Yoꞌoꞌ kaꞌán a̱ xaꞌa̱ꞌ yuu̱ꞌ xa̱aꞌ miiꞌ ni̱ ke̱ꞌi̱ Ndiosí tu̱ꞌu̱n nde̱iꞌ a̱
34
Te̱ ni̱ kaꞌa̱n Yahvé xiinꞌ Moisés ndii:
―Tu̱xiꞌ uvi̱ taꞌan vitu̱ꞌ yuu̱ꞌ,
i̱i̱n katyi ko̱o̱ a̱ xiinꞌ ña̱ ni̱ ta̱xi̱ i̱ nu̱uꞌ i̱ nda̱ꞌaꞌ u̱nꞌ,
te̱ ni̱ sa̱kuatyiꞌ u̱nꞌ u̱n,
te̱ mi̱iꞌ yuꞌu̱ ke̱ꞌi̱ xata̱ꞌ a̱ ña̱ ni̱ ke̱ꞌi̱ xata̱ꞌ yuu̱ꞌ ña̱ nu̱uꞌ.
2 Xaꞌa̱ꞌ a̱ ja̱a̱nꞌ na sa̱kooꞌ tu̱ꞌva̱ xiinꞌ miiꞌ u̱nꞌ te̱ ka̱a̱ u̱nꞌ ni̱a̱ꞌa̱ tiaa̱n xíniꞌ i̱kuꞌ Sinaí,
te̱ xíniꞌ i̱kuꞌ ja̱a̱nꞌ ndiatuꞌ u̱nꞌ xaa̱ i̱.
3 Nde̱e̱ i̱i̱n ne̱ yivi̱ꞌ kü̱vi̱ ka̱a̱ xiinꞌ u̱nꞌ i̱kanꞌ,
ni̱ nde̱e̱ kü̱vi̱ tu̱ ko̱o̱ nde̱e̱ i̱i̱n ne̱ yivi̱ꞌ ka̱niiꞌ sa̱a̱ xinunduu xaꞌa̱ꞌ i̱kuꞌ ja̱a̱nꞌ,
ni̱ nde̱e̱ mbe̱e̱,
ni̱ nde̱e̱ si̱ndiki̱ꞌ kü̱vi̱ ku̱ꞌu̱n ka̱xi̱ꞌ kuꞌu̱ ya̱ti̱n miiꞌ iinꞌ i̱kuꞌ yoꞌoꞌ ―ni̱ katyi̱ a̱.
4 Sa̱kanꞌ te̱ ni̱ ya̱kun Moisés nuu̱ꞌ uvi̱ taꞌan yuu̱ꞌ,
te̱ ni̱ xa̱ꞌa̱ ra̱ a̱ nde̱e̱ naa ni̱ ii̱n ña̱ nu̱uꞌ.
Te̱ ni̱a̱ꞌa̱ va̱ tu̱ku̱ kivi̱ꞌ ni̱ ndo̱koo̱ ra̱,
te̱ ni̱ na̱ꞌi̱ ra̱ uvi̱ sa̱aꞌ vitu̱ꞌ yuu̱ꞌ ja̱a̱nꞌ,
te̱ ni̱ ka̱a̱ ra̱ xíniꞌ i̱kuꞌ Sinaí sa̱a̱ niiꞌ ni̱ kaꞌa̱n tyuunꞌ Yahvé xiinꞌ ra̱.
5 Sa̱kanꞌ te̱ ni̱ nu̱u̱ Yahvé xíniꞌ i̱kuꞌ ja̱a̱nꞌ nuu̱ꞌ i̱i̱n viko̱ꞌ,
te̱ ni̱ ndoo̱ a̱ i̱kanꞌ xiinꞌ ra̱,
te̱ ni̱ kaꞌa̱n a̱ kivi̱ꞌ a̱,
Yahvé,
xiinꞌ ra̱.
6 Sa̱kanꞌ ña̱ ni̱ xkaꞌndi̱a̱ Yahvé nuu̱ꞌ Moisés,
te̱ ni̱ kaꞌa̱n tiꞌeꞌ a̱ xiinꞌ ra̱ ndii:
―¡Yahvé,
Yahvé,
Ndiosí ña̱ sa̱kuuꞌ a̱ ku̱vi̱ nduuꞌ i̱!
