So̱ꞌo̱ ni̱ xa̱a̱ a̱ kii̱ꞌ ni̱ kaꞌa̱n tyuunꞌ rey Asuero, te̱ ni̱ xa̱ꞌni̱ꞌ te̱ yivi̱ꞌ Amán nuu̱ꞌ i̱i̱n ndu̱yu̱
7
Sa̱kanꞌ te̱ ni̱ xaꞌa̱n rey xiinꞌ Amán miiꞌ ni̱ xa̱va̱ꞌa̱ reina Ester ña̱ xaxi̱ꞌ ja̱a̱nꞌ.
2 Te̱ kivi̱ꞌ ña̱ uvi̱ ja̱a̱nꞌ,
kii̱ꞌ ndieeꞌ ra̱ xiꞌiꞌ ra̱ vino,
te̱ ni̱ kaꞌa̱n tu̱ku̱u̱ rey xiinꞌ reina Ester ndii:
―¿Yo̱o̱ nduuꞌ a̱ kuni kaka̱n u̱nꞌ nuu̱ꞌ i̱,
reina,
te̱ ta̱xi̱ e̱ꞌ nda̱ꞌaꞌ u̱nꞌ?
¿Yo̱o̱ nduuꞌ a̱ kaꞌán nimá u̱nꞌ xaꞌa̱ꞌ?
Tee̱ꞌ ndee taꞌvi̱ꞌ sa̱va̱ miiꞌ xaꞌndia tyuunꞌ i̱ kaka̱n u̱nꞌ nuu̱ꞌ i̱ ndii,
ta̱xi̱ i̱ e̱ nda̱ꞌaꞌ u̱nꞌ ―ni̱ katyi̱ ra̱.
3 Te̱ ni̱ kaꞌa̱n reina Ester xiinꞌ ra̱ ndii:
―Tákuiꞌe rey,
naaꞌ kuatiaꞌ nimá u̱nꞌ xini u̱nꞌ yuꞌu̱,
te̱ naaꞌ va̱ꞌa̱ yoo a̱ nuu̱ꞌ u̱nꞌ ña̱ ta̱xi̱ u̱nꞌ ña̱ kaka̱n i̱ nuu̱ꞌ u̱nꞌ ndii,
kaꞌán ndaꞌvi i̱ xiinꞌ u̱nꞌ ña̱ tä̱xi̱ u̱nꞌ ka̱ꞌni̱ꞌ te̱ yivi̱ꞌ yuꞌu̱,
te̱ tä̱xi̱ tu̱ u̱nꞌ ña̱ ka̱ꞌni̱ꞌ ra̱ ne̱ ñu̱u̱ i̱.
4 Sa̱kanꞌ ña̱ yuꞌu̱ xiinꞌ sa̱kuuꞌ ne̱ ñu̱u̱ i̱ ndii,
xa̱ ni̱ keꞌvi̱ sa̱kuuꞌ ndu̱,
te̱ ka̱ꞌni̱ꞌ te̱ yivi̱ꞌ ndu̱,
te̱ sa̱ndiꞌiꞌ xa̱tyiꞌ ra̱ nduꞌu̱.
Naaꞌ sa̱kanꞌ te̱ ni̱ keꞌvi̱ ndu̱ te̱ ku̱ndu̱u̱ ndu̱ ne̱ ka̱ka̱ nu̱u̱ so̱ꞌo̱ ku̱i̱ti̱ꞌ ndii,
käka̱n i̱ ña̱ kaa̱ꞌ nuu̱ꞌ u̱nꞌ.
Sa̱kanꞌ ña̱ naaꞌ ña̱ ja̱a̱nꞌ ku̱i̱ti̱ꞌ nduuꞌ a̱ ndii,
köo̱ꞌ nde̱e̱ i̱i̱n xaꞌa̱ꞌ ña̱ sa̱ta̱ñaꞌa̱ꞌ ndu̱ yoꞌó,
rey ―ni̱ katyi̱ aꞌ.
5 Sa̱kanꞌ te̱ ni̱ kaꞌa̱n rey Asuero xiinꞌ aꞌ ndii:
―¿Yo̱o̱ nduuꞌ te̱ ndi̱e̱ni ni̱a̱tu̱ ja̱a̱nꞌ,
te̱ kuni sa̱a̱ ña̱ ja̱a̱nꞌ xiinꞌ ndo̱ꞌ?
¿Te̱ miiꞌ nduꞌu̱ꞌ ra̱?
―ni̱ katyi̱ ra̱.
6 Te̱ ni̱ kaꞌa̱n reina Ester xiinꞌ ra̱ ndii:
―Te̱ ndasiꞌ ndu̱,
te̱ sandoꞌoꞌ ra̱ ndu̱ ndii,
Amán,
te̱ ni̱a̱ꞌa kaa̱ꞌ nduuꞌ ra̱ ―ni̱ katyi̱ aꞌ.
