Yoꞌoꞌ kaꞌán a̱ xaꞌa̱ꞌ ña̱ xatyuunꞌ nda̱ku Ndiosí xaꞌa̱ꞌ ne̱ nduuꞌ kuenta a̱, ne̱ xïkaꞌ nda̱ku i̱tyiꞌ a̱
Ya̱a̱ ña̱ ni̱ xi̱ta̱ Asaf nuu̱ꞌ Ndiosí.
78
Ndoꞌó kuaꞌa,
ne̱ taꞌanꞌ i̱,
ku̱ni̱ so̱ꞌo̱ ndo̱ꞌ tu̱ꞌu̱n nde̱iꞌ i̱.
Te̱ tyu̱nxaꞌaꞌ va̱ ndo̱ꞌ ña̱ kaꞌán i̱ xiinꞌ ndo̱ꞌ.
2 Kaꞌa̱n i̱ nuu̱ꞌ ndo̱ꞌ xiinꞌ ña̱ kaꞌán ndi̱a̱a̱,
te̱ kaꞌa̱n i̱ xiinꞌ ndo̱ꞌ xaꞌa̱ꞌ ña̱ yoo si̱ꞌe ña̱ ni̱ xa̱a̱ Ndiosí xaꞌa̱ꞌ ne̱ xii̱ꞌ ya̱taꞌ e̱ꞌ xta̱ꞌanꞌ kivi̱ꞌ.
3 Ña̱ ja̱a̱nꞌ ndii,
xa̱ ni̱ xi̱ni̱ so̱ꞌo̱ e̱ꞌ e̱,
te̱ ni̱ ku̱nda̱ni̱ tu̱ e̱ꞌ e̱,
ku̱a̱tyi̱ ndii,
xa̱ ni̱ nda̱tuꞌunꞌ te̱ xii̱ꞌ ya̱taꞌ e̱ꞌ ña̱ ja̱a̱nꞌ nuu̱ꞌ e̱ꞌ.
4 Te̱ kuní a̱ ña̱ nda̱tuꞌunꞌ e̱ꞌ xaꞌa̱ꞌ a̱ nuu̱ꞌ siꞌe̱ e̱ꞌ,
te̱ kaꞌa̱n e̱ꞌ xiinꞌ si̱a̱niꞌ xikaꞌ e̱ꞌ,
ne̱ ko̱o̱ nuu̱ꞌ kuꞌu̱n e̱ꞌ xaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ Yahvé.
Kaꞌa̱n e̱ꞌ xiinꞌ ni̱a̱ xaꞌa̱ꞌ ña̱ ndi̱e̱eꞌ a̱ xiinꞌ xaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ a̱.
5 Sa̱kanꞌ ña̱ ni̱ ta̱xi̱ a̱ tu̱ꞌu̱n nde̱iꞌ a̱ nda̱ꞌaꞌ Jacob,
uun ndo̱ꞌ,
ni̱ sa̱na̱kuaꞌa a̱ ña̱ kaꞌán tuní a̱ nuu̱ꞌ ne̱ vi̱ꞌe̱ Israel.
Ni̱ kaꞌa̱n tyuunꞌ a̱ nuu̱ꞌ te̱ xii̱ꞌ ya̱taꞌ e̱ꞌ ja̱a̱nꞌ ña̱ sa̱niaꞌá ra̱ nde̱iꞌ ja̱a̱nꞌ nuu̱ꞌ siꞌe̱ ra̱.
6 Sa̱kanꞌ te̱ ku̱nda̱ni̱ ne̱ yivi̱ꞌ,
ne̱ ko̱o̱ nuu̱ꞌ kuꞌu̱n e̱ꞌ,
ne̱ kuní ka̱ tuvi̱ kii̱ꞌ sa̱kanꞌ,
xaꞌa̱ꞌ a̱,
te̱ ne̱ ja̱a̱nꞌ sa̱niaꞌá xaꞌa̱ꞌ ña̱ ja̱a̱nꞌ siꞌe̱ ni̱a̱.
7 Te̱ i̱ni̱ ne̱ ja̱a̱nꞌ ku̱ni̱ ni̱a̱ Ndiosí,
te̱ nä̱ndoso̱ꞌ ni̱a̱ xaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ a̱.
Te̱ sa̱xinú tu̱ ni̱a̱ ña̱ kaꞌán tyuunꞌ a̱.
8 Sa̱kanꞌ te̱ sä̱a̱ ni̱a̱ naa ni̱ xa̱a̱ ne̱ xii̱ꞌ ya̱taꞌ ni̱a̱ nuu̱ꞌ Ndiosí,
ne̱ ja̱a̱nꞌ ndii,
ne̱ so̱ꞌo̱ ni̱ nduu̱ ni̱a̱ nuu̱ꞌ a̱,
te̱ ni̱ nduu̱ tu̱ ni̱a̱ ne̱ xi̱i̱ nimá,
ne̱ ja̱a̱nꞌ ndii,
nï̱ kuni̱ ni̱a̱ sa̱na̱kuaꞌa ni̱a̱ nimá ni̱a̱ nda̱ꞌaꞌ Ndiosí,
sa̱kanꞌ ña̱ nï̱ xa̱tyuunꞌ nda̱ku ni̱a̱ nuu̱ꞌ a̱ xiinꞌ nimá ni̱a̱.
