Yoꞌoꞌ kaꞌán a̱ xaꞌa̱ꞌ kivi̱ꞌ ña̱ ni̱ na̱ko̱o̱ Ndiosí na̱ndiee̱ꞌ e̱ꞌ
35
I̱kanꞌ te̱ ni̱ na̱ka̱ya̱ Moisés sa̱kuuꞌ ne̱ vi̱ꞌe̱ Israel,
te̱ ni̱ kaꞌa̱n ra̱ xiinꞌ ni̱a̱ ndii:
―Ña̱ yo̱ꞌo̱ꞌ nduuꞌ tu̱ꞌu̱n nde̱iꞌ ña̱ ni̱ kaꞌa̱n tyuunꞌ Yahvé xiinꞌ i̱ sa̱xinu̱ e̱ꞌ.
2 Iñu̱ taꞌan kivi̱ꞌ sa̱tyuunꞌ ndo̱ꞌ,
ndisu̱ kivi̱ꞌ ña̱ uxa̱ ndii,
i̱i̱n kivi̱ꞌ ña̱ na̱ndiee̱ꞌ sa̱kuuꞌ ndo̱ꞌ ku̱ndu̱u̱ a̱,
i̱i̱n kivi̱ꞌ su̱ꞌu̱n ndi̱ti̱a̱ Yahvé ku̱ndu̱u̱ a̱ nuu̱ꞌ ndo̱ꞌ.
Yo̱o̱ ka̱ sa̱a̱ ndiaa ka̱ tyu̱u̱n kivi̱ꞌ ja̱a̱nꞌ ndii,
kuní a̱ ka̱ꞌni̱ꞌ xa̱tyiꞌ ña̱ꞌaꞌ ndo̱ꞌ.
3 Kivi̱ꞌ ña̱ nandiee̱ꞌ ndo̱ꞌ ja̱a̱nꞌ ndii,
ni̱ nde̱e̱ ñuꞌu̱ nä̱ꞌmi̱ ndo̱ꞌ miiꞌ ka̱ ndieeꞌ ndo̱ꞌ,
ni̱ katyi̱ a̱ ―ni̱ katyi̱ ra̱.
Yoꞌoꞌ kaꞌán a̱ xaꞌa̱ꞌ tu̱mani̱ꞌ ña̱ kuní a̱ na̱soko̱ꞌ ne̱ yivi̱ꞌ ti̱xi̱n yu̱kunꞌ toto̱
4 Sa̱kanꞌ te̱ ni̱ kaꞌa̱n Moisés xiinꞌ sa̱kuuꞌ ne̱ vi̱ꞌe̱ Israel ndii:
―Ña̱ yo̱ꞌo̱ꞌ nduuꞌ ña̱ ni̱ kaꞌa̱n tyuunꞌ Yahvé xiinꞌ e̱ꞌ sa̱a̱ e̱ꞌ.
5 Ka̱ya̱ ndo̱ꞌ i̱i̱n ña̱ na̱soko̱ꞌ ndo̱ꞌ nuu̱ꞌ Yahvé te̱i̱n sa̱kuuꞌ ndo̱ꞌ.
Yo̱o̱ ka̱ kaꞌán nimá ta̱xi̱ tu̱mani̱ꞌ ja̱a̱nꞌ nuu̱ꞌ Yahvé ndii,
ku̱vi̱ ki̱xi̱n ndi̱a̱ka̱ ndo̱ꞌ ña̱ nduuꞌ oro xiinꞌ plata xiinꞌ bronce,
6 xiinꞌ toto̱ ndi̱ꞌeꞌ,
xiinꞌ toto̱ ndu̱kunꞌ,
xiinꞌ toto̱ kuaꞌa,
toto̱ lino va̱ꞌa̱ va̱,
xiinꞌ i̱xiꞌ xata̱ꞌ ti̱xuꞌu̱ꞌ,
7 xiinꞌ i̱i̱nꞌ mbe̱e̱ tyiee̱,
ña̱ ni̱ na̱keꞌi̱ kuaꞌa,
xiinꞌ i̱i̱nꞌ ti̱xiꞌu̱ꞌ,
ña̱ va̱ꞌa̱ va̱,
xiinꞌ i̱tunꞌ acacia,
8 xiinꞌ xa̱ꞌa̱n oliva,
ña̱ ku̱ꞌu̱n ti̱xi̱n ka̱a̱ tuún,
xiinꞌ xa̱ꞌa̱n xavixínꞌ ña̱ nasaká xiinꞌ xa̱ꞌa̱n ña̱ tiinꞌ sutu̱ te̱ sañuꞌuꞌ ra̱,
te̱ su̱vi̱ tu̱ a̱ nduuꞌ ña̱ nasaká xiinꞌ su̱xa̱ tyu̱ꞌma xavixínꞌ.