Te̱ kii̱ꞌ ni̱ xi̱ni̱ so̱ꞌo̱ Amán ña̱ ja̱a̱nꞌ ndii,
ni̱ xi̱nu̱ ndo̱o̱ níiꞌ ra̱ nde̱e̱ ni̱ ku̱u̱ ya̱a̱ ndi̱i ra̱ nuu̱ꞌ rey,
xiinꞌ nuu̱ꞌ reina Ester ja̱a̱nꞌ.
7 I̱kanꞌ te̱ ni̱ na̱saa̱ꞌ xa̱va̱ꞌa̱ rey Asuero,
te̱ ni̱ ndo̱ndi̱tyi̱ ra̱ miiꞌ nduꞌu̱ꞌ ra̱ xixiꞌ ra̱ ja̱a̱nꞌ,
te̱ kuaꞌa̱n ra̱ nuu̱ꞌ ki̱ꞌe̱ ra̱ miiꞌ yoo tunꞌ i̱ta̱.
Ndisu̱ kii̱ꞌ ni̱ xi̱ni̱ Amán ña̱ te̱ xa̱ yo̱o̱ ku̱vi̱ nduuꞌ ra̱ sa̱a̱ rey ja̱a̱nꞌ xaꞌa̱ꞌ ña̱ ja̱a̱nꞌ ndii,
ni̱ ndoo̱ ra̱ ti̱xi̱n vi̱ꞌe̱ ja̱a̱nꞌ te̱ kaꞌa̱n ndaꞌvi ra̱ xiinꞌ reina Ester,
ndiani̱ te̱ vi̱kuiꞌni̱ aꞌ xaꞌa̱ꞌ ra̱ te̱ kä̱ꞌni̱ꞌ ña̱ꞌaꞌ rey ja̱a̱nꞌ.
8 Te̱ kii̱ꞌ ni̱ na̱ndi̱koꞌ rey ti̱xi̱n vi̱ꞌe̱ ja̱a̱nꞌ ndii,
nuu̱ꞌ tei̱ miiꞌ nduꞌu̱ꞌ reina ni̱ ndu̱va̱ Amán kanduꞌu̱ꞌ ra̱.
Sa̱kanꞌ te̱ ni̱ kaꞌa̱n rey xiinꞌ ra̱ ndii:
―¿Ñáá kuni ti̱i̱n uꞌvi̱ tu̱ u̱nꞌ reina nuu̱ꞌ i̱ iinꞌ i̱ yoꞌoꞌ,
tee̱ꞌ ndee vi̱ꞌe̱ i̱ nduuꞌ a̱?
―ni̱ katyi̱ ra̱.
Te̱ kii̱ꞌ ndi̱ꞌi̱ ni̱ kaꞌa̱n rey ña̱ kaa̱ꞌ ndii,
ni̱ ti̱saꞌvi̱ te̱ yivi̱ꞌ nuu̱ꞌ Amán.
9 I̱kanꞌ te̱ ni̱ kaꞌa̱n i̱i̱n te̱ naniꞌ Harbona,
te̱ ñaꞌma,
te̱ xikaꞌ nuuꞌ nuu̱ꞌ rey xiinꞌ ra̱ ndii:
―Xa̱ iinꞌ i̱i̱n ndu̱yu̱,
tunꞌ kumiꞌ oko̱ uꞌu̱n metro nuu̱ꞌ ki̱ꞌe̱ Amán.
Te̱ mi̱iꞌ ra̱ ni̱ kaꞌa̱n tyuunꞌ,
te̱ ni̱ ku̱a̱ꞌa̱ nu̱ꞌ te̱ ka̱ta̱xkoꞌ ra̱ Mardoqueo i̱kanꞌ.
Te̱ Mardoqueo ja̱a̱nꞌ nduuꞌ te̱ ni̱ sa̱kakú yoꞌó,
rey,
te̱ nï̱ xa̱ꞌni̱ꞌ te̱ yivi̱ꞌ yoꞌó ―ni̱ katyi̱ ra̱.
Sa̱kanꞌ te̱ ni̱ kaꞌa̱n rey ndii:
―Nuu̱ꞌ ndu̱yu̱ ja̱a̱nꞌ ka̱ta̱xkoꞌ ndo̱ꞌ mi̱iꞌ ra̱ ―ni̱ katyi̱ ra̱.
10 Sa̱kanꞌ te̱ ni̱ xaꞌa̱n ka̱ta̱xkoꞌ ra̱ Amán nuu̱ꞌ ndu̱yu̱,
miiꞌ ni̱ kuni̱ te̱ ja̱a̱nꞌ ka̱ta̱xkoꞌ ra̱ Mardoqueo.
Te̱ xiinꞌ ña̱ ja̱a̱nꞌ ni̱ ndiko̱ nimá rey Asuero.