So̱ꞌo̱ ni̱ xa̱a̱ a̱ kii̱ꞌ ni̱ tyi̱ka̱nduꞌu̱ꞌ rey Asuero tu̱ꞌu̱n nde̱iꞌ ña̱ nakaꞌán ra̱ xaꞌa̱ꞌ ne̱ judío
8
Xa̱ kivi̱ꞌ ja̱a̱nꞌ ni̱ ta̱xi̱ rey nda̱ꞌaꞌ reina Ester sa̱kuuꞌ ña̱ ni̱ ku̱miꞌ Amán,
te̱ ndasiꞌ taꞌanꞌ xiinꞌ ne̱ judío.
Te̱ ni̱ ki̱xi̱n Mardoqueo miiꞌ nduꞌu̱ꞌ rey,
sa̱kanꞌ ña̱ xa̱ ni̱ kaꞌa̱n reina Ester xiinꞌ rey ña̱ te̱ i̱i̱n kuuꞌ xiinꞌ aꞌ nduuꞌ ra̱.
2 Sa̱kanꞌ te̱ ni̱ xta̱ꞌniꞌ rey ka̱xun nda̱ꞌaꞌ,
ña̱ nduuꞌ sello ra̱,
nuu̱ꞌ nda̱ꞌaꞌ ra̱,
ña̱ ni̱ na̱ꞌi̱ ra̱ nda̱ꞌaꞌ Amán,
te̱ ni̱ ta̱xi̱ ra̱ a̱ nda̱ꞌaꞌ Mardoqueo ja̱a̱nꞌ.
Sa̱kanꞌ tu̱ Ester ndii,
ni̱ sa̱kuisoꞌ tyuunꞌ aꞌ Mardoqueo ja̱a̱nꞌ nuu̱ꞌ sa̱kuuꞌ ña̱ ni̱ nduu̱ ña̱ꞌa̱ Amán.
3 Ni̱ yaꞌa̱ te̱ ni̱ xaꞌa̱n tu̱ku̱u̱ reina Ester nuu̱ꞌ rey,
te̱ ni̱ xi̱kuii̱n xitiꞌ aꞌ nuu̱ꞌ ra̱ xakuꞌ aꞌ kaꞌán ndaꞌvi aꞌ xiinꞌ ra̱ ña̱ na tä̱xi̱ ra̱ xinu̱ ña̱ ki̱ni̱ ña̱ ni̱ tyi̱tuní Amán,
te̱ nduuꞌ si̱a̱niꞌ xikaꞌ Agag,
sa̱a̱ ra̱ xiinꞌ ne̱ judío.
4 Te̱ tu̱ku̱ sa̱kanꞌ ni̱ ka̱ta̱ni̱ rey ta̱tunꞌ ra̱ nuu̱ꞌ Ester,
sa̱kanꞌ te̱ ni̱ ndo̱ndi̱tyi̱ aꞌ,
te̱ ni̱ xi̱kuii̱n aꞌ ya̱ti̱n nuu̱ꞌ ra̱.
5 Te̱ ni̱ kaꞌa̱n aꞌ xiinꞌ ra̱ ndii:
―Tákuiꞌe rey,
naaꞌ va̱ꞌa̱ yoo a̱ nuu̱ꞌ u̱nꞌ,
te̱ tuu u̱nꞌ ña̱ ña̱ nda̱ku nduuꞌ ña̱ xikán i̱,
te̱ kuatiaꞌ ka̱ nimá u̱nꞌ xini u̱nꞌ yuꞌu̱ ndii,
sa̱a̱ u̱nꞌ ña̱ va̱ꞌa̱ te̱ kaꞌa̱n tyuunꞌ u̱nꞌ te̱ keꞌi̱ nde̱iꞌ ña̱ tä̱xi̱ xinu̱ ña̱ kaꞌán tu̱tu̱ ña̱ ni̱ ti̱ꞌviꞌ Amán,
miiꞌ kaꞌán tyuunꞌ ra̱ ña̱ ka̱ꞌni̱ꞌ te̱ yivi̱ꞌ sa̱kuuꞌ nduꞌu̱,
ne̱ judío,
ne̱ ndieeꞌ i̱i̱n ka̱niiꞌ nuu̱ꞌ ñu̱ꞌuꞌ miiꞌ xaꞌndia tyuunꞌ yoꞌó,
rey.