9 Ku̱vi̱ tu̱ ki̱xi̱n ndi̱a̱ka̱ ni̱a̱ yuu̱ꞌ nda̱tu̱nꞌ ña̱ naniꞌ ónice,
xiinꞌ yuu̱ꞌ nda̱tu̱nꞌ ña̱ tyindondia te̱ yivi̱ꞌ soko̱ soo̱ꞌ ti̱koo̱ꞌ ña̱ niꞌnuꞌ sutu̱ kaꞌnuꞌ,
xiinꞌ nuu̱ꞌ toto̱ kukunꞌ ña̱ ndianduꞌu̱ꞌ ti̱a̱ꞌni̱ sutu̱ꞌ.
Yoꞌoꞌ kaꞌán a̱ xaꞌa̱ꞌ tyu̱u̱n ña̱ ni̱ xa̱a̱ sutu̱ ti̱xi̱n yu̱kunꞌ toto̱
10 ’Sa̱kuuꞌ ne̱ tyu̱u̱n va̱ ka̱sa̱ꞌa̱ nda̱tyuunꞌ ña̱ kuní ti̱xi̱n yu̱kunꞌ ndii,
kuní a̱ ki̱xi̱n ni̱a̱ te̱ ka̱sa̱ꞌa̱ ni̱a̱ sa̱kuuꞌ nda̱tyuunꞌ ña̱ ni̱ kaꞌa̱n Yahvé ku̱a̱ꞌa̱.
11 Naa kuuꞌ yu̱kunꞌ toto̱,
xiinꞌ toto̱ ndiká ña̱ kanu xata̱ꞌ a̱,
xiinꞌ i̱i̱nꞌ ki̱tiꞌ ña̱ kanuꞌ xata̱ꞌ a̱,
xiinꞌ toto̱ su̱ꞌu̱n ña̱ ndisaꞌví a̱,
xiinꞌ ka̱a̱ ki̱ꞌiꞌ a̱,
xiinꞌ i̱tunꞌ,
tunꞌ itaꞌ xi̱i̱nꞌ vitu̱ꞌ yiꞌeꞌ,
xiinꞌ vitu̱ꞌ kukunꞌ,
xiinꞌ tunꞌ taꞌnuꞌ ndi̱xi̱n,
xiinꞌ ndu̱yu̱ a̱,
xiinꞌ miiꞌ itaꞌ xaꞌa̱ꞌ ndu̱yu̱ ja̱a̱nꞌ,
12 xiinꞌ xatu̱nꞌ miiꞌ naá kuento ña̱ ni̱ ndoo̱ Ndiosí xiinꞌ e̱ꞌ,
xiinꞌ ka̱roti,
tunꞌ kiꞌiꞌ xatu̱nꞌ ja̱a̱nꞌ,
xiinꞌ tunꞌ ndasi yu̱ꞌuꞌ xatu̱nꞌ ja̱a̱nꞌ,
miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ,
xiinꞌ toto̱ ndiká ña̱ taxkoꞌ ti̱xi̱n yu̱kunꞌ toto̱ ja̱a̱nꞌ,
ña̱ ndasi miiꞌ iinꞌ xatu̱nꞌ ja̱a̱nꞌ,
13 xiinꞌ mesa,
xiinꞌ ka̱roti,
tunꞌ kiꞌiꞌ nu̱ꞌ,
xiinꞌ sa̱kuuꞌ nda̱tyuunꞌ ña̱ yoo nuu̱ꞌ nu̱ꞌ,
xiinꞌ xita̱ꞌ va̱ꞌa̱ ña̱ nduuꞌ ndi̱ti̱a̱ Yahvé,
14 xiinꞌ kandelabro ña̱ tuún ti̱xi̱n yu̱kunꞌ,