Te̱ nduuꞌ tu̱ i̱ ña̱ kuvita i̱ni̱,
te̱ ña̱ kaꞌnuꞌ va̱ i̱ni̱ nduuꞌ i̱,
te̱ nduuꞌ tu̱ i̱ ña̱ kuiee va̱ nasaáꞌ,
te̱ nduuꞌ tu̱ i̱ ña̱ kundani̱ va̱,
te̱ nduuꞌ tu̱ i̱ ña̱ xatyuunꞌ nda̱ku.
7 Te̱ kundani̱ te̱ kundani̱ tu̱ i̱ ne̱ yivi̱ꞌ tee̱ꞌ ndee xkaꞌndi̱a̱ kuaꞌa̱ꞌ mií kuiya̱,
te̱ nduuꞌ tu̱ i̱ ña̱ yoo kaꞌnuꞌ i̱ni̱ xaꞌa̱ꞌ ña̱ ni̱a̱ꞌa,
xiinꞌ xaꞌa̱ꞌ ña̱ xateiꞌ ne̱ yivi̱ꞌ,
xiinꞌ xaꞌa̱ꞌ ku̱a̱tyi̱ ne̱ yivi̱ꞌ.
Ndisu̱ ne̱ xaaꞌ ku̱a̱tyi̱ ndii,
sa̱ndoꞌoꞌ ña̱ꞌaꞌ i̱,
te̱ sa̱ndoꞌoꞌ tu̱ i̱ siꞌe̱ ni̱a̱ xaꞌa̱ꞌ ku̱a̱tyi̱ ja̱a̱nꞌ,
te̱ sa̱ndoꞌoꞌ tu̱ i̱ si̱a̱niꞌ ni̱a̱ xiinꞌ si̱a̱niꞌ xikuaꞌ ni̱a̱ ―ni̱ katyi̱ a̱.
8 Te̱ numi̱ꞌ va̱ ni̱ na̱ka̱nduꞌu̱ꞌ ndi̱e̱e̱ Moisés nde̱e̱ ni̱ tondi̱a̱ nuu̱ꞌ ra̱ nde̱e̱ nuu̱ꞌ ñu̱ꞌuꞌ,
te̱ ni̱ xa̱kaꞌnuꞌ ra̱ Ndiosí.
9 Te̱ ni̱ kaꞌa̱n ra̱ ndii:
―Tákuiꞌe,
naaꞌ va̱ꞌa̱ xna̱ꞌa̱ kuni u̱nꞌ xini u̱nꞌ yuꞌu̱ ndii,
sa̱a̱ u̱nꞌ ña̱ va̱ꞌa̱ te̱ kuꞌu̱n u̱nꞌ xiinꞌ ndu̱.
Sa̱kuuꞌ ne̱ yivi̱ꞌ kaa̱ꞌ ndii,
ne̱ xi̱i̱ va̱ nimá nduuꞌ ni̱a̱,
ndisu̱ sa̱a̱ u̱nꞌ ña̱ va̱ꞌa̱ te̱ ko̱o̱ kaꞌnuꞌ i̱ni̱ u̱nꞌ xaꞌa̱ꞌ ku̱a̱tyi̱ ndu̱ xiinꞌ xaꞌa̱ꞌ ña̱ ni̱a̱ꞌa ña̱ xaaꞌ ndu̱.
Te̱ na̱ti̱i̱n tu̱ku̱u̱ u̱nꞌ ndu̱ ku̱ndu̱u̱ kuenta u̱nꞌ ―ni̱ katyi̱ ra̱.
10 Te̱ ni̱ kaꞌa̱n Yahvé xiinꞌ Moisés ndii:
―Tyu̱u̱n xaꞌaꞌ va̱ ndo̱ꞌ ña̱ kaꞌa̱n i̱,
vi̱ti̱n ndoó i̱ i̱i̱n kuento nuu̱ꞌ sa̱kuuꞌ ndo̱ꞌ.
