Yoꞌoꞌ nakaꞌán Nehemías xaꞌa̱ꞌ ne̱ yivi̱ꞌ, ne̱ tyaꞌvi̱ꞌ kuaꞌa̱ꞌ va̱ xu̱ꞌunꞌ xaniꞌ
5
Te̱ kivi̱ꞌ ja̱a̱nꞌ ndii,
ndi̱e̱eꞌ va̱ ni̱ kaꞌa̱n ku̱a̱tyi̱ kiꞌinꞌ va̱ ne̱ yivi̱ꞌ xaꞌa̱ꞌ te̱ judío,
taꞌanꞌ ni̱a̱,
2 Sa̱va̱ ni̱a̱ ni̱ kaꞌa̱n ndii:
―Kuaꞌa̱ꞌ va̱ tiaa̱ siꞌe̱ ndu̱,
te̱ kuaꞌa̱ꞌ va̱ tu̱ ña̱ꞌaꞌ siꞌe̱ ndu̱ naaꞌ ka̱ꞌvi̱ ña̱ꞌaꞌ e̱ꞌ,
sa̱kanꞌ na kuiiꞌ kuní a̱ ndu̱kuꞌ ndu̱ ndi̱kinꞌ trigo ku̱xi̱ ndu̱ te̱ kü̱vi̱ ndu̱ so̱ko̱ ―ni̱ katyi̱ ni̱a̱.
3 Te̱ i̱nga̱ ni̱a̱ ni̱ kaꞌa̱n ku̱a̱tyi̱ xiinꞌ i̱ ndii:
―Te̱ xaꞌa̱ꞌ a̱ ña̱ ni̱ xika̱n ndu̱ ndi̱kinꞌ trigo ku̱xi̱ ndu̱ te̱ kü̱vi̱ ndu̱ so̱ko̱ ndii,
ni̱ tyi̱ka̱ndi̱a̱ ndu̱ ñu̱ꞌuꞌ ndu̱,
xiinꞌ yo̱ꞌoꞌ uva ndu̱,
xiinꞌ vi̱ꞌe̱ miiꞌ ndieeꞌ ndu̱ ―ni̱ katyi̱ ni̱a̱.
4 Te̱ i̱nga̱ tu̱ku̱ ni̱a̱ ni̱ kaꞌa̱n ndii:
―Ñu̱ꞌuꞌ ndu̱ xiinꞌ yo̱ꞌoꞌ uva ña̱ ni̱ tyi̱ꞌi̱ ndu̱ ni̱ tyi̱ka̱ndi̱a̱ ndu̱,
te̱ ni̱ ta̱tu̱ ndu̱ xu̱ꞌunꞌ te̱ tya̱ꞌvi̱ꞌ ndu̱ xu̱ꞌunꞌ yoo̱ꞌ nda̱ꞌaꞌ rey.
5 I̱i̱n nda̱a̱ꞌ nuu̱ꞌ ne̱ yivi̱ꞌ nduuꞌ ndu̱ xiinꞌ i̱nga̱ ti̱ꞌvi̱ ne̱ taꞌanꞌ ndu̱,
te̱ sa̱kanꞌ tu̱ i̱i̱n katyi iinꞌ siꞌe̱ ndu̱ xiinꞌ siꞌe̱ ne̱ ja̱a̱nꞌ,
ndisu̱ xa̱ ni̱ tyi̱ka̱ndi̱a̱ ndu̱ tiaa̱ siꞌe̱ ndu̱ xiinꞌ ña̱ꞌaꞌ siꞌe̱ ndu̱ nda̱ꞌaꞌ ne̱ ja̱a̱nꞌ te̱ nduuꞌ ni̱a̱ ne̱ xikaꞌ nuuꞌ so̱ꞌo̱ nuu̱ꞌ ni̱a̱,
te̱ sa̱va̱ ña̱ꞌaꞌ siꞌe̱ ndu̱ ndii,
xa̱ ne̱ xikaꞌ nuuꞌ so̱ꞌo̱ nuu̱ꞌ ne̱ ja̱a̱nꞌ nduuꞌ ni̱a̱.