6 Sa̱kanꞌ ña̱ ¿sa̱a̱ ku̱vi̱ ku̱ndi̱e̱ni yuꞌu̱ ku̱ni̱ nuu̱ꞌ i̱ ka̱ꞌni̱ꞌ sa̱ni̱ku̱u̱ te̱ yivi̱ꞌ sa̱kuuꞌ ne̱ ñu̱u̱ i̱,
te̱ ku̱ni̱ tu̱ i̱ sa̱nduxín ra̱ sa̱kuuꞌ ne̱ i̱i̱n kuuꞌ xiinꞌ i̱?
―ni̱ katyi̱ aꞌ.
7 Sa̱kanꞌ te̱ ni̱ kaꞌa̱n rey Asuero xiinꞌ reina Ester,
te̱ ni̱ kaꞌa̱n tu̱ ra̱ xiinꞌ Mardoqueo ndii:
―Xa̱ ni̱ ta̱xi̱ i̱ nda̱ꞌaꞌ reina Ester sa̱kuuꞌ ña̱ ni̱ nduu̱ ña̱ꞌa̱ Amán,
te̱ nuu̱ꞌ ndu̱yu̱ ni̱ ka̱ta̱xkoꞌ te̱ yivi̱ꞌ mi̱iꞌ ra̱ xaꞌa̱ꞌ a̱ ña̱ ni̱ xika̱ ra̱ ka̱ꞌni̱ꞌ ra̱ ne̱ judío.
8 Sa̱kanꞌ na kuiiꞌ vi̱ti̱n ndii,
xa̱ ku̱vi̱ ke̱ꞌi̱ ndo̱ꞌ i̱i̱n nde̱iꞌ ña̱ vi̱kuiꞌni̱ xaꞌa̱ꞌ sa̱kuuꞌ ndoꞌó,
ne̱ judío.
Te̱ ku̱vi̱ ke̱ꞌi̱ ndo̱ꞌ ndee ka̱ ña̱ kaꞌán nimá mi̱iꞌ ndo̱ꞌ nuu̱ꞌ tu̱tu̱ ja̱a̱nꞌ,
te̱ tyi̱nduꞌu̱ꞌ ndo̱ꞌ ka̱xun nda̱ꞌaꞌ i̱,
ña̱ nduuꞌ sello i̱ nuu̱ꞌ tu̱tu̱ ja̱a̱nꞌ.
Sa̱kanꞌ ña̱ i̱i̱n tu̱tu̱ ña̱ keꞌí ña̱ kaꞌán tyuunꞌ rey,
te̱ tyinduꞌu̱ꞌ ra̱ sello ra̱ nuu̱ꞌ a̱ ndii,
kü̱vi̱ xïnu̱ ña̱ kaꞌán a̱ ―ni̱ katyi̱ ra̱.
9 Xaꞌa̱ꞌ a̱ ja̱a̱nꞌ na kivi̱ꞌ ña̱ oko̱ uni̱ xikaꞌ yoo̱ uni̱,
tiꞌ naniꞌ Siván,
te̱ ni̱ ka̱na̱ ra̱ sa̱kuuꞌ te̱ keꞌi tu̱tu̱,
te̱ xatyuunꞌ nuu̱ꞌ rey.
Te̱ ni̱ ke̱ꞌi̱ ra̱ sa̱kuuꞌ ña̱ ni̱ kaꞌa̱n tyuunꞌ Mardoqueo xiinꞌ ra̱ kuaꞌa̱n nda̱ꞌaꞌ te̱ nduuꞌ te̱ judío,
xiinꞌ nda̱ꞌaꞌ te̱ xaꞌndia tyuunꞌ,
te̱ ndisoꞌ tyuunꞌ vie̱ ka̱,
xiinꞌ nda̱ꞌaꞌ te̱ kuuꞌ nu̱uꞌ nuu̱ꞌ te̱ xíinꞌ,
xiinꞌ nda̱ꞌaꞌ i̱ꞌi̱n te̱ xaꞌndia tyuunꞌ nuu̱ꞌ ciento oko̱ uxa̱ nda̱ꞌaꞌ ñu̱u̱ kaꞌnuꞌ,
ña̱ ñuꞌuꞌ nuu̱ꞌ ñu̱ꞌuꞌ ja̱a̱nꞌ,
nde̱e̱ nuu̱ꞌ ñu̱ꞌuꞌ India,
xiinꞌ nde̱e̱ nuu̱ꞌ ñu̱ꞌuꞌ Etiopía.
