Yoꞌoꞌ kaꞌán a̱ ña̱ Ndiosí nduuꞌ ña̱ xataꞌa̱n na̱ti̱i̱n sa̱kuuꞌ ña̱ kiꞌinꞌ kaꞌnuꞌ e̱ꞌ
Ya̱a̱ ña̱ ni̱ xi̱ta̱ David nuu̱ꞌ Ndiosí.
24
Ña̱ꞌa̱ Yahvé nduuꞌ i̱i̱n ka̱niiꞌ ñu̱ꞌuꞌ i̱i̱n yivi̱ꞌ xiinꞌ sa̱kuuꞌ ña̱ yoo nuu̱ꞌ a̱,
te̱ kuenta tu̱ a̱ nduuꞌ sa̱kuuꞌ ne̱ yivi̱ꞌ,
ne̱ yoo nuu̱ꞌ ñu̱ꞌuꞌ i̱i̱n yivi̱ꞌ.
2 Sa̱kanꞌ ña̱ su̱vi̱ a̱ nduuꞌ ña̱ ni̱ xa̱ꞌa̱ ñu̱ꞌuꞌ ja̱a̱nꞌ nuu̱ꞌ ti̱kui mi̱ni̱ kaꞌnuꞌ,
te̱ ni̱ tyi̱ka̱nduꞌu̱ꞌ a̱ xaꞌa̱ꞌ i̱i̱n yivi̱ꞌ nde̱e̱ ma̱aꞌ ti̱xi̱n mi̱ni̱ kaꞌnuꞌ.
3 Yahvé,
¿yo̱o̱ ku̱vi̱ ku̱ndi̱e̱e̱ ti̱xi̱n yu̱kunꞌ kaꞌnuꞌ su̱ꞌu̱n miiꞌ nduꞌu̱ꞌ u̱n?
¿Yo̱o̱ ku̱vi̱ xaa̱ nuu̱ꞌ u̱nꞌ te̱ ku̱nduꞌu̱ꞌ ni̱a̱ xíniꞌ i̱kuꞌ su̱ꞌu̱n miiꞌ nduꞌu̱ u̱nꞌ?
4 Ne̱ ku̱vi̱ ku̱ndi̱e̱e̱ i̱kanꞌ ndii,
ne̱ xaaꞌ ña̱ va̱ꞌa̱ xiinꞌ ne̱ ndo̱o̱ nimá nduuꞌ ni̱a̱,
te̱ ku̱vi̱ tu̱ ku̱ndi̱e̱e̱ ne̱ xäkaꞌnuꞌ ndiosí saka xiinꞌ ne̱ köo̱ꞌ kivi̱ꞌ ndieeꞌ yu̱ꞌuꞌ sikiꞌ.
5 Ne̱ ja̱a̱nꞌ ndii,
sa̱ñuꞌuꞌ va̱ ña̱ꞌaꞌ Yahvé,
te̱ sa̱tyuunꞌ nda̱ku Yahvé,
ña̱ sakakú ña̱ꞌaꞌ xaꞌa̱ꞌ ni̱a̱.
6 Ne̱ yivi̱ꞌ naa ne̱ ja̱a̱nꞌ nduuꞌ ne̱ nandukuꞌ nuu̱ꞌ yoꞌó,
Yahvé,
te̱ sa̱kaꞌnuꞌ ni̱a̱ nuu̱ꞌ u̱nꞌ,
yoꞌó,
Ndiosí,
ña̱ ni̱ xa̱kaꞌnuꞌ Jacob.
Selah
7 Ndoꞌó,
yiꞌeꞌ ndiká ya̱taꞌ va̱,
nuni̱a̱ꞌ ndo̱ꞌ,
ndoꞌó,
yiꞌeꞌ,
ña̱ itaꞌ xta̱ꞌanꞌ kivi̱ꞌ,
nuni̱a̱ꞌ ndo̱ꞌ,
te̱ xkaꞌndi̱a̱ rey,
ña̱ xataꞌa̱n na̱ti̱i̱n sa̱kuuꞌ ña̱ kiꞌinꞌ kaꞌnuꞌ.
8 ¿Yo̱o̱ nduuꞌ rey ña̱ xataꞌa̱n na̱ti̱i̱n sa̱kuuꞌ ña̱ kiꞌinꞌ kaꞌnuꞌ?
Ña̱ ja̱a̱nꞌ nduuꞌ Yahvé ña̱ ndi̱e̱eꞌ kooꞌ tyukuuꞌ,
te̱ ña̱ kaꞌnuꞌ va̱ tu̱ nduuꞌ a̱.
Te̱ nde̱e̱ i̱i̱n köo̱ꞌ ka̱nandoo ña̱ꞌaꞌ kii̱ꞌ kuntaꞌanꞌ a̱.
9 Ndoꞌó,
yiꞌeꞌ ndiká ya̱taꞌ va̱,
nuni̱a̱ꞌ ndo̱ꞌ,
ndoꞌó,
yiꞌeꞌ,
ña̱ itaꞌ xta̱ꞌanꞌ kivi̱ꞌ,
nuni̱a̱ꞌ ndo̱ꞌ,
te̱ xkaꞌndi̱a̱ rey,
ña̱ xataꞌa̱n na̱ti̱i̱n sa̱kuuꞌ ña̱ kiꞌinꞌ kaꞌnuꞌ.
10 ¿Yo̱o̱ nduuꞌ rey,
ña̱ xataꞌa̱n na̱ti̱i̱n sa̱kuuꞌ ña̱ kiꞌinꞌ kaꞌnuꞌ ja̱a̱nꞌ?
Ña̱ ja̱a̱nꞌ nduuꞌ Yahvé ña̱ xaꞌndia tyuunꞌ kuuꞌ nu̱uꞌ nuu̱ꞌ kuaꞌa̱ꞌ te̱ xíinꞌ te̱ ndieeꞌ ndi̱viꞌ.
Ña̱ ja̱a̱nꞌ nduuꞌ rey ña̱ xataꞌa̱n na̱ti̱i̱n sa̱kuuꞌ ña̱ kiꞌinꞌ kaꞌnuꞌ.
Selah