Te̱ köo̱ꞌ xa̱tyiꞌ a̱ ku̱vi̱ sa̱a̱ ndu̱ te̱ sa̱kakú ña̱ꞌaꞌ ndu̱ nda̱ꞌaꞌ ne̱ ja̱a̱nꞌ,
sa̱kanꞌ ña̱ ñu̱ꞌuꞌ ndu̱ xiinꞌ yo̱ꞌoꞌ uva ndu̱ ndii,
xa̱ ña̱ꞌa̱ i̱nga̱ te̱ yivi̱ꞌ nduuꞌ a̱ ―ni̱ katyi̱ ni̱a̱.
6 Te̱ kii̱ꞌ ni̱ xi̱ni̱ so̱ꞌo̱ i̱ sa̱kuuꞌ ña̱ kaꞌán ku̱a̱tyi̱ ni̱a̱,
te̱ ni̱ xi̱ni̱ tu̱ i̱ ña̱ kande̱iꞌ kaꞌán ku̱a̱tyi̱ ni̱a̱ xaꞌa̱ꞌ ña̱ ja̱a̱nꞌ ndii,
ni̱ na̱saa̱ꞌ xa̱va̱ꞌa̱ i̱.
7 Te̱ kii̱ꞌ ni̱ ndi̱ꞌi̱ ni̱ xa̱ni̱ni̱ va̱ꞌa̱ i̱ ndee ña̱ kaꞌa̱n i̱ ndii,
ni̱ na̱ka̱na̱ i̱ sa̱kuuꞌ te̱ kuuꞌ nu̱uꞌ xiinꞌ te̱ xaꞌndia tyuunꞌ,
te̱ ni̱ xiꞌe̱ i̱ nuu̱ꞌ ra̱ kaꞌán i̱ xiinꞌ ra̱ ndii:
―Vä̱ꞌa̱ xa̱tyiꞌ yoo ña̱ xaaꞌ ndoꞌó ña̱ kuaꞌa̱ꞌ va̱ kendiaa̱ꞌ yaꞌviꞌ ndo̱ꞌ xata̱ꞌ xu̱ꞌunꞌ ña̱ satatu ndo̱ꞌ ne̱ taꞌanꞌ e̱ꞌ ―ni̱ katyi̱ i̱.
Sa̱kanꞌ te̱ ni̱ xa̱ꞌa̱ i̱ kunta kaꞌnuꞌ xiinꞌ sa̱kuuꞌ ne̱ yivi̱ꞌ,
te̱ ni̱ nda̱tuꞌunꞌ ndu̱ xaꞌa̱ꞌ ña̱ xaaꞌ te̱ satatu xu̱ꞌunꞌ ja̱a̱nꞌ.
8 Te̱ nuu̱ꞌ sa̱kuuꞌ ne̱ ja̱a̱nꞌ ni̱ kaꞌa̱n i̱ xiinꞌ ra̱ ndii:
―Xa̱ kuaꞌa̱ꞌ va̱ ni̱ ndo̱ꞌo̱ e̱ꞌ te̱ ni̱ sa̱ta̱ꞌ e̱ꞌ ne̱ taꞌanꞌ e̱ꞌ,
ne̱ judío,
ne̱ xa̱ ni̱ keꞌvi̱ nda̱ꞌaꞌ ne̱ tukuꞌ te̱ kuaꞌa̱n ni̱a̱ tu̱ku̱ ñu̱ꞌuꞌ,
te̱ ni̱ sa̱kakú ña̱ꞌaꞌ e̱ꞌ.
Te̱ vi̱ti̱n ndii,
xa̱ mi̱iꞌ ndoꞌó,
ne̱ taꞌanꞌ e̱ꞌ,
nduuꞌ ne̱ xiko̱ꞌ tu̱ku̱u̱ ña̱ꞌaꞌ te̱ ku̱ndu̱u̱ ni̱a̱ ne̱ xikaꞌ nuuꞌ so̱ꞌo̱,
te̱ tu̱ku̱ sa̱kanꞌ na̱tyaꞌvi̱ e̱ꞌ xaꞌa̱ꞌ ni̱a̱ te̱ sa̱kakú ña̱ꞌaꞌ e̱ꞌ nda̱ꞌaꞌ ne̱ ni̱ sa̱ta̱ꞌ ña̱ꞌaꞌ xanini ndo̱ꞌ ―ni̱ katyi̱ i̱.