Te̱ i̱ꞌi̱n ñu̱u̱ xiinꞌ nda̱ꞌaꞌ a̱ ni̱ ti̱ꞌviꞌ ra̱ tu̱tu̱ ña̱ ni̱ keꞌi̱ xiinꞌ tu̱ꞌu̱n ña̱ ndatuꞌunꞌ mi̱iꞌ ne̱ ndieeꞌ i̱kanꞌ xiinꞌ sa̱a̱ keꞌi ni̱a̱ tu̱ꞌu̱n ni̱a̱ ja̱a̱nꞌ.
Sa̱kanꞌ tu̱ tu̱tu̱ ña̱ kuaꞌa̱n nda̱ꞌaꞌ ne̱ judío ndii,
ni̱ ke̱ꞌi̱ ra̱ a̱ xiinꞌ tu̱ꞌu̱n ña̱ ndatuꞌunꞌ mi̱iꞌ ni̱a̱ xiinꞌ sa̱a̱ keꞌiꞌ ni̱a̱ tu̱ꞌu̱n ni̱a̱ ja̱a̱nꞌ.
10 Te̱ ni̱ ke̱ꞌi̱ ra̱ sa̱kuuꞌ tu̱tu̱ ja̱a̱nꞌ xiinꞌ ña̱ ndi̱e̱eꞌ rey Asuero,
te̱ ni̱ tyi̱nduꞌu̱ꞌ ra̱ sello nuu̱ꞌ a̱ ña̱ nduuꞌ ka̱xun nda̱ꞌaꞌ rey.
Te̱ ni̱ ti̱ꞌviꞌ ra̱ a̱ xiinꞌ nda̱ꞌaꞌ te̱ yivi̱ꞌ,
te̱ yoso̱ꞌ kuei,
tiꞌ ka̱ma̱ xa̱va̱ꞌa̱,
tiꞌ nduuꞌ sana̱ mi̱iꞌ rey,
tiꞌ xitoꞌ va̱ ra̱.
11 Te̱ xiinꞌ ña̱ yoso̱ꞌ nuu̱ꞌ tu̱tu̱ ja̱a̱nꞌ taxiꞌ rey ña̱ ndi̱e̱eꞌ sa̱kuuꞌ ne̱ judío ndee ka̱ ñu̱u̱ ndieeꞌ ni̱a̱,
ña̱ ndu̱i̱i̱n ni̱a̱ te̱ na̱kaꞌa̱n ni̱a̱ xaꞌa̱ꞌ ni̱a̱,
te̱ ka̱ꞌni̱ꞌ ni̱a̱,
te̱ sa̱nduxín ni̱a̱,
te̱ sa̱ndiꞌiꞌ xa̱tyiꞌ ni̱a̱ sa̱kuuꞌ ne̱ ndisoꞌ ña̱ xíinꞌ,
ne̱ ndasiꞌ ña̱ꞌaꞌ ne̱ ki̱e̱e̱ ndee ka̱ ñu̱u̱,
uun nda̱ꞌaꞌ a̱.
Te̱ kuꞌu̱n ni̱a̱ kuni ka̱ꞌni̱ꞌ ña̱ꞌaꞌ ni̱a̱,
uun kuni ka̱ꞌni̱ꞌ ni̱a̱ ñaꞌ siꞌi ra̱,
uun siꞌe̱ ra̱.
Te̱ ku̱vi̱ tu̱ na̱ka̱ya̱ ni̱a̱ sa̱kuuꞌ ña̱ꞌa̱ ne̱ ndasiꞌ taꞌanꞌ xiinꞌ ni̱a̱ ja̱a̱nꞌ,
ne̱ ki̱e̱e̱ ndee ka̱ ñu̱u̱ uun nda̱ꞌaꞌ a̱.
12 Te̱ kivi̱ꞌ uxi̱ uni̱ xikaꞌ yoo̱ uxi̱ uvi̱,
tiꞌ naniꞌ Adar,
ni̱ na̱kuii̱n kivi̱ꞌ ña̱ ko̱o̱ sa̱kuuꞌ ña̱ ja̱a̱nꞌ i̱i̱n ka̱niiꞌ nuu̱ꞌ ñu̱ꞌuꞌ miiꞌ xaꞌndia tyuunꞌ rey Asuero.