9 Sa̱kuuꞌ tiaa̱ siꞌe̱ Efraín ndii,
tee̱ꞌ ndee ndisoꞌ ra̱ tunꞌ to̱so̱ xiinꞌ kuxi̱,
ndisu̱ kii̱ꞌ ni̱ xaꞌa̱n ku̱ntaꞌanꞌ ra̱ xiinꞌ te̱ ndasiꞌ taꞌanꞌ xiinꞌ ra̱ ndii,
ni̱ xi̱nu̱ ra̱ taxtaꞌanꞌ yiꞌvi ra̱.
10 Sa̱kanꞌ ña̱ nï̱ sa̱xinú ra̱ kuento ña̱ ni̱ ndoo̱ ra̱ nuu̱ꞌ Ndiosí,
ni̱ nde̱e̱ nï̱ xi̱i̱n tu̱ ra̱ ka̱ka̱ ra̱ sa̱a̱ kaꞌán tyuunꞌ a̱ xiinꞌ ra̱.
11 Süu̱ꞌ ja̱a̱nꞌ ndii,
ni̱ na̱ndoso̱ꞌ ra̱ xaꞌa̱ꞌ sa̱kuuꞌ tyu̱u̱n kaꞌnuꞌ ña̱ ni̱ xa̱a̱ Ndiosí,
ña̱ nduuꞌ tyu̱u̱n kaꞌnuꞌ ña̱ ni̱ niaꞌa̱ a̱ nuu̱ꞌ ra̱.
12 Te̱ ni̱ na̱ndoso̱ꞌ tu̱ ra̱ xaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ Ndiosí nuu̱ꞌ ne̱ xii̱ꞌ ya̱taꞌ ra̱
nuu̱ꞌ ñu̱ꞌuꞌ Egipto yo̱soꞌ ña̱ naniꞌ Zoán.
13 Naa kuuꞌ ña̱ ni̱ nu̱niaꞌ a̱ ti̱kui mi̱ni̱ kuaꞌa,
te̱ ni̱ ndiaka̱ ña̱ꞌaꞌ a̱ ni̱ xkaꞌndi̱a̱ ni̱a̱ mi̱ni̱ ja̱a̱nꞌ,
te̱ kii̱ꞌ xkaꞌndíá ni̱a̱ mi̱ni̱ ja̱a̱nꞌ ndii,
ni̱ na̱ta̱ꞌviꞌ ma̱ꞌiꞌ a̱ ti̱kui,
te̱ ni̱ ti̱i̱n ndi̱a̱a̱ ña̱ꞌaꞌ a̱ te̱ köyo̱ raꞌ siki̱ꞌ ni̱a̱.
14 I̱i̱n keꞌinꞌ ndii,
xiinꞌ viko̱ꞌ ni̱ ndiaka̱ ña̱ꞌaꞌ a̱ kuaꞌa̱n ni̱a̱,
te̱ ñu̱u ni̱ ndiaka̱ ña̱ꞌaꞌ a̱ xiinꞌ ñuꞌu̱ ndatin.
15 Te̱ ni̱ ta̱ꞌviꞌ tu̱ Ndiosí ka̱va̱ꞌ miiꞌ i̱tyi kaaꞌ,
te̱ ni̱ ta̱xi̱ a̱ ti̱kui,
nde̱e̱ naa teꞌ kieeꞌ nde̱e̱ ma̱aꞌ ti̱xi̱n ñu̱ꞌuꞌ,
ni̱ xi̱ꞌi̱ ni̱a̱.
16 Te̱ xata̱ꞌ ka̱va̱ꞌ ja̱a̱nꞌ ni̱ ta̱va̱ꞌ a̱ kuaꞌa̱ꞌ va̱ ti̱kui,
te̱ ni̱ ki̱e̱e̱ raꞌ nde̱e̱ naa te̱ñuꞌu̱ꞌ i̱ti̱a̱.
17 Ndisu̱ ne̱ ja̱a̱nꞌ ndii,
ni̱ xa̱a̱ naa ni̱ xa̱a̱ ni̱a̱ ku̱a̱tyi̱ nuu̱ꞌ a̱,
te̱ xiinꞌ ña̱ ja̱a̱nꞌ ni̱ xa̱teiꞌ ni̱a̱ nuu̱ꞌ Ndiosí kaꞌnuꞌ va̱ ña̱ nduꞌu̱ꞌ ndi̱viꞌ kii̱ꞌ ni̱ xika̱ ni̱a̱ miiꞌ i̱tyi kaaꞌ.
18 Sa̱kanꞌ ña̱ ni̱ xi̱to̱ ku̱a̱ꞌa̱ ni̱a̱ Ndiosí xiinꞌ nimá ni̱a̱,
xikán ni̱a̱ nuu̱ꞌ a̱ ña̱ xaxi̱ꞌ ña̱ ndi̱e̱eꞌ va̱ kaꞌán nimá ni̱a̱ ku̱xi̱ ni̱a̱.