―Vä̱ꞌa̱ xa̱tyiꞌ yoo ña̱ xaaꞌ ndo̱ꞌ ja̱a̱nꞌ,
naaꞌ va̱ꞌa̱ i̱i̱n yivi̱ꞌ ndii,
ki̱ꞌi̱n kaꞌnuꞌ ndo̱ꞌ Ndiosí,
ña̱ xakaꞌnuꞌ e̱ꞌ,
sa̱kanꞌ te̱ kü̱ndi̱ꞌi̱ ne̱ tukuꞌ,
ne̱ ndasiꞌ yooꞌ,
xiinꞌ e̱ꞌ.
10 Yuꞌu̱,
xiinꞌ ña̱ni̱ i̱,
xiinꞌ ne̱ xatyuunꞌ nuu̱ꞌ i̱ ndii,
ni̱ sa̱tatu ndu̱ xu̱ꞌunꞌ xiinꞌ ndi̱kinꞌ trigo ne̱ yivi̱ꞌ,
ndisu̱ vi̱ti̱n ndii,
kë̱ndiaa̱ꞌ yaꞌviꞌ ka̱ ña̱ꞌaꞌ ndu̱ xaꞌa̱ꞌ ña̱ ja̱a̱nꞌ.
11 Xaꞌa̱ꞌ a̱ ja̱a̱nꞌ na kaꞌán tyuunꞌ i̱ xiinꞌ ndo̱ꞌ vi̱ti̱n ña̱ sa̱a̱ ndo̱ꞌ ña̱ va̱ꞌa̱ te̱ na̱ta̱xi̱ ndo̱ꞌ nda̱ꞌaꞌ ne̱ ja̱a̱nꞌ ñu̱ꞌuꞌ ni̱a̱,
xiinꞌ yo̱ꞌoꞌ uva ni̱a̱,
xiinꞌ tunꞌ olivo ni̱a̱,
xiinꞌ vi̱ꞌe̱ ni̱a̱.
Te̱ na̱ta̱xi̱ tu̱ ndo̱ꞌ ña̱ ni̱ ke̱ndiaa̱ꞌ yaꞌviꞌ ndo̱ꞌ xata̱ꞌ sa̱kuuꞌ ña̱ ni̱ sa̱tatu ña̱ꞌaꞌ ndo̱ꞌ,
naa kuuꞌ ndi̱kinꞌ trigo,
xiinꞌ vino,
xiinꞌ xa̱ꞌa̱n oliva ―ni̱ katyi̱ i̱.
12 Sa̱kanꞌ te̱ ni̱ kaꞌa̱n ra̱ ndii:
―Va̱ꞌa̱ tu̱ sa̱kanꞌ,
sa̱na̱ndikoꞌ ndu̱ sa̱kuuꞌ ña̱ ni̱ ke̱ndiaa̱ꞌ yaꞌviꞌ ndu̱ nda̱ꞌaꞌ ni̱a̱,
te̱ näka̱n ka̱ ndu̱ nde̱e̱ i̱i̱n a̱ nuu̱ꞌ ni̱a̱,
te̱ sa̱a̱ ndu̱ sa̱a̱ niiꞌ ni̱ kaꞌa̱n u̱nꞌ xiinꞌ ndu̱ ―ni̱ katyi̱ ra̱.
Sa̱kanꞌ na ni̱ na̱ka̱na̱ i̱ sa̱kuuꞌ sutu̱ kuuꞌ nu̱uꞌ,
te̱ nuu̱ꞌ sutu̱ ja̱a̱nꞌ ni̱ kaꞌa̱n i̱ xiinꞌ sa̱kuuꞌ te̱ ja̱a̱nꞌ te̱ ta̱xi̱ ra̱ kuento ra̱ ña̱ sa̱xinu̱ xna̱ꞌa̱ ra̱ ña̱ ni̱ kaꞌa̱n ra̱ ja̱a̱nꞌ.
