nda̱ku Yahvé xaꞌa̱ꞌ sa̱kuuꞌ yooꞌ,
ne̱ nduuꞌ kuenta a̱,
te̱ ko̱o̱ kaꞌnuꞌ i̱ni̱ a̱ xaꞌa̱ꞌ sa̱kuuꞌ ne̱ xikaꞌ nuuꞌ nuu̱ꞌ a̱.
15 Sa̱kuuꞌ ndiosí ña̱ xakaꞌnuꞌ sa̱kuuꞌ ti̱ꞌvi̱ ne̱ tukuꞌ ndii,
ña̱ ni̱ ku̱a̱ꞌa̱ xiinꞌ plata xiinꞌ oro ku̱i̱ti̱ꞌ nduuꞌ a̱,
te̱ ne̱ yivi̱ꞌ ku̱i̱ti̱ꞌ ni̱ xa̱ꞌa̱ xiinꞌ nda̱ꞌaꞌ a̱.
16 Yoo yu̱ꞌuꞌ a̱,
ndisu̱ kü̱vi̱ nda̱tuꞌunꞌ a̱,
yoo ndu̱tyiꞌ nuu̱ꞌ a̱,
ndisu̱ kü̱vi̱ ko̱to̱ꞌni̱ a̱.
17 Yoo yavi̱ so̱ꞌo̱ a̱,
ndisu̱ kü̱vi̱ ku̱ni̱ so̱ꞌo̱ a̱,
yoo yu̱ꞌuꞌ a̱,
ndisu̱ kü̱vi̱ na̱ꞌi̱ tatyi̱ꞌ a̱.
18 Ne̱ xaꞌa nda̱ꞌaꞌ ndiosí ña̱ xakaꞌnuꞌ ni̱a̱ ja̱a̱nꞌ ndii,
naa iinꞌ mi̱iꞌ ni̱a̱ iinꞌ a̱ ni̱ xa̱a̱ ni̱a̱,
te̱ iinꞌ tu̱ a̱ sa̱a̱ niiꞌ iinꞌ sa̱kuuꞌ ne̱ xakaꞌnuꞌ a̱.
19 Sa̱kuuꞌ yooꞌ,
ne̱ vi̱ꞌe̱ Israel,
na sa̱kaꞌnuꞌ e̱ꞌ Yahvé,
sa̱kuuꞌ ndoꞌó,
sutu̱,
te̱ nduuꞌ si̱a̱niꞌ xikaꞌ Aarón,
sa̱kaꞌnuꞌ ndo̱ꞌ Yahvé.
20 Sa̱kuuꞌ ndoꞌó,
te̱ vi̱ꞌe̱ Leví,
sa̱kaꞌnuꞌ ndo̱ꞌ Yahvé,
sa̱kuuꞌ yooꞌ,
ne̱ xitoꞌ kaꞌnuꞌ Yahvé,
na sa̱kaꞌnuꞌ ña̱ꞌaꞌ e̱ꞌ.
21 Na sa̱kaꞌnuꞌ e̱ꞌ Yahvé nde̱e̱ miiꞌ nduꞌu̱ꞌ a̱ ñu̱u̱ Sión,
sa̱kanꞌ ña̱ nduꞌu̱ꞌ a̱ ñu̱u̱ Jerusalén yoꞌoꞌ xiinꞌ e̱ꞌ.
Kaꞌnuꞌ va̱ ña̱ nduuꞌ Ndiosí.