Sa̱a̱ i̱ tyu̱u̱n kaꞌnuꞌ xa̱va̱ꞌa̱ nuu̱ꞌ sa̱kuuꞌ ndo̱ꞌ ña̱ köo̱ꞌ kivi̱ꞌ ni̱ xi̱ni̱ nde̱e̱ i̱i̱n ne̱ yivi̱ꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
Te̱ ku̱ni̱ tu̱ sa̱kuuꞌ ne̱ yivi̱ꞌ,
ne̱ ndieeꞌ ñu̱u̱ ña̱ ñuꞌuꞌ ya̱ti̱n miiꞌ ndieeꞌ ndo̱ꞌ tyu̱u̱n kaꞌnuꞌ kooꞌ tyukuuꞌ ña̱ xaaꞌ yuꞌu̱,
Yahvé.
Sa̱kanꞌ ña̱ sa̱a̱ i̱ i̱i̱n tyu̱u̱n kaꞌnuꞌ xa̱va̱ꞌa̱ xaꞌa̱ꞌ ndo̱ꞌ.
Yoꞌoꞌ kaꞌán Ndiosí xiinꞌ ne̱ Israel ña̱ sä̱kaꞌnuꞌ ni̱a̱ ndiosí ña̱ xakaꞌnuꞌ ne̱ ndieeꞌ nuu̱ꞌ ñu̱ꞌuꞌ Canaán
11 ’Te̱ ndoꞌó ndii,
kuní a̱ sa̱xinu̱ ndo̱ꞌ nde̱iꞌ ña̱ taxiꞌ i̱ nda̱ꞌaꞌ ndo̱ꞌ vi̱ti̱n,
te̱ ta̱va̱ꞌ i̱ sa̱kuuꞌ ne̱ vi̱ꞌe̱ amorreo,
xiinꞌ ne̱ vi̱ꞌe̱ cananeo,
xiinꞌ ne̱ vi̱ꞌe̱ heteo,
xiinꞌ ne̱ vi̱ꞌe̱ ferezeo,
xiinꞌ ne̱ vi̱ꞌe̱ heveo,
xiinꞌ ne̱ vi̱ꞌe̱ jebuseo nuu̱ꞌ ndo̱ꞌ miiꞌ xkaꞌndi̱a̱ ndo̱ꞌ kuꞌu̱n ndo̱ꞌ.
12 Ndisu̱ ndoꞌó ndii,
ku̱i̱raro va̱ ko̱o̱ ndo̱ꞌ te̱ nä̱ka̱ta̱ ndo̱ꞌ kuento ndo̱ꞌ xiinꞌ ne̱ ndieeꞌ nuu̱ꞌ ñu̱ꞌuꞌ miiꞌ ko̱ꞌni̱ ndo̱ꞌ ku̱ndi̱e̱e̱ ndo̱ꞌ.
Naaꞌ na̱ka̱ta̱ ndo̱ꞌ kuento ndo̱ꞌ xiinꞌ ne̱ ndieeꞌ i̱kanꞌ ndii,
i̱yo̱ ko̱ꞌni̱ ni̱a̱ ndoꞌó nuu̱ꞌ tu̱n kuiꞌe̱.
13 Te̱ nuu̱ꞌ a̱ ña̱ sa̱a̱ ndo̱ꞌ ña̱ ja̱a̱nꞌ ndii,
ta̱ni̱ ndo̱ꞌ sa̱kuuꞌ altar miiꞌ xakaꞌnuꞌ ni̱a̱ ndiosí ni̱a̱,
te̱ ta̱ꞌviꞌ tu̱ ndo̱ꞌ sa̱kuuꞌ ndiosí naꞌnuꞌ ña̱ xakaꞌnuꞌ ni̱a̱,
te̱ sa̱kuatyiꞌ tu̱ ndo̱ꞌ i̱tunꞌ miiꞌ sanianiaꞌ ni̱a̱ ña̱ꞌaꞌ,
ñaꞌ xakaꞌnuꞌ ni̱a̱ ñaꞌ naniꞌ Asera.
14 Sä̱kaꞌnuꞌ ndo̱ꞌ nde̱e̱ i̱i̱n nuu̱ꞌ i̱nga̱ ndiosí,
sa̱kanꞌ ña̱ yuꞌu̱,
Yahvé ndii,
kuiñu va̱ i̱ xaꞌa̱ꞌ ne̱ nduuꞌ kuenta i̱,
sa̱kanꞌ na kivi̱ꞌ i̱ ndii,
Ndiosí ña̱ kuiñu nduuꞌ a̱.