19 Ni̱ kaꞌa̱n i̱ꞌni̱ ni̱a̱ xaꞌa̱ꞌ Ndiosí kii̱ꞌ ni̱ kaꞌa̱n ni̱a̱ ndii:
“Kü̱vi̱ ta̱xi̱ Ndiosí ña̱ ku̱xi̱ e̱ꞌ miiꞌ i̱tyi kaaꞌ yoꞌoꞌ.
20 Xa̱ ni̱ ku̱vi̱ ni̱ ta̱ꞌviꞌ a̱ ka̱va̱ꞌ te̱ ta̱xi̱ a̱ ti̱kui ko̱ꞌo̱ e̱ꞌ,
te̱ nde̱e̱ ni̱ na̱kaa̱ kuaꞌa̱ꞌ ti̱kui kuaꞌa̱n ra̱ nuu̱ꞌ ñu̱ꞌuꞌ,
ndisu̱ kü̱vi̱ ta̱xi̱ a̱ nde̱i̱ꞌ ku̱xi̱ yooꞌ,
ne̱ nduuꞌ kuenta a̱,
miiꞌ i̱tyi kaaꞌ yoꞌoꞌ”,
ni̱ katyi̱ ni̱a̱.
21 Kii̱ꞌ ni̱ xi̱ni̱ so̱ꞌo̱ Yahvé ña̱ ni̱ kaꞌa̱n ni̱a̱ ja̱a̱nꞌ ndii,
nï̱ xta̱ni̱ xa̱tyiꞌ a̱ ña̱ ja̱a̱nꞌ,
te̱ ni̱ na̱saa̱ꞌ xa̱va̱ꞌa̱ a̱ ni̱ xi̱ni̱ a̱ ne̱ vi̱ꞌe̱ Jacob,
ni̱ xiꞌe̱ xa̱va̱ꞌa̱ a̱ ni̱ xi̱ni̱ ne̱ vi̱ꞌe̱ Israel ja̱a̱nꞌ.
22 Sa̱kanꞌ ña̱ nï̱ kandixaꞌ ni̱a̱ Ndiosí,
te̱ ni̱ nde̱e̱ nï̱ i̱ni̱ tu̱ ni̱a̱ ña̱ ku̱vi̱ ko̱to̱ ña̱ꞌaꞌ a̱.
23 Nde̱e̱ sa̱a̱ ka̱ ni̱ ndii,
ni̱ kaꞌa̱n tyuunꞌ a̱ xiinꞌ viko̱ꞌ ña̱ ndieeꞌ ndi̱viꞌ,
te̱ ni̱ nuni̱a̱ꞌ yiꞌeꞌ ndi̱viꞌ.
24 Te̱ ni̱ sa̱kuunꞌ a̱ ña̱ xaxi̱ꞌ ña̱ naniꞌ maná ni̱ xa̱xi̱ꞌ ni̱a̱,
ña̱ ja̱a̱nꞌ nduuꞌ ndi̱kinꞌ trigo ña̱ ni̱ ki̱e̱e̱ ndi̱viꞌ.
25 Xita̱ꞌ va̱ꞌa̱,
ña̱ xixiꞌ ángele,
ni̱ xi̱xi̱ ne̱ yivi̱ꞌ ni̱ xa̱a̱ Ndiosí,
te̱ ni̱ ta̱xi̱ a̱ ni̱ xi̱xi̱ ni̱a̱ ña̱ ja̱a̱nꞌ nde̱e̱ ni̱ nda̱ꞌni̱ ni̱a̱.
26 Ni̱ nu̱niaꞌ Ndiosí ndi̱viꞌ,
te̱ xiinꞌ ndi̱e̱e̱ꞌ a̱ ni̱ xa̱ꞌaꞌ xikaꞌ va̱ tatyi̱ꞌ i̱ꞌniꞌ ña̱ ku̱a̱xi̱ suꞌma̱ꞌ ñu̱ꞌuꞌ i̱i̱n yivi̱ꞌ.
27 Te̱ ni̱ sa̱koyó a̱ kuaꞌa̱ꞌ xa̱va̱ꞌa̱ nde̱i̱ꞌ ku̱xi̱ ni̱a̱ nde̱e̱ naa ya̱kaꞌ,
kuaꞌa̱ꞌ xa̱va̱ꞌa̱ sa̱a̱ ni̱ sa̱koyó a̱ nuu̱ꞌ ni̱a̱ nde̱e̱ naa kuaꞌa̱ꞌ ñu̱tiꞌ ña̱ ndieeꞌ yu̱ꞌuꞌ mi̱ni̱ kaꞌnuꞌ.
28 Ni̱ sa̱koyó a̱ riꞌ kaniiꞌ miiꞌ ndieeꞌ ni̱a̱,
ni̱ sa̱koyó a̱ riꞌ sa̱a̱ xinundu̱u̱ i̱ꞌi̱n vi̱ꞌe̱ miiꞌ ndieeꞌ ni̱a̱ ja̱a̱nꞌ.
29 Ni̱ xi̱xi̱ ni̱a̱ riꞌ nde̱e̱ ni̱ nda̱ꞌni̱ ni̱a̱,
sa̱kanꞌ ni̱ xa̱a̱ a̱,
te̱ ni̱ sa̱xinú a̱ ña̱ kaꞌán nimá ni̱a̱.