xiinꞌ sa̱kuuꞌ nda̱tyuunꞌ ña̱ nitaꞌanꞌ xiinꞌ a̱,
xiinꞌ ka̱a̱ tuún,
xiinꞌ xa̱ꞌa̱n oliva ña̱ ku̱naa̱ ti̱xi̱n a̱,
15 xiinꞌ altar miiꞌ xixí su̱xa̱ tyu̱ꞌma,
xiinꞌ ka̱roti tunꞌ kiꞌiꞌ xi̱i̱nꞌ a̱ te̱ ko̱ni̱ꞌi̱ te̱ yivi̱ꞌ a̱,
xiinꞌ xa̱ꞌa̱n ña̱ tiinꞌ sutu̱ te̱ sañuꞌuꞌ ra̱,
xiinꞌ su̱xa̱ tyu̱ꞌma xavixínꞌ,
xiinꞌ toto̱ ndiká ña̱ ndasi yiꞌeꞌ yu̱kunꞌ toto̱ ja̱a̱nꞌ,
16 xiinꞌ altar miiꞌ xixí ki̱tiꞌ,
xiinꞌ ka̱a̱ bronce ña̱ ndasi i̱ꞌnu̱ a̱,
xiinꞌ ka̱roti tunꞌ kiꞌiꞌ xi̱i̱nꞌ a̱ te̱ ku̱vi̱ niꞌiꞌ te̱ yivi̱ꞌ a̱,
xiinꞌ sa̱kuuꞌ nda̱tyuunꞌ ña̱ nitaꞌanꞌ xiinꞌ a̱,
xiinꞌ pila miiꞌ naá ti̱kui natiaꞌ ne̱ yivi̱ꞌ nda̱ꞌaꞌ ni̱a̱ xiinꞌ xaꞌa̱ꞌ ni̱a̱,
xiinꞌ xaꞌa̱ꞌ a̱ miiꞌ iinꞌ a̱,
17 xiinꞌ sa̱kuuꞌ toto̱ ndiká ña̱ ndasi nuu̱ꞌ ki̱ꞌe̱,
xiinꞌ ndu̱yu̱,
tunꞌ tiín a̱,
xiinꞌ miiꞌ itaꞌ xaꞌa̱ꞌ ndu̱yu̱ ja̱a̱nꞌ,
xiinꞌ toto̱ ndiká ña̱ ndasiꞌ nuu̱ꞌ ki̱ꞌe̱ yu̱kunꞌ toto̱ ja̱a̱nꞌ,
18 xiinꞌ ti̱kundu̱,
tunꞌ xita̱ꞌ toto̱ ndiká ña̱ ndasiꞌ xata̱ꞌ yu̱kunꞌ toto̱ ja̱a̱nꞌ,
xiinꞌ ti̱kundu̱,
tunꞌ xita̱ꞌ toto̱ ña̱ taꞌnuꞌ nuu̱ꞌ ki̱ꞌe̱,
xiinꞌ yo̱ꞌoꞌ ña̱ tiín sa̱kuuꞌ toto̱ ja̱a̱nꞌ,
19 xiinꞌ sa̱kuuꞌ toto̱ ña̱ ni̱ ku̱a̱ꞌa̱ ku̱i̱ꞌnu̱ sutu̱ kii̱ꞌ sa̱tyuunꞌ ra̱ ti̱xi̱n yu̱kunꞌ,
xiinꞌ toto̱ ña̱ niꞌnuꞌ sutu̱ Aarón,
xiinꞌ toto̱ ña̱ ku̱i̱ꞌnu̱ siꞌe̱ ra̱ kii̱ꞌ sa̱a̱ ra̱ tyu̱u̱n sutu̱ nuu̱ꞌ Ndiosí ti̱xi̱n yu̱kunꞌ,
ni̱ katyi̱ a̱ xiinꞌ i̱ ―ni̱ katyi̱ Moisés.