15 ’Xaꞌa̱ꞌ a̱ ja̱a̱nꞌ na nä̱ka̱ta̱ ndo̱ꞌ kuento ndo̱ꞌ xiinꞌ nde̱e̱ i̱i̱n ne̱ ndieeꞌ nuu̱ꞌ ñu̱ꞌuꞌ ja̱a̱nꞌ,
sa̱kanꞌ ña̱ naaꞌ sa̱a̱ ndo̱ꞌ ña̱ ja̱a̱nꞌ ndii,
i̱yo̱ te̱ na̱ko̱o̱ ndo̱ꞌ yuꞌu̱ xata̱ꞌ ndo̱ꞌ,
te̱ sa̱kaꞌnuꞌ ndo̱ꞌ ndiosí ña̱ xakaꞌnuꞌ ne̱ ja̱a̱nꞌ,
te̱ na̱soko̱ꞌ ndo̱ꞌ ki̱tiꞌ nuu̱ꞌ ndiosí ni̱a̱,
te̱ kaꞌa̱n ni̱a̱ xiinꞌ ndo̱ꞌ ña̱ ndu̱u̱ i̱i̱n ndo̱ꞌ xiinꞌ ni̱a̱ te̱ ku̱xi̱ tu̱ ndo̱ꞌ ña̱ nasoko̱ꞌ ni̱a̱ nuu̱ꞌ ndiosí ni̱a̱ ja̱a̱nꞌ,
16 te̱ kaꞌa̱n ni̱a̱ xiinꞌ ndo̱ꞌ ña̱ tu̱ndaꞌa̱ꞌ ña̱ꞌaꞌ siꞌe̱ ni̱a̱ xiinꞌ tiaa̱ siꞌe̱ ndo̱ꞌ,
te̱ kii̱ꞌ sa̱a̱ ne̱ ja̱a̱nꞌ ku̱a̱tyi̱ ña̱ sa̱kaꞌnuꞌ ni̱a̱ ndiosí ni̱a̱ ndii,
ka̱vi̱koꞌ tu̱ ni̱a̱ tiaa̱ siꞌe̱ ndo̱ꞌ ja̱a̱nꞌ te̱ sa̱kaꞌnuꞌ ra̱ ndiosí ni̱a̱ ja̱a̱nꞌ.
17 Kä̱sa̱ꞌa̱ ndo̱ꞌ ndiosí ndo̱ꞌ xiinꞌ ka̱a̱ ña̱ xaꞌmiꞌ ndo̱ꞌ nuu̱ꞌ ñuꞌu̱.
Yoꞌoꞌ kaꞌán a̱ xaꞌa̱ꞌ vi̱koꞌ ña̱ nasukú sa̱a̱ kuiya̱
18 ’Ka̱sa̱ꞌa̱ ndo̱ꞌ vi̱koꞌ ña̱ xixiꞌ ndo̱ꞌ xita̱ꞌ va̱ꞌa̱ ña̱ köo̱ꞌ yu̱tyiꞌ levadura saká xiinꞌ.
Uxa̱ taꞌan kivi̱ꞌ kuní a̱ ku̱xi̱ ndo̱ꞌ xita̱ꞌ va̱ꞌa̱ ja̱a̱nꞌ sa̱a̱ niiꞌ ni̱ kaꞌa̱n tyuunꞌ i̱ xiinꞌ u̱nꞌ.
Te̱ yoo̱ Abib ka̱sa̱ꞌa̱ ndo̱ꞌ vi̱koꞌ ja̱a̱nꞌ,
sa̱kanꞌ ña̱ yoo̱ꞌ Abib nduuꞌ a̱ kii̱ꞌ ni̱ ki̱e̱e̱ ndo̱ꞌ nuu̱ꞌ ñu̱ꞌuꞌ Egipto.