30 Nde̱e̱ tïaꞌa̱an nda̱ꞌni̱ vi̱ꞌ ni̱a̱ ku̱xi̱ ni̱a̱ tiꞌ ja̱a̱nꞌ,
nde̱e̱ kuuꞌ saaꞌ ñuꞌuꞌ ka̱ nde̱i̱ꞌ riꞌ yu̱ꞌuꞌ ni̱a̱ xixiꞌ ni̱a̱,
31 te̱ ni̱ na̱saa̱ꞌ xa̱va̱ꞌa̱ Ndiosí ni̱ xi̱ni̱ ña̱ꞌaꞌ a̱,
sa̱kanꞌ na ni̱ xa̱ꞌni̱ꞌ a̱ te̱ yivi̱ꞌ,
te̱ ndi̱e̱eꞌ ka̱,
te̱ saká te̱i̱n ni̱a̱,
te̱ ni̱ xa̱ꞌni̱ꞌ ndo̱o̱ tu̱ a̱ te̱ sa̱va̱,
te̱ xtoꞌniꞌ va̱,
te̱ saká te̱i̱n ne̱ vi̱ꞌe̱ Israel ja̱a̱nꞌ.
32 Nde̱e̱ sa̱a̱ ka̱ ni̱ ndii,
ni̱ xa̱a̱ naa ni̱ xa̱a̱ ni̱a̱ ku̱a̱tyi̱ nuu̱ꞌ Ndiosí,
te̱ nï̱ xi̱i̱n ni̱a̱ ka̱ndi̱xaꞌ ña̱ꞌaꞌ ni̱a̱ tee̱ꞌ ndee ni̱ xi̱ni̱ ni̱a̱ ña̱ ni̱ xa̱a̱ a̱ kuaꞌa̱ꞌ tyu̱u̱n kaꞌnuꞌ.
33 Sa̱kanꞌ na kuiiꞌ ni̱ sa̱ndiꞌiꞌ a̱ kivi̱ꞌ ñu̱u̱ sa̱kuuꞌ ni̱a̱ nuu̱ꞌ ña̱ kuäsa̱ꞌ kuní nde̱e̱ naa xaaꞌ e̱ꞌ tava̱ꞌ e̱ꞌ tatyi̱ꞌ yu̱ꞌuꞌ e̱ꞌ ku̱i̱ti̱ꞌ,
te̱ kivi̱ꞌ ñu̱u̱ ni̱a̱ ña̱ ka̱ka̱ ka̱ na ni̱a̱ i̱i̱n yivi̱ꞌ ndii,
ku̱ti̱a̱ku̱ ndoꞌoꞌ va̱ ni̱a̱ sa̱a̱ a̱.
34 Kii̱ꞌ ni̱ xa̱ꞌaꞌ Ndiosí xaꞌni̱ꞌ ña̱ꞌaꞌ a̱ ndii,
sa̱kanꞌ vi̱ꞌ te̱ ni̱ xa̱ꞌaꞌ ni̱a̱ nandukuꞌ ña̱ꞌaꞌ ni̱a̱,
ni̱ na̱ma̱ ni̱a̱ nimá ni̱a̱,
te̱ ni̱ xa̱ꞌaꞌ ni̱a̱ saxinú xna̱ꞌa̱ ni̱a̱ ña̱ kaꞌán tyuunꞌ a̱.
35 Sa̱kanꞌ vi̱ꞌ te̱ ni̱ na̱ka̱ꞌanꞌ ni̱a̱ ña̱ Ndiosí ja̱a̱nꞌ nduuꞌ nde̱e̱ naa i̱i̱n vi̱ꞌe̱ yuu̱ꞌ miiꞌ ku̱vi̱ kaku̱ ni̱a̱.
Te̱ Ndiosí kaꞌnuꞌ va̱ ña̱ nduꞌu̱ꞌ ndi̱viꞌ nduuꞌ ña̱ tyaꞌvi̱ xaꞌa̱ꞌ ku̱a̱tyi̱ ni̱a̱.
36 Nde̱e̱ sa̱a̱ ka̱ ni̱ ndii,
sa̱kuuꞌ ña̱ ni̱ xa̱a̱ ni̱a̱ ja̱a̱nꞌ ndii,
tu̱n vixi̱ ku̱i̱ti̱ꞌ ni̱ nduu̱ a̱,
te̱ ni̱ xi̱ni̱ xaꞌanꞌ ña̱ꞌaꞌ ni̱a̱ xiinꞌ ña̱ ni̱ kaꞌa̱n ni̱a̱ ja̱a̱nꞌ.
37 Sa̱kanꞌ ña̱ nï̱ xa̱tyuunꞌ nda̱ku nimá ni̱a̱ nuu̱ꞌ a̱,
te̱ nï̱ sa̱xinú ni̱a̱ kuento ña̱ ni̱ ta̱xi̱ a̱ nuu̱ꞌ ni̱a̱ sa̱a̱ ni̱a̱.