Yoꞌoꞌ kaꞌán a̱ xaꞌa̱ꞌ ña̱ taxiꞌ ne̱ vi̱ꞌe̱ Israel tu̱mani̱ꞌ sa̱a̱ ka̱ ni̱ ku̱vi̱ ta̱xi̱ mi̱iꞌ ni̱a̱
20 Sa̱kanꞌ te̱ ni̱ ki̱e̱e̱ sa̱kuuꞌ ne̱ vi̱ꞌe̱ Israel nuu̱ꞌ Moisés ja̱a̱nꞌ kuaꞌa̱n nuꞌu̱ꞌ ni̱a̱.
21 Te̱ sa̱kuuꞌ ne̱ ni̱ kaꞌa̱n nimá ta̱xi̱ ni̱a̱ tu̱mani̱ꞌ ja̱a̱nꞌ ndii,
ni̱ xaꞌa̱n ndi̱a̱ka̱ ni̱a̱ a̱ nuu̱ꞌ Yahvé xiinꞌ i̱i̱n ka̱niiꞌ nimá ni̱a̱,
te̱ ku̱a̱ꞌa̱ yu̱kunꞌ miiꞌ na̱kaya̱ ni̱a̱ xiinꞌ Ndiosí,
xiinꞌ sa̱kuuꞌ ña̱ kuní ti̱xi̱n yu̱kunꞌ ja̱a̱nꞌ,
xiinꞌ yuꞌva̱ te̱ ku̱a̱ꞌa̱ toto̱ su̱ꞌu̱n.
22 Sa̱kanꞌ te̱ ni̱ ki̱xi̱n tiaa̱ xiinꞌ ña̱ꞌaꞌ niꞌiꞌ ni̱a̱ tu̱mani̱ꞌ oro,
ña̱ na̱soko̱ꞌ ni̱a̱ nuu̱ꞌ Yahvé sa̱a̱ ka̱ ni̱ ku̱miꞌ ni̱a̱ nimá ni̱a̱,
naa kuuꞌ ka̱rena,
xiinꞌ siki̱ so̱ꞌo̱,
xiinꞌ ka̱xun nda̱ꞌaꞌ,
xiinꞌ ka̱rena ña̱ ñuꞌuꞌ nda̱ꞌaꞌ ni̱a̱,
xiinꞌ sa̱kuuꞌ nuu̱ꞌ ka̱a̱ ña̱ ni̱ ku̱a̱ꞌa̱ xiinꞌ oro.
Te̱ sa̱kuuꞌ ni̱a̱ ni̱ ta̱xi̱ tu̱mani̱ꞌ ja̱a̱nꞌ nuu̱ꞌ Yahvé.
23 Te̱ sa̱kuuꞌ ne̱ ni̱ ku̱miꞌ yuꞌva̱ ndi̱ꞌeꞌ,
uun yuꞌva̱ ndu̱kunꞌ,
uun yuꞌva̱ kuaꞌa,
uun yuꞌva̱ lino va̱ꞌa̱ xa̱va̱ꞌa̱,
uun i̱xiꞌ ti̱xuꞌu̱ꞌ tiata̱nꞌ,
uun i̱i̱nꞌ mbe̱e̱ tyiee̱ ña̱ ni̱ na̱keꞌi̱ xiinꞌ tiaku̱ kuaꞌa,
uun i̱i̱n xata̱ꞌ ti̱xuꞌu̱ꞌ ña̱ va̱ꞌa̱ xa̱va̱ꞌa̱ ndii,
ni̱ ki̱xi̱n ndi̱a̱ka̱ ni̱a̱ nuu̱ꞌ Ndiosí.