13 Ndi̱ꞌi̱ ja̱a̱nꞌ,
te̱ ni̱ ki̱si̱ i̱ toto̱ ndiká niꞌnuꞌ i̱,
te̱ ni̱ kaꞌa̱n i̱ ndii:
―Sa̱a̱ niiꞌ ni̱ ki̱si̱ yuꞌu̱ toto̱ i̱ yoꞌoꞌ na ki̱si̱ tu̱ Ndiosí sa̱kuuꞌ ne̱ sä̱xinu̱ kuento ni̱a̱ ña̱ ni̱ ta̱xi̱ ni̱a̱ yoꞌoꞌ vi̱ti̱n,
te̱ ta̱va̱ꞌ xa̱tyiꞌ tu̱ ña̱ꞌaꞌ a̱ vi̱ꞌe̱ ni̱a̱,
te̱ ndoo̱ nda̱ꞌaꞌ xikoꞌ xa̱tyiꞌ ni̱a̱ ―ni̱ katyi̱ i̱.
Te̱ ni̱ kaꞌa̱n sa̱kuuꞌ ne̱ yivi̱ꞌ ndii:
―Sa̱kanꞌ na ku̱ndu̱u̱ a̱ ―ni̱ katyi̱ ni̱a̱.
Te̱ ni̱ xa̱kaꞌnuꞌ sa̱kuuꞌ ni̱a̱ Yahvé.
Te̱ ni̱ xa̱a̱ sa̱kuuꞌ ni̱a̱ sa̱a̱ niiꞌ ni̱ ta̱xi̱ ni̱a̱ kuento ni̱a̱ ja̱a̱nꞌ.
14 Nde̱e̱ kii̱ꞌ xa̱ kuaꞌa̱n oko̱ kuiya̱ ña̱ xaꞌndia tyuunꞌ rey Artajerjes,
te̱ ni̱ xaꞌa̱n ndi̱koꞌ a̱ nde̱e̱ kuiya̱ oko̱ uxi̱ uvi̱ kii̱ꞌ ni̱ sa̱kuisoꞌ tyuunꞌ ra̱ yuꞌu̱ nuu̱ꞌ ne̱ vi̱ꞌe̱ i̱,
ne̱ Judá.
Te̱ niiꞌ uxi̱ uvi̱ kuiya̱ ña̱ ni̱ xa̱ꞌndi̱a̱ tyuunꞌ i̱ ja̱a̱nꞌ ndii,
ni̱ nde̱e̱ te̱ taꞌanꞌ i̱,
te̱ ni̱ nde̱e̱ yuꞌu̱ ndii,
köo̱ꞌ xu̱ꞌunꞌ xaniꞌ ña̱ xikuꞌún yaꞌviꞌ te̱ xaꞌndia tyuunꞌ,
ni̱ ki̱ꞌi̱n ndu nda̱ꞌaꞌ ne̱ taꞌanꞌ ndu̱ te̱ sa̱ta̱ꞌ ndu̱ ña̱ ku̱xi̱ ndu̱.
15 Ndisu̱ sa̱kuuꞌ te̱ ni̱ xa̱ꞌndi̱a̱ tyuunꞌ nuu̱ꞌ ni̱a̱ nuu̱ꞌ ni̱ ki̱xi̱n ndii,
mi̱iꞌ va̱ ni̱ ku̱u̱ ra̱ xiinꞌ ne̱ yivi̱ꞌ,
te̱ ni̱ ti̱i̱n uꞌvi̱ tu̱ ña̱ꞌaꞌ ra̱,
te̱ ni̱ tya̱ꞌvi̱ꞌ ni̱a̱ uvi̱ xi̱ko̱ xu̱ꞌunꞌ plata te̱ ki̱ꞌi̱n ra̱ ña̱ xaxi̱ꞌ ku̱xi̱ ra̱,
xiinꞌ vino ko̱ꞌo̱ ra̱.