38 Ndisu̱ Ndiosí,
xaꞌa̱ꞌ ña̱ kuvita i̱ni̱ a̱ xaꞌa̱ꞌ ni̱a̱ ndii,
ni̱ yoo̱ kaꞌnuꞌ i̱ni̱ a̱ xaꞌa̱ꞌ ku̱a̱tyi̱ ni̱a̱,
te̱ nï̱ xaꞌni̱ꞌ a̱ sa̱kuuꞌ ni̱a̱
te̱ kuaꞌa̱ꞌ va̱ i̱tyiꞌ ndii,
ndee tyaaꞌ va̱ te̱ ka̱ꞌni̱ꞌ ña̱ꞌaꞌ a̱,
ndisu̱ nï̱ xa̱ꞌni̱ꞌ ña̱ꞌaꞌ a̱ tee̱ꞌ ndee ni̱ xiꞌe̱ xa̱va̱ꞌa̱ a̱ ni̱ xi̱ni̱ ña̱ꞌaꞌ a̱ kiꞌinꞌ va̱ i̱tyiꞌ.
39 Sa̱kanꞌ te̱ ni̱ na̱ka̱ꞌanꞌ a̱ ña̱ ne̱ yivi̱ꞌ i̱i̱n yivi̱ꞌ ku̱i̱ti̱ꞌ nduuꞌ ni̱a̱,
te̱ nduuꞌ ni̱a̱ nde̱e̱ naa tatyi̱ꞌ ña̱ xkaꞌndíá kuaꞌa̱n ku̱i̱ti̱ꞌ,
te̱ köo̱ꞌ kivi̱ꞌ nandikoꞌ ka̱ a̱.
40 Kuaꞌa̱ꞌ va̱ i̱tyiꞌ ni̱ xa̱so̱ꞌo̱ ni̱a̱ nuu̱ꞌ Ndiosí miiꞌ i̱tyi kaaꞌ,
te̱ ni̱ sa̱ku̱sutyiꞌ va̱ ni̱a̱ i̱ni̱ a̱ nuu̱ꞌ ñu̱ꞌuꞌ miiꞌ i̱tyi kaaꞌ ja̱a̱nꞌ miiꞌ köo̱ꞌ nde̱e̱ i̱i̱n ña̱ꞌa̱ yooꞌ.
41 Ndisu̱ xa̱u̱u̱n xa̱u̱u̱n ni̱,
te̱ ni̱ xa̱a̱ ni̱a̱ ku̱a̱tyi̱ nuu̱ꞌ a̱,
te̱ ni̱ sa̱ta̱ñaꞌa̱ꞌ xa̱va̱ꞌa̱ ni̱a̱ nuu̱ꞌ Ndiosí su̱ꞌu̱n ña̱ xakaꞌnuꞌ yooꞌ,
ne̱ vi̱ꞌe̱ Israel.
42 Te̱ ni̱ na̱ndoso̱ꞌ ni̱a̱ xaꞌa̱ꞌ ña̱ ndi̱e̱eꞌ a̱,
te̱ ni̱ na̱ndoso̱ꞌ tu̱ ni̱a̱ sa̱a̱ ni̱ xa̱a̱ a̱ kii̱ꞌ ni̱ tya̱ꞌvi̱ a̱ xaꞌa̱ꞌ ni̱a̱,
te̱ ni̱ sa̱kakú ña̱ꞌaꞌ a̱ nda̱ꞌaꞌ te̱ ndasiꞌ taꞌanꞌ xiinꞌ ni̱a̱.
43 Ni̱ na̱ndoso̱ꞌ ni̱a̱ xaꞌa̱ꞌ sa̱kuuꞌ tyu̱u̱n kaꞌnuꞌ ña̱ ni̱ xa̱a̱ a̱ nuu̱ꞌ ñu̱ꞌuꞌ Egipto,
ni̱ na̱ndoso̱ꞌ ni̱a̱ xaꞌa̱ꞌ ña̱ nandani̱ ña̱ ni̱ xa̱a̱ a̱ nuu̱ꞌ ni̱a̱ nuu̱ꞌ ñu̱ꞌuꞌ ña̱ naniꞌ Zoán.
44 Kii̱ꞌ ni̱ sa̱na̱nduuꞌ a̱ ti̱kui i̱ti̱a̱ níiꞌ,
sa̱kanꞌ te̱ nde̱e̱ i̱i̱n ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ nï̱ ku̱vi̱ ko̱ꞌo̱ ti̱kui nde̱e̱ i̱i̱n yivi̱ ja̱a̱nꞌ.
45 Te̱ ni̱ ti̱ꞌviꞌ tu̱ a̱ kuaꞌa̱ꞌ xa̱va̱ꞌa̱ ti̱xa̱ꞌndu,
te̱ sa̱ndoꞌoꞌ va̱ ña̱ꞌaꞌ riꞌ,
te̱ ni̱ ti̱ꞌviꞌ tu̱ a̱ kuaꞌa̱ꞌ xa̱va̱ꞌa̱ saꞌva̱,
te̱ ni̱ sa̱nduxín ndo̱o̱ riꞌ miiꞌ ndieeꞌ ni̱a̱.
46 Te̱ ni̱ ti̱ꞌviꞌ tu̱ a̱ kuaꞌa̱ꞌ xa̱va̱ꞌa̱ ti̱ku̱xiꞌ,
te̱ ni̱ xa̱xi̱ꞌ ndo̱o̱ riꞌ ña̱ saviꞌ ña̱ ni̱ tyi̱ꞌi̱ ni̱a̱,
te̱ ni̱ xa̱xi̱ꞌ ndo̱o̱ tu̱ riꞌ sa̱kuuꞌ ña̱ savi̱ꞌ ña̱ kaꞌán ni̱a̱ xaꞌa̱ꞌ.