19 Sa̱kuuꞌ tiaa̱ siꞌe̱ nu̱uꞌ ndo̱ꞌ ndii,
ndi̱ti̱a̱ yuꞌu̱ nduuꞌ ra̱,
te̱ sa̱kanꞌ tu̱ siꞌe̱ nu̱uꞌ ki̱tiꞌ sana̱ ndo̱ꞌ naaꞌ tiꞌ tyiee̱ nduuꞌ riꞌ,
naa kuuꞌ siꞌe̱ nu̱uꞌ si̱ndiki̱ꞌ,
xiinꞌ siꞌe̱ nu̱uꞌ mbe̱e̱,
xiinꞌ siꞌe̱ nu̱uꞌ ti̱xuꞌu̱ꞌ.
20 Te̱ siꞌe̱ nu̱uꞌ i̱i̱n mburra naaꞌ kuní ndo̱ꞌ ndoo̱ riꞌ nda̱ꞌaꞌ ndo̱ꞌ ku̱ndu̱u̱ sana̱ ndo̱ꞌ ndii,
kuní a̱ tya̱ꞌvi̱ ndo̱ꞌ nuu̱ꞌ i̱ xaꞌa̱ꞌ riꞌ xiinꞌ i̱i̱n mbe̱e̱ tyiee̱.
Ndisu̱ naaꞌ tyä̱ꞌvi̱ ndo̱ꞌ xaꞌa̱ꞌ riꞌ ndii,
kuní a̱ kaꞌnu̱ ndo̱ꞌ suku̱nꞌ riꞌ.
Te̱ sa̱kanꞌ tu̱ kuní a̱ tya̱ꞌvi̱ i̱ꞌi̱n ndo̱ꞌ nuu̱ꞌ i̱ xaꞌa̱ꞌ tiaa̱ siꞌe̱ nu̱uꞌ ndo̱ꞌ xiinꞌ i̱i̱n tu̱mani̱ꞌ.
Te̱ nde̱e̱ i̱i̱n ndo̱ꞌ kü̱vi̱ ki̱xi̱n nuu̱ꞌ i̱ naaꞌ köo̱ꞌ tu̱mani̱ꞌ niꞌiꞌ ndo̱ꞌ na̱soko̱ꞌ ndo̱ꞌ.
21 Iñu̱ kivi̱ꞌ kuní a̱ sa̱tyuunꞌ ndo̱ꞌ,
ndisu̱ kivi̱ꞌ ña̱ uxa̱ kuní a̱ na̱ndiee̱ꞌ ndo̱ꞌ tee̱ꞌ ndee kivi̱ꞌ ña̱ tyiꞌiꞌ ndo̱ꞌ nduuꞌ a̱,
uun kivi̱ꞌ ña̱ nakaya ndo̱ꞌ ña̱ savi̱ꞌ nduuꞌ a̱.
22 Te̱ ka̱sa̱ꞌa̱ tu̱ ndo̱ꞌ vi̱koꞌ xaꞌa̱ꞌ ña̱ savi̱ꞌ nu̱uꞌ ña̱ nda̱tu̱nꞌ ña̱ nakaya nu̱uꞌ ndo̱ꞌ,
te̱ na̱soko̱ꞌ ndo̱ꞌ a̱ nuu̱ꞌ i̱,
te̱ sa̱kanꞌ tu̱ ka̱sa̱ꞌa̱ ndo̱ꞌ vi̱koꞌ xaꞌa̱ꞌ ña̱ savi̱ꞌ ña̱ nakuixaꞌ ndiꞌiꞌ kuiya̱,
te̱ na̱soko̱ꞌ ndo̱ꞌ a̱ nuu̱ꞌ i̱.
23 Uni̱ i̱tyiꞌ i̱ꞌi̱n kuiya̱ kuní a̱ ki̱xi̱n sa̱kuuꞌ te̱ yivi̱ꞌ nuu̱ꞌ yuꞌu̱,
Yahvé,
Ndiosí,
xto̱ꞌo̱ ndo̱ꞌ,
ña̱ xakaꞌnuꞌ ne̱ vi̱ꞌe̱ Israel.