Te̱ sa̱kanꞌ tu̱ ne̱ xikaꞌ nuuꞌ nuu̱ꞌ ni̱a̱ ndii,
ni̱ sa̱ndoꞌoꞌ ni̱a̱ ne̱ yivi̱ꞌ.
Ndisu̱ yuꞌu̱,
xaꞌa̱ꞌ a̱ ña̱ yiꞌvi i̱ Ndiosí ndii,
nï̱ xa̱a̱ i̱ sa̱kanꞌ xiinꞌ ndo̱ꞌ.
16 Süu̱ꞌ ja̱a̱nꞌ ndii,
ni̱ xa̱tyuunꞌ tu̱ yuꞌu̱ miiꞌ kuaꞌa nama̱ ñu̱u̱ e̱ꞌ,
te̱ ni̱ xa̱tyuunꞌ tu̱ sa̱kuuꞌ te̱ xikaꞌ nuuꞌ nuu̱ꞌ i̱,
tee̱ꞌ ndee köo̱ꞌ ñu̱ꞌuꞌ ndu̱ kanduꞌu̱ꞌ ñu̱u̱ ja̱a̱nꞌ.
17 Te̱ nuu̱ꞌ mesa miiꞌ xixiꞌ i̱ ndii,
xikundieé siento uvi̱ xi̱ko̱ uxi̱ te̱ judío,
taꞌanꞌ i̱,
xiinꞌ te̱ xatyuunꞌ nuu̱ꞌ te̱ xaꞌndia tyuunꞌ kuuꞌ nu̱uꞌ xixiꞌ ra̱ xiinꞌ i̱,
te̱ ni̱ xi̱ku̱ndiee̱ tu̱ kuaꞌa̱ꞌ ka̱ te̱ yivi̱ꞌ,
te̱ tukuꞌ,
te̱ ku̱a̱xi̱ ñu̱ꞌuꞌ ña̱ ñuꞌuꞌ ya̱ti̱n miiꞌ ndieeꞌ e̱ꞌ.
18 I̱ꞌi̱n kivi̱ꞌ kuaꞌa̱n ni̱ xa̱ꞌni̱ꞌ ndu̱ i̱i̱n si̱ndiki̱ꞌ,
xiinꞌ iñu̱ taꞌan mbe̱e̱,
tiꞌ nda̱tu̱nꞌ xa̱va̱ꞌa̱,
xiinꞌ kiꞌinꞌ sa̱a̱,
te̱ sa̱a̱ uxi̱ kivi̱ꞌ ni̱ yoo̱ kuaꞌa̱ꞌ va̱ vino ni̱ xi̱ꞌi̱ ne̱ yivi̱ꞌ.
Tee̱ꞌ ndee sa̱kanꞌ ni̱ xa̱a̱ i̱ ndii,
köo̱ꞌ kivi̱ꞌ ni̱ xika̱n i̱ xu̱ꞌunꞌ xaniꞌ nuu̱ꞌ ne̱ yivi̱ꞌ te̱ kuxi̱ i̱ xaꞌa̱ꞌ a̱ ña̱ nduuꞌ i̱ te̱ xaꞌndia tyuunꞌ nuu̱ꞌ ni̱a̱,
sa̱kanꞌ ña̱ xa̱ kuaꞌa̱ꞌ yaꞌa̱ xu̱ꞌunꞌ xaꞌni̱ꞌ ni̱a̱ xaꞌa̱ꞌ tyu̱u̱n ña̱ xaaꞌ ni̱a̱ ja̱a̱nꞌ.
19 Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ na̱ka̱ꞌanꞌ u̱nꞌ xaꞌa̱ꞌ sa̱kuuꞌ ña̱ ni̱ xa̱a̱ i̱ xaꞌa̱ꞌ ñu̱u̱ yoꞌoꞌ,
te̱ tyi̱ndi̱e̱eꞌ u̱nꞌ yuꞌu̱.