47 Te̱ ni̱ sa̱nduxín tu̱ a̱ sa̱kuuꞌ yo̱ꞌoꞌ uva ni̱a̱ xiinꞌ iꞌinꞌ naꞌnuꞌ va̱,
te̱ sa̱kanꞌ tu̱ ni̱ sa̱nduxín a̱ sa̱kuuꞌ tunꞌ ndo̱koꞌ higuera ni̱a̱ xiinꞌ iꞌinꞌ ja̱a̱nꞌ.
48 Te̱ ni̱ xa̱ꞌni̱ꞌ ndo̱o̱ tu̱ a̱ si̱ndiki̱ꞌ sana̱ ni̱a̱ xiinꞌ iꞌinꞌ naꞌnuꞌ ja̱a̱nꞌ,
te̱ xiinꞌ ñuꞌu̱ savi̱ꞌ ni̱ xa̱ꞌni̱ꞌ ndo̱o̱ tu̱ a̱ mbe̱e̱ sana̱ ni̱a̱.
49 Te̱ xaꞌa̱ꞌ a̱ ña̱ xiꞌé va̱ Ndiosí xini a̱ ne̱ ja̱a̱nꞌ ndii,
ni̱ sa̱ndoꞌoꞌ xa̱va̱ꞌa̱ ña̱ꞌaꞌ a̱
xiinꞌ sa̱kuuꞌ ña̱ xiꞌé a̱ ja̱a̱nꞌ,
xiinꞌ ña̱ nï̱ xta̱ni̱ a̱,
xiinꞌ ña̱ ni̱ sa̱nduxín xa̱tyiꞌ ña̱ꞌaꞌ a̱.
Ni̱ ti̱ꞌviꞌ a̱ kuaꞌa̱ꞌ ángele,
te̱ ni̱ xa̱ꞌni̱ꞌ a̱ ne̱ yivi̱ꞌ,
ne̱ ndieeꞌ nuu̱ꞌ ñu̱ꞌuꞌ Egipto.
50 Ni̱ na̱saa̱ꞌ xa̱va̱ꞌa̱ Ndiosí ni̱ xi̱ni̱ a̱ ne̱ ja̱a̱nꞌ,
sa̱kanꞌ na nï̱ yoo̱ kaꞌnuꞌ i̱ni̱ a̱ xaꞌa̱ꞌ ni̱a̱,
süu̱ꞌ ja̱a̱nꞌ ndii,
ni̱ xa̱ꞌni̱ꞌ a̱ sa̱kuuꞌ ni̱a̱ xiinꞌ kuiꞌe̱.
51 Sa̱kanꞌ na ni̱ xa̱ꞌni̱ꞌ a̱ tiaa̱ siꞌe̱ nu̱uꞌ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto,
siꞌe̱ nu̱uꞌ ni̱a̱,
te̱ ni̱ yoo̱ kii̱ꞌ naá va̱ ña̱ ndi̱e̱eꞌ ni̱a̱.
52 Ndisu̱ ni̱ ta̱va̱ꞌ a̱ ne̱ nduuꞌ kuenta a̱ nde̱e̱ naa xaaꞌ te̱ pa̱xto tava̱ꞌ ra̱ mbe̱e̱ sana̱ ra̱,
te̱ ni̱ ndiaka̱ ña̱ꞌaꞌ a̱ ni̱ xaꞌa̱n a̱ xiinꞌ ni̱a̱ miiꞌ i̱tyi kaaꞌ,
te̱ köo̱ꞌ a̱ ni̱ ndo̱ꞌo̱ nde̱e̱ i̱i̱n ni̱a̱.
53 Ni̱ xi̱to̱ va̱ꞌa̱ ña̱ꞌaꞌ a̱,
sa̱kanꞌ te̱ kü̱yi̱ꞌvi ni̱a̱,
ndisu̱ te̱ ndasiꞌ taꞌanꞌ xiinꞌ ni̱a̱ ndii,
ni̱ tavi̱ ña̱ꞌaꞌ ti̱kui mi̱ni̱ kuaꞌa ni̱ xa̱a̱ a̱.
54 Te̱ ni̱ xaꞌa̱n ndi̱a̱ka̱ ña̱ꞌaꞌ a̱ nde̱e̱ xeꞌinꞌ ñu̱ꞌuꞌ su̱ꞌu̱n yoꞌoꞌ,
ña̱ ni̱ ka̱nandoo a̱ ku̱ndu̱u̱ ña̱ꞌa̱ ne̱ ja̱a̱nꞌ.