24 Mi̱iꞌ yuꞌu̱ ta̱va̱ꞌ ne̱ ndieeꞌ nuu̱ꞌ ñu̱ꞌuꞌ miiꞌ kuaꞌa̱n ndo̱ꞌ,
te̱ nda̱sa̱tyiee̱ ka̱ i̱ ñu̱ꞌuꞌ ña̱ ndoo̱ nda̱ꞌaꞌ ndo̱ꞌ,
te̱ nde̱e̱ i̱i̱n ne̱ yivi̱ꞌ ndï̱o̱o̱ꞌ i̱ni̱ na̱ꞌi̱ ñu̱ꞌuꞌ ndo̱ꞌ kii̱ꞌ ka̱a̱ ndo̱ꞌ uni̱ i̱tyiꞌ i̱ꞌi̱n kuiya̱ yu̱kunꞌ te̱ sa̱kaꞌnuꞌ ndo̱ꞌ yuꞌu̱,
Yahvé,
Ndiosí ndo̱ꞌ.
25 ’Kii̱ꞌ na̱soko̱ꞌ u̱nꞌ níiꞌ ki̱tiꞌ nuu̱ꞌ i̱ ndii,
nä̱soko̱ꞌ ingaꞌ u̱nꞌ xita̱ꞌ va̱ꞌa̱ ña̱ saká yu̱tyiꞌ levadura xiinꞌ xiinꞌ a̱.
Te̱ nä̱ko̱o̱ u̱nꞌ xaꞌa̱ꞌ i̱nga̱ kivi̱ꞌ nde̱i̱ꞌ ki̱tiꞌ,
tiꞌ ni̱ na̱soko̱ꞌ u̱nꞌ xaꞌa̱ꞌ vi̱koꞌ pascua,
ña̱ ni̱ ndoo̱ ndo̱so̱ꞌ.
26 Te̱ kii̱ꞌ na̱ka̱ya̱ u̱nꞌ ña̱ savi̱ꞌ ndii,
kuní a̱ kuꞌu̱n ndi̱a̱ka̱ u̱nꞌ ña̱ savi̱ꞌ nu̱uꞌ,
ña̱ nda̱tu̱nꞌ ka̱,
vi̱ꞌe̱ yuꞌu̱,
Yahvé Ndiosí.
Te̱ sä̱tyoꞌó ndo̱ꞌ i̱i̱n ti̱xuꞌu̱ꞌ tyiee̱ siee xiinꞌ letyin si̱ꞌiꞌ riꞌ ―ni̱ katyi̱ a̱.
Yoꞌoꞌ kaꞌán a̱ xaꞌa̱ꞌ vitu̱ꞌ yuu̱ꞌ miiꞌ yoso̱ꞌ tu̱ꞌu̱n nde̱iꞌ Ndiosí
27 Te̱ ni̱ kaꞌa̱n ka̱ Yahvé xiinꞌ Moisés ndii:
―Ke̱ꞌi̱ u̱nꞌ nde̱iꞌ yoꞌoꞌ,
sa̱kanꞌ ña̱ ña̱ kaa̱ꞌ nduuꞌ xaꞌndu̱ kuento ña̱ ni̱ ndoo̱ i̱ xiinꞌ u̱nꞌ xiinꞌ sa̱kuuꞌ ne̱ vi̱ꞌe̱ Israel,
taꞌanꞌ u̱nꞌ ―ni̱ katyi̱ a̱.
28 Te̱ ni̱ ndoo̱ Moisés xíniꞌ i̱kuꞌ xiinꞌ Yahvé niiꞌ uvi̱ xi̱ko̱ kivi̱ꞌ xiinꞌ uvi̱ xi̱ko̱ ñu̱u.
Nï̱ xi̱xi̱ ra̱,
te̱ nï̱ xi̱ꞌi̱ tu̱ ra̱ ti̱kui sa̱kuuꞌ kivi̱ꞌ ja̱a̱nꞌ.
Te̱ i̱kanꞌ ni̱ ke̱ꞌi̱ Ndiosí xata̱ꞌ vitu̱ꞌ yuu̱ꞌ kuento ña̱ ni̱ ndoo̱ a̱ xiinꞌ ne̱ vi̱ꞌe̱ Israel,
ña̱ nduuꞌ uxi̱ taꞌan tu̱ꞌu̱n nde̱iꞌ a̱.