24 Te̱ sa̱kuuꞌ ne̱ ni̱ kuni̱ na̱soko̱ꞌ plata,
uun bronce ndii,
ni̱ ki̱xi̱n ndi̱a̱ka̱ ni̱a̱ nuu̱ꞌ Yahvé,
te̱ sa̱kanꞌ tu̱ ne̱ ni̱ ku̱miꞌ i̱tunꞌ acacia ndii,
ni̱ ki̱xi̱n ndi̱a̱ka̱ ni̱a̱ nu̱ꞌ nuu̱ꞌ Yahvé,
te̱ xiinꞌ ña̱ ja̱a̱nꞌ ni̱ tyi̱ndi̱e̱eꞌ ni̱a̱ te̱ ku̱a̱ꞌa̱ sa̱kuuꞌ ña̱ kuní te̱ xinu̱ yu̱kunꞌ ja̱a̱nꞌ.
25 Te̱ sa̱kanꞌ tu̱ sa̱kuuꞌ ña̱ꞌaꞌ ne̱ tyu̱u̱n va̱ nda̱ꞌaꞌ ku̱nu̱ ndii,
ni̱ ki̱xi̱n ndi̱a̱ka̱ ni̱a̱ toto̱ ndi̱ꞌeꞌ ña̱ ni̱ ku̱nu̱ ni̱a̱,
xiinꞌ toto̱ ndu̱kunꞌ,
xiinꞌ toto̱ kuaꞌa,
xiinꞌ toto̱ lino va̱ꞌa̱ va̱.
26 Te̱ sa̱kuuꞌ ña̱ꞌaꞌ ne̱ tyu̱u̱n va̱ sa̱tyuunꞌ xiinꞌ i̱xiꞌ xata̱ꞌ ti̱xuꞌu̱ꞌ,
te̱ ni̱ kaꞌa̱n nimá ni̱a̱ ta̱xi̱ ni̱a̱ yuꞌva̱ ndii,
ni̱ sa̱kuunꞌ ni̱a̱ yuꞌva̱ xiinꞌ i̱xiꞌ ti̱xuꞌu̱ꞌ,
te̱ ni̱ ta̱xi̱ ni̱a̱ a̱.
27 Sa̱kuuꞌ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ Israel ni̱ xaꞌa̱n ndi̱a̱ka̱ yuu̱ꞌ nda̱tu̱nꞌ ña̱ naniꞌ ónice,
xiinꞌ kiꞌinꞌ i̱nga̱ nuu̱ꞌ yuu̱ꞌ nda̱tu̱nꞌ te̱ tyi̱ndo̱ndi̱a̱ te̱ yivi̱ꞌ a̱ soko̱ soo̱ꞌ ti̱koo̱ꞌ ña̱ niꞌnuꞌ sutu̱,
xiinꞌ nuu̱ꞌ toto̱ kukunꞌ ña̱ ndianduꞌu̱ꞌ ti̱a̱ꞌni̱ ra̱.
28 Te̱ ni̱ ki̱xi̱n ndi̱a̱ka̱ tu̱ ra̱ xa̱ꞌa̱n xavixínꞌ,
xiinꞌ xa̱ꞌa̱n oliva ña̱ kieé ti̱xi̱n ka̱a̱ tuún,
xiinꞌ xa̱ꞌa̱n ña̱ tiinꞌ sutu̱ kii̱ꞌ sañuꞌuꞌ ra̱,
xiinꞌ su̱xa̱ tyu̱ꞌma xavixínꞌ va̱.
29 Te̱ sa̱kuuꞌ ne̱ vi̱ꞌe̱ Israel tiaa̱ ni̱ xiinꞌ ña̱ꞌaꞌ ni̱,
ne̱ ni̱ kuni̱ tyi̱ndi̱e̱eꞌ sa̱a̱ ni̱ ku̱miꞌ mi̱iꞌ ni̱a̱ nimá ni̱a̱ ndii,
ni̱ ki̱xi̱n ndi̱a̱ka̱ ni̱a̱ tu̱mani̱ꞌ ja̱a̱nꞌ nuu̱ꞌ Yahvé,
te̱ ku̱a̱ꞌa̱ sa̱kuuꞌ ña̱ ni̱ kaꞌa̱n tyuunꞌ Yahvé xiinꞌ Moisés.