55 Te̱ kii̱ꞌ xkaꞌndíá a̱ kuaꞌa̱n a̱ xiinꞌ ne̱ Israel ja̱a̱nꞌ ndii,
ni̱ ta̱xiꞌ ndo̱o̱ a̱ ne̱ tukuꞌ,
ne̱ ndieeꞌ nuu̱ꞌ ñu̱ꞌuꞌ ja̱a̱nꞌ,
te̱ ni̱ na̱ta̱ꞌviꞌ a̱ ñu̱ꞌuꞌ ja̱a̱nꞌ ndoo̱ nda̱ꞌaꞌ i̱ꞌi̱n ne̱ vi̱ꞌe̱ Israel ku̱ndu̱u̱ ña̱ꞌa̱ ni̱a̱ xiinꞌ ña̱ kati̱n.
Te̱ ni̱ na̱tyi̱ndi̱e̱e̱ a̱ i̱ꞌi̱n ti̱ꞌvi̱ ni̱a̱ vi̱ꞌe̱ ni̱a̱.
56 Ndisu̱ ne̱ ja̱a̱nꞌ ndii,
ni̱ xi̱to̱ ku̱a̱ꞌa̱ ni̱a̱ Ndiosí,
te̱ ni̱ sa̱na̱saáꞌ ña̱ꞌaꞌ ni̱a̱,
te̱ nï̱ sa̱xinú ni̱a̱ tu̱ꞌu̱n nde̱iꞌ a̱.
57 Süu̱ꞌ ja̱a̱nꞌ ndii,
ni̱ na̱ko̱o̱ ña̱ꞌaꞌ ni̱a̱ xata̱ꞌ ni̱a̱,
te̱ ni̱ xa̱teiꞌ ni̱a̱ nuu̱ꞌ a̱ nde̱e̱ naa ni̱ xa̱a̱ yu̱vaꞌ siꞌiꞌ ni̱a̱.
Te̱ ni̱ xa̱tyuunꞌ yakuaꞌ ni̱a̱ nde̱e̱ naa i̱i̱n tunꞌ to̱so̱,
tunꞌ yakuaꞌ.
58 Ni̱ sa̱na̱saáꞌ ña̱ꞌaꞌ ni̱a̱ kii̱ꞌ ni̱ xa̱ꞌa̱ ni̱a̱ kiꞌinꞌ altar miiꞌ ni̱ xa̱kaꞌnuꞌ ni̱a̱ i̱nga̱ ndiosí xíniꞌ i̱kuꞌ,
te̱ ni̱ xa̱kuiñu ña̱ꞌaꞌ a̱ kii̱ꞌ ni̱ xi̱ni̱ a̱ xakaꞌnuꞌ ni̱a̱ ndiosí ña̱ xaꞌa nda̱ꞌaꞌ mi̱iꞌ ni̱a̱.
59 Ni̱ na̱saa̱ꞌ xa̱va̱ꞌa̱ Ndiosí kii̱ꞌ ni̱ xi̱ni̱ so̱ꞌo̱ a̱ sa̱kuuꞌ ña̱ xaaꞌ ni̱a̱ ja̱a̱nꞌ,
sa̱kanꞌ na kuiiꞌ ni̱ ku̱nda̱siꞌ xa̱va̱ꞌa̱ a̱ ne̱ xii̱ꞌ ya̱taꞌ e̱ꞌ,
ne̱ vi̱ꞌe̱ Israel ja̱a̱nꞌ,
te̱ ni̱ sa̱xi̱o̱o̱ ña̱ꞌaꞌ a̱ nuu̱ꞌ a̱.
60 Sa̱kanꞌ te̱ ni̱ na̱ko̱o̱ a̱ vi̱ꞌe̱ toto̱ miiꞌ ni̱ nduꞌu̱ꞌ a̱ ñu̱u̱ Silo,
sa̱kanꞌ ña̱ i̱kanꞌ ni̱ ii̱n vi̱ꞌe̱ toto̱ ni̱ nduꞌu̱ꞌ a̱ te̱i̱n ne̱ nduuꞌ kuenta a̱.
61 Ni̱ ta̱xi̱ a̱ ña̱ na̱ꞌi̱ te̱ ndasiꞌ taꞌanꞌ xiinꞌ a̱ xatu̱nꞌ miiꞌ naá kuento a̱ ña̱ ni̱ ndoo̱ a̱ xiinꞌ ne̱ vi̱ꞌe̱ Israel,
ne̱ nduuꞌ kuenta a̱ ja̱a̱nꞌ,
ni̱ ta̱xi̱ a̱ ña̱ na̱ꞌi̱ te̱ ndasiꞌ taꞌanꞌ xiinꞌ a̱ xatu̱nꞌ miiꞌ naá kuento a̱ ja̱a̱nꞌ ña̱ niaꞌá ña̱ kaꞌnuꞌ a̱.
62 Ni̱ sa̱na̱kuaꞌa tu̱ a̱ ne̱ nduuꞌ kuenta a̱ nda̱ꞌaꞌ te̱ ndasiꞌ taꞌanꞌ xiinꞌ a̱ te̱ ka̱ꞌni̱ꞌ ña̱ꞌaꞌ ra̱ xiinꞌ ityi̱,
sa̱kanꞌ ña̱ ni̱ na̱saa̱ꞌ xa̱va̱ꞌa̱ a̱ ni̱ xi̱ni̱ a̱ ne̱ nduuꞌ kuenta a̱ ja̱a̱nꞌ.