Yoꞌoꞌ kaꞌán a̱ xaꞌa̱ꞌ ña̱ ni̱ yiꞌe̱ nda̱tu̱nꞌ va̱ nuu̱ꞌ Moisés
29 Te̱ kii̱ꞌ ni̱ na̱kaa̱ꞌ Moisés xaꞌa̱ꞌ i̱kuꞌ Sinaí ja̱a̱nꞌ ndii,
niꞌiꞌ ndi̱a̱a̱ ra̱ uvi̱ sa̱aꞌ vitu̱ꞌ yuu̱ꞌ miiꞌ yoso̱ꞌ tu̱ꞌu̱n nde̱iꞌ Ndiosí,
ndisu̱ xïní ra̱ ña̱ yiꞌé vi̱ꞌ i̱i̱nꞌ nuu̱ꞌ ra̱ xaꞌa̱ꞌ ña̱ ni̱ ndatuꞌunꞌ ra̱ xiinꞌ Ndiosí.
30 Kii̱ꞌ ni̱ xi̱ni̱ Aarón xiinꞌ sa̱kuuꞌ i̱nga̱ ne̱ vi̱ꞌe̱ Israel ña̱ yiꞌé vi̱ꞌ i̱i̱nꞌ nuu̱ꞌ Moisés ndii,
ni̱ yi̱ꞌvi xa̱va̱ꞌa̱ ni̱a̱ ku̱ya̱ti̱n ni̱a̱ miiꞌ iinꞌ ra̱.
31 Ndisu̱ ni̱ ka̱na̱ Moisés Aarón xiinꞌ sa̱kuuꞌ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ni̱a̱,
te̱ ni̱ xaa̱ te̱ ja̱a̱nꞌ nuu̱ꞌ ra̱,
te̱ kaꞌa̱n ra̱ xiinꞌ ra̱.
32 Ni̱ yaꞌa̱ te̱ ni̱ ku̱ya̱ti̱n sa̱kuuꞌ ne̱ vi̱ꞌe̱ Israel ja̱a̱nꞌ nuu̱ꞌ ra̱,
te̱ ni̱ kaꞌa̱n tyuunꞌ ra̱ xiinꞌ ni̱a̱ ña̱ sa̱xinu̱ ni̱a̱ sa̱kuuꞌ ña̱ ni̱ kaꞌa̱n Yahvé xiinꞌ ra̱ xíniꞌ i̱kuꞌ Sinaí.
33 Te̱ kii̱ꞌ ndi̱ꞌi̱ ni̱ nda̱tuꞌunꞌ Moisés xiinꞌ ni̱a̱ ndii,
ni̱ ti̱saꞌvi̱ ra̱ nuu̱ꞌ ra̱ xiinꞌ i̱i̱n toto̱ ndi̱kiꞌ.
34 Ndisu̱ i̱ꞌi̱n i̱tyiꞌ kii̱ꞌ ndiꞌví Moisés ti̱xi̱n vi̱ꞌe̱ toto̱ nuu̱ꞌ Yahvé,
te̱ nda̱tuꞌunꞌ ra̱ xiinꞌ a̱ ndii,
xtáꞌniꞌ ra̱ toto̱ ndi̱kiꞌ ja̱a̱nꞌ nuu̱ꞌ ra̱,
nde̱e̱ ska̱tyiꞌ ndi̱ꞌi̱ kaꞌa̱n ra̱ xiinꞌ ne̱ vi̱ꞌe̱ Israel sa̱kuuꞌ ña̱ ni̱ kaꞌa̱n tyuunꞌ Ndiosí xiinꞌ ra̱ ti̱xi̱n vi̱ꞌe̱ ja̱a̱nꞌ,
kaꞌa̱n ra̱ xiinꞌ ni̱a̱.
35 Te̱ xaꞌa̱ꞌ a̱ ña̱ xini ne̱ vi̱ꞌe̱ Israel ña̱ yiꞌé naa yiꞌé i̱i̱nꞌ nuu̱ꞌ ra̱ ndii,
tu̱ku̱ sa̱kanꞌ ni̱ ti̱saꞌvi̱ ra̱ nuu̱ꞌ ra̱ xiinꞌ toto̱ ndi̱kiꞌ ja̱a̱nꞌ nde̱e̱ ska̱tyiꞌ ndiꞌvi̱ tu̱ku̱u̱ ra̱ te̱ ndatuꞌunꞌ ra̱ xiinꞌ Yahvé Ndiosí.