Yoꞌoꞌ kaꞌán a̱ xaꞌa̱ꞌ ña̱ ni̱ ka̱na̱ Ndiosí Bezaleel xiinꞌ Aholiab
Ex. 31.1-11
30 Sa̱kanꞌ te̱ ni̱ kaꞌa̱n Moisés xiinꞌ sa̱kuuꞌ ne̱ vi̱ꞌe̱ Israel ndii:
―Ko̱to̱ ndo̱ꞌ,
Yahvé ndii,
ni̱ ka̱na̱ a̱ te̱ nduuꞌ Bezaleel,
siꞌe̱ Uri,
te̱ siꞌe̱ Hur nduuꞌ Uri ja̱a̱nꞌ.
Te̱ i̱tyiꞌ ne̱ vi̱ꞌe̱ Judá nduuꞌ te̱ ja̱a̱nꞌ.
31 Te̱ ni̱ sa̱kutuꞌ ña̱ꞌaꞌ Ndiosí xiinꞌ Espíritu mi̱iꞌ a̱,
xiinꞌ ña̱ xini tuní,
xiinꞌ ña̱ ndityi,
xiinꞌ ña̱ tyu̱u̱n va̱ ra̱ te̱ ka̱sa̱ꞌa̱ ra̱ ndiaa ka̱ nuu̱ꞌ ña̱ꞌa̱.
32 Te̱ tyu̱u̱n va̱ tu̱ ra̱ sa̱a̱ ra̱ tyuunꞌ nda̱tu̱nꞌ xiinꞌ ka̱a̱ oro,
xiinꞌ plata,
xiinꞌ bronce,
33 te̱ tyu̱u̱n va̱ tu̱ ra̱ ya̱kun ra̱ yuu̱ꞌ nda̱tu̱nꞌ te̱ tyi̱ndo̱ndi̱a̱ ra̱ a̱ nuu̱ꞌ ka̱a̱ yaxinꞌ ña̱ ndieeꞌ soko̱ soo̱ꞌ ti̱koo̱ꞌ ña̱ niꞌnuꞌ sutu̱,
te̱ tyu̱u̱n tu̱ ra̱ tu̱xiꞌ ra̱ i̱tunꞌ,
te̱ ka̱sa̱ꞌa̱ ra̱ sa̱kuuꞌ nuu̱ꞌ ña̱ nda̱tu̱nꞌ xa̱va̱ꞌa̱,
xiinꞌ ña̱ sanianiaꞌ ra̱ xata̱ꞌ i̱tunꞌ ja̱a̱nꞌ.
34 Ni̱ ta̱xi̱ tu̱ Ndiosí ña̱ xini tuní te̱ nduuꞌ Bezaleel xiinꞌ Aholiab,
siꞌe̱ Ahisamac,
te̱ sa̱niaꞌá ra̱ te̱ yivi̱ꞌ sa̱a̱ sa̱a̱ ra̱ sa̱kuuꞌ tyu̱u̱n ja̱a̱nꞌ.
Te̱ i̱tyiꞌ Dan nduuꞌ Ahisamac ja̱a̱nꞌ.
35 Te̱ ni̱ ta̱xi̱ tu̱ Ndiosí ña̱ xini tuní nimá uvi̱ sa̱aꞌ te̱ ja̱a̱nꞌ te̱ sa̱a̱ ra̱ sa̱kuuꞌ nuu̱ꞌ tyu̱u̱n ña̱ nda̱tu̱nꞌ xa̱va̱ꞌa̱ xiinꞌ ña̱ ka̱sa̱ꞌa̱ ra̱ ña̱ nianiaꞌ xata̱ꞌ i̱tunꞌ.
Te̱ ku̱vi̱ tu̱ na̱ta̱ꞌviꞌ xíniꞌ ra̱ ña̱ na̱ku̱ ra̱ xiinꞌ toto̱ ndi̱ꞌeꞌ,
xiinꞌ toto̱ ndu̱kunꞌ,
xiinꞌ toto̱ kuaꞌa,
xiinꞌ yuꞌva̱ lino va̱ꞌa̱ va̱,
te̱ ku̱vi̱ tu̱ kunuꞌ ra̱ ndiaa ka̱ nuu̱ꞌ tyu̱u̱n,
ña̱ na̱ta̱ꞌviꞌ xíniꞌ mi̱iꞌ ra̱.