63 Te̱ ni̱ xa̱ꞌmi̱ꞌ te̱ ndasiꞌ taꞌanꞌ xiinꞌ a̱ te̱ sa̱va̱,
siꞌe̱ ne̱ nduuꞌ kuenta a̱ ja̱a̱nꞌ,
xiinꞌ ñuꞌu̱ ndatin,
xaꞌa̱ꞌ a̱ ja̱a̱nꞌ na kuiiꞌ nï̱ yoo̱ ka̱ nde̱e̱ i̱i̱n te̱ yivi̱ꞌ,
te̱ tu̱ndaꞌa̱ꞌ xiinꞌ ne̱ sa̱va̱,
te̱ köo̱ꞌ ni̱ xitaꞌ ka̱ ya̱a̱ ña̱ tundaꞌáꞌ xaꞌa̱ꞌ ni̱a̱.
64 Te̱ ni̱ xa̱ꞌni̱ꞌ tu̱ te̱ yivi̱ꞌ sutu̱,
te̱ xikaꞌ nuuꞌ nuu̱ꞌ Ndiosí,
te̱ ña̱ꞌaꞌ kuaa̱nꞌ ndii,
nï̱ xa̱ku̱ ni̱a̱ xaꞌa̱ꞌ ña̱ ni̱ xiꞌi̱ te̱ ja̱a̱nꞌ,
sa̱kanꞌ ña̱ nde̱e̱ nï̱ ku̱ni̱a̱ꞌa̱ ni̱a̱.
65 Sa̱kanꞌ vi̱ꞌ te̱ ni̱ ndo̱to̱ nuu̱ꞌ Tákuiꞌe Ndiosí nde̱e̱ naa xaaꞌ i̱i̱n te̱ ni̱ ndo̱to̱ kii̱ꞌ kixín ra̱,
nde̱e̱ naa xaaꞌ i̱i̱n te̱ xini̱ ndi̱e̱ni va̱ kii̱ꞌ nakunaá nimá ra̱,
te̱ ndeꞌí tiꞌeꞌ ra̱ ña̱ kuaꞌa̱ꞌ va̱ ndi̱xi̱ ni̱ xi̱ꞌi̱ ra̱.
66 Ni̱ ka̱nandoo a̱ sa̱kuuꞌ te̱ ndasiꞌ taꞌanꞌ xiinꞌ a̱ kii̱ꞌ köo̱ꞌ a̱ naá nimá ra̱,
te̱ ni̱ sa̱kaꞌanꞌ ña̱ꞌaꞌ a̱ nde̱e̱ ndiꞌiꞌ ni̱ kivi̱ꞌ.
67 Te̱ ni̱ sa̱xi̱o̱o̱ tu̱ a̱ ne̱ vi̱ꞌe̱ José,
te̱ nï̱ na̱ti̱i̱n tu̱ a̱ ne̱ vi̱ꞌe̱ Efraín.
68 Süu̱ꞌ ja̱a̱nꞌ ndii,
ti̱ꞌvi̱ ne̱ vi̱ꞌe̱ Judá ni̱ na̱ka̱xi̱n a̱,
te̱ ni̱ na̱ka̱xi̱n tu̱ a̱ i̱kuꞌ Sión,
ña̱ ndani̱ a̱.
69 Te̱ i̱kanꞌ ni̱ xa̱ꞌa̱ a̱ yu̱kunꞌ a̱ xíniꞌ i̱kuꞌ ja̱a̱nꞌ miiꞌ sukun va̱ nde̱e̱ naa ndi̱viꞌ,
ni̱ xa̱ꞌa̱ kutu̱ꞌ ña̱ꞌaꞌ a̱ nde̱e̱ naa kutu̱ꞌ kanduꞌu̱ꞌ ñu̱ꞌuꞌ i̱i̱n yivi̱ꞌ,
te̱ na̱ꞌaꞌ tu̱ ku̱i̱i̱n a̱ nde̱e̱ naa na̱ꞌaꞌ kanduꞌu̱ꞌ ñu̱ꞌuꞌ i̱i̱n yivi̱ꞌ.
70 Ni̱ na̱ka̱xi̱n Ndiosí David,
te̱ xikaꞌ nuuꞌ nuu̱ꞌ a̱,
te̱ ni̱ xta̱ꞌniꞌ ña̱ꞌaꞌ miiꞌ naá ra̱ ko̱rra xitoꞌ ra̱ mbe̱e̱ sana̱ ra̱.
71 Te̱ ni̱ xta̱ꞌniꞌ a̱ David miiꞌ naá ra̱ xitoꞌ ra̱ mbe̱e̱ sana̱ ra̱,
te̱ ni̱ sa̱na̱nduuꞌ ña̱ꞌaꞌ a̱ te̱ pa̱xto,
te̱ ko̱to̱ ra̱ yooꞌ,
ne̱ si̱a̱niꞌ xikaꞌ Jacob,
te̱ nduuꞌ kuenta Ndiosí.
72 Te̱ ni̱ xi̱to̱ ña̱ꞌaꞌ ra̱ xiinꞌ i̱i̱n nda̱a̱ꞌ nimá ra̱,
te̱ va̱ꞌa̱ va̱ tu̱ ni̱ xa̱ꞌndi̱a̱ tyuunꞌ ra̱ nuu̱ꞌ ni̱a̱.