13 Te̱ ni̱ ke̱ꞌi̱ ra̱ kiꞌinꞌ tu̱tu̱ miiꞌ yoso̱ꞌ nde̱iꞌ ja̱a̱nꞌ te̱ kuaꞌa̱n a̱ sa̱kuuꞌ ñu̱u̱ xiinꞌ nda̱ꞌaꞌ a̱,
te̱ ko̱o̱ tu̱ꞌva̱ ne̱ judío,
ne̱ ndieeꞌ i̱kanꞌ,
kii̱ꞌ xaa̱ kivi̱ꞌ ja̱a̱nꞌ,
te̱ na̱kaꞌa̱n ni̱a̱ xaꞌa̱ꞌ ni̱a̱ nuu̱ꞌ ne̱ ndasiꞌ taꞌanꞌ xiinꞌ ni̱a̱.
14 Sa̱kanꞌ te̱ ni̱ kiku̱ te̱ xaxa̱ꞌ tu̱tu̱,
te̱ yoso̱ꞌ kuei,
tiꞌ ka̱ma̱ ka̱ kuaꞌa̱n,
sa̱na̱kuaꞌa ra̱ a̱ sa̱a̱ ni̱ kaꞌa̱n tyuunꞌ rey xiinꞌ ra̱.
Te̱ tu̱tu̱ miiꞌ yoso̱ꞌ nde̱iꞌ ja̱a̱nꞌ ndii,
ni̱ kiku̱ tu̱ a̱ ñu̱u̱ Susa,
ña̱ nduuꞌ ñu̱u̱ kaꞌnuꞌ miiꞌ nduꞌu̱ꞌ rey xaꞌndia tyuunꞌ ra̱.
15 Te̱ ni̱ ke̱ta̱ Mardoqueo ti̱xi̱n vi̱ꞌe̱ rey niꞌnuꞌ ra̱ toto̱ nani̱ꞌ,
ña̱ niꞌnuꞌ te̱ kuuꞌ kaꞌnuꞌ.
Te̱ kumiꞌ a̱ tiaku̱ ndi̱ꞌeꞌ xiinꞌ ña̱ ya̱a̱,
te̱ nduꞌu̱ꞌ tu̱ i̱i̱n corona tyiee̱ va̱ ña̱ ni̱ ku̱a̱ꞌa̱ xiinꞌ oro xíniꞌ ra̱,
te̱ niꞌnuꞌ tu̱ ra̱ toto̱ kuaꞌa ndu̱kunꞌ,
ña̱ ni̱ ku̱a̱ꞌa̱ xiinꞌ yuꞌva̱ lino.
Te̱ sa̱kuuꞌ ne̱ ndieeꞌ ñu̱u̱ Susa ndii,
ni̱ ku̱a̱aꞌ tiꞌeꞌ ni̱a̱ xakaꞌnuꞌ ni̱a̱ xaꞌa̱ꞌ tu̱ꞌu̱n nde̱iꞌ xa̱aꞌ ja̱a̱nꞌ ña̱ va̱ꞌa̱ kuni ni̱a̱.
16 Te̱ ne̱ judío ndii,
va̱ꞌa̱ xa̱va̱ꞌa̱ ni̱ ku̱ni̱ ni̱a̱,
te̱ ni̱ na̱ku̱a̱tiaꞌ xa̱va̱ꞌa̱ tu̱ nimá ni̱a̱,
te̱ ni̱ ki̱ꞌi̱n kaꞌnuꞌ ña̱ꞌaꞌ ne̱ yivi̱ꞌ.
17 Te̱ i̱i̱n ka̱niiꞌ nuu̱ꞌ ñu̱ꞌuꞌ ja̱a̱nꞌ xiinꞌ nda̱ꞌaꞌ a̱ miiꞌ ni̱ xa̱a̱ ña̱ ni̱ kaꞌa̱n tyuunꞌ rey ja̱a̱nꞌ ndii,
va̱ꞌa̱ xa̱va̱ꞌa̱ ni̱ ku̱ni̱ ne̱ judío,
te̱ ni̱ na̱ku̱a̱tiaꞌ xa̱va̱ꞌa̱ nimá ni̱a̱,
ni̱ xa̱ꞌa̱ ni̱a̱ vi̱koꞌ,
te̱ ni̱ xa̱ꞌa̱ tu̱ ni̱a̱ kuaꞌa̱ꞌ va̱ ña̱ xaxi̱ꞌ.
Te̱ sa̱kanꞌ tu̱ kuaꞌa̱ꞌ va̱ i̱nga̱ ne̱ yivi̱ꞌ,
ne̱ ndieeꞌ nuu̱ꞌ ñu̱ꞌuꞌ i̱kanꞌ,
ni̱ na̱ndu̱u̱ ne̱ judío xaꞌa̱ꞌ a̱ ña̱ yiꞌvi ni̱a̱ ne̱ judío ja̱a̱